رفقا بما تبقى مني ..(الجزء الاول " دموع طفلة يتيمة ")

الفصل 9..

رواية :رفقاً بما تبقى مني...
الكاتبة:👑اFatima Z-F
الجزء الأول : دموع طفلة يتيمة
الفصل 9...
دخلات الماس حطات لوصلة في الكوزينة و خرجات بان ليها ولد عمها "لحسن"نوفل عمرو 18 سنة كيقرا في الباك شافها و هو يتبسم في جنب و قال :
الماس جيبي طاس و اجي كمدي لي رجلي .
بقات كتشوف فيه الماس و هبطات عِنيها دارت داك شي لي قال ليها و هبطات بين رجليه مع سالف ديلها لي واصل تحت مؤخرتها و بقات كتمسد ليه رجليه فالما سخون.
هو كيشوف فيها و داير ابتسامة على جنب فمو..
دخل عليهم كمال (ولد خالها تاني عبد الله) بقا كيشوف فيهم و كيشوف في الماس لي كتمسد رجلين نوفل، و زاد طلع لبيتو بلا تا كلمة هو من طبعو صامت.
سلات الماس و نشفات ليه رجلو ورجعات طاس لحمام و نوفل مزال حاط عليها لعين على نفس الابتسامة و كمال كيشوف فيه من فوق بنضرات ممفهومينش.
وصل ليل و كل واحد بشا ينعس و الماس بقات في الكوزينة كتغسل ماعن ديال لعشا محسات تا دخلات عليها جداتها وقالت.
شوفي اديك شهبة غدا فيقي بكري و وجدي لفطور و طلعي صبني دوك طلامط لي محطوطين فسطح
الماس:وخا جدة
الحاجة:بغيت انا إجدبو عليك انشالله نهبط غدا مع صباح نلقا لفطور واجد و كمارتك مكدورش هنا، يالله سيري لبيت لخزبن نعسي فيه و سدي عليك بساروت من لداخل.
الماس عينيها في الارض :و و و لك لكن اجدة بيت لخزين سخون بزاف غير خليني فداك بيت كيبرد فليل شوية.
الحاجة شداتها من شعرها و لواتو بين يديها:شتك سايرة معايا كلمة بكلمة.
الماس :اهئ اهئ صافي و الله منعاود اععع اهئ اهئ عافك اجدة
دفعاتها من حداها تا تزدحات مع بوطاجي:يالله قدامي و سدي عليك باب من وراك و لا و الله و منلقاك تم يا تنكويك من دوك ليدين،
طارت الماس من قدام جداتها بشات هزات مانطة لي كتفرش و دخلات بيت الخزين و سورتات عليها من لداخل كيف قالت ليها جداتها، فرشات و حطات لمخدة ديالها و تكات و كتشوف فسقف ... نعسات بلا متحس، وخا لحرارة و البيت سخون طايب لكن لعيا مخلهاش تفكر في صهد و دغيا نعسات.
ضرباتها الفيقة مع ادان الفجر لقات راسها مدوشة بالعرق ناضت حلات الباب دربها داك البرد ديال صباح تا تبورشات في بلاصتها.
دخلات لحمام قدات غردها و توجهات الكوزينة تصاوب لفطور كيف ديما وجدات كلشي و حطاتو في طبلة لي في الكوزينة و غطاتو ... 

طلعات بلا فطور لسطح بان ليها عامر طلامط و زربيات تقال و كبار، 2عيالات و يحيرو فيهم بقا غير بنت صغيرة بلا تا كلمة هزات لبانيو لي غادي تصبن فيه و بدات كتصبن تلميطة بي طلميطة و لي صبناتها كتجرها و تحطها فجنب باش تشللها سمعات صوت من وراها
-الماس
دارت عندو بان ليها سيف دين معلق فصور لي كيفصل رياضهم على رياض لحاج محمد هبط لسطحهم و توجه عندها ركع على رجليه باش يهبط لمستوى ديالها و قال.
الماس اش كديري هنا مع صباح (شاف جنابها) واش كتصبني هاد شي كامل.
حركات راسها بي معنى اه.... زير على يدو و غمض عنيه حس بنار شعلة فيه و عاود حلهم و شاف فيها.
-سيف:واش هادو حماقو ولا تسطاو واش كاين شي بنت كتصبن هاد لعرام ديال حوايج كامل و شوفي حالتك كيف دايرة واش نتي قد هادشي شوفي يديك كيف مجروحين و شوفي وجهك كي صفر.... شاف في عنيها و شد ليها يديها كيلمس الجرحات لي فيهم و بصوت حنين قال:متعاوديش تصبني مرة اخرى صافي ...
الماس بصوت خافت و رقيق:منقدرش انا ديما كنصبن لمصبنتش غادي يضربوني.
سيف دين و عِنيه خارجين: كيضربوك.
الماس و عنيها مملوئين بدموع و نفس بدات كطلع ليها و تهبط بي البكا: ا ا اهئ اهئ اهئ اااه اهئ ديما كيضربوني ، شوف شنو دارت لي مرات عمو لحسن (وراتو رجلها بحال شي بنت صغيرة كتشكي لمامها) كواتني هنايا اهئ اهئ و ديما كينتفوني اهئ اهئ
كتبكي و تشكي ليه و تعاود ليه اش كيديرو ليها و لي معمرها عوداتو لشي حد عوداتو لسيف من الاول تال اخر و هو كيسمع ليها و عروق راسو بانو و دمو سخن مكرهش يهبط يقتلهم كاملين و يتفنن فتعديبهم و يكويهم بنفس الحديدة لي كواو بيها الماس... جبدها عندو لصدرو و حاط يديه على جسدها الصغير و زيرها عندو بحال مكرهش يدخلها لداخل ديالو و هي عاد كتزيد تبكي و تخنق في صوتها باش ميسمعها حد حسات بي الامان وهي وسط صدرو ...الامان لي تحرمات منو من نهار ماتو والديها معمر شي حد جا و عنقها و سولها اش كيضرك ابنتي بكات تا فشلات و على صدر سيف تكات ...بقا حاطها على صدرو و يد دايرها على ضهرها و يد حطها على شعرها حس بيها ترخات هبط عينو فيها لقاها نعسات دوز يدو على وجها صغيور و دار ابتسامة على الشفاه ديالو و واعد نفسو على الماس لا تخلات ما يبشي تا يحيدها من هاد لعيشة لي مدوزين عليها حبابها.. هزها بين يديه و حطها فلجلسة لي دايرين فسطح و جلس حدها و يدو على شعرها ما تهزات....

بقا كيمشط ليها شعرها بيدو و عينو عليها ما بعدات،.. ما عرفش علاش هاد طفلة جدباتو من شفها فسطح لبارح و فقلبو سكنات حس بالمسؤولية تجاهاَ ..،دور عينو في سطح و بانو ليه طلامط و زرابي لي كانت محنية عليهم الماس كتصبنهم ...