لهفة عشك

البارت ٤

.......لهفة عشك.....

للكاتبة (zainab) عطر الورد

......البارت ٤........

شمس ...
شفت امي دخلت رحت عليها ركض اريدها اسولفلي عنهم..
ها يمة شفتيهم اتعرفتي عليهم ..
ام شمس ..شبيج موتي روحج..هسة خليني اكعد تعبت واني اسولفلج بس لاتخبصيني..
كعدت امي واني يمها اسالها ..
شنو عائلتهم جبيرة زغيرة وابوية منين يعرفهم..

ام شمس..الرجال صاحب ابوج من زمان يعرفه وكرايبه من بعيد يعني معرفة قديمة خوش ناس امهم مبينه خوش مره وعندها اثنين ولد واحد عسكري مزوج وعنده بنية وثاني موظف بجامعة وعندها بنية مزوجة وحدة زغيرة وخطية عندها بنية ستوها متوفيه..

شمس ..ياا خطية الله يساعدها ...
ام شمس..كومي حظري وياي غدة ابوج ما متغدي ولاضلين تحجين ترة راسي موتني اريد اكل وانام من صبح اشتغل ..صيحي اختج خليها تنزل ..

رحت صحت أديان اجه بابا ضل يسولف عليهم واحنا حظرنا غدة...هسة يلا ارتاحيت جان فضول موتني اعرف منو مهم عرفت🙄..

خلصنه غدة كلمن راح لغرفته اني صعدت اقرا لان بدت امتحانات شهرية ولازم أشد حيلي من بداية اريد درجات عالية بلكي انعفي بدرس بدرسين ..
كملت قراية رحت حظرت ملابسي خابرت لبنى ع كم درس ..اخذت منها بقية دروس ...

مر شهر كامل ع نفس روتين دوام وقراية جنت دائما اطلع من بيت اروح لبيت خالتي علمود لبنى ومناك الخط يوكف النا يوصلنه جنت من اطلع دائما اشوف ابن جوارينه يطلع وياي يوكف بشارع علمود سيارات ما جنت اهتم بيه بس دائما صبح اشوفه بس من ارجع ما اشوفه  ...

ضليت فترة هيج لاحظته حتى برجعة اشوفه احسه يراقبني اني ما اهتميت ..كمت كل ما اطلع الكاه بنفس مكان ينتظرني اصعد سيارة وي لبنى واشوفه يروح حتى من ارجع من وكت كام هذا شي يضايقني احسه عينه عليه ...

مرة نزلت من سيارة وجان جوء حار وسيارة قريبه ع بيتنه نزلت ومحد بشارع وشمس واني تعبانة اريد اوصل بس لبيت لكيته هو بلباب مالت بيتهم واكف من شافني عدل وكفته وضل بس يباوع خفت لا أحد يشوفني ويكول عندها علاقة بيه وخصوصا هو مفضوح بس يباوع ومحد بشارع بسرعة دخلت لبيت وسديت الباب كلت لازم اكول لامي ما اريد واحد بعدين يفهمني غلط ...

بعد ماتغديت ورتاحيت رحت كعدت يم امي اسالها عليهم ..
شمس...ماما بيت ام قائد مو عندها ولد تقريبا أكبر مني ...
امي جانت تشرب جاي من سمعتني هيج احجي خلت جاي ع صفحة وتباوعلي بنظرات استفهام يعني اكمل ..
شمس...ماما احس ابنهم ديتابعني من اروح لدوام ومن ارجع دائما الكاه موجود ويباوعلي ..

ام شمس..ابنها بشار هو موظف بجامعة بس خوش ولد وماشفنه منهم شي ..
شمس..ما اعرف احسه يراقبني ..
ام شمس..معليج بيه ولاتباوعيله لا اصير سالفة ..
ترة ام قائد مرة وكحة هسة عندها مرت قائد يومية عركة وتشكي منها ...
هم جوارينه مانريد مشاكل انتي دائما يجوز اشوفينه عبالج يباوعلج..