#قلوب_لا_تعرف_الرحمه
#فريده _احمد_فريد
الحلقه الخامسه.........................
ف مستشفي المروه التخصصي للأمراض النفسيه والعصبيه صخر دخل بعربيته جوه المستشفي
.......طلع اوضه جنه لكنه ملقهاش ...خرج سأل الممرضه
(انسه أمل فين اختي)
امل(ف الجنينه تحت يا صخر بيه)
صخر بعصبيه (وحضرتك سايباها لوحدها ليه)
امل (لأ حضرتك انا كنت معاها...بس طلعت اجيب لها العلاج...انا كنت نازله اهوه)
صخر (طب هيه عامله ايه دلوقتي)
امل (واللهي يا فندم انا مش هكدب ع حضرتك....انسه جنه مش بتتحسن ....انا بحاول دايما اخليها تتكلم او ألفت نظرها لاي حاجه لكنها مش عايزه تقول او تهتم بأي حاجه...انا اسفه اوي اوي بس انا هفضل احاول معاها....دكتور محمد هناك اهوه اتفضل حضرتك أسأله وانا هنزل لها تحت وهستني حضرتك معاها)
صخر بأقتضاب (ماشي)
صخر اتكلم مع الدكتور عن حالتها شويه...وسابه ونزل الجنينه تحت
لقي جنه باصه ع الزهور ادامها وساكته كعادتها....قرب من الكرسي المتحرك اللي هيه قاعده عليه رفع ايدها وباسها..
...لكن هيه ما باصتش عليه حتي...بص للممرضه الممرضه امل بعدت عنهم شويه...
.صخر قعد ع كرسي جمبها وقالها
(الجميل عامل ايه دلوقتي.....جنه مش هتردي عليا بقي....طب قوليلي نفسك ف اي حاجه اجبها لك...طب تحبي اجيبلك فراوله...مش انتي بتحبيها....امل قالتلي انك المره اللي فاتت كلتيها كلها...تحبي اجيب لك غيرها.....يا جنه)
صخر قام وقف....وبص لها بحزن شديد....وقف جمبها شويه...وبعدين شاور لأمل جت بسرعه ..
.قالها (خدي بالك منها...انا رايح الشغل...بكره هعدي عليها تاني...ولو ف اي جديد ابقي كلميني...دا لو فيه)
خرج صخر من المستشفي وركب عربيته...وراح ع الشغل **************************
زيد اشتغل ع التوك توك.....وتقريبآ أتأقلم عليه....نزل ناس عند سوبر ماركت نزل هوه كمان يجيب سجاير..
..وقف عند بقال....كانت واقفه جمبه قمر هوه بص لها بطرف عينه.....
وفعلا الطبع يغلب التطبع....رغم انها مش لابسه لا ضيق ولا محزق لكن
الشاب الرخيص بيبص ع اي واحده وبيضايقها والسلام قرب منها وقال
(رغم انك لا شكل ولا منظر...بس جسمك كرباج...بقولك ايه ما تيجي)
قمر بصت له اوي...قالتله بزعيق
(ما تحترم نفسك...ايه اللي انت بتقوله ده)
زيد ضحك بخبث وحط ايده ع وسطها وقال
(ايه يا موله....ما تحمدي ربنا اني بصيت لواحده كلوب زيك)
#كان يقصد النضاره اللي لبساها
قمر شالت ايده من ع وسطها...ورزعته ع وشه بالألم.....الناس بصوا...زيد برق لها قمر صرخت
(ألحقوني يا ناس ابن الكلب دا بيحط ايده عليا...هوه مفيش راجل يعلمك الأدب)
وفجأه ...اتلم الناس ع زيد...ونزلوا فيه ضرب...هيه كمان خلعت شبشبها ونزلت عليه مع الناس...لما عدموه العافيه *********************
بدر كانت مبسوطه اوي ف شغلها الجديد ف الهايبر ماركت كان شغلها بياعه..
.واقفه ع الجبن....لكن لما بيكون ف شغل تاني زي نضافه كانت بتنضف مع العمال.
...لما بتيجي بضاعه كانت بتحملها للمخزن والتلاجه الكبيره الخلفيه زيها...زي الشباب.
...الكل استجدعها....كانت بتشتغل بضمير وكانت بتحب شغلها
ف الساعه دي....كانت بتنضف رفوف تلاجه الجبنه زي العاده.....وفجأه...... حست بقلبها بيدق بسرعه
رهيبه...لدرجه انها وقفت وحطت ايدها ع قلبها شمت عطر عدي من ورا ضهرها...
