امال وملاك (مكتملة) (سلسلة كوارث وخبائث المجتمع)

البارت الرابع4

كومنت ولايك بدون امر حتى اكمل ❤❤

دخلت للبيت فرحانه واغني لاكتني اختي امال رفعت حاجبه بنظرة استفهام؟؟

مادرتلها بال ورحت للغرفه لعد عيني بس هيه احاجيها وماترد عليه اني هم مارد عليها وماهتملها دخلت للغرفه بدلت وسبحت وانا جاي امشط بشعري دخلت امال شفتها جاي تلم بملابسها من الغرفه كلت ابالي هاي شجاي تسوي

وشويه دخلت امي وراها ومبينه عليها متضايقه

-يمه امال انتي شجاي تسوين كضيتي عمرج انتي وي اختج بهاي الغرفه وهسه تريد تعزلين بوحدج بالمخزن

استغربت!!!! هاي صدك تحجي وانا اكوول اليوم من اجيت للبيت شفت باب المخزن مفتوح ومرتب والغراض البي معزله معقووله عود صدك امال تريد تعزل وتعوف غرفتنه الي انا وياها تشاركنه  بيها حزنه وفرحنه ولحظاتنه الحلوه سوه وشقانه

كمت وكفت وكمت اباوع لاامال اريد اشوف ردة فعلها

-اي ماما بعدين هذا مو مخزن هذا منا وغاد غرفتي الخاصه وهاي الغرفه خليها لبنتج تشبع بيها

-اماااال انتي شتحجين هاي غرفتنه من جنه صغار وابد لاانا تضايقت منج ولاانتي تضايقتي مني ليش جاي تسوين هيج لليييش

-اسألي روحج ملاك اليل كله تذبين عليه حجي ترديني اطلع من الغرفه لاتسوين روحج مسكينه كبال ماما..

فكيت حلكي بصدمه عود صدك تحجي نيمت انا ذبيت عليها حجي اصلاً البارحه هيه ماحاجتني ابد ولاانا حاجيته تتبله عليه امال معقوله ماكدرت اصدك اجيت احجي وسكتتني امي

-ليش هيج يمه تضايقين من اختج الجبيره والي هيه حتى ملابسج تغسلهن الج وقايمه بكل شغل البيت وماتخليج تمسين عود الشخاط تريدج تدرسين وتجتهدين تاليها هيج تجازيها..

كامت عيوني تصب
-ماما والله...

قاطعتني  امال

-ماما ماكو داعي تعتبين عليها اتركيها براحتها انا راح اتركلها الغرفه خل تشبع بيها

كامت امي عيونها تصب مثلي وانا اباوعلها برجاء احاجيها بعيوني انو انا مضلومه وامال جاي تتبلى عليه خذت غراضها وطلعت وامي وراها كعدت على الجربايه وكمت ابجي بحركه

ليش هيج تسوين بيه امال انا اختج الصغيره وانتي الربيتيني وكنتي قدوتي هيج تتبلين عليه وتحاربيني ليش هيج لييش

انقهرت حييل وحتى قرايه ماقريت ولاكليت لفيت راسي ونمت كعدت العصر الساعه ب3 واتذكرت انا مامصليه صلاة الضهر ياربي كمت توضيت وصليت طبعاً اكو بغرفتي حمام وصحيات فـ ماكو داعي اطلع بره الغرفه واشوف وجه اماال الي حقدت عليها من كل كلبي صليت وضليت كاعده افكر حزينه ليش هيج تسوي امال اكيد تريدني اتزوج حتى تخلص مني بس انا اعلمج امال اله ابقى كاعده على كلبج واشوف شيطلع بيدج تسوين