#غفران
البارت الثاني
للكاتبة ام مصطفى
وبيوم جنة نايمين بالليل
ونسمع صوت لينه تصرخ وابوي نخبص
بقيت بمكاني جامده ماتحركت
بس اسمع شكو خفت لا تموت مثل امي
بعدين ابوي يحجي وياها سمعت ان شاء الله تجيبين وتكومين بالسلامة
عرفت هي تطلك
واخذها ابوي صعدها بالسياره
ورجع ندهني
غفيره وج غفيره
-ها يابة
-كومي سدي الباب وراي ولا تفتحينه اله تسمعين صوتي
-وين رايح بويه
-خالتج لينه تطلك وماخذها للجده ام كريم
لا تنامين ضلي مناطره لحد مانرد
-اي صار بويه
طلع ابوي وكمت سديت الباب وراه
ضليت كاعده ع فراشي
نعست واخذتني النومه
واسمع الباب يريد يتفلش
طفرت اركض
فتحت الباب وابوي تفل علي
-احتركوا اهلج مو كتلج لا تنامين
-يابه اخذتني النومه
-وخري هسه خل تفوت خالتج
فاتت لينه واختها شايله الطفل
وابوي يمشي بيها ويدردم علي
دخلوها لغرفتها ورد علي
-لزمني من اذاني
-صار ساعة ادك باباب شني تنبل مال نوم
مو كتلج ضلي كاعده
-بويه والله مدري شلون غفيت
ضربني ع راسي وكال
..ولي يله سوينه جاي
ايي اي بويه صار
حطيت القوري ع النار
جان ستوه الفجر يطر
طلع ابوي ولينه ماسمعت حس الها
واختها ماطلعت من غرفتها
ابوي شويه ورجع
جايب كيمر عرب صينيه
وصمون حار
كال خلص الجاي
اي ابوي
خليه بصينيه وحطي الاستكاين
خليتهن .وشال الصينية وراح
شويه سمعت صوت الطفل يبجي
رحت تقربت يم باب الغرفه اسمعهم يحجون
واختها دكله يشبه لينه حلو الولد
عرفت جايبه ولد
اني احب الجهال كلش تمنيت الزمه وابوسه
بس ماطبيت اخاف
لينه محرمة علينه طبت غرفتها
الي هي غرفة امي جانت
..........
بقت زينه اخت لينه يمنا كم يوم وراحت
بهاي الايام البقت زينه جانت تطبخ وتخبز النه والباقي علينا نكنس ونعزل ونغسل مواعين وهدوم
كله علينا
من راحت لينه كامت تطبخ هي
مره كاعده تطبخ وسمعت صوت حيدوري يبجي ركضت شلته وبسته
فدوه يجنن جنه لعابه
مدنكه عليه وبوس بيه
ومااحس اله ضربه قويه ع ركبتي بالمس مالت التمن انكطع نفسي
وصرخت
اخذت حيدر مني ودفرتني برجلها
فوك مااني مكطوع نفسي وهاي اول مره تضربنه
كالت شوفي لو اشوفج لازمه ابني انوب اموتج خلاص
كومي وسخه كومي اطلعي من الغرفة
اريد اكوم مااكدر احس نفسي انكطع وركبتي انكسرت
اشر الها اوكفي اوكفي
وهي تصيح اطلعي
اجت ايمان وعببر كامن يجرن بيه
طلعت بالحوش
شبيج غفوره
بس اباوع الهن وابجي
من يومها بعد ماتقربت الحيدر
بس من بعيد
كامت تطلع النه حضاين حيدر نغسلهن
بوكتها مجانت اكو حفاضات
وجانن كلهن اوساخ
وتجبرنه نغسلهن
واحنه صغار تلعب نفسنه
بس مجبورين
ومرت الايام اتعس ايام لا شفنه طفوله ولا راحه
بيبي اجتنا كم مره تشوفنا
من تشوف بيبي لينه تسوي روحها حنينه علينه وتحبنه
اخر مرة اجت بيبي جانت عطلة
وكالت ترحن وياي
ابوي مارضى
بس بيبي اصرت نروح
وابوي يخاف منها سكت
كيفنا احلى فرحة عدنا هي روحتنا يم بيت جدي
بيبي تحبنا وتدارينا وبيت جدي جبير
نطلع للبستان عمتي امل تموت علينه
جانت كلش حلوه عمتي ومخطوبه بوكتها لابن عمها