العطر ده عمرها ما نسيته ابدا بصت مره واحده....كان هوه...فعلا دا ايمن الفرماوي
عدي من وراها وراح ع اوضه المدير.... بدر بصت بعيد ع اسم الهايبر اللي مطبوع ع الشنط.
..كان هايبر الفرماوي ماركت ...ازاي ما خدتش بالها من الاسم قبل كده
بدر عقلها وقف عن التفكير...قلبها زادت دقاته...قالت لنفسها
(لأ...معقول....تدور السنين وتلف...وارجع اشوفك تاني...واشتغل عندك كمان...لأ ...مستحيل....طب هعمل ايه دلوقتي.....اسيب الشغل وامشي ولا افضل شغاله...اعمل ايه بس....استني بس يا بدر بلاش تسرع...هتسيبي الشغل ليييه....هوه أنتي كنتي سرقتيه قبل كده وخايفه يشوفك...دا يا ماما لو شافك مش هيفتكرك اصلآ...بلاش استعباط يا بدر كملي شغلك ومالكيش دعوه بيه....دا اكيد واحد من محلاته وجاي يبص عليه وماشي تاني....يعني هتشوفيه كل فين وفين....كملي شغلك وسكتي قلبك ده شويه...بلا حب بلا كلام فارغ...انتي عمرك ما هتكوني ليه ولا هوه هيبص لك اصلآ ممكن بقي تفكك شويه وتشوفي آكل عيشك)
بدر لقت دموعها بتنزل ...مسحت دموعها بسرعه ولفت تكمل شغلها
لكنها لفت رأسها تاني ناحيه المكتب.....عنيها كانت مشتاقه تشوفه ولو مره واحده ***********************
ف شركه صخر.....دخل صخر مكتبه...ودخل وراه السكرتير بتاعه قاله بأحترام
(صخر بيه...ف واحده قاعده منتظره حضرتك من بدري وقالتلي عايزه تقابل حضرتك ف شغل)
صخر(خليها تتفضل)
قعد صخر وطلب القهوه بتاعته....خبطت شمس ع بابه..
.أذن لها تدخل ....دخلت شمس وهيه لابسه لبس لافت جدآ....
بنطلون جينز مقطع وباضي كاشف جزء من صدرها...
.وشعرها الاسود نازل ع كتفها والميكب مديها جمال فوق جمالها.....
طبعآ بسبب عمليه التجميل وبرضو بسبب العمليه دي اللي غيرت شكلها خالص...
شمس كانت متأكده انه مستحيل يتعرف عليها وقفت تبصله ...
هوه وقف عشان يرحب بيها ويتعرف عليها....لكنه لما شاف لبسها قلب وشه وكشر
هيه بصت له بحقد وكره كبير للحظه...لكنها قالت لنفسها بسرعه
(اهدي وأمسكي اعصابك...يلا ابتدي يا شمس)
رسمت ابتسامه مزيفه...وقربت منه...مدت ايدها ..مد إيده هوه كمان وهوه مكشر سلموا ع بعض.
..قالت له
(صخر بيه...انا شمس الفرماوي سمعت كتير عن حضرتك وجايه لك ف شغل)
صخر(اهلا وسهلا....اتفضلي أامريني)
شمس بدأت تقوله ع فكره مشروعها...لكنها لاحظت حاجه غريبه ف صخر
ملامحه بقت جامده...كبر طبعا مع السنين ووسامته زادت اضعاف...
غير حجم جسمه اللي بقي اضخم...غالبا بسبب الرياضه .
.لكن شمس.استغربت انه ما ضحكش ف وشها ولا مره رغم انها توقعت انه يتحرش بيها بالكلام.
