ابتسمت لجين بخبث وفي عيونها نظرة تحدي لهمام : أهلا استاذ عمر
همام: 😨...مازادهاش ولاكلمة...خبط الكرسي في جنبه وطلع...
عمر: مساء الوردات
لجين: نعم..أه..قصدي مساء الخير
عمر: أسف إني ازعجتك...بس كنت نبي نسألك علي بعض الحاجات بخصوص الشغل
لجين حست بالموقف البايخ اللي حطت نفسها فيه: أه 😓..ضروري توا
عمر: لو مافيش مانع
لجين: اني مش في الحوش توا...ممكن نأجلوها..والا نقولك خليها غدوة نتصل بيك ان شاء الله
عمر: عادي مافيش...وسامحيني بالله لو ازعجتك
لجين: لا عادي ولايهمك
عمر: تصبحي علي خير
لجين: تلاقي الخير..سكرت وهي تلعن في نفسها مية مرة..تبي تغيط همام..لكن مش علي حساب نفسها
صبت لجين العصير ورجعت للدار...
نعيمة: صحيتي ابنيتي تعبناك
لجين: تعبك راحة ياخالتي
بعد ماروحو...همام ممتد علي رجلين أمه سارح وعيونه في السقف...
نعيمة: انبدري كلمت عزام ماردش عليا خيره؟!
همام:......
نعيمة: نكلم فيك 😒
همام: أه...نعم يام
نعيمة: وين سارح !!!
ساوى همام تقعميزته: يام من الاخير نبيك تساعديني
نعيمة : في شنو اللطف 😕
همام: في موضوعي مع لجين.. نبي نعرف اميتها وين تصب..جننتني برفضها وبتصرفاتها 😖 معاش فهمت شيء
نعيمة بشماتة: تستاهل..واللي اديره فيك شويا😁
همام: اول مرة نشوف عزوز ديما واقفة مع كناينها 😒
نعيمة: غير خليها توافق قبل 😂 بعدين نحسبوها ع الكناين
همام: يام 😖
نعيمة: باه ها سكتنا 🙊😂
همام: يام نتكلم بجد راه...فددتني..تكلمت معاها بشكل صريح وقلتلها نبيك بالحلال
نعيمة: اشيه اشيه...من ورايا 😏
همام: هاذا اللي صار يام...المهم نبيك تساعديني عارفك قدها 😉
نعيمة تمثل قلة الحيلة : منو أني 😩 يافرقت حالي 😂
همام: عليا أني يانعنع 😒... لو فعلا مافي قلبها شيء إتجاهي خليني ننسحب بهدوء علاش نضايق فيها😖
نعيمة: خلاص اوليدي خلي الموضوع عليا ونجيبلك الاكيدة وعلي قولتك لو هي مش موافقة عليك ربي يهنيها
~~~~~~~~~~~~~~~~~~~~~~
ربا والاء مقعمزين في شقة لجين يتفرجو علي فيلم...
لجين تساعد في عبودي في كتابة واجبه: مش هكي الكاف 😖
عبودي: الابلة هكي دارتهولنا 😒
لجين: اوووف ع العناد 😑
ربا: علوش يلا خلصني وهات إيدك 😖
هرب منها علوش يجري ويضحك...
ربا: اووووف حيجنني
ألاء تلاعب في عيوش وتضحك: منظركم يشجع ع الزواج والانجاب الصراحة 😂
ربا: لو بتسمعي كلامي لسا بكير ع الزواج وسد النفس 😖 عيشي حياتك وبعدين فكري بالزفت الزواج😏
لجين: 😂 ماتسمعيش كلامها...أحلي شيء لما تتزوجي شخص تحبيه وتعيشو الحياة بحلوها ومرها مع بعض..صح مش طول الوقت فرح وحب وأحلام وردية زي مانشوفو في الافلام والمسلسلات التركية وضروري من شوي نكد ومشاكل لكن صدقيني بالتفاهم والحوار كله يمشي...
