رفقا بما تبقى مني ..(الجزء الاول " دموع طفلة يتيمة ")

الفصل 10

رواية :رفقاً بما تبقى مني...
الكاتبة:Fatima Z-F
الجزء الأول : دموع طفلة يتيمة
الفصل10:
خرجات تنهيدة طويلة و حيد يدو من شعر الماس جمع الوقفة و كفض سروال كيطمة لي كان لابس هز جميع طلامط و حطهم قدامو كب عليهم ما و تيد و بدا يشتف عليهم برجليه صبن جميع طلامط و شللهم و حطهم على الحيط يتسقطرو ،هز شيتة و داز على زرابي كاملين ..هز اخر زربية حطها حدا خوتها و هو لي راجل غلباتو و جاتو تقيلة صدرو يهبط و يطلع و نفسو متسارعة بحال لكان داخل لمرطون حط يدو على ركابيه و كيحاول يلتاقط انفاسو هز راسو فألماس وهي ناعسة كيف الملاك و في نفسو مخلا فعائلة الحاج محمد غير لي نسا، محشمو محياو عاطين لطفلة تصبن هاد شي كامل تفقص و زاد كره كثر ما هو كاره تنهد و ضبط اعصابو و توجه فين ناعسة الماس هبط عندها و يدو دوزها على وجها
كمشات وجها و حلات عنيها بزربة و جمعات الوقفة شافت فيه و فمها كيترعد حابسة البكية بزز ، طاحت على رجليه و تقول؛: عافك مضربنيش و الله معرفت كيف نعست اهئ اهئ اهئ و الله منعاود غير مضربنيش اهئ😢.
سيف جرها لعندو و هو كيمسح ليها دموعها و بصوت حنبن :ششششش انا ماشي بحالهم مكنضربش دراري صغار.
الماس كتنخسس و كتشوف فيه :بصح مغاديش ضربني.
سيف هزها بين يديه و حطها على ركابيه :لا مغديش نضربك حيت نتي زوينة.
الماس بي ابتسامة:😊ماما ديما كانت كتقول لي زوينة.
سيف : حيت نتي زوينة بزاف ...جبد ليها حنيكاتها و هو كيضحك... ويتك على لغزيولة.
الماس:😄
سيف جاتو ضحكة :انا سميتي سيف دين
الماس:زوينة😊
سيف:ههههههه شكراً، لكن نتي لي سميتك زوينة بزاف دابا انا وياك صحاب ياكي
الماس:اه صحا.... قبل متكمل هضرتها حلات عنيها بجهد و دورات وجها لحوايج لي نسات بان ليها كلشي مصبن و مستف فوق الحيط.
سيف:انا لي صبنتهم من كنتي ناعسة.
الماس:وعلاش صبنتيهم غاضربني جدة😢
سيف:نو نو متبكيش ياك غير انا وياك لي عارفين مغاديش نقولوها ليها.
الماس :وعلاش.
سيف:هه ياك حنا صحاب دابة و صحاب كيعاونو صحابهم و مكيقولو والو لناس لخرين.
الماس: وخا منقول والو 😄
سيف: ههههه خنيفيشة شحال زوينة دابا واعديني متقولي لتا وحاد راكي كتعرفيني صافي.
الماس ببراءة :اه نتا صاحبي و صحاب مكيقولو والو 😄
سيف: ههههههه اه صاحبك انا دا.... قاطعهم صوت جاي من كرش الماس و هي بدات كضحك:هيهيهيهيهي
سيف :هههه فيك جوع
الماس :لا مفطرتش حيت لا كليت جدة غادي تكويني 😢
عنقها سيف عندو و تا هي تعلقات فيه محتاجة لشي حد لي يكون حنين معاها و تا هو عارفها محتاجة لي يحن عليها و يعوضها على طفولتها .

زير عليها وسط منو و تنهد :اااه ابنتي اه، متخافيش من ليوم انا معاك عمرني نخليك.
شافت فيه بعيون دامعة وقالت:تا بابا قالي عمرو يخليني و لكن دابا بشا لعند الله و خلاني.
حط، يدو على وجها كيمسح ليها دموعها:انا مغديش، نخليك غادي نبقا معاك ديما تا نكبرو بجوج.
حطها فجنبو جلسات و هو جمع الوقفة :تسنايني هنا هاني جاي دابة.
طل على وسط رياض سي الحاج محمد مبان ليه تا حد و الحس مقطوع عرفهم مزالين ناعسين و مع صيف ناس كيسهرو و كيصبحو ناعسين.
نقز لسطحهم و هبط بشوية باش ميسمعو تا حد شاف دنيا صاقلة عرف الواليدة ديالو مزال ناعسة دخل لكوزينة هز حليب سْخنو و خلطو مع شكلاط و هز شي كروسات شاطو من كسكروط ديال البارح و طرف من كاطو ديال شكلاط دار كلشي في بلاطو و طلعو معاه لسطح حط كلشي فقنت و نقز لعند الماس عاود هز بلاطو و توجه عندها لقاها مزالة في لبلاصة فين حطها و هي غير شافتو تبسمات ليه حط بلاطو قدامو و هز الماس بين يديه جلسها على رجليه و بدا يوكلها و هي كتاكل و كتشوف فيه و تبسم عاجبها الحال و خصوصاً الشكلاط كانت كتكلو غير من كتبشي عند لالة خديجة كديرو ليها في خبيز مع كاس اتاي... كلات تا شبعات و كل مرة دور عند سيف و تبسم ليه وتا هو تبسم ليها شدها من يديها و داها جيهت لما غسل ليها وجها و يديها و وصاها متقول تال شي واحد هادشي و تبقا غير بيناتهم و تا هي دارت بي وصيتو ... هز زرابي نشرهم على جنب لحيوطة و نقز لسطح ديالهم دارت ليه باي باي و هبطات و حاطة كلام سيف في ودنيها متقولها لحد..
هبطات ما لقات تا شي حد عرفاتهم مازال ناعسين دخلات لكوزينة و بقات جالسة فيها و كل مرة كضحك غير وحدها.
حمات شمس و وصل وقت لغدا و كيف العادة مخبيا الماس في الكوزينة كتغسل ماعن و العائلة مجموعة في صالون على الغدا و تقول واش واحد فيهم سول على ديك البنت واش كلات و لا لا.
في دار الحاج عبد الكبير لي متوسط صالون و ولادو دايرين بيه و تا هما كيتغداو سالاو و حطات ليهم الحاجة كاس ديال اتاي يتجمعو عليه.. تحنحن سيف و شاف في باه.
سيف:الواليد عندي شي حاجة بغيت نقولها ليك.
الحاج عبد لكبير: ايه اولدي الله اسمعنا خير.
سيف: خير نشأ الله مهم انا الوليد قررت انه ورا مندوز الجهوي غادي ندير انتقال و نجي نكمل الباك ديالي هنا في مراكش.

