رفقا بما تبقى مني ..(الجزء الاول " دموع طفلة يتيمة ")

الفصل الثاني

رفقاً بما تبقى مني
الجزء الأول :دموع طفلة يتيمة
الكاتبة:Fatima Z-F
الفصل 2:
بشات الطفلة دارت زيف عكسات بيه شعرها بيديها صغيورين  و هي كلها كتشهق و كتشوف ضربات لي فرجلها ولاو حمرين و دايرين خط واحد  و بحكم لحمها بيض دغيا حمارو ليها دارت يديها عليهم و هي تبعدها من حسات بالحريق  ، ...جرات قصرية لبلاصة فين كتعجين دارت طحين بيديها صغيورين و بدات كتعجن و تشهق و كل مرة تزلق ليها القصرية و تجي على وجها في الارض وتعاود تنود و تكمل لعجينة حبات العرق تكونو على جبهتها و صدرها كيهبط و يطلع مسلات تا سخفات.. غطات لعجينة  دارت لما يطيب لأتاي و توجد القهوة ، طلات على عجينة لقاتها خمرات قربات حداها ريشو شعلاتو ودارت عليه المقلة و بدات كطيب و كل مرة تحرق يديها من جهة تا سلات كلشي و عمرات طبق غير بي البطبوط دارتو في طبسيل و دارت عليه زبدة بلدية مع العسل  ، بقات كتوجد تا وصلات 7 ديال صباح و هي تسمع تحنحينة وسط الدار بزبة هزات مقراش لي فيه ما سخون  داتو لوسط دار لي كان واقف فيها راجل كبير لابس جلابة بالابيض و مخضة بي الاسود و بلغة بيضاء و داير عليها سلهام،  طاحت عليه باست ليه يديه  و هو مخنزر فيها محملهاش
-(بصوت كيخلع و صارم) لحاجة كاين شي فطور طلقيني راه تابعاني الخدمة .
الحاجة:كلشي واجد اسيدي الحاج متبقا غير على خاطرك .
خرجات عِنيها في الطفلة و دارت لها اشارة  "زيدي قدامي"... دخلات الكوزينة لقات كلشي واجد،  بدات كتهز و تحط حيت صنية لي فيها اتاي و القهوة تقال على الطفلة حطات كلشي فطبلة  قدام الحاج.
الحاج؛:فين دوك عريساتك مالهم ميوجدوش هما الفطور.
الحاجة:اودي الحاج غير خليني ساكتة راه مكيديرو يديهم فوالو انا لي نهار و مطال و أنا في الكوزينة، اجي دوق هاد المخيمرات راه نضت بكري غير باش نوجدهم ليك.
-الحاج:وهاديك اش كدير تما جابتها نصرف عليها و نوكلها كيف البقرة ولا شنو.
الحاجة: هديك راه شي نهار تركب فيا شي مرض راه مكتسمعش الهضرة والو فين منهضر معاها كدير راسها مكتسمعنيش.
الحاج:اييه هي انا كلامي مبقا ليه وزن فهاد دار (كيغوات)المااس الماااااس اهديك اللفعة اجي لهنا.
الحاجة :ها شنو قتلك الحاج راه و الله مكتبغي ترد.
الحاج:الماااااس (كاع لي فرياض سمعوه كلشي ناض مخلوع من صوت باهم و هو كيعيط الالماس
كلشي خرج كيتجرا معرفو باش تبلاو.
-ه ه ها هاني ا ا ا جدي
هز يدو و ضربها بطرشة تا طاحت الارض و دم نزل من نيفها و دموع فعنيها كلها كترعد بالخوف حنكها حمر و ودنيها مبقاتش كتسمع بيها بحر طرشة لي خدات.
الحاج بغوات: من كنت كنعيط عليك فين كنتي واش بغتي نصفيها ليك هاد نهار يا هاد المسخوطة.
الماس بخوف :ك ك كن كنت غير ف في ب بيت ال م ا
الحاج شدها من ودنها و جرها عندو : راه و الله و مزال نعيط و متقوليش لعام ياتندفنك حية و مزال متسمعيش كلام لالك الحاجة نصفيها ليك (دفعها تا طاحت)يالله وجهك ميبانش قدامي باينة من صبحت عليك  هاد نهار  غادي يدوز بحال وجهك لعنة الله و عليك....