الاء: تعرفي يالوجي من طول عمري ندعي إن ربي يرزقني بشاب زي علاء الله يرحمه حنون وطيب ونيته صافية...والحمد لله ربي استجاب لدعايا
لجين عيونها دمعو: مافيش حد زي علاء..علوش حالة خاصة وصعب تتكرر
ربا: صحيح...بس أكيد في ناس بتشبه لعلاء في حنيتو وطيبتو ولو 1%...لوجي لا تدفني حالك بالماضي ويضيع حاضرك ومستئبلك
لجين تتهرب من الموضوع: عبودي مش هكي الكاف قلنا 😡
ضرب تليفون ألاء وكان عزام....حطت ألاء عيوشة في حضن أمها وامشت تجري للبالكونة
ربا: يييييييي ماأحلا الحب 😍... اشتئت لضياء خليني اتصل فيه 😁
ابتسمت لجين بحزن...تنهدت ومسحت علي شعر عبودي: ها وين وصلت !!!!!!
~~~~~~~~~~~~~~~~~~~~~~~
ألاء: مساء الخير
عزام بصوت مش واضح: مساء النور
ألاء: خيره صوتك 😕
عزام: راقد علي بطني 😖 عييييت
الاء: 😁 معليش تحمل هالايام لين تصح
عزام: حاضر انتي تؤمري يالحب 😘
ألاء: مازال في وجع
عزام: يعني ... شفتي أمي اليوم؟ كيف حالها؟!
الاء: اي كنا عندها...تمام التمام
عزام: أه ياللوش أه...أتاري الام ماكيفها حد..وفقدها صعب
سكتت ألاء: ........
انتبه عزام إن الاء فاقدة أمها من وقت طويل وأكيد أحزنها كلامه...
عزام: للوشتي...حبيبي
ألاء: نعم
عزام: نحبك باهي
أبتسمت: ربي يخليك ليا
عزام: يارب...اي حقا ان شاء الله أول مانطلع من المستشفي بنبدأ نبني ونبيك تختاري معايا كل شيء في الحوش...نبيه كله علي ذوقك
ألاء: اللي تختاره انت أكيد حيعجبني...أني لو عليا حتي دار معاك تكفيني
عزام: أأأه....
الاء بخوف: عزام خيرك...ظهرك؟!
عزام: لا قلبي يوجع فيا
ألاء: خزي عليك عزام والله خوفتني 😨
عزام: أسف 😁...والله قاعد ندور ونفكر شن الخير الكبير اللي مدايرة في حياتي عشان ربي رزقني بيك
ألاء:.....
عزام: نموت في الخجول أني 😘
ألاء: عزااام
عزام: ههههه باه خلاص... أسمعي شن رايك الاسبوع الجاي نقرو الفاتحة
الاء بحيرة: مانعرفش😕
عزام: شنو ماتعرفيش...مادام نعنع شبه موافقة خلينا نقروها بالله عليك قبل ماتغير رايها
الاء: تفاهم انت وضياء...عارفني أني ماعنديش مانع
عزام: تم ياقلبي 😍تصبحي علي خير توا بديت ننعس...الدواء فيه منوم وخايف نرقد واني نكلم فيك😁
الاء: اوكي...تصبح علي خير...سكرت منه وحطت إيدها علي قلبها وهي حاسة بسعادة لاتوصف...حاسة روحها طايرة فوق السحاب...مااحلا الحب ياناس 😍😍😂
~~~~~~~~~~~~~~~~~~~~~~~
اليوم الثاني بعد الظهر...
لجين طلعت من شركتها وخدت عبودي من الروضة...قررت تمر علي نعيمة تطمن عليها واهو فرصة يكون همام مش موجود في الحوش....
لقت الباب مفتوح فخشت للحوش..وركبت طول لدار نعيمة...
فتحت لجين الباب: السلام عليكم 😊
نعيمة: أهلا ...أهلا
لجين: كيف حالك اليوم خالتي؟!
نعيمة: بخير..كيف حالك عبودي؟!
عبودي: كويس...جنى وين؟!
نعيمة: قاعدة مع بوها تحت في المطبخ
لجين: " غبارتي قاعد 😨"
نزل عبودي يجري...ولجين قعمزت ع طرف السرير جنب نعيمة
نعيمة: كيف حال اكنينتي ؟!
لجين: كويسة😁
نعيمة : والله خاطري نسكر عين ونفتح عين نلقاها معانا
لجين: ان شاء الله تنوضي اصحيحة وتفرحي بيهم يارب
نعيمة بخبث: تعرفي نفكر حتي همام نخطبله ونزوجهم مرة وحدة
لجين سكتت تحساب الكلام عليها: ......