..لانه كان زير نسا... لكنه كان مركز ف كلامها عن المشروع وما بصش ع جسمها او صدرها ولا مره واحده
خلصت كلامها...المشروع عجب صخر واتكلموا ف تفاصيل تخص الامور دي صخر قالها
(شوفي حضرتك عايزه تبدأي أمتي وانا هبعت لك اشطر مهندس عندي هنا)
لكن شمس كشرت ..وقالت له
(لأ يا صخر بيه...كده انا ازعل منك....انا عايزه حضرتك اللي تكون معايا وانت اللي تصمم وتنفذ المشروع ده بأيدك.....انا كان ممكن اجيب مهندس اجنبي من بره...لكن انا سمعت عن أنجازاتك انت...مش حضرتك برضو بتهتم بنفسك بمشاريع كبار رجال الاعمال...والوزراء وكده...انا بقي مش أاقل منهم.....وكمان زي ما قلت لحضرتك دا مشروع حياتي اللي أتحديت بيه اخويا ايمن الفرماوي....اكيد انت سمعت عنه كتير...وما يرضكش اني اطلع عيله ادامه...انا عايزه شغل ممتاز...ومن مهندس اكتر من ممتاز...وانا واثقه اني هنجح لو حضرتك اللي اشتغلت ف المشروع ده بنفسك)
صخر(بس انا عندي شغل كتير وشركات تانيه بديرها بنفسي ازاي بس هسيب كل ده عشان مشروع صغير زي دا)
شمس حست بإحباط ....وشافت انه لو ما اشتغلش بنفسه معاها...يبقي خطتها هتفشل
بصت للأرض وقلبت شفايفها وقالت بإحباط
(خساره....انا اسفه اني ضيعت وقتك يا صخر بيه...بس انا مش هغامر واقبل اي مهندس غيرك....للأسف انا مش هنفذ المشروع ده...وهعتذر لاخويا....متشكره اوي ع وقتك...وشرف ليا اني قابلتك...السلاموا عليكوا)
لفت عشان تمشي لكنه نده عليها...ابتسمت بخبث ولفت بصت له ....ورسمت خيبه الامل ع وشها قالها
(خلاص يا انسه شمس...وانا مش هقدر ازعلك....عايزه نبتدي من أمتي)
شمس مثلت السعاده وقالت له
(من بكره لو وقتك يسمح ايه رايك)
صخر(خلاص ممكن حضرتك تديني رقمك...ونبقي نتفق ف التلفون ماشي)
ابتسمت ف وشه بصعوبه....وادته رقمها....وسلمت عليه وخرجت من مكتبه لكن الدموع نزلت تاني ع
وشها...احساسها وهيه ماسكه ايده وبتضحك ف وشه كان اكبر من انها تتحمله...
ركبت عربيتها وفضلت تعيط وتخبط ايدها ع الدريكسيون ادامها
**************************
زينه كانت قاعده ترسم ف اوضتها....الرسم كان هوايتها وتسليتها الوحيده
فجأه دخل زيد عليها...اتنفضت من دخلته...قالها بسرعه
(زينه قومي ألبسي وتعالي معايا حالا)
زينه(ايه يا زيد ف أيه)
زيد(عايزك تضربي واحده)
زينه(ايه...ليه)
زيد بتمثيل (يرضيكي ان اخوكي ينضرب بالشبشب من حته بت مالهاش لازمه)
زينه اتعصبت..وقامت واقفه وصرخت فيه
(ومين دي اللي عملت كده...دا انا هأكلها الشبشب ده...بس حصل ايه عملت كده معاك ليه)
زيد(كانت زبونه ووصلتها...لكنها مكانتش عايزه تدفع الفلوس....ولما زعقت لها...صرخت وقالت للناس اني عايز اخطفها وخدت علقه بسببها...وضربتني مع الناس يرضيكي يا زينه)
زينه انفجرت من الغضب وقالتله
(لا دا انا هطلع لك عين اهلها...تعالي وريهالي استني احط العبايه عليا)
زينه لبست وخرجت مع اخوها....ركبوا التوك توك وراحوا ع المنطقه القريبه اللي ساكنه فيها قمر وبدر
زيد قال لاخته
(هيه ساكنه هنا....ف البيت دا...انا سألت واحد ...قالي انها ساكنه ف الشقه اللي ف الارضي اللي ع الشمال)
زينه قالتله بعصبيه
(طب استني انت هنا...انا هدخل اجيبها من شعرها)
نزلت زينه.....ودخلت البيت...خبطت ع الشقه...فتحت لها قمر....زينه صرخت فيها
(انتي يا بت اللي ضربتي اخويا بالشبشب)
قمر بصت لها وخافت منها ....لانها اطول منها وجسمها مليان عنها قالت لها بصدق
(حضرتك جايه تتخانقي معايا ف بيتي....اخوا حضرتك يا انسه حط ايده ع وسطي وانا واقفه اشتري الحاجه من السوبر ماركت وقالي ماتيجي وقالي كلام قليل الادب...انتي ترضيها ع نفسك يا أنسه)
زينه صدقت كل حرف قالته قمر.... لأنها عارفه اخوها كويس.... اتبخر غضبها وحست بإحراج كبير حطت عينها ف الارض
وقالت لها (لأ طبعآ ما ارضهاش وانا اسفه اوي)
اتفجئوا الاتنين بصوت زيد من وراهم بيقول لأخته
(وحياه امك...انا جايبك تأخديلي حقي منها وانتي واقفه تتأسفي لها)
زينه بصت له بغضب وقالتله
(انا مصدقاها ومصدق انك تعمل كده....انا ماشيه ومش هتخانق مع حد)
زينه خرجت عدت من جمبه...لكنه بص لها وقالها وهوه بيخرج المطوه
(مش عايز من ميتين اهلك حاجه....انا هأخد حقي بإيدي)
زينه صرخت ...قمر اتصدمت....زيد جري عليها...وبمنتهي العنف ضربها بالمطوه ف وشها.
