#غفران
للكاتبة ام مصطفى
البارت الثالث
وره يومين اجت بيبي النه محمله غراض اشكال الوان
هدوم وقراصات وحلويات وحتى عبي جايبة النه
طرنه فرح بيها
هاي كل ماتجي تجيب اشكال الوان النه
كعدت بيبي وفكت جيسها وكامت توزع
تعاي امينه هاي من عمتج امل الج ثياب وملابس داخليه سمعت بيج راح تعرسين ودزتهن الج
من كالت هيج بيبي عرفت هي وافقت تزوج ايمان
اندارت علي وينج غفره بيبي
-ها بيبي
-تعاي يبعد كلبي وجلاويه شوفي شجبتلج
شنو بيبي
فتحت الملابس كوستم تنوره وقميص لونهن جوزي
هاي الج بيبي جبتلج كوستم من عمتج ودته الج
وهاي دشداشه خيطتها الج
وحتى قندرة جبتلج هاج خاف دكولين بس لايمان
دنكت ع ايدها بستها بيبي ربي يخليج النه
شكد فرحت بيهن ممصدكه راح البسهن كلش حلوات
رغم ابوي حالته كلش زينه بس مايوم اشترالنه شي ولا تطانه فلس
بيبي كل فتره هي تجيب النه
عمرنه ماطبينه سوك واختارينه
ولا طالعين لغير بيت جدي
خوالي من ماتت امي كطعوا علاقتهم بابوي
ماعدنه غير بيبي حنينه علينه وتشترينه
جانت خالتي لينه تعاين علينه
وبيبي توزع بالملابس النه
جانت حصة الاسد مثل منكول
كلها لعبير اشكال جايبه الها حتى لعابة جبيره
حضنتهن عبير وراحت للغرفه لبست وطلعت تغور بلينه
هي ماعايزه تلبس اشكال الوان لينه
بس تموت اذا شافتنه لابسين شي حلوه
ونطلع احلى منها
عبالك جاهل تقارن روحها بينه
ابوي جان موهنا
بيبي كومت خالتي لينا
-كومي منا جبح هالشوفه كومي سويلي جاي
-شبيج حجيه شسويتلج
-وشبت بيج شمالج مكابلتنه وكاعده اكلاص مي ماحطيتي كبالي ماتعرفين الاصول شني
كومي يله
كامت تدردم لينه بينها وبين نفسها
اندارت ع عبير
عبيييره كومي اخذي اخوج واطلعي عدي حجي وي اخواتج
اي بيبي صار
سدت الباب وردت كعدت
-تعالن جده كبالي
ايمان بيبي ام بلال رايتج لابنها عامر
وانه الصدك طرت فرح ابنها خوش زلمه
ومخلص مدرسة ابغغغداد
خايبه الف وحده اتمناه
-بيبي بس انه مااريد اتزوج
-اشش شني هاي ماتردين تزوجين شعدج ضاله تخدمين لوينه
لا بيبي موش صحيح هالحجي اتزوجي وافتحي بيت جده وصيري سباعيه
سكتت ايمان
اندارت علي
غفره بيبي عليش ماتردين تزوجين
ابوج يكول هي ماتريد اتزوج
رغم ابوي ماسائلني
بس كلت الها
-اي بيبي مااريد اتزوج اخواني صغار اداريهم اريد
لا بيبي مو صحيح
بس يجيج واحد مثل عامر ازوجج
وان جان ع جواد وعبير مالج شغل
اخذهم عدي
لا بيبي مااريد
اسسس انه من احجي انتي كولي صار
صار بيبي
كمت
وين كايمه اسويلج غده بيبي
جا ولوينه شني شغلها
بيبي احنه علينه الغده شعلينه بيها
وجن اني مو كلت لا تخدمنها
بيبي نخدم نفسنه احنه يعني ماناكل
اخخخ منجن عوبات ميفيد الحجي وياجن
اجه ابوي من شغله
سمع صوت بيبي بسرعة طب الها
هله يمة هله
هله بيك اطته ايدها باسها
خالتي لينه لا اول ولا تالي طبت ويانه تطبخ وتصب بالغده صدك الخوف يعدل الشوف
مدينه السفره
وبيبي كعدتنه ناكل
كالت لابوي
-فلاح دز خبر لبيت ابو بلال احنة قابلين
وخل يجون يخطبون
-ها يمة رضيتي بيهم
اي جا ليش خوش اواد
ان شاء الله افرح بغفران
-الله كريم يمةة هسه خل نزوج ايمان وانوب غفران
شلنا الاكل الزايد وكمنا نغسل مواعين
لينه تطب وتطلع ادردم ع بيبي
لكفتها عبير
هيي هي شبيج تحجين ع بيبي تره والعباس اروح اكلها
كرصتها من ايدها اسكتي بله مشاكل
عوفيني شني تحجي ع بيبي واسكت الها
صاحت لينه
وانت ياهو اليم بيبيتج اني وحدي احجي
خافت لا تصير مشكله
جانت كلش تخاف من بيبي وتكرها
عافتنه وطلعت
الله يستر هسه اضمها النه من تروح بيبي
شحدها
اسكتي انت ام المشاكل
العصر ابوي دز خبر لبيت ابو بلال يجون يخطبون
كالو يومين واحنه يمكم
بيبي اخذت ايمان للحفافه حفتها واجت
ماعرفناها طلع وجها
وثاني يوم لبستها دراعة بيبي جايبتها
كلها بلك وخرز حمره
وحلت شعرها
اجت عمتي امل مكيجت الها