نعيمة: عندي بنت خالتي...عندها ابنية تبارك الرحمان جمال وعقل نفكر نخطبهوله
لجين فتحت عيونها علي وسعهم: أه 😳... اي اي ربي يهنيه
نعيمة: اي والله ماصدقت بيه قالي يام إخطبيلي اللي خاطرك فيها...شكلي بعد مرضت خافو عليا هالقرودة ومايبوش يزعلوني...بيني وبينك أني مستغلة الوضع 😁
لجين: .....
نعيمة:لجين ابنيتي وين سرحتي؟!
لجين: معاك ياخالتي...ووقفت باارتباك :'مادام انتي بخير اسمحيلي وقت عليا
نعيمة: اللطف ياربي شن جايين تقيسو الطريق وتروحو
لجين: معليش ياخالتي...غدوة نجيك في وقت مناسب ونقعمز ونهدرز
نعيمة: اوكي براحتك...أمانة سلميلي علي ربا والاء
لجين: يوصل....مع السلامة توا
نعيمة ابتسمت بخبث لأنها وصلت للمطلوب😉
~~~~~~~~~~~~~~~~~~~~~~
نزلت لجين للمطبخ بتنادى لولدها...وقفت قدام المطبخ مستغربة...
كان همام لابس مريول المطبخ يغسل في الماعين. وحاط طنجرة ع النار...جنى وعبودي مقعمزين ياكلو في تفاحة
لجين: احم احم...
لف همام وارتبك: أأ... نساعد في أمي
لجين تحاول تمسك ضحكتها علي منظره: اي علاش لا...
قرن همام حواجبه: عادي طلعيها هالضحكة اللي حاصلة 😏
لجين: علاش بالعكس نحترم الراجل اللي يساعد أهله في شغل الحوش..
فارت الطنجرة...بسرعة فتح همام الغطاء وزادها امية وقعد يحرك...
قربت لجين حطت شنطتها ع الطاولة... ووقفت ع الحوض تكمل في باقي الماعين..
همام: خليهم تو نكملهم ماتتعبيش نفسك
لجين: لا عادي مش مشكلة
همام: اوكي.... فتح الثلاجة وطلع طماطم وجرجير وليمون بيدير سلطة
لجين: يلا اهو هانت قالت خالتي بتزوجك عن قريب وترتاح 😒
همام بعدم فهم: نعم 😕
لجين: بنت بنت خالتها قالت عاجبتها وبتزوجهولك
همام فهم الموضوع: اها...اي فتحت معايا الموضوع وقلتلها ديري اللي يريحك
لجين: ربي يهنيك 😏
همام : تسلمي ☺..وقف بياخد صفاي تعمد يكون ورا لجين وهي ع الحوض...ميل شويا وهمس بصوت واطي جدا: نحبك
بعدت لجين مخلوعة ومش متأكدة من اللي سمعاته: شنو 😨
همام: قتلك الصفاي معليش😊
لجين مدتهوله: تفضل 😑
همام: اقعدو تغدو معانا
لجين: لا معليش مستعجلين 😏
همام: اوكي براحتك
~~~~~~~~~~~~~~~~~~~~~~~
كملت لجين غسل الماعين...تمسح في إيديها...
همام طلع للجنان بيلوح الكناسة حاشاكم...
عبودى: ماما تليفونك يضرب
لجين: هاته ماما...قرنت حواجبها لما شافت الرقم: أيوه عمر
همام كيف بيخش بس لما سمع الاسم وقف جنب الباب..قابض إيده بعصبية
عمر: كيف حالك مدام لجين... ان شاء الله بخير 😊
لجين: الحمد لله بخير
عمر: مش ع أساس اليوم بتتصلي بيا عشان نتفاهمو
لجين: أه سامحني نسيت
عمر: مش عارف ليش حاسك زي اللي كاشة مني يامدام
لجين ارتبكت: لا والله عادي😓
عمر: صدقيني مش قصدي نزعجك ولا نضايقك بس هاذا شغل...وانتم مشروعكم متأخر ونبي نلحق نكمل في الموعد
لجين: عندك حق.. أسفة
عمر: لا لا مدام...مش لدرجة الأسف..مانرضاش أنثي تتأسفلي حتي لو كانت غالطة. أني اللي أسف
لجين:......
