جبروت_الحنين
بارت ٣٣
نورا ناصر
اذا حصل والتقينا ...
كُن متفادياً إرباكي
كن حذراً من شظايا كبريائي
إذا [حصلَ] والتقينا
حادثني كالغرباء .. أو لا تحادثني [بالأصل]
وَ إكتفي باختلاس النظر
إلى إمرأة كانت بين يديكَ عآآصمة النساءء
*****************************
انداريت واشوف امي وبيدها مصطفى ..
معرفت شنو اسوي حسيت الارض افترت بيه
الفرحة شلتني شل وكعت ع الارض وظليت انحب ورافعة ايديه لامي اريدها تنطيني مصطفى ..
نزلت امي لمستواي وتناوشت منها مصطفى ..
اخذته منها وحضنته حيل وابوس بي وامي تبوس بيه وتكلي ليش هيج جفيتي وياي ليش يمه مو اني امج ربيتج مثل ماانتي مشتاقة لابنج ومحروك كلبج عليه اني هم هيج احترك كلبي عليج ..
مصطفى ظل يبجي مستغرب مني وتوجع من حضنتي اله واني ابوس بي ..
اخذت ايد امي وظليت ابوس بيها واثنينه نبجي بنحيب ..
باوعتلها والدمع يهل من عيونه ..
من بين نحيبي حجيت يممه سامحيني
ودنكنت راسي وبعد ماكدرت انطق ..
اشوف امي تعبانة حيل وتتنفس بصعوبة ومنتبهت لماجد جان يمنه حسيت على صوته
وهو يحاجيني ؛ يقين ترة امج تعبانة جاية من طريق طويل خليها ترتاح ..
مسحت دموعي ولازلت اطبع بوسات على وجه ابني واشمه ومدا اشبع ..
كمت على حيلي وبيدي مصطفى مستغرب مبرطم ويباوعلي ، كومت امي من الكاع واخذتها كعدتها على السرير وخليت مصطفى بحضنها ورحت جبت الها مي رجعت شفت جيهان وصبا ديسلمون عليها ..
بعدها اخذهم ماجد وطلع ..
اخذت مصطفى بحضني كالتلي امي طلعيله ممته بالجنطة رحت طلعتها وانطيتها اله ضل يشرب منها وهو بحضني وعينه عليه مستغرب ..
كتلها يووم بشير يعرف مصطفى عندي ؟؟؟
شربت كلاص المي خلصت وخلته ع الدولاب بصف السرير ..
كالت ؛ من القهر والتفكير بيج وبعالية ارتفع الضغط ووكعت دخلوني مستشفى بيومها اجاني بشير بوسني على راسي واعتذر مني كال عمة اعذريني الصار مو بيدي وانتِ اعرف ماكو واحد يتحمل الموقف الي نحطيت بي ..
لزمت ايده وترجيته ؛ يمه بشير اذا صدك تعزني وتطلب رضاي لاتحرمها من ضناها على الاقل خليها تشوفه جايه تريد تشوفه وروحها لايبة خطية ..
هز راسه بقبول بس متردد وهم ميريد يفشلني وكال صار عمه انتِ طلعي منا بالسلامة ومايصير خاطرج اله طيب ..
طلعت من المستشفى لبيت عالية اجاني هناك .. يتحمدلي ع السلامة ..
كتله ها بشير وينه وعدك ..
كال عمة هذا مصطفى خلي عندج وخليها تجي تشوفه ..
كتله ؛ لا عمة اني ادز على اخوها يجي ياخذنه الها تشوفه يبقى كم يوم يمها ونرجعه ..
صفن شوية وحسيته انحرج مني كال ميخالف ..
