امال وملاك (مكتملة) (سلسلة كوارث وخبائث المجتمع)

البارت 20

20

جانت مبدله ولابسه تراكسود اسود وشعرها مسويته كعكه ومنزله خصل منه

-يمه امال انتي بعدج تعبانه

-لا ماما مابيه شي اخذي ملاك وروحي انتي ولايضل بالج على البيت لو على بابا انا هنا

-الله يبارك بيج يمه يلا ملاك كومي خل نبدل

كمت انا وماما طلعت كدامي بعد ماخلت السله مال الزلاطه بالثلاجه

وامال هم اجت تطلع بس صحت وراها اني

-شكرا الج

التفتلي وابتسمت

-ولو سلميلي على شمس وياج

-يوصل

بعدها طلعت من المطبخ ع السريع ورحت بدلت لبست عبايتي الاسلاميه الي ماعندي غيرها وحجاب وطلعت

لكيت ماما طالعه من الغرفه

-يمه انتي ابقي هنا انا راح أجر تاكسي واجيج

-اوك

بقيت واكفه منتظره وماعرف ليش الخوف والتوتر كاتلني خاف صاير شي على ام شمس لو على شمس اتمنى لو هسه اكو طياره وتاخذني تذبني بالمستشفى اووف

نوره

اني نوره طالبة سادس اعدادي طبعا هاي ثاني سنه اليه لان أريد اطلع معدل صيدله على العلم ماجان يهمني هالشي وجنت رايده من الثالث متوسط واروح معهد بس تغيرت قرارتي كلها وراح تعرفون ليش بعدين

بابا شهيد من جان عمري ٩ سنوات استشهد بأنفجار جنت افتهم لذالك امي خلتني عد بيت عمي وراحت تزوجت وبعد ماشفتها

ولا أريد اشوفها اصلا لان جانت نكديه وابوي دائما زعلان وبره البيت من وراها

وبيوم الي استشهد جان متعاررك وياها وطالع من البيت بس جابو النه بتابوت

بسببها هيه دائما الومها لان لو ما جانت متعاركه ومنكده عليه ماجان طلع من البيت شارد منها

على العلم عمي امجد دائما يكلي هذا قضاء وقدر وامج ما عليها بس لو اموت ماقتنع بهالشي

المهم عمي امجد متزوج متأخر كلش عمره ٣٥ واتزوج والي خذاها هم نفس عمره ٣٣ سنه وماخلفو اطفال

لذالك مرته اعتبرتني مثل بنتها وانا احبها بس ضجت منها كلش بأخر سنوات

صارت تقليديه وتحجيلي بالحلال والحرام وماتقبل على كلشي اسويه ودائما اني وياها على خلاف

اما بالنسبه لعمي امجد جان مفوض بالمديريه مال الشرطه ونشوفه باليوم مره ومن يجي كبل ينام همزين ماتلحك تحجيله شي لان كلش عصبي

المهم راح احجيلكم ليش تغيرت كل قرارتي

السبب من جنت داخله دوره تقويه بالثالث متوسط تعرفت على بنيه نفسي كلش ونفس اطباعي اسمها امينه