أنا بشاربك يا علي

الحلقة -21-

البارت الحادي والعشرون(21)
((أنا بشاربك ياعلي))
بقلمي/ فراقد حسن علي
..........،،،،،،،..........

صدق كلام الله من كال بسم الله الرحمن الرحيم ((وَمَن يَتَّقِ اللَّهَ يَجْعَل لَّهُ مَخْرَجًا (2) وَيَرْزُقْهُ مِنْ حَيْثُ لَا يَحْتَسِبُ ۚ وَمَن يَتَوَكَّلْ عَلَى اللَّهِ فَهُوَ حَسْبُهُ ۚ إِنَّ اللَّهَ بَالِغُ أَمْرِهِ ۚ قَدْ جَعَلَ اللَّهُ لِكُلِّ شَيْءٍ قَدْرًا (3))

وصلت للبيت ،،فتحت باب الشارع هي بيها سرقي من جوه وبيها فتحه صغيره من فوك على شكل نص دائره امد ايدي وافتح السرقي هذا الشي بس احنه نعرف بي

فتحت الباب وبقيت اباوع شنو هاي البراني يلمع كاشيه ونظيف يكول هسه مطبكينه ،،

وشفت على جهه بصف حايط الجوارين ،،من جهه تختى و قنيقه غاز مطروحه وعليها زوليه مغسوله ،،وفوكاها الحصيره،،وعليهن دواشك الكرويتتات

وشباك الهول الجام يلمع والشبك هو كله يلهث من النظافه

دخلت الهول مفروش زوليه جديده ونظيفه،،الكرويتات عليهن دواشك ونزلات جديده،،
والطبلات نظيفه وعليها مفارش بيض ومطرزه باالوان ونقشات حلوه وعليهن تحفيات صغيره
والكومدي الخشب جاماته يلمعن والمواعين البداخله نظيفات و مغسولات عبالك هسه طالعات من الباكيت والجرجف العليه غير شكل والتلفزيون ممسوح ونظيف ومغطى بمفرش حلو بي نقشات ورد والبردات جديده والصوبه مشعوله والريحه تخبل بالبدايه ترددت افوت كلت خاف متوهم وهذا مو بيتي وداخل غير بيت هههههه بس هذا بيتي بعد التنظيف ههههه

حمحمت ودخلت جوه ماكو زهره شفت باب الحمام مقفول وسمعت صوت الدوش عرفتها بالحمام

دخلت اول غرفه مفروشه زوليه جديده ومده من جهه وحده وبيها جربايه نفر واحد بقيت صافن هاي منين ومفروشه و وعليها نزله جديده ونظيفه ومخده وبطانيه جديدات والبرده هم جديده

رحت للغرفه الثانيه هم مفروشه زوليه جديده والمده من جهه وحده والبوفيه نظيفه وممسوح خشبها والنضيده مسفطه وملفوفه بجرجف حلو والبرد مالتها هم جديده والكنتور هم ممسوح وموجوده بيها جربايه نفر واحد مفروشه ونظيفه هاي شنو هي بس جربايتي وهي تنام عليها بهذيج الغرفه هاي منين جابتها الجربايه الثانيه

دخلت للمطبخ نفس وضع الصبح ماكو شي متغيير خلف الله عليها مبين هواي مشتغله وتعبانه
من الاخير بيتي يشعر بالنظافه يلمع لمع

رجعت للهول وتمددت على الكرويته صدك مرتاح ونفسيتي منتعشه نظافه فووول والريحه تجنن غمضت عيوني وغفيت واسمع صوتها تندهي

زهره/علي،،علي،،اكعد ليش هيج نايم

علي/فتحت عيوني واشوفها واكفه كدامي طولها حلو ،،رشيقه،،وبيضه وعيونها خضره ورموشها طوال طاخات بجفونها وحواجبها طويله ومجروره لنهايه عيونها وحلكها صغير وشفافيها متروسه وكصت خشمها حلوه وشفت اكو شامه سوده فوك حاجبها الايسر من صفحه شكد حلوه صح وجهه بي زراك وخطوط خارطه الوطن صاير بي من الضرب بس ملامحها كلش حلوه