...من اول شعرها لحد رقبتها... المطوه كسرت النضاره صحيح لكن... حمت عين قمر الشمال من انها تفرقع....
زينه صرخت ...زيد شاف الدم بينطر من رقبتها...خاف رمي المطوه وطلع يجري.....
زينه بصت له...وطلعت تجري ع قمر...قمر حطت ايدها ع وشها وع الدم اللي غرق ايدها ووشها وهدومها
وفضلت تصرخ....دخل الناس من الشارع ع الصريخ...جريوا ع قمر الجيران خدوها بسرعه ع اقرب صيدليه
...بسبب اللهوجه....محدش سأل زينه انتي مين... زينه وطت خدت مطوه اخوها وخبتها ف صدرها
بسرعه...وخرجت تجري ع بيتها.... ف وسط الزحمه بدر كانت بره بتجيب طلبات البيت...
رجعت وشافت الناس بيجروا بأختها ف الشارع رمت كل اللي كان ف ايدها...وفضلت تصرخ بإسمها
وجريت مع الناس ع الصيدليه.... الصيدلي وقف نزيف الدم اللي كان ف الرقبه و خيطه 8 غرز بالطول
قمر اغم عليها من كتر الرعب والخوف ومنظر الدم
*************************
شمس حاولت تنام عشان تبطل تفكير ف صخر....لكن عقلها رافض انه يرحمها
ويبطل تفكير فيه مسكت تلفونها....وخدت الكارت بتاعه اللي ادهولها...فكرت تتصل بيه لكن
بعد تفكير بعتت له ع الواتس
"استاذ صخر ينفع نتقابل بكره ونروح ع الموقع "
سابت التلفون جمبها..قالت لنفسها لما يبقي يرد بقي سمعت صوت رساله
"موقع ايه مين معايا"
"لحقت تنساني يا مستر صخر"
"مين"
"يعني مش شايف صورتي حتي"
"هوه حضرتك حابه تستزرفي ع المسا يا تقولي انتي مين يا تقفلي وما تبعتيش تاني احسن لك"
"ايه يا استاذ صخر استزراف ايه اللي انا هستزرفه مع حضرتك انا بكلمك ف شغل انا شمس الفرماوي اللي جيت لحضرتك النهارده افتكرتني"
"طب ما تقولي من الاول يا انسه ماشي عاما هرد عليكي بكره هظبط مواعيدي واكلمك"
"ماشي بس ياريت المعاد يكون بعد الضهر عشان محاضراتي"
"حضرتك بتدرسي لسه"
"ايوا ف اخر سنه ف الجامعه اومال انا قولتلك المشروع دا مهم عندي ليه دا هيكون اول خطوه ف سلم حياتي"
"ماشي هحاول اظبط مواعيدي ع مواعيدك عاما هكلمك دا رقمك صح"
"ايوا هستني رسالتك او اتصالك تصبح ع خير"
"ماشي سلام"
شمس استغربت اوي من جفاؤه معاها ف الكلام ...حست للحظه انه مش صخر
وهوه مجرد واحد يشبهه ف الشكل والاسم....لكنها خرجت الفكره الغبيه دي من دماغها
مستحيل يكون ف اتنين من صخر الراوي...هوه صخر واحد بس مهما اتغير ف معاملته او طريقته او نظراته..
.بس هيفضل هوه نفس الراجل... الشخصيه الوقحه المتغطرسه... الاناني ....عديم الضمير
اكيد مفيش حد بالمواصفات دي غير صخر الراوي.... عدوها الوحيد ف الدنيا.
..واللي هتنتقم منه ولو دا كان اخر حاجه هتعملها ف حياتها.
..لازم تذله وتهينه وتحرمه اغلي واعز ما يملك وتدوقه من نفس الكأس
يمكن يندم ويحس باللي عمله فيها... واكيد عمله ف بنات ناس كتير غيرها
ضحكت شمس بمراره وهيه بتمسح دمعتها وقالت بصوت مسموع
(خلاص هانت يا شمس صخر مهما حاول يمثل انه اتغير هيفضل بالنسبه لي هوه نفس الحقير اللي دمر حياتي وحياه اخواتي وهخليه يدفع التمن قريب قريب اوي انا ف دماغي خطه ليك يا صخر عمرك ما كنت تتخيل انها تطلع من واحده زيي انا وبكره تشوف بنفسك)
يتبع ف الحلقه٦