طلعت تخبل
للعصر صارت الكعده وخطبوها
طب عامر
صدك حلو طول وهيبه ولبسة حلو
تعجبنه بيه
عقدوا الهم
وام بلال طايره فرح بايمان
وكفت بالنص وكامت تهوس
(انه امك جبتلك الخيار وبيضة والحلك جمار انه امك ) وكلها تهوس وياها
فرحت كلش لاختي ايمان احساس حلو
صدك خلي تخلص من لينه وعيشتها
خل تطلع من سجن ابوي
كمت اباوع ابجي الله يسعدج حبيبيتي
(للكاتبة ام مصطفى )
خلصت الخطبه
وبيبي راحت
جانو مستعجلين ع العرس الولد ماعنده شي مجهز كلشي
اجت ام بلال اخذت ايمان وراحت تشتريلها ذهب
فرحتلها من كل كلبي اختي
للعصر كلش رجعت ايمان
محمله اشكال الوان وطايره فرح
تحجي وماتسكت
وج غفران فرحانه فرحانه الله عوضني
عامر خوش ولد كلي شتردين اخذي
بس اني استحي
وبيبي ام بلال اشترتلي
تعاي شوفي الذهب
جان محبس وحلقه وتراجي وكلاده
كلش حلوات
فتحت بقجت الملابس شوفي
اشكال الوان مشتريلها
الله يخبلن هذن ايمان
انت اختاريتيهن
لا ولج بيبي ام بلال وعامر
اصلا اني ولا حجيت كلمه بس اهز راسي
حتى عامر يكلها خاف خرسه
دكله لا تستحي
بس هو شكد خوش ولد حنين كلش
يكلي شتردين بس اشري
اه يخبل
ها ولج عيب شو طلعت عينج
ماادري غفران احس احساس حلو اتجاها
فرحانه كلش
يوم الاج وتفرحين وتحسين نفس احساسي
حبيبي ربي يفرح كلبج
صدك بوكتها حبيبت اعيش احساس ايمان
وتمنيت تصير ملابس وذهب عندي مثلها
بس من اذكر جواد
اكول مااعوفه لا لينه تستفرد بيه منو اله
جهزت ام بلال كامل جهاز لايمان
ومرت بسرعه ايام الخطبة
واجه اليوم الي افترق بيه وي اختي ورفيقة طفولتي ايمان حبيبتي
من الصبح اخذوها للصالون
واني التهيت بالبيت خطار كام يجينه
جنت اتمنى اروح وياها وواكف الها بهيج يوم
بس لينه ما رضت كالت ياهو للخطار
التهيت اركب وانضف
لينه حفت وصبغت ولبست
وانه بوصخي غاطة بالشغل اركض هيج واجي هيج
ماحسيت ع الوكت
لحد ما طبت ايمان شفتها ابدلة العرس
طالعه تخبل جنها لعابه
شافتني وبجت
شلون اعوفج وحدج
لا تبجين امونه شبيه جا اني
شلون شبيج شوفي حالج
تركضين وحدج
ميخالف اركض الكم مو الغربه
حضنتني وبجت انت امي وانت اختي وانت صديقتي غفوره مدري شلون نجازيج
بيبي بجت علينا
شافتني مالابسه لهسه جرتني
امشي اسبحي وبدلي يله
بيبي بعدني مامخلصه المطبخ
كامت اتجت ع عوجيتها
وطبت لغرفة لينه
وطكتها بالعوجيه كومي ام الوسخ
كومي نضفي شني خدم عدج
كامت لينه ادردم
وبيبي تغلط عليها
وعبير تضحك مكيفه حللل
دفعتني بعوجيتها امشي طبي اسبحي
مالج شغل انتي
اخذت كوستمي الجوزي الجابته بيبي
وفتت سبحت
ولبسته مشطت شعري ولبست ربطه
واسمع صوت المزيقه ادك
كالوا اجو اجو
روحي راحت راح تروح اخيتي ايمان
كامت عيوني تجري دموع وحدها
البد من ايمان مااريد اشوفها وتشوفني
طبوا
وطب عامر وياه سيد لابس عباايه وغتره سوده معكل
كوموا ايمان وطلعوا
صعدوها بالسياره
واحنه هم صعدنا بكوستر
شكد بجيت طول الطريق ابجي
والنسوان تركص وتهوس
ويأشرن علي اخت العروس تبجي عليها
وصلنا لبيتهم
جان جبير كلش
لكينا العرسان واصلين كبلنه
اجيت كعدت يم ايمان شافت عيوني وارمة
بجت هي هم
كافي امونه لا تبجين
ابجي عليج
شعلي اني ماعلي شي لا تخافين
عبير ام لسان وياي وضحكت الها
بيبي شافتنه كومت عمتي امل النه
وجن شبيجن كلبتنها فاتحه
كافي مايصلح
وجن احمدن الله تخلصن من لوينه
المن ضالات للخدمه
كافي ايمان وج صرتي جنج سعلوه
وعامر بس يشوفج يختلس
اطيني وصله
لزمت وصله ومسحت الكحلة السالت ع خدودها
وكامت تضحك بيها
شويه وصبوا العشه
وراها زفوهم لغرفتهم
صعدت ترجف ايمان وعينها علي
بقت بيبي باتت يمها هاي عوايدنه قبل الام تبات يم بتها
بس احنه ماعدنه ام بيبي باتت
وردينه احنه للبيت
من رجعت شفت مكانها وفراشها فارغ
شبعت بجي الليل كله ابجي عليها
شلون راح اتعود ع فراكها ماادري
وللحكاية بقيه
ام مصطفى
