أنا بشاربك يا علي

الحلقة -9-

البارت التاسع (9)
((أنا بشاربك ياعلي))
بقلمي :-فراقد حسن علي
...............،،،،،،،.........

سمعت خطوات رجليه أبتعدت ، كمت شربت مي،،ورجعت غفيت ونمت كلش تعبانه

فزيت مخروعه الباب أنشلعت ،،تكسرت علينه ،،واسمع صوت أبو حامد يصيح حاااااامد ،،يا حاااامد

باوعت الساعه ب(2)بليل أبوه يصيح عليه يريده يطلعلهم ،،وهو نايم مطفي ندهته ،،ردت حاولت ماكعد،، شويه وراح أبوه

كمت جبت مي بارد وغسلت وجهه ،،هو فز وكعد على حيله ،،كلشي ماافهم من حجيه يخيط ويخربط
بقى شويه كاعد بمكانه

حامد /بيش ساعه هسه

زهره/ب(2)بليل

حامد/بوووويه وليش هلكد عفتيني نايم ،،هسه أبويه يعلكني فلقه والكاه منتظرني

زهره/شفتك تعبان ونايم عفتك براحتك ،،وابوك مرتين دك عليك الباب

حامد/شوكت هل حجي ،،شوكت دك الباب

زهره/هسه من غسلت وجهك وتقريبا قبل ساعه

حامد /خرب ..... ليش ماندهتيني من وكت اليوم شيخلصني من عنده

شفته فز بسرعه من مكانه وكام يبدل ،،ينزع بهدومه ويشمرها على الكاع ترس الكاع بيهن ،،بنطرون بجهه،،الستره بجهه،،القميص،،الجواريب ،،حتى الساعة نزعلها وشمرها على الكاع ،،

ولبس دشداشه بيضه وهو يمشي يسد بدكمها وبطلعته للباب بس فتحها لكى أبوه وامه بوجهه يصعدون الدرج طلع وطبك الباب وراه

ماكو دقايق وأشوف أمه طبت للغرفه هجمت عليه وجرتني من شعري

أم حامد/ولج العوبه ليش تمنعين حامد منج

زهره/خاله فدوه بس عوفي شعري ،،وماافتهم منج شتحجين

أم حامد /بت وحيد لا تستغبين براسي عوفي هاي الدروب ،،ليش ماتقبلين حامد يتقربلج؟؟

زهره/خاله يادورب ،،شجاي تحجين والله هو جان نايم كعد بدل وطلع عليكم

أم حامد/أنجبي لج شنو تجذبين أبني ،،يكول من المغرب لهسه اتحايل عليها وأجيتها بكل الطرق ماتنطيني نفسها

زهره/والله خاله بالقران بس طب للغرفه نام ،،واني هسه غسلت وجهه بمي بارد يلا كعد

أم حامد /شوفي ولج الج مهله نص ساعه واجي عليج اريد نيشانج بيدي ،،غير هل حجي أشوفج الويل

هي طلعت وحامد دخل للغرفه وقفل الباب أشرلي حط اصبعه على حلكه أششش بمعنى مااطلع صوت ،،همس أبويه حط كرسي وبقى كاعدلي بالباب

زهره/حجيت بصوت ناصي وشعنده كاعد بالباب شيريد

حامد/ينتظرني يريد النيشان ،،لو يعلكني فلقه