رواية :رفقاً بما تبقى مني...
الكاتبة:Fatima Zahra Fallaka
الجزء الأول : دموع طفلة يتيمة
و صل وقت لغدا و العائلة تجمعات و على طبلة جلسات و ليتيمة في الكوزينة سكنات سلاو غداهم و الماس دازت على طبلة جمعات و بيديها صغيورين هازة سينية ديال اتاي حطاتها قدامهم و كلشي كيخنزر فيها و تا حد محملها و كون ما كانت هازة عليهم حمل ديال شقة و تمارة كون بشحال هادي جراو عليها و تهناو منها .
تجمعو على براد اتاي تا سمعو دقان في الباب.
الحاج محمد:شكون هدا لي غيجي فهاد لوقت
الحاجة:الله و اعلم
حلات الماس الباب و لقات خالتها خديجة قدامها و صوت من وراها سمعات.
الحاجة:اديك الجحمومية شكون لي فالباب.
الماس:غير خالتي خديجة اجدة.
الحاجة:يجدبو عليك انشالله، ازيدي أ خديجة هاني في صالون.
خديجة في نفسها :لا حول و لا قوة الا بالله ..دخلات لصالون لقاتهم كاملين مجموعين دارت ليهم ضحكة صفرة و عطات سلامها .
الحاجة:اش حب لخاطر اخديجة
خديجة:والو الالة الحاجة غير جبت شي حوايج صغارو على بنتي و قلت نجيبهم لألماس
الحاجة:امممم اوا مزيان من كتفكرو في بنت لخدامة سيري عندها الكوزينة و عطيهم ليها .
عودات تبسمات ليهم خديجة بي ابتسامة صفرة و هي، مكرهاتش دفل عليهم فوجهم و تنعلهم كاملين ،عاقلين غير هي بنت لخدامة و نسيتو شكون باها لي هو ولدكم. تحكمات في راسها و توجهات لكوزينة بحكم انها كتعرف رياض مزيان و متحتاج لي يوريها طرقانو ... دخلات على الماس لقاتها وسط لماعن ديال لغدا كتغسل فيهم
خديجة :باركة عليك ابنتي و اجي عندي.
هبطات الماس من لكرسي و توجهات عندها و عنيها في الميكات عرفاتهم هما لي كان هاز سيف.
الماس اشارة بصبعها لميكات و نطقات بصوت طفولي:سيف.
خديجة: شششش عنداك تقولي جابهم سيف سكتي و لي سولك قولي انا لي جبتهم ليك.
الماس:سيفطهم سيف ياكي.
خديجة:ااه ابنتي هو لي سيفطهم معايا و هانتي راه كلهم حوايج قدك تبقاي تبدلي بيهم و لي توصخات ليك صبنيها ولا جيبهم ليا نصبنهم ليك.
حركات الماس راسها و لالة خديجة خرجات بحالها و مقالت تا بسلامة لهدوك لي حضينها بطرف عينيهم حيت معاشرهم كاملين و عارفة اش تحت راسهم و عرفاتهم عاجبهم الحال من تصدق خديجة مرت لخباز لي ماشي في مستواهم على الماس بنت لخدامة و يبان ليها مستواها و انها ماشي من مستوى العائلة وهي غير خدامة عندهم و دمها ماشي من دمهم.. و لكن نساو ان الماس غير طفلة مكتفهم في مستوى الطبقات و لا فتفكيرهم لمريض و لموسخ و عندها كلشي بحال بحال و نضرة ديالها لحياة هي نضرة بريئة ..ولكانو باغين بهينوها بهاد طريقة راه هانو راسهم قدام خديجة و بانو ليها بحال شي حشرات ناطقة...
هزات الماس الميكات لي فيهم الحوايج و قدام العائلة دازت لبيت لي كتنعس فيه و هما كيضحكو عليها.
كوثر :هههه وشوفو ليك تا من خديجة ولات كتصدق
مينة:ههههههه وييه ضحكاتني و الله قالك صدقة باين شي حوايج دايرين كي وجها
كوثر:ههه تا نتي شكون غادي يلبسهم ياك غير خدامة.
الحاجة:صافي سكتونا و نتوما خاصكم غير علامن تحلو داك درقوش ديالكم
كوثر:تا نتي الحاجة خلينا نضحكو شوية
بقاو مجمعين على نميمة هادي دارت هادي فعلات تا برد الحال و تافقو العيالات يخرجو يضورو في جامع لفنا كلشي خرج بقات غير الماس وحدها دارت شغلها كامل و توجهات لبيت لي كتنعس فيه حلات الميكات ليعامرين حوايج لقاتهم كسيوات ديال خروج و بيجامات و كيطمات ديال دار و صنيديلات قدها و لاتروس ديال جونسون فيه كاع المستلزمات من شمبوات و صابون و زيت كيس ديال حمام مع شيتة ديال شعر و لقات من لتحت جوج فوطات رطبين بقات كتلمسهم و هي حشمانة خايفة توسخهم و فرحانة بيهم بان ليها كلشي مزال جديد بقات كل مرة تهز حاجة و تحطها قدامها مكرهاتش تلبسهم لكن خافت توسخهم و حطاتهم قدامها تفرج فيهم و كل مرة ضحك غير بوحدها بقات فبيتها تا سمعات شي حد كيعيط عليها....
أنت تقرأ
رفقا بما تبقى مني ..(الجزء الاول " دموع طفلة يتيمة ")
Short Storyغادر الرضا النفس الطيبة ، وماتت الحياة الباسمة . فما عاد سبب يستحق الحياة ، فالضمير يتألم وتسمع الأعماق صرخاته وعويله ....هي تجتدي النجاة فقد ضل اللقم وضاع منه قنديله بين ضباب الطقس ....... هي لا تتكلم مثلما تتألم ، فهي تستقبل العتاب عن اقتناع وتستع...
