نعيمة: شن تعرفو بعضكم؟!
همام: اي شريكتي في العمل..
لجين:معناها جنى بنتك؟!
هز همام راسه باﻹيجاب....
لجين: مادام طلعنا معرفة.. أسمحلي نخطب بنتك لولدي مهبلنا بيها ليل نهار هو يتكلم عليها..يقولي نحبها ياماما ونبي نتزوجها.
عبودي ينخص في أمه: ماما 😣
لجين: ههههه هاذا الحق شن نكذب يعني...
عبودي طلق إيد أمه وامشي للسيارة ع أساس متحشم يعني 😁
نعيمة: حرام عليك أفضحتي الولد 😂
لجين: حيوريني غير نوصلو للحوش😁...
همام إبتسم: ربي يحفظه ان شاء الله
لجين: ويحفظلك جنونة..تهبل عليك عسل....وتوا اعذروني لازم نستأذن
نعيمة: إذنك معاك ابنيتي...وننتظر منك في زيارة هاذي مش محسوبة راه
لجين: ان شاء الله 😊
طلعت لجين بالسيارة تحت أنظار همام وأمه...بمجرد ماطلعو من البواية جاهم عزام من المربوعة : شن تعرفوهم نشوف فيكم تهدرزو؟!
نعيمة: هاذي لجين شريكة خوك في العمل
عزام: أه لجين 😁 اللي اتصلت مرة
همام: قول مدام لجين😑 من وين تعرفها تناديها بدون رسميات
عزام: باه 😑
خشو للحوش...همام ركب لداره ...
وعزام قعمز يهدرز علي أمه او بالاحري بيجبد منها الدوة. وجنى قعمزت ع الوطا تفتح في الهدايا اللي جوها...
عزام: باه والبنت اللي معاها بنتها؟!
نعيمة: لا وين بنتها اللطف...المراة صغيرة😑...هاذي حماتها
عزام يقلب في قنوات التلفزيون: اها....
نعيمة: ماشاء الله عليها عاقلة وراكزة علي صغر سنها
عزام ابتسم: منو حماتها؟!
نعيمة: نقصد علي لجين بروحها😑
عزام:اها....
نعيمة: كملت قرايتك اللي جاي تقلب في التلفزيون...😳
عزام: لا مازال شويا...
فكت منه الريموت: معناها نوض كمل قرايتك😏
عزام: معقولة يانعنع تعاملي فيا كأني اصغير...قلت ناخد ريست ونرجع انكمل؟!
جنى بفرحة: حييييي ماشا...وتقصد علي اللعبة..بمبلة ماشا
عزام: هههههه شن يحزها معاها توا بديرلنا زي لعبة لولي كات السنة اللي فاتت...اللي بتاكلها بتعطيها منها واللي بنشروها ناخدولها منها واسكتو بترقد...وماتكشخوش عليها....وبرا 😁
نعيمة: خلي البنت في حالها...وامشي لقرايتك
عزام باس راس أمه: انتي تؤمري يانعنع.....وطلع
~~~~~~~~~~~~~~~~~~~~~~
وصلت لجين للشقة...نزل عبودي حامق وامبوزم..
خش لداره وقربع الباب....
لجين: ههههههههه نجيلي الحامق ياربي😁... سبحان الله نسخة من بوه حتي في العصبية...
الاء: الله يرحمه يارب
لجين تنهدت:يارب... نحطلكم تتعشو...
الاء: لا ماخاطريش خلي بنغير حوايجي وبنزل لربا نلعب علي علوشي شويا...
لجين: خلاص ناخد دوش..ونصالح الزعلان😁..ونلحقكم..
كملت لجين الدوش ومشت لدار عبودي...كان راقد علي ظهره يتفرج ع التلفزيون وأول ماشافها قلب للجيهة الثانية...
ابتسمت لجين علي حركاته وقعمزت في جنبه: هيا بنمشو لحوش عمك....