عمر: الو معايا
لجين: اي معاك
عمر: شوفي مدام لجين...غدوة اني مسافر للقرية السياحية ومادابيا حتي انتي تكوني موجودة نبيك تشوفي شن بنديرو وكيف بنشتغلو علي أرض الواقع
لجين: ضروري يعني 😓
عمر: بالله عليك يامدام لجين لو مش واثقة فيا خلينا نفضوها هالشراكة أحسن
لجين حست بالاحراج: لا لا مش قصدي... اوكي خلاص تمام
عمر بحماس: نتلاقو معناها ان شاء الله
لجين: ان شاء الله
خش همام متعصب: أعتقد وقت عليكم لو بتروحو 😡
تفاجأت لجين من تصرفه وكأنه يلز فيهم: هيا عبودى
عبودى: ماما بنقعد مع جنى
لجين بعصبية: هيا قدامي 😡... مسكاته لجين من إيده وطلعت حامقة
خبط همام إيده ع الطاولة بعنف: عنيدة وماتسمعش الكلام.... 😡
جنى تشوفله بااستغراب...
همام انتبه لنفسه: جنى حبيبتي بري جيبيلي كاس المية اللي في دار اميمة نعبوه امية
جنى: باه...ومشت بسرعة
خدي همام تليفونه واتصل بأيمن...
أيمن: خير ياطير
همام: أسمع الزفت اللي إسمه عمر تجيبلي معلومات كاملة عليه وعلي شركته ونبيها غدوة تكون عندي
أيمن: وعلاش؟!
همام: دير اللي قتلك عليه وبعدين نفهمك
أيمن: تم
~~~~~~~~~~~~~~~~~~~~~~~
مع العصر
ضياء مقعمز يراجع في حسابات المطعم ومضايق...
ربا مدتله فنجان قهوة: شو في حبيبي ؟!
تنهد ضياء وحط إيديه علي راسه: المطعم قاعد يخسر ياربا
ربا بخوف: يييي ليش؟!
ضياء: مانعرفش...بس الايرادات بدت تقل بشكل كبير والمصاريف هلبا..المطعم هاذا أمانة ولازم نحافظ عليها..
ربا: طيب ليش مابدخلو شي جديد...تغيرو الديكور مثلا..او بضيفو وجبات جديدة..أي شيء بيجيب ايرادات أكثر
ضياء: هاذا كله يبي فلوس وحاليا صعب
ربا: ممممم ليش مابتاخد من لجين مارح تئلك لأ
ضياء: والله 😒 هاذا ماناقص بدل مانصرف عليها هي وولدها..نخليها هي تصرف عليا
ربا: لجين الله فاتحها عليها...وبعدين انت اعتبرن مثل القرض وبترجعن لألها علي مهلك
ضياء: لا...بعدين لجين نعرفها مستحيل ترجع تاخدهم... لازم نلاقى حل ثاني
طق الباب وناضت ربا تفتح...
لجين: السلام عليكم...عبودى قاعد اهني
ربا: فوتي لوجي
خشت لجين وقعمزت ع الكرسي بتعب: قاعد زعلان مني 😩
ربا: انتي شو عاملتيلو لحتي رافض يركب لعندك
لجين: كشخت عليه قدام جنى وهوا امنبه عليا من قبل مانحرجاش قدامها 😂
ضياء بغرور: طالع لعمه نفسه عزيزة 😌
ربا: 😏
لجين: اي حقا ضياء غدوة بنسافر للقرية...نبي نشوف موضوع الضي لوين وصلو فيه
ضياء: بروحك؟!
لجين: حنرجع في نفس اليوم ان شاء الله
ربا: وهمام مارح يروح معكن
لجين: ماعندنا مانديرو بيه 😒...وينه عبودي...استاحشته 😢
ربا: بغرفة علوش روحي صالحيه😂
~~~~~~~~~~~~~~~~~~~~~~
نعيمة وهمام عند عزام...
عزام: يام علاش جاية انتي مريضة😖
همام: عييت وأني نتكلم مافيش فايدة
نعيمة:'مافيا شيء...بعدين اهو جاية علي كرسي متحرك تقول عيل اصغير خوك مايبيني نتحرك بكل..فديت من السرير 😖
عزام: خايفين عليك يانعنع 😉
نعيمة: كلام بس 😏
همام من وقت روحت لجين وهو يتصل بيها...حاس بالذنب لتصرفه الظهر ويبي يعتذر...
نعيمة: بمنو تتصل؟!
