#قلوب_لا_تعرف_الرحمه
#فريده _احمد_فريد
الحلقه الثامنه
شمس حطت نضاره ع عنيها قبل ما تدخل لصخر مكتبه كانت فكرت كتير طول الليل
عمرها ما هتقدر تواجه اخواتها قبل ما تاخد حقها من صخر....
وتخليه يعترف بجريمته ف حقها وانه اتبلي عليها زور عشان يذلها
خرج السكرتير وقالها ...تتفضل تدخل ...شكرته ووقفت قصاد الباب
مسحت عينها كويس ....ورسمت ابتسامه بالعافيه ع وشها
فتحت الباب ....ودخلت متحمسه اوي..... جريت ع مكتبه وقالت بسعاده وحماس مزيفين
( استاذ صخر ....بارك لي... بارك لي بسرعه)
صخر وقف وقالها بدهشه
( ابارك لك ع ايه... اهدي وفهميني )
قالت له
(ايمن اخويا قالي ان المشروع كله هيبقي ملكي لوحدي يعني... هروح ع بدر واشتري الارض باسمي... واكتب معاك العقد باسمي انا.... انا مبسوطه اوي اوي... انت وشك حلو اوي عليا )
صخر ابتسم اخيرا ..وقالها
(مبروك يا انسه)
قربت منه ومسكت ايده بحركه تمثيليه... طفوليه... وقالت تترجاه
( استاذ صخر ممكن... بليز.... ارجوك... تيجي معايا اصل ايمن سابلي الجمل بما حمل ....وانا خايفه لابوظ الدنيا او سمسمار يضحك عليا.... صخر انا لسه مبتدئه وده اول مشروع ف حياتي.... وخايفه لاشفل )
صخر بص لها ....وتقريبا تمثيليتها دخلت عليه
ابتسم وقالها
(عيب تقولي كده وانا معاكي... انا عشان خاطر حماسك ده.... هأجل مواعيدي واجي معاكي)
ضحكت اوي وقالتله
(متشكره اوي ....اوي ...كده انا اتاكدت اني هنجح ميه ف الميه ان شاء الله طبعا )
ابتسم لها وناده السكرتير وطلب منه تاجيل مواعيده وطلب منها انهم يمشوا دلوقت
شمس خرجت معاه وركبت عربيته وهيه سعيده بس مش عشان وافق يساعدها
لا عشان اول خطوه ف خطتها نجحت
*"**********************
بدر حضرت بطاقه قمر... وصور قديمه ليها.... قمر فضلت حزينه كانت خايفه من الساعات الجايه
وفعلا زين جه مع اهله وجاب معاه كام واحد من صحابه عشان يشهدوا ع الجواز
بدر قامت معاهم بالواجب مرغمه عشان الجوازه تتم ع خير
لكنها كانت بتعامل زين بجفاء ع اعتبار انه هوه اللي شوهه اختها
كان نفسها تشوهه وتاذيه زي ما عمل ف اختها لكنها حكمت عقلها ومشاعرها
عشان مستقبل قمر ...هوه كمان ما يتشوهش
بدر فكرت للحظه انها تبلغ عنه وتحبسه لكن قمر هتستفاد ايه من حبسه
بدر شافت ان اختها تتجوز من مجرم احسن ما تعيش حزينه وحيده زيها لباقي عمرها
حضر المأذون وطلب قمر العروسه... زينه دخلت مع بدر عشان يجيبوها
زين كان متضايق ومغصوب ع كل ده لكنه استني يشوف البنت اللي اخوه شوهها
بدر وزينه دخلوا اوضه قمر لكنهم اتصدموا لما لقوها لابسه نقاب ع وشها
**********************
امل الممرضه حطت طبق الفراوله قصاد جنه
وقالت لها (كلي يا جنه وانا هرجع لك بعد شويه)
امل رغم ان صخر بيديها فلوس كتير عشان تهتم وتحن ع جنه
الا انها بتعمل كده قصاده وقصاد الدكتور وبس غير كده كانت بتهملها وتسبيها لوحدها
فترات طويله.... سابتها ورجعت ع مبني المستشفي....... جنه كانت قاعده ف الجنينه
بصت لطبق الفراوله من غير نفس ......دخلت عربيه للمستشفي نزل منها ست وطفلين
الاطفال جريوا ورا بعضهم....... امهم نادت عليهم لكنهم فضلوا يجروا ويلعبوا ف جنينه المستشفي
لكن طفل فيهم خبط ف زيد ....الطفل اتأسف وجري من اخوه
زيد بص لهم وضحك ع شقاوتهم خصوصا انهم شبه بعض
فكروه بيه هوه وزين ف سنهم.... لكن طفل منهم خبط ف ترابيزه جنه وقع طبق الفراوله ع الارض
جنه بصت لهم.... سابوها وجريوا ....زيد شاف الموقف راح ع جنه بصفته عامل النضافه
بص لها لقاها اتضايقت..... بص لها بقرف قال ف سره
"ايه العبط ده.... هيه زعلت من لعب العيال عشان وقعوا شويه فراوله.... فعلا عالم نتنه "
لم الفراوله ف الطبق تاني وقالها بجفاء
( هغسلها وارجعها لك ع طول يا انسه)
زيد قال ف نفسه انها هتقوله ارميها لكنها بصت له وسكتت
زيد رفع حواجبه بدهشه وراح ع مبني المستشفي غسل الفراوله باهمال
ورجع لها قالها وهوه بيمد ايده بالطبق
( اتفضلي غسلتها كويس)
لكنها ما مدتش ايدها زيد استغرب قالها
(حضرتك عايزه الطبق ولا ارميه ف الزباله)
لكنها هزت راسها نفي بسرعه... زيد لاحظ انها بتحرك صوابعها بصعوبه
زيد حس ان جردل ميه ساقعه اتدلق ع دماغه... لما فهم انها عاجزه ...مشلوله
زيد عمل حاجه غريبه نزل ع ركبته وقرب منها قالها بهمس
( حضرتك مشلوله )
بصت له وفرت دمعه من عينيها ....زيد بسرعه مسح دمعتها وقالها
( انا مقصدش اعيطك... معلش انا اسف انا بس بحسدك)