عبودي: مانبيش نمشي 😒
لجين: وعلاش؟!
عبودي: زعلان منك أني 😒
لجين: وعلاش 😁
عبودي قعمز وبنرفزة:ياماما حرجتيني 😣 ع أساس " أحرجتيني 😁"
لجين: باه أسفة معاش نحرجك ثاني 😁..هيا نوض
عبودي: باه 😑
جهزت لجين كيكة ونزلت مع ولدها لشقة ضياء...لقتهم مقعمزين يتفرجو علي فيلم افاتار...
ألاء: بسرعة لجين ألحقي كيف إبدي
لجين: هيا هي...خلي نمشي نحط ع الكيكة في صواني...ربا وين؟!
ألاء: في المطبخ....
ضياء ياكل في سمنيسة: حقا للوش شن ناوية بتخشي عشان نسجلك؟!
الاء ساوت تقعميزتها وبحماس: نبي قانون...اتفقنا أني ورشا بنخشو زي بعض..
ضياء: قانون مرة وحدة
الاء: اي خاطري فيه
ضياء: خلاص علي بركة الله...غدوة نمشي نشوف شن الاوراق المطلوبة...عشان نجهزهم وامتي مايفتحو التسجيل نسجلك...عندي اوليد نعرفه غاديكا واكيد حساعدنا
الاء بفرحة: خليني نمشي معاك...نبي نشوف كليتي الجديدة...
ضياء: خلاص تم..ربوشة وين الارقيلة😣
ربا من المطبخ: شو مفكرلي حالك بباب الحارة ...ئوم إعملها لحالك 😡
ضياء: 😳
لجين: حرام عليك 😁
ربا: بدو يجنني هالرجال...شايف بطني لحلئي ومابيخلص طلبات 😣
لجين: هههههههههههههههههههه والله يموت فيك..غير يحب ينرفزك
~~~~~~~~~~~~~~~~~~~~
همام كالعادة مقعمز ع السرير واللاب توب في إيديه يتابع في أشغاله وأعماله...
أنتبه للباب اللي انفتح بشويا...قعد يراجي من بيدخل..بس الباب تسكر ومافيش حد...
قرن حواجبه يأستغراب... ورجع لشغله...
شويا ولاحظ زوز وذان طوال زي وذان الارنب باينات من نهاية السرير...نحا اللاب علي جنب وامشي بيشوف....
كانت جنى لابسة بيجامتها اللي ع شكل أرنوب ومقعمزة...
ابتسم همام من منظرها: انتي شن إديري اهني؟!
قامت جنى راسها بخوف: حييييي كيف شفتني
همام: بري لدارك ارقدي
جنى بتوسل: بابا خليني نرقد جنبك
همام بجدية: لا... يلا بري لدارك
جنى: 😩 باه....طلعت و خاطرها مكسور
همام إضايق علاش يتصرف معاها هكي...بس مش قادر... كل مايشوفها يذكر رؤيا...واخدة هلبا من ملامح أمها...يتعذب ويتقطع كل مايشوفها...اذكر فيه بأحلي ايام قضاهم في حياته مع إنسانة حبها وحباته من نعومة أظافرهم....وخطفها منه الموت
إمتد ع السرير بتعب نفسي أكثر ماهو جسدي حط إيديه الاثنين علي وجه وكأنه يحاول يختفي من الوجود عشان يرتاح ويريح غيره....
~~~~~~~~~~~~~~~~~~~~~~
صباح يوم جديد في حياة أبطالنا....
لجين في طريقها للروضة بتحط عبودي وبتمشي للشركة...
لجين: هيا حبيبي...إنزل ورد بالك ادير شطانة باهي 😑
عبودي: باه..
كيف بتلف بالسيارة شافت جنى مقعمزة برا في الحديقة وكأنها تبكي....
قرنت لجين حواجبها بااستغراب ونزلت...قربت منها: جنى حبيبتي خيرك؟!
