اسمحو لي اسلم عليكم واقول ليكم اني هنا عشان احكي ليكم قصة ليست بالغريبة ولا بالرهيبة هي قصة حب بس مسلية وعشان عارف انو قصص الحب بتكون مصدر اهتمام واسئلتها كتيرة حصلت كيف واحداثا شنو وانتهت علي شنو ده كلو حانمر عليهو . طيب السؤال البدور في اذهانكم انو انا ياتري منو؟ صاحب القصة ولا دخلي شنو ؟ انا بقول مامهم عشان حاتفكرو كل شويه انا دوري وين وحااظهر متين انا بقول سموني الراوي ، يلا نبدا
بفتش علي طريقة ابدا بيها تكون مامملة تعالو نفكر شويه اممممممممممم!؛
كان في شاب اسمو سليم ٢٨سنة وهو موفور الصحة وجسمو رياضي ووسيييم ملفت للنظر، شخص حضورو قوي وشخصيتو حازمة ودايما راسم نظرة سخرية ومغرور شايف نفسو من الاخر وليهو الحق يكون كده لانو الحوليهو خلوهو كده ، كان بملك مع زوج اختو شركة تنظيم مناسبات رسمية واعراس واي حدث ممكن يحتاج تنظيم
ناصر زوج اخت سليم ٣٥سنة متزوج سلمى اخت سليم الكبيرة عمرها٣٠سنه وعندو منها طفل عمرو ٥سنين اسمو محمد
بديرو هم الاتنين شركتهم سوا كالتالي؛ كل واحد فيهم ليهو سكرتيرة وليهو مساعد شخصي وبتقسمو المهام مع بعض
مساعدة ناصر الشخصية تركت الشغل بعد انخطبت لانها حاