مساء الخير متابعيني ابدي وياكم بقصة جديده حقيقيه من احد صديقات البيج اتمنى تنال اعجابكم
#غفران
من جنت صغيرة واني اشوف امي طريحة فراش
نايمة دوم ومريضه ومن دكتور لدكتور
ابوي جان رجال عصبي وجان دائما يذمر
من امي
دائما يكول الله بلاني امره عليله
وجان دوم يهدد امي يتزوج عليها
وامي المسكينة لا حول ولا قوه
بذاك الوكت جان عمري عشر سنين
كلش زين اذكر من ابوي طبب مره النه للبيت
وكال هاي هدية اطوني اياها كرايبي
جانت امكيجة ولابسة ثوب كله خرز وبلك مثل ثوب الممثلات اليطلعن بالتلفزيون
من شافتها نامت ع وجها وماعاد كامت
جنت احجي وياها يمة كومي يمة
بس ماجانت ترد علي
كل ضني نايمة لو زعلانه لان ابوي جاب مرة عليها .
بس طلعت امي نطت وماتت بنفس اليوم الي ابوي تزوج عليها
امي جانت مريضه بمرض السل
عافاكم الله
جان هذا المرض هاد حيلها كله
واكلها اكل
الى ان انهبطت وماتت
وتركتنا اني واخواتي واخوي الصغير .....
اني غفران من مواليد ٨٠
جبيرة اخواني
اخواتي اصغر من
ايمان مواليد ٨٢
وعبير مواليد ٨٣
اما اخوي جواد مواليد ٨٨
تركتنا امي صغار كلشي منعرف بالحياة
عشنه اتعس ايم حياتنا وي مرت ابوي لينه
من يوم الطبت للبيت وهي كارهتنه وهاملتنه
جنت صف خامس ابتدائي
بس بطلتني ماقبلت اداوم بحجة اخوانج منو الهم
شكد توسلت باابوي ابقى اداوم لان جنت هواي احب المدرسة وشاطره
بس مقبل كال اخوج يبجي عليج من ترحين متعلق بيج ومايريد غيرج
بعدين شسوين بالمدرسة اول ع تالي امبطلج
اتركي من هسه احسن اهوانج محد الهم
كتله وخالتي لينه مو موجوده
خالتج حامل وكافي عليها شغل البيت
ترديها تركض وره اخوج
انت اكعدي داريه
كلش انقهرت بوكتها
كابلت جنطتي الجانت امي مخيطتها الي بيدها
من بنطرون كابوي قديم
بجيت يمةة ليش عفتيني ورحتي
ابوي بطلني من المدرسة
جانن ايمان وعبير يباوعلي
ليش تبجين
ابوي مايرضى اداوم بالمدرسة
واحنه هم ميقبل
لا انتوا بقيتوا بس اني بطلني
اي همزين احنه بقينه
جانت المدرسة متنفسنه الوحيد
نطلع من جو البيت ومن خالتي لينه
الي نهار كله تعيط علينه
شلين وخلن واكنسن وامسحن
واحنه جنه نسوي بسكوت كلشي تطلب من عدنا
صح ماتضربنه
بس احنه نخاف كلش منها
من تعصب تخزر عيونها وتعض اصبع ايدها
وتصرخ اني الجن اليوم اكلجن اكل .
احنه نخاف بسرعة نسوي الي تريده .....
تركت المدرسة وبقيت بس اداري اخوي جواد
جان متعلق كلش بيه ينام بحضني
واله اني اوكله واشربه بيدي
مجلب بثوبي ليل نهار
جنت احس اني امة وهو طفلي ومثل لعابة اداريه
رغم صغر سني بس تعلق جواد بيه
جانت بيبيتي ام ابوي دائما تجينه
لو ادز علينا وابوي يجي ياخذنه الها
بيبي جانت مره قوية ونشطه
بعدها بحيلها
جانت تحبنة هواي
وادئما تسئل خاف تضربكم لينه
لا جده بس تصيح علينه ونوبات تخزرنة بعيونها
_كون الفكس بعيونها
ليش تخزركم شمسويات
_مو بيبي تريدنه انضف الها
_جا هي شبيها مكسره اديها شنو
_لا دكول حامل مااكدر انضف
تخاف ع الجاهل الي ابطنها
_شني معلك بدبوس وتخاف علي
جنت حامل بابوجن واروح احش
واحلب واخبز والبيت كله ع راسي
شو ماصار لبوجن شي
شو تالي طلع مربرب تربرب وشحلاته
نسوان تالي وكت اتنغوص
_هههههههههه
_يا شمالجن تضحكن
_بيبي صدك اتنغوص هي ودوم خاله ايدها ع ضهرها
ودكل لابوي ضهري يوجعني
وابوي يرجع علينه
كومن نضفن المره حبله
_اي مو متعجب اول طفل راح يجي
سوده علي
صجيجة كون للغمان
خرب هالولد كلش مدري شمسويتله
اضنها مسويتله سحر
كل شخصية ماضلت عده شدكله يكلها تم
جا شو امجن شبعت ضيم المكروده لحد ما سللهم وماتت
هي هم حضوض
دكومن بيبي كومن جبت الجن ملابس
ستوهن جبتهن من الخياطة ام سوسن
كومن كدرنهن والبسنهن
وذبن هاي الخلاكين
شني ماعدجن غيرهن
غفران : بيبي من ماتت امي صار سنه لليوم احنه محد مشتريلنه ملابس
وكبلها امي مريضة ماتطلع
_جا ابوجن شماله
_ابوي ملتهي وي لينه يجيب ويحط الها
ملابس واحنه النه الله
اطيت هدوم المدرسه مالاتي ليمان اداوم بيهن
وايمان اطت هدومها لعبير
داومت بيهن
_يجي ابوجن واني احجي وياه
دكومي بيبي افتحي البوفيه
ولبسن هديماتجن
لهسه اذكر فتحت بوفية بيبي وطلعت الملابس
جان لونه احمر وبي ورده جبيره زركة
جان بارد كلش قماشه
لبسته وكمت افتر ممصدكه لابسه ثوب جديد
رغم ابوي جانت حالته زينه بس جان حارمنه ومايشتريلنه ...
فرحنا كلش بالدشاديش الجدد
وحتى لجواد مخيطه بيبي بجامة وقميص
كالت بعد مااوديجن يم لوينه
ابقن يمي
بيبي كاعده بنص بستان وجان عمي الصغير سمير عمره ١٥ سنه مامزوج
وعندي عمه هم صغيره
وجدي عدل يشتغل فلاح بكاعة
جان بستانهم كله نخل وسدر وزارعين ركي وخيار عطروزي
جانوا خير عدهم
من كالت بيبي ابقيكم كيفنا
بس المدرسه شلون بعيده ع بيت جدي
تمنيت انضل يمهم ومانروح
هنا بيبي مدللتنه
بس ابوي من اجه حاجته بيبي ماقبل
_لا يمة مااكدر مناك المرة وحدها بالبيت
_يا جا المره جاهل وتخاف عليها وحده
مره شكبرها وشكدها وتسد بابها وتكعد
عوف البنات وجواد عدي
موش مسويتهن خدم لوينه يمها
_يمةة رحمه لموتاج خليني اخذهم وامش المره مناك وحدها
_خايب شجاك كل كلمه والمره والمره
شو دول والبنيات يضل عدي مااطيهن
_يمةة مو عدهن مدارس يعني ابطلهن
ولجن تردن تبطلن
صاحن ايمان وعبير
لا بويه لا
جا امشن
بيي ضلت تحجي ع ابوي وتتوعد ال لينه اذا اذتنه
_وحك علي لينه اذا تدنت الهن لو اسمع بيها تخدم عليهن
اجي اسحلها سحل من البيت
شني السالفة يمةة تره لينة يتحبهن ومداريتهن مايوم مدت ايدها عليهن
جا انت تصدكين الجهال
_عوزها تطكهن اكسر ايدها
وكلها لا تخدم عليهن
_يمةة هي ماتخدم عليهن بس اخوهن جواد متعلق بيهن ومايريدها
تكلهن كضنه
_اكلك انت شني صاير الها محامي
الطرن صاير خركة بيت مرتك
امداك خايب 🙌
_شبيج يمةة
اسسس وشبت بيك
انه كتلك ونبهتك وانت كيفك بعد
_كومي ولج غفيره يله جيبي خواتج وتعاي امشي
خفت من نضرة ابوي الي كلت هسه اوصل ويكتلني عباله احنه شكينه لبيبي
طلعت اني واخواتي
واخذنه ابوي ورجعنا للبيتنا
ابوي طول الطريق يغلط ويسب بينا
انه اعلمجن شلون تشكني لامجن
ايمان :-بويه والله ماحجينه شي لبيبي
هي وحدها كالت هيج
-كافي ولج تقشمرني بعد بيبي ماتشوفنها اله احرمجن من الطلعه من الببيت
وصلنا للبيت وتلكتنا ايمان بطنها لخشمها يله بساع طبن للحمام اغسلن الهدوم مكومة
كعدت اني وايمان لهسة اذكر اني اغسل وهي تشطف
وعبير تشر ع الحبل
كل مانريد نخلص تجيب وجبه جديده
جنها تطلع حيفها بينا
وتنكعت هدومنه الحلوه الجابتهن بيبي
خلصنا بالف ياعلي
انوب لزمنا المواعين
بيومها نمنا ميتين تعب
شكد ارتاحينا يم بيبي طلعت من خشمنا الطلعة
وللحكاية بقية
ام مصطفى
النشر يومي عدا يوم الجمعة استراحة
