وصلو للمستشفي...
همام قام علوش الصغير: انتي اقعدي اهني ماتنزليش
لجين: لا لا مانقدرش..بنمشي معاك 😢
همام: وين بتنزلي بمنظرك هاذا😨
لجين انحرجت: باه اتصل بيا طمني...
همام: اوكي...نزل من السيارة وخش بسرعة للمستشفي...
لجين علي نار حاضنة عبودي وتدعي من قلبها إن علوش يكون بخير...
رن تليفونها وكان همام ردت بسرعة: ها شنو طمني 😢
همام: اهو فاق ماتخافيش..وقاعد يعيط معاها
لجين خنقتها العبرة: بالحق 😢 بالله عليك ماتكذب عليا...هوا كويس
همام: والله العظيم اهو فايق قدامي😳..حاطيله التنفس الاصطناعي..قالو أقل شي ربع ساعة..
لجين تنهدت براحة: الحمد لله ياربي الحمد لله
همام: سكرو الباب كويس من داخل...شويا ونجيكم
لجين: اوكي
قعدو يستنو اكثر من ربع ساعة لين عبودي رقد في حضن أمه...
طلع همام من المستشفي ومعاه علوش اللي كان راقد حتي هوا ....
فتح باب السيارة: شن رقد عبدالله؟!
لجين هزت راسها بأيجاب...: وبخوف: علاش ساكت علوش؟!
همام: اشششش خليه راقد بهدلنا لداخل...حطه ع الكرسي الخلفي في السيارة.. وركب شغل السيارة وانطلق لحوش لجين...
قبل مايوصل وقف علي محل نزل جاب امية للجين: هاك اشربي ريقك انشف من العياط أكيد
لجين بخجل: شكرا...بارك الله فيك
همام: العفو....
وصلو لقدام العمارة وكان ضياء واقف وباين عليه القلق والخوف..انصدم لما شاف لجين نازلة مع همام: لجين 😳 وين كنتي وشن اديري مع هاذا؟!
لجين ارتبكت: ضياء...ماهو...ماهو
همام مد علوش لضياء: كنا في المستشفي.. ولدك شرق وغاب عليه النفس
ضياء يشوف لولده بخوف: كيف 😨
لجين : أني السبب أسفة 😢
همام : حصل خير..المدام لجين ماعرفتش كيف تتصرف اتصلت بيا
لجين: والله اتصلت بيك ضياء كان مقفل وللوش ناسية تليفونها اهني😓
ضياء: لاحول ولاقوة الا بالله.. همام سامحنا تعبناك
همام: ولايهمك.الحمد لله ع سلامته.. هي تصبحو علي خير
ضياء: تلاقي الخير
~~~~~~~~~~~~~~~~~~~~~
رجع همام للحوش...اول مافتح لاقاته جنى تجري وتبكي...
قامها همام: علاش تبكي؟!
جنى: نبي نتفرج علي ماشا اميمة ماتبيش 😢
همام: أكيدة موعد مسلسلها التركي 😒 تعالي نشوفوها....
خش للصالون: السلام عليكم
نعيمة تتفرج ع التلفزيون بتركيز : اششششش
همام: تو من جدك يام مخليا جنى تبكي وماتبيش تحطيلها ع الكرتون
نعيمة شافتله بنص عين: ومن امتي هالحنانة علي بنتك 😒
همام: يعني لاهكي عاجب ولا هكي عاجب😑
جنى: إميمة نبي ماشا أني 😢
نعيمة: اووووف علينا مانتفرجو علي شي معاكم شوره...ديما وانتي ع الكرتون هي ساعة بنحضر فيها هالمسلسل ماتريحونيش ... وانت وين لتوا؟!
همام: كنت مع لجين
فنصت نعيمة عيونها: نعم 😳 شن حسك قولت ؟! ساوت تقعميزتها وقابلت همام....
جنى استغلت الفرصة ومشت تجري خدت الريموت وحطت علي ماشا 😂
همام: التفكير الخبيث فكينا منه يانعنع 😒
نعيمة: تو شن قلت أني 😒 نبيك تفهمني شن كنت ادير عند المراة في هالليل
حكالها همام علي صار...
" طبعا أكيد ملاحظين العلاقة الحلوة بين نعيمة وأولادها...احترام وصداقة وتفاهم لدرجة يحكولها في مشاكلهم وأسرارهم بكل بساطة...لانها تسمعلهم كصديقة مش كأم"
أنت تقرأ
نسيت أنساك.
Romanceالجزء الثاني لقصة ياريتني.. القصة الأصلية موجودة ف صفحة عالفيس اسمها قصص من عالمي. #منقولة