الام: الله اولدي مالك على هادشي ياك بقا ليك عام واحد و تسالي .
سيف: الوليدة ديك لمدرسة مبقاتش عجباني و ليوم قررت نكمل اخر عام هنا حداكم حسن.
حاج عبد لكبير: ولكن اولدي نتا ولفتي لقراية ديال تم و صحابك كاملين تم راه صعيب تكون صداقات هنا عوتاني غير صبر و زيد كمل الباك ديالك.
سيف: مكاين لا صحاب لا والو تما كلشي كيضرب على راسو وانا عيت من داك الجو و بغيت نجي ندوز حداكم هاد العام.
منير: صافي الوليد خليه يدير لي بغا و منها نيت مزيان يكمل قرايتو هنا و نيت يدخل راسو في التجارة معانا يتعلم شوية.
سيف و ضحكة على جنب فمو: لا اخاي منير انا داك البزار خليتو ليك نتا و كريم و ديرو فيه ما بغيتو .اما انا غادي نبني مستقبلي راسي و ندير مشروعي بوحدي نكون راسي براسي ما نحتاج لا لواليد لا لغيرو..
كريم؛:ههههه اييه اسي سيف دين سرنا نيت ها حنا غانشوفو هاد لقراية ديالك فين غتوصلك راه تا حنا حفات لينا عنينا في القراية و مادينا منها والو واش لي عايش في المغرب غادي يطفرو حمدلله حنا بتجارة ديالنا و ميسورين الحال اما ناس خرين راهم كيموتو بجوع فهاد لبلاد..
سيف:متافق معاك لكن بنادم ماشي بحال بحال و انا عارف اش كنقول و عارف اش غندير و كل واحد و طريقة تفكيرو .
حاج عبد للكبير:اودي مخليتي ليا منقول الله ارضي عليك و لكان هادشي لي باغيه نتا و غادي ترتاح فيه ديرو اولدي.
سيف: امين الوليد امين.. جمع الوقفة.. نخليكم دابا غادي نراجع شوية فالبيت.
الام:الله ارضي عليك اولدي.
داز نهار عند الماس غير في تمارة ديال الكوزينة تبارك الله وخا صغيرة لكن دغيا تعلمات شغل دار و دوز على الحاجة تخليها كتشعل لي شاف يقول مرا ونص لي خملات و جمعات كون يعرفو هاد المرا و نص غير بنت عمرها خمس سنين مشافت في دنيا ما تشوفات من نهار ولات كتعرف وهي فشغل لكوزينة علموها قبل الوقت جات حارة وحادکة بحال ماماها لالة غيثة الله ارحمها، وخا صحيحتها على قد الحال لكن ربي عطاها جهد لكبار لي شافها ميعطيهاش 5 سنين جات وافية تبارك الله و كلشي كيغلط في سن ديالها و يعطيها كثر من 8سنين ...
متأفف متشكي ولي قالوه ليها تقول واخة وهي حادرة الراس و عنيها في الأرض ..نسات اللعب و تمحا من ذاكرتها و بلاصت ليد لي تشد مونيكة شدات فراكة و تمارت شقا ما يطيح ليل عليها تا تولي كيف الورقة دفعا طيح ..بريئة ومعارفة والو لا فغدر زمان و لا خيانة البشر ربي لي واقف معاها فطريقها و كاع ولاد الحرام بعدهم عليها و تا جداتها جامعة و طاوية ورادة البال لصغيرة و الكبيرة من شافت شوفات نوفل ولد ولدها لكبير لألماس قلبها مهنهاش و عرفات من شوفاتو ناوي لغذر حمرات فيه العين و نبهاتو على الماس ما يحط يدو ...ماشي حيت خايفة على الماس لا خايفة على دارها و ولادها و مبغيا شوهة مع ناس وهادشي علاش بدلات لألماس بيتها وعطاتها بيت لخزين لي كيتسورت من لداخل و تهنات من جيهتها،