في المستشفي
لجين: انت ياضياء..معقولة تخون ربا😒
ضياء: أقسم بالله فهمتو الموضوع غلط يالجين 😣
لجين: شن فيها من غلط امقعمز انت والهانم وفمك بينشرك من الضحك 😒
ضياء: تي هاذي.....
الدكتورة: وين زوج المريضة؟!
ضياء: أني أني...
الدكتورة: لو سمحت وقعلنا ع الاوراق...المدام بندخلوها للعمليات
ضياء بخوف: عمليات شنو!!😨 مازال موعدها قاعدة في الثامن هيا
الدكتورة: الباين ولادة مبكرة..ضروري نولدوها
ضياء قعد يخبط علي راسه:تي كيف بتولدوها في الثامن...ممكن يصير فيها شي
الدكتورة: لو قعدت اكثر حيكون في خطر علي حياتها
لجين: خلاص ياضياء بالله عليك وقع😢
ضياء مش عارف كيف يتصرف: باهي وين تبوني نوقع
الدكتورة: تعال معاي
امشي ضياء مع الدكتورة وقع ع الاوراق المطلوبة ورجع مضايق...
لجين: ها شن صار؟!
ضياء بحزن: كيف دخلوها...لو يصير فيها او في البيبي شي مش حنسامح نفسي نهائي 😩
لجين:علاش الخيانة ياضياء...ماسد البنت متغربة علي اهلها وانت تزيد فيها
ضياء: يالجين انتي تعرفيني كويس...وعارفة قداش نحبها ربا ومستحيل نخونها
لجين: بس اللي شفناه غير هكي😒
ضياء: غير خلي توا تنوض ربا والبيبي بالسلامة وحنفهمكم كل شي...
~~~~~~~~~~~~~~~~~~~~
فتح همام باب الحوش ينادي :يام يام
طلعت نعيمة من المطبخ تنشف في إيديها: أهلين...خيرك تبي شي!!
همام: علاش ماترديش علي تليفونك ليا ساعة نرن عليك 😒
نعيمة: كنت في المطبخ والله ماانتبهت
همام::باه شن صار؟!
نعيمة بااستعباط: في شنو؟؟
همام: لا خلاص شي سلامتك 😑... وركب الدروج متنرفز
نعيمة تضحك: كلمتها وماردتش عليا..
وقف ونزل يجري: هاشفتي معناها في حاجة كبيرة صايرة
نعيمة: الله أعلم ممكن 😕
همام: خلاص بعد العصر نرفعك غاديكا وشوفي الموضوع😉
نعيمة: نعم..والله العظيم ماني هاوياته بالك مشكلة خاصة بيهم.شن دخلني أني😱
همام: بس..
نعيمة: لا بس ولاخس..وبعدين انت شن سر هالاهتمام بيها مش ع أساس قلبها أسود شن صار توا !!😒
همام: لا اهتمام ولاشي...قتلك كله علي خاطر العمل
نعيمة: اي صدقتك 😑
همام اتنرفز: وااو هالحوش هاذا الواحد يتكلم كلمة يحصل...ركب الدروج يبرطم
علي جية عزام من برا: تي خيركم صوتكم واصل لبرا؟! 😨
نعيمة: هاذا خوك وتصرفاته الغريبة العجيبة ؟!
عزام: خيره!!!!
نعيمة إتكت علي الدرابزين في نهاية الدروج : .مش ملاحظ ان همام متغير هلبا علي قبل...وطلع من القوقعة اللي كان حابس نفسه فيها 😕
عزام: أه... اي صح
نعيمة: حتي علاقته بجنى تحسنت نوعا ما
عزام بتفكير: اي صدقتي يام
نعيمة: ومش ملاحظ ان هالتغير صار من وقت إشتغل مع لجين
عزام: فعلا..قداش ليا ماشفته مبتسم او يضحك..بس توا مرة مرة نشوف فيه
نعيمة: باه وشن تفسيرك لهاذا كله😉
عزام: شنو 😕
نعيمة: شكله قلبه تحرك من ناحيتها 😉
همام من فوق: قلنا شغل شغل باش تفهمو إنتم😡
نعيمة وعزام من الخلعة تشرتعو كل واحد امشي لمكان 😂 نعيمة للمطبخ وعزام لداره
~~~~~~~~~~~~~~~~~~~~~~
أنت تقرأ
نسيت أنساك.
Roman d'amourالجزء الثاني لقصة ياريتني.. القصة الأصلية موجودة ف صفحة عالفيس اسمها قصص من عالمي. #منقولة
