جبروت_الحنين
بارت ٢٣
نورا ناصر ..
خمطته مني ورجعت شمرته عليه ..
كالت واني شلي بي شنو تتبلين عليه مو تدرين برجلي مفقود .. وبعدين تعاي انت توج تزوجتي وحامل شمعرفج بي هذا شنوو ؟؟
_ شايفته عند عالية اختي وبعدين شتقصدين بحجيج هذا ..؟قصدج اني جنت استخدمه !!!
_ ماقصدي شي ..انتي اعرف بروحج .. حجت وخلت البركع على وجهه .. كالت امي وين ؟
كتلها وبنتر اخذت ايات وراحت للمستوصف ..
امج وين ؟
امي بايتة يم عالية ..
كالت اني طالعة اذا اجوي جهالي ووياهم جهال حماي مو تكولين اني طلعت كوليلهم نايمة ومطمورة .. مو تطلع حجاية منج سمعتي ..
كتلها بنتر .. معليه بيج اني لا احجي ولا اكول خليني بعيدة عن طلايبج وسوالفج الي تسوينهه .
رفعت البركع من وجهه كالت وشكالولج عني ها شنو سوالفج وطلايبج ...
سحبتني من ملابسي وظلت تسحل بيه ع الممر اريد افك روحي منها مااكدر ..
رفعت ايدها ونزلتها وظلت تضرب بيه على وجهي راشديات و بدون رحمة ..
خليت ايدي على وجهي واني اغلط واسب بيها
نزلت ضرب على اكتافي ..
بيدهه الخشنة .. اريدها تفكني ماكو ومااكدر اقاومها هي اضخم مني ..
لحد مادك تليفونها عافتني وطلعت ...
لزمت بطني وظليت ابجي وانحب بمكاني ..
تقويت وكمت صعدت الدرج كوة دخلت للغرفة ظليت ادور تليفوني .. لحد ما لكيته ع الميز .. اخذته ودكيت رقم بشير وخابرته ..
بس سمعت صوته يكول الو انفجرت بالبجي والصياح ..
تعاااال الحكني بشير تعااال اختك كتلتني ..
بعد ماسمعت اله حس بس صوت المكالمة تنسد كعدت بالغرفة واحس نار الغضب شبت بروحي .. شهالعيشة هاي ...
تمددت شوية ورة تقريباً ربع ساعة انفتحت الباب ودخل بشير ..
عدلت كعدتي وهو اجاني ملهوف .. ويحجي شكوو شبيج هاي منو طايحة الحظ الي ضربتج ..
واجه كعد يمي يتفحصني ..
خليت راسي على صدره وابجي كتله هاي بيداء كتلتني ..
وخر راسي من صدري وظل يباوع على وجهي بتركيز
ظل يتفحص خدودي ومخنزر عيونه .. كال هاي شمسوية بيج اليوم اله احركها حرك والله ..
استمريت ابجي .. واخلي راسي على صدره .. مد ايده لبطني كال خو مااذتج خو ماصار شي للطفل ..
كتله لا بس على وجهي ضربتني .. واكتافي ..
كام على حيله كال اليوم اني اعلمها وينها هسه ؟؟