جنى تشوف للارض والحزن ساكن عيونها البريئة...
لجين: في حد ضربك ؟!
هزت جنى راسها بالنفي....
قعمزت جنبها ومسحت علي راسها: إمالا علاش زعلانة الحلوة
جنى قامت راسها وشافت للجين بكل براءة:انتي تحبي عبودي؟!
لجين بااستغراب: اكيد عبودي ولدي..
جنى::امالا علاش بابا مايحبنيش؟! 😩
لجين صدمها السؤال..واذكرت كلام نعيمة علي همام: حبيبتي شن هالكلام هوا أكيد يحبك..خشي توا لداخل...وفي المرواح نستأذنو من بابا وتروحي تلعبي مع عبودي..شن رايك؟!
جنى بفرحة: حقا؟!
لجين: اي وتو نكلمه أني بابا
جنى: باه....ومشت فرحانة
وصلت لجين للشركة وكان همام يستني فيها عند السكرتيرة..
لجين: أسفة ع التأخير..
همام بضيق: ورايا شغل مهم مفروض نلتزمو بالمواعيد شويا
لجين : أسفة.......
همام: باه بنقعدو نتأسفو للصبح يعني
قرنت لجين حواجبها بأستنكار: اوكي وسع بالك..تفضل وسبقاته ع المكتب.." مغرور"
همام حس انه زودها شويا قعد يأشر بايديه : مش قصدي..مش من عوايدي نتعصب بسرعة
لجين: حصل خير واني قتلك أسفة لاني عارفة غلطي...
همام: احم احم... اوكي هادم الرخص..وغدوة بنوقعو العقد مع الشركة اللي بناخدو منها الحديد
لجين تقلب في الاوراق: حلو..الشغل ماشي مية مية
همام: ان شاء الله الشهر الجاي نبدو في المرحلة الاولي..
لجين بحماس: وهو كذلك...وبعد ساعتين تقريبا حيقابلك مسؤول العمال تنسق معاه
شاف همام لساعته: ساعتين ...مش عارف مفروض نروح بجنى من الروضة
لجين : اي خطرها علي جنى نبي نستأذنك نروح بيها مع عبودي خليها تغير جو..
همام بااستغراب: مش عارف...هي موافقة؟
لجين: اي كنت معاها قبل مانجي كانت مضايقة هلبا وحزينة...وفرحت لما قلتلها
همام تنهد: أكيدة مني.
لجين: تبي الصراحة اي وقالت بابا مايحبنيش
همام انصدم : معقولة...مش عارف كيف نتعامل معاها احترت
لجين: انت حبها بس وحسسها باهتمامك وهي ماتبي شي
همام: حاولت كذا مرة وماقدرتش...اذكر فيا بأمها بكل تفاصيلها...مرات استغفر الله ياربي نقول ياريت ماتت معاها
لجين بنرفزة: انت أكيد مجنون
فنص فيها وكـأنه مش عاجبه الوصف
لجين ارتبكت: ق ق قصدي ...مفروض تفرح انها تركتلك شي منها ع الاقل كل ماتشوفها تذكر احلي أيام عشتهم..
همام: كيف قدرتي تتخطي غياب زوجك؟ نحس فيك عايشة حياتك ومنطلقة ؟
لجين ابتسمت: بعبودي..لو ماكانش موجود في حياتي كنت متت من زمان....انت غر قرب من بنتك وشوف كيف حتحب الحياة بيها
شافلها همام بانتباه: ان شاء الله....وقف: مشكورة...وقعد يمسح علي شعره: ومعليش علي صار
لجين: ولا يهمك
~~~~~~~~~~~~~~~~~~
أنت تقرأ
نسيت أنساك.
Romantizmالجزء الثاني لقصة ياريتني.. القصة الأصلية موجودة ف صفحة عالفيس اسمها قصص من عالمي. #منقولة
