تعـــالة نرجع خمسه سنة لي ورا
اســامة :- من الليله حيكون مكتبك دا .. المدير التنفيذي للشركة اسامة نـاجي !
كان بقولها بكل الفخر ,, من الليله إنت يدي اليمين و سندي في كل خطوة بخطيها ^^
من الليله إعتبر كل الشركة تحت تصرفك ي لؤي
لــؤي :- باسه في راسه : ربنا يخليك لينا يا حاج و أكون عند حسن ظنك فيني!
اسامة : يلا سريع سريع تعال أعرفك علي الموظفين .. عشان تتأقلم بسرعة !
لـؤي :- بتشويق ارح طيب
و كان بالنسبة ليهو يوم ملئ بالضغوط في الشركة .. و لمن رجعوا للبيت الكان مليان فرح بالمناسبة دي !
إتلمت العيلة في طاوله الطعام !
اماني :- عقبال ما أفرح بيك عريس زي ما شفتك موظف .. أبوك خته ليك طوبة الأساس يا لـؤي الباقي عليك إنك تكبر البنيان !
لــﯠي هز براسو : أكييد ما تشيلي هم و لا ما واثقة في تربيتك ي يمة
اسامة ضحك : الحاجة الوحيدة الواثقين منها و متأكدين هي تربيتنا ليكم عمررها ما تخيب !
نسيم : مييين قدك يا مدييير خلي بالك اول مرتب ليك انا عندي فيو عـزومة
روان :يلا يلا وقت المفاجئة جاء دي هدية مننا كلنا يا الـو بمناسبة إستلامك لمكتبك الجديد... !
ابـي بغرور : ع العموم ما تفرح كتير يا أستاذ لـؤي و تخلي الغرور يتملكك كلها سنة و أجي أستلم مكتبي و أسيطر علي الشركة و ضحك بشر هـــاهـــاهـــاي
ضحكوا كلهم لضحكتوا !
و إماني واسامة كانوا حاسين بالفخر والسعادة لنجاح أولادهم و حسوا إنو تربيتهم كانت صح واولادهم ماشين في الطريق الصح !
لـؤي: بابا أنا شايف إنك تقلل من المشي للشركة بعد دا .. أنا بقدر أديرها و أمشي الشغل فيها !
اسامة عاين ليهو بنظرة عميقة : أنا بحيي حماسك دا يا ولدي بس إنت عارف العالم دا دا عمييييق و لاززم تكون محارب شاطر وعشان تقدر تطلع منو
محتاج يكون عندك الخبرة الكافية جدا !
لــؤي : بس أنا كنت بحضر معاك الإجتماعات. وكنت بشتغل معاك يعني اكتسبت الخبرة الكافيه
اسامة ربت علي كتف ولدو بحنية : خلي نفسك طوويل و ما تندفع مرة واحده كدا للشغل ... أصبر و راقب و أفهم !
الشغل دا دااير حكمة وتفكير وتحركاتك تكون بذكاء عالم البزنيس دا ذي لعبه الشطرنج
لــؤي بصــوت باس : أمري لله !
flash back
رجع للواقع بتشه السجارة ليدو .. نفض رمادها
لــؤي :- بصـوت باكي الله يرحمك يا غالي بتذكر أول يوم لي معاك كأنو حصل الليله ما قبل خمس سنواات بس حجيب ليك حقك مهما طال الزمن !
وطلع نفســو بضييق و عاين لي الحيطه القدامو و بقي يراقب الشخصيات الجمبها بحذر
فــي جـــانب تــاني
في أحد أركان كافيه ما :
كان قاعد و بضرب بأطراف أصابعه ع الطربيزة القدامو بعصبيه واضحة !
و قال بصوت غضبان : نعم نعم عيــدي القلتي تاني
ولي ان شاء الله ي هانم نأجل العرس تاني ؟؟
هو لعب عيااال ولا شنو ؟؟ أول مرة أجلناهو عشان الوفاة و دا من حقك ,, بس تاني ماف تأجيل يا ... الوفاة تمت 5 سنة المفروض تسيطري ع حزنك دا بالله وما تنكدي علينا
.... :- عاينت ليهو بذهول و أعقبت بصوت مبحوح : إنت ليه بتتكلم كأنوا ما فارق معاك شي ؟
.... : يا ... الموت علينا حق و الحزن الزايد بعقبو حزن. ابدي .. و ماف أي غلط لو عرسنا و ماف زول حيعترض !
أدينا الكل فترة كافية عشان يستعيدوا حياتهم و جاء الوقت النشوف فيهو حياتنا كمان ولا شنو !
.... : بس أنا لسه ما إستعدت حياتي ... و محتاجه وقت عشان ارجع !
... :لا والله وانا مطلوب مني استني قـدر شنو عشان إنتي تدي نفسك فرصة وتطلعي من دوامة الحزن العايشه فيها دي
.... :- وما قدرت تسيطر ع دموعها مستغربة في في قسوتو دي جابها من وين
... :- اليشوفك ما يقول إنك بتتكلم عن أبوي الكنت قريب منو و حاولته جهدك عشان تكسب ثقتو و تبقي معاهو في الشركة عشان تثبت إنك زول مسؤول !
.... بتوتر واضح : ما أنا أنا. وبقي يتمتم فعلا بعزو و هو بمقام والدي بس بس خلاص الحي أبقي من الميت ياخي
... : غير كدا أنا ما حاخد قرار مهم زي دا و .... ما موجود !
.... بإهتمام : و ... مشي ووين !؟
.... مسافر في شغل .
... : بطلي نكد و خلينا في موضوعنا ... ممكن يرجع لمن يعرف إنك القررتي تعرسي و ما حيعارض !
