#جبروت_الحنين
بارت ٢٥
نورا ناصر
على وقع كلماته حسيت اطرافي انشلت باوعلي اخر نظرة كانت كلها توعد ...
وطلعته امه وسدت الباب وراه واجتني وبيدهه الكرك خفت لاتضربني بي .. واني مو كادرة اتحرك ...
كالت بنبرة كلها تهديد : بعد مااريد اشوفج واكفة ويا تردين تخبلين طالب ويصير كاتل ومكتول ..
كتلها والله خالة هو استفزني ويريد ..
قاطعتني : تشوفينه منا تختفين منا افتهمتي لاتصيرين كباله ابد ..
دنكت وكتلها ان شاءالله .. اريد افوت صاحت عليه
كالت : من يجي طالب لاتحجيله خطية تعبان ويعصب لاتحجين كل شي كدامه وامجد بس حجي كلشي ميسوي ..
هزيت راسي وفتت جوة ودخلت لغرفتي والافكار والمخاوف هاجمتني بشراسة كعدت على السرير
ولازمه قلبي بيدي .. هذا امجد مبين وكف على رجلينه وخايفة يأذيني لو يفضحني لو ياخذ بنتي او يخرب بيني وبين طالب كلشي اتوقع منه ...
كعدت رؤى رحت اخذتها وطلعت من الغرفة
توجهت لغرفة امي طليت على حنونة شفتها نايمة يم امي .. ظليت اباوع الها واتحسس شعرها وخدودها ..
واني اتسائل شنو مصيرها هالطفلة وهيه بينه ومن تكبر شلون واذا عرفت الحقيقة حقيقة امها وابوها ...!!!
لو شكد مايمر الوقت مستحيل اخلص من العار مستحيل بكل لحظة يلاحقني ويقلب عليه حياتي جحيم ..
سمعت صوت طالب .. طلعت من غرفة امي ورحت شفته بالهول استقبلته اخذ مني رؤى بوسهه ويضحكها .. ظل يباوعلي
كال شبيج شو مكلوبة خلقتج اليوم شكوو ؟
جاوبته بارتباك ؟؟
كال اجه امجد بغيابي ؟؟
جاوبته واني افوت لغرفتنه .. لالا بس اني والله تعبانة .. عمليته لسه احسها توجعني والبنات متعباتني وخاصة حنين الاهتمام بيها متعب خاصة هسه هيه كبرت ولازم اجيبها منا واوديها منها ..
اخذت منه رؤى وهو راح يبدل .. كال وهو ينزع قميصه لتضوجين هيه هاي الحياة بعد شسوين
وبالنسبة لحنين ان شاءالله فد كم يوم ونروح لبغداد الدكتور الي اشتغل عنده بالمجمع انطاني اسم طبيب جملة عصبية نعرضها عليه وان شاءالله خير ..
خليت رؤى بفراشها ورحت يمه فرحت كلش خليت ايدي على زنده وابتسمت بوجهه كتله تحجي صدك يعني الها علاج اكو امل تمشي ..؟؟
كال : ان شاءالله اكو امل رحمة الله واسعة .. وانتِ لا تيأسين منها ...
******
يقين : اليوم صار النا اربعين يوم ، امي وخالتي نجية سبحوا مصطفى واني سبحت وراه طلعت شفته نايم وخالة نجية يمه ...
بس شافتني كالت مايصير توج سابحة وشعرج ينقط ماي وتجين تفوتين عليه ؟
كتلها خالة لعد وين اروح .. ؟؟
