جبروت_الحنين .. القسم الثاني
بارت ٣١
نورا ناصر
انا تلك الفتاة المُتناقضة ..!!
- التي تشتمك نهاراً ,,
ۈ تبكيك ليلاً ..
- تشتاقك بـ روح فتاة بريئة ,
ۈ تعاتبك بِ لساان عجوز شيطانة ...
لــكــنـهـا ,, تـــعـــشـــقـــك
متمددة بفراشي وحاسه انوو متمددة بنعش على كد المشاعر السلبية الي محاوطتني ، الظلام مخيم بصدري كاتم انفاسي ويمزق قلبي ويغلفه بالحزن والوجع ، عيوني مرهقة بسبب انهار الالم الي تسيل على خدي وتحفر اخاديد ووديان ، جفاني النوم وضجيج الارق يعبث براسي .
الي شهرين على هذا الحال ، صاروا يضوجون من نحيبي حتى اطفال اخوية الصغار وجيهان ينهزمون من يشوفوني دا ابجي ، احس عقلي اصابه مس من الجنون ومجاي اكدر استعيد نفسي القديمة .
شلون استعيدها واني بعيدة عن فلذة كبدي جزء من روحي وقطعة من قلبي .
كعدت على السرير ومثل الي نايم وانشمر عليه سطل مي بارد وصحصح ، تذكرت ابني اني مجنت ناسيته ابد بس هسه خلص غلبني الشوك اله اريده بهاللحظة وما بيه اصبر بعد ،صرت احس نفسي حافية فوك سعير شوقي اله .
طلعت من الغرفة وحالتي حالة ادور ماجد سمعت صوتهم بالمطبخ مشيت وصار صوتهم وهم يسولفون ويضحكون يتوغل بعمق مسامعي احس الكل عايش واني ميتة .
دخلت للمطبخ وصارت بوجهي صبا بس وقع نظرها عليه تأفأفت ودارت وجهه .
شافني ماجد تكلم بحنية ؛ ها يقين تعالي اكلي تونه دناكل بسم الله .
تقربت كعدت وبكعدتي وشمرت كل ثقلي على الكاع
ماتوجعت بكد مامتوجعة روحي .
انهالت امطار الدموع على خدي ،خليت ايدي على حلكي اكتم شهكاتي .
كتله بنبرة كلها نحيب وبجي ؛ ماجد اريد اشوف ابني بعد ما اتحمل عفية تعبت .
ردت صبا ؛ هسه يا ابنج بهالليل ؟
باوعتلها ودرت وجهي تجاهلتها وروحي فايرة ورجعت باوعت لماجد واتوسل بي ؛ عفية حباب ماجد وديني اله والله مشتاقتله .
لزمني من ايدي وكال اي اكيد اوديج بس تعالي اكلي لكمة دشوفي شصاير بيج صايرة هيكل عظمي .
جاوبته ومستمرة ابجي ؛ ما اشتهي عفية وديني هسة .
شهكت صبا ؛ ولج يا هسه دنيا ليل قابل هو خطوتين اشو بغير محافظة وبعدين انتِ ابنج تنازلتي عنه منو يخليج تشوفي .
اني زدت بالبجي وشهكت شهكة قوية واسمع ماجد عاط بصبا ؛ اسكتي انتِ شجاج تردين تخبليها ؟
جاوبته ؛ خو انتَ دوم تسكتني اكوم من الاكل احسن الي .
نتر بيها ؛ اي كومي بدل الحجي الماصخ هذا متشوفين حالتها .