.... : أنا قلته العندي و العرس أخر ما أفكر فيه حاليا و يا سيدي لو حاسي إني عبء أو مؤخراك من الزواج ف دي دبلتك أنا حررتك من كل إرتباطاتك إتجاهي ! و قامت بسرعة متجاهله كل محاولاتو عشان يوقفها !
وجواها شعور غريب ما قادرة تفسروا !
(قـــدام حنعـــرف ديل منو)
.............
وفـــي جانب اخـــر من روايتنا
في شركة ما :
قاعد في كرسي فخم ورا طربيزة مكتبو ... مظهرو بيدل علي شخصيتو القوية و الشيب المع سواد شعرو أداهو هيبة لكن دا ما بيمحي الشر والحقد الطالع من عيونو !
قال بإنفعال : إنت بتقول شنوو ؟؟
داير تهرب !
ضحك بخبث و أعقب : كلنا في الهواء سووا بس ما تخاف ما حننكشف !
هو الأخر ما كان بقل هيبة منو بس البختلف انو داك الشر ظاهر في وشو ودا البظهر علي انو زول مسكين وم
سالم (الله يكفينا شر الناس البي وشين)
رد : أهرب ؟؟ عفوا منك ي استاذ ما أنا البخاف و إنت عارف كدا كويس بس عندي شغل لازم أخلصو !
و مد ليهو ملف و عينو بتلمع شر : دي الوثائق بتاعت الملكية كلها ... بإشارة بس و حيبقو في الشارع !
مسك الملف : قرريب قريب بس ما خليهم يستمتعوا شوية بحياة الغنـا دي قبل ما نقلب الطاولة لينا
رد : يلااا أنا أستأذن وراي مشاريع كتيرة طفي سجارتو و طلع !
كان قاعد و سامع كلامهم كلو بس ما علق :
.... : أنا ما عارف كيف وافقت إني أكون عارف عمايلكم دي و أسكت .. كيف سمحته لنفسي أكون قذر كدا ؟!
.... : لاااا ياخي عان الود حاسي بتأنيب ضمييير و ندمان ؟
رد بحرقة : أنا فعلا ندمان لكن ما للحصل ... ندمان لإنو نصيبي في الدنيا أكون ولدك ماعارف ياتو غلطه الارتكبتها دي عشان ربنا جزاني كدا
حرقه الكلمات الطلعن منو دي كان كافيلة ب إنو يصيب خدوو كف حااارق بحرقة كل حرف إتقال ....!
مسك خدو و ضحك بأسي : عاارف أنا دااايما كنت بحسدهم و قلبي مليان غل إتجاهم بس ما عشان هم أغنياااء و ناجحين !
كل شعور حقد كان لإنهم عيلة متماسكة و الحب ظاهر بينهم و إنهم بهتمو لبعض بجد !
رغم كل شئ كنت بتمني لو إني أكون فرد منهم عسي إني أحس بدفء العيلة و صدق المشاعر !
كنت بتمني لو إنك تتأثر بطيبتهم و تعاملهم معاك ,, لو إنك لمرة واحده بس ونستك معانا تكون عن أحوالنا و تظهر لينا محبتك و إنك مهتم بينا
قعد في الكرسي بإنهيار : أنا ما قادر أصدق إنك ولدي ...و إنت بتتكلم معاي كأني واحد من عدووينك عملت ليك شنو انا موفــر ليكم اي شي عايزنو وعندكم قـروش ماليها حد !
خسارة تعبي فيك و أنا البعمل دا كلو عشانكم إنتو عشان ما تحسوا إنو في زول أحسن منكم !
رد نبرة الهادئه :- الحياة ما قــروش
ونبـرتو اتغير بإنفعال : عشاانك إنت للأسف كل همك كان إنو تطور شركتك و تكبر إسمك و شهرتك !
فوووق يا بابا و لا الأفضل أنادييك بأستااذ ...... لإني عمري ما حسيت بانك ابـوي
.... : إحترم نفسك إنت بتتكلم مع أبوك ... أنا ما عايز أشوف وشك لمن أرجع البيت !
.... : ب بييت هاااه أي بيت قصدك الخرابة داك ع العموم أنا كنت قاعد عشان خاطر أمي المسكينة الخايف يوم تموت حسرة بسبب عمايلك الوسخة
صرخ وضرب الطاوله : أطللللع برررررة إنت من الليله ما ولدي ... و ما عندك أي حق في الشركة دي
.... : حق مبني ع القذاره دي ما دايرو و بقوليك خاااف خااف بس ما مني و إني ممكن أفضحك و ما يهمني .. بس خاف من ربنا لانو الظلم نهايتو حارة وحتندم
و فتح الباب طلع و جواه مشاعر مختلطة و كل شعور بقول للتاني أنا سبب كافي عشان يتالم
*" العائلة تدمرنا أكثر من المرض ، أكثر من الحرب ، أكثر من الحب والفقر ؛ تحت عنوان نحن أدرى بمصلحتك*
💙
نتلاقا مع كل الحب والريد
كســرة
تعلم كيف تنهض بنفسك دون اللجوء الى احد💖✨
أنت تقرأ
اسم الروايه :- تحت مسمي الحب // بقــلم :- تسنيم الامين
Mystery / ThrillerTASNEEM ALAMEEN: تحـــت مسمى الحب بقلمي : TASNEEM ALAMEEN المقدمة:- الى ذلك الذي رحل دون انذار تركنا مكبلين دون احرار لماذا تركتني خلفك ولم تخبـرني اي اعذار هل خانك حزني ام خانك بؤسي ام علي الاظهار تركتني أواجه وحدي تلك الامواج أواجه ذلك الانفجار ...