همام: حد 😨
نعيمة: باه سلملي عليه الحد هاذا هو وولده 😉
ضحك همام وطلع لبرا....واتصل بضياء...
ضياء: أهلا همام...كيف حال الوالدة بالله؟!
همام: الحمد لله بخير شن اخباركم انتم ؟!
ضياء: الحمد لله في نعمة
همام: الحمد لله...احم...أأ..نبي لجين علي موضوع في الشغل...نتصل بيها وماتردش
ضياء: قاعدة لداخل هي وربا ...تو نعطيهولك
طق الدار : لجين يبيك همام ع التليفون
لجين: شنو 😨..
ضياء: شدي بس...خلي بنمشي نلحق علي ديما😍
ربا: اي انت هاذا اللي أخد عئلك حب للإيجار والست ديما تبعك 😡ضياء تعا لهوووون...ومشت وراه
لجين: أيوه 😏
همام: شن الاخبار
لجين: من ربي بخير 😏
همام: باه تمام....أأأ...غدوة لو فاضية الصبح مري عليا في الشركة في حاجات نبي نوريهولك في الشغل
لجين: غدوة امسافرة للقرية
همام باستغراب: وعلاش؟!
لجين: نبي نطمن ع الشغل
همام بشك: انتي ومنو😒
لجين: بروحي..
همام بعدم تصديق: متأكدة 😒
لجين: اي...ومية مرة نقولك ماليكش علاقة بيا...انت خليك في بنت بنت خالة أمك 😏
همام : 😕
حست لجين بأن كلامها ماليشي داعي ويورطها:الرصيد كمل هي سلام😨....وسكرت
قرن همام حواجبه: اني اللي متصل 😕 خيرها هاذي😕...علي اليمين الا غيرانة 😂😂
~~~~~~~~~~~~~~~~~~~~~~
في الصباح الباكر...
فاقت لجين.. صلت صلاتها وغيرت حوايجها ...خدت معاها شنطة اصغيرة حطت فيها حاجات بسيطة...وتوكلت علي الله
بعد ساعتين تقريبا كانت في القرية...
استقبلها عمر بأبتسامة ودودة: صباح الخير 😊
لجين:'صباح النور
عمر: قبل كل شيء أكيد مش فاطرة...لو ماعندكش مانع جهزت فطور بسيط خلي ناكلو قبل..
لجين: والله مافي داعي
عمر: كيف عاد...عشان يكون عيش وملح علي قولة المصاروة
ابتسمت لجين: اوكي
كان عمر حاط طاولة وزوز كراسي...
مرتب الطاولة بطريقة جميلة...مع باقة ورد جوري حمراء في الوسط
لجين: الله منظر حلو
ابتسم عمر وجبدلها الكرسي: تفضلي😊
همام دار لجنى سندوتش الروضة...وجهز صفرة الفطور وركب يفطر مع أمه
همام: هههههههه أما إنتي يانعنع باااع...منين جبتيها بنت بنت خالتك
نعيمة: والله ألفتها وخلاص...بس تبي الحق والله كانت بتموت من الغيرة.😉.
همام: اي وتأكدت بنفسي
نعيمة: معناها سلم اوليدي ماإضيعها من إيدك وساد انهيه هالموضوع
همام: وانتي قلتيها يام...بأذن الله غدوة بنفاتح ضياء بالموضوع ونطلبها رسمي
نعيمة بفرحة: أيوه أحسن شيء
رن تليفونه: شويا يام تو نجيك...أيوه أيمن ها شن صار؟!
أيمن: تي مصيبة ياهمام مصيبة
همام: مصيبة شنو 😨
أيمن: عمك عمر طلع نصاب ومافيش شركة بأسم الاسلاك المضيئة..وكله كذب في كذب
همام بصدمة : نعم 😳
أيمن: زي مانحكيلك
همام: هالواطي...وفجأة كأنه اذكر حاجة وشهق: لجين 😨...سكر ياايمن تو نعاودلك...
ضرب علي لجين بخوف ودقات قلبه تتسارع....
": عفوا الرقم المطلوب مقفل "
همام: 😳
يتبع
~~~~~~~~~~~~~~~~~~~~~~~~~
أنت تقرأ
نسيت أنساك.
Romanceالجزء الثاني لقصة ياريتني.. القصة الأصلية موجودة ف صفحة عالفيس اسمها قصص من عالمي. #منقولة
