#جبروت_الحنين
النهاية
نورا ناصر ..
ملاحظة ؛ المشهد الاخير من بارت النهاية للضحك فقط بدينا القصة بضحك ننهيهه بضحك ..والي متحب نجية من هسه لتقراه ☺
___________________________________❤
بشير .. تقربت من بيداء ووجهت المسدس عليه وخليته على كصتها ، انخلست وسدت عيونها قووي وتردد وتمتم ؛ لا بشير عفية لاتقتلني والله ماسويت حرام زوجي هذا ..
ضغطت بالمسدس على راسها ، حجيت واسناني مطبكة ولج شلون زوجج وميعرف اسمج الحقيقي ..
حسيت بزوجها يحوس تقربت منه ووجهت المسدس عليه
خزرته وحجيت بعصبية
- لا تحاول تتحرك ترة اترس راسك رصاص ..
رفع ايده باستسلام ..
رجعت لبيداء كتلها احجي وجاوبي ع سؤال ..
كالت ؛ من تعرفت عليه خفت من عيالي وكتله اسمي يقين وبعد ماتطورت علاقتنا وردنه نعقد كتله عندي اسمين بالجنسية وبالبيت هو اخذ لسانه على اسم يقين ..
خليت ايديه على راسي اشيلهن واركع راسي بيهن ، عذاب الندم تملكني بلحظة وتوغل بيه شتتني وبعثرني
كنت اشعر انو انفاسي تطلع من بين رياتي مثل السحاجين الحادة المسمومة ، تطعن بيه الف طعنة وطعنة ..
خليت ايديه على رقبتي والمسدس بعده بيدي
رفعت راسي ليفوك اطلب منه الصبر ..
حسيت بيني وبين قتلهم شعرة وحدة بس
حاولت اسيطر على نفسي لخاطر ابني لخاطر يقين ....
استمرت طواحين الافكار تدور براسي شنو اسوي شنو اسوي ؟؟؟
جريت تليفوني واتصلت بطالب ولحظتها بلغني بحادث
حرق ابني حبيبي نتاج عشقي الوحيد ، حسيت اختنكت ، انتهيت ، بعد مالي طاقة اتحمل صدمات اكثر ، عيوني غوشت ، واذاني انسدت حسيت حرووب استعرت وصرت صريع الها ....
واجاني صوت طالب تعبان
_ لك يلله حالته خطرة ترة تعال اترك كل شي بيدك وتعال احنا بالمستشفى صار النا ساعة اتصل بيك وانت ماكو ...
طلعت اركض بلا وعي من البيت ، نسيت كل شي بلحظتها بس ابني على بالي وصورته متفارك خيالي عبالك دااشوفه محروك ويصرخ متألم ..
___________//______________________
يقين .. رجعت من الكلية وكان اخر يوم بامتحانات الفاينل للعام الدراسي ٢٠١٧_٢٠١٨ ، وبعدها انتقل للمرحلة الثالثة وتبقى سنة واخلص كان كل طموحي ارجع ابني الي ..
دخلت للبيت شفت جيهان وكعدنا نسولف وظلت تحجيلي ع الجهال ووكاحتهم وشنو سوو ..
للحظة خلت ايديها بحظنها وتطكطك باصابعها ومبين على هيئتها انو هيه خجلانة ..
كالت ؛ اليوم ماجد حجه وياي ..
سألتها ؛ شنو كال ؟
كالت ؛ اخذني من ايدي وكال تعالي احجي وياج
كعدت بصفه ع القنفة مدنكة واعصر باصابعي من الندم ولو ماهو يمي جان عضيتهن صبع صبع ..
