جبروت_الحنين
بارت٢٢
نورا ناصر
يقين : لزمني من ايدي وطبك الباب حييل بيده الثانية .. جرني لحد نص الغرفة ..
لزمني من زنودي ومن بين اسنانه المطبقة بقوة وعصبية كال : منو كلج طلعين من البيت بدون اذن مني ..
نفضت روحي منه بانفعال وانطيته ظهري .. كتله بلله وخر عني مالي خلكك ومو وكت خبالاتك هسه ..
لزمني من اكتافي وكعني ع الكاع .. بالضبط وكعت بصف الكنتور وصار ظهري عليه حسيت وجعني ظهري ..
اجه كعد كبالي وينفث عصبية وعيونه ظلمة من الغضب مخنزر وماكو رحمه بوجهه خلاني اخاف كلش وابجي ..
كال عبالج اذا تبجين تفلتين من عقابي هااا ...
سكتت ودرت وجهي .. وهو كلما اتجاهله يزيد عصبية .. لزمني من معصمي
كال ليش طلعتي بدون متحجين نسيتي الي صار قبل ليلة من العرس من طلعتي شنو حصلتي مني ؟
صرخت بوجهه واني اسحب ايدي منه ..
_واني وين طالعة وويامنو امك واختي ومرايحة اتونس حسيت نفسي تعبانة ورحت للمستوصف ..
_ امي واختج بيش الكيلوو هاا واني منين جبتج من بيت مشبوه يسموونهم بيت ابو السحورة شعندج طابة بي ؟
كمت على حيلي .. وبصياح: واالله روح اسال امك ليش دخلتنه بي اني معليه واصلا مااعرفهم شكلولك عني خايطة المنطقة خوط وافرفر حتى اعرفهم بيت ابو سحورة ..
جرني من زندي كال تعاي هاي شلابسة ؟؟
درت عليه كتله بتعجرف شلابسة بعد بلوز وبنطرون ..
صيح وليش تلبسين هذا اللبس هاااااا ..
صيحت لعد شلبس كونية مثل امك !!!
دفعني صار ظهري على ميز التواليت ..
باعصاب شبه متماسكة : ليش تجبريني اذيج يقين ؟؟
باوعتله وحجيت كتله انتَ جرب تأذيني او تمد ايدك عليه تحلم تشوفني هنا بعد ترة كوة متحملة ..
تقرب عليه اكثر كال : لاتضلين تخربطين وهذا اللبس متلبسينه حتى لو جوة العباية بنطرون متلبسين ابد مفهووم وهذا اخر كلام عندي وطلعة من البيت بدون اذني مااكو لو مدري ويامن مطلعين صار معلوم ؟؟
سكتت ومجاوبته بس بقيت استفزه بنظراتي .. حسيته بعد مايتحمل ضرب ايده بقوة على ميز التواليت ..
وبصياح كال : ويا من احجي كوولي صار ومتتكرر شبيج انتِ جلدج يحكج من هذن الي يحبن الكتل تردين اكتلج ؟؟
اندفرت الباب ودخلت خالة نجية تصيح وتأشر بيديها ..
_ هووووب ولكم كافي صياحكم واصل لراس الشارع كولي رجال مريض جوة نايم يريد يرتاح كعد على صوت صايحكم والبارحة كله مانايم وانه كوة سحيت روحي وصعدت الكم هنانه مو تدرون رجلي بيها سوفان ..
