#قلوب_لا_تعرف_الرحمه
#فريده _احمد_فريد
الحلقه السابعه...........
شمس. حاولت تنام لكن تفكيرها ف صخر طير النوم من عينيها
مش قادره تنسي نظره الإعجاب اللي بصتها ليه وهوه بيختار موقع المول
وبيحدد لها كل المطلوب كان باين عليه الثقه وهوه بيتكلم
اتفقت معاه انها هتروح له الشركه عشان يتكلموا ف اللي هيتم بعد موافقة ايمن ع التخطيط
فضلت تتقلب عشان تنام لكن صخر شاغل تفكيرها بتسأل نفسها
هوه ليه اتغير وياتري خطتها هتنجح ولا لأ من الواضح أن صخر مش معجب بيها ولا بيحب يقضي الوقت معاها
والدليل انه خلص كلامه بسرعه ف الموقع وطلب منها انهم يرجعوا عشان مواعيده
شمس حاولت تشيله من دماغها عشان تقدر تنام وتستعد لمواجهته بكره
*******************
عدت الليالي صعبه ع زينه كانت مستنيا زيد يرجع عشان تشوف هيعملوا ايه ف البنت اللي شوه وشها
لكنه مارجعش من تلت ايام
كانت قاعده ف اوضتها زعلانه من آخر مره اتكلمت مع أهلها بالأسلوب الفظ
ما اتكلمتش معاهم تاني كانت بتقعد لوحدها طول الوقت ف اوضتها
امها خبطت عليها... دخلت
( ايه يا بنتي هتفضلي حابسه نفسك كده كتير يا زينه )
( ماما لو سمحتي انا مش قادره اتكلم مع حد ف حاجه سبوني براحتي)
( يا بنتي انت بتعاقبي نفسك ع غلطه اخوكي ليه بس)
هنا دخل زين وابوها وقفت وقالت لهم بتصميم
( انتوا عايشين الحياه عادي كده ازاي وف انسانه مستقبلها اتدمر بسببنا )
الاب قالها
( يا بنتي واحنا هنعمل ايه بس ف اخوكي منه لله قبل كده قتل شاب صغير ودلوقتي شوه بنت مالهاش ذنب واحنا برضو مالناش ذنب يا زينه هنعمل ايه بس يا حبيبتي )
( لأ نعمل ونعمل كتير زيد قتل أمير ف خناقه وأمير كان بتاع مخدرات فاشل زيه لكن قمر دي ذنبها ايه يا بابا مستقبلها يتدمر بسببه)
زين نفد صبره قالها بعصبيه
( يعني من الآخر عايزانا نعمل ايه اخوكي غلط وهرب وانا قلبت الدنيا عليه المفروض نعمل ايه عشان نكفر عن غلطته ف حق البنت يعني)
زينه بصت له والحزن مالي عنيها قالتله بحزن
( يعني لو ف ايدك تصلح غلطه تؤامك هتصلحها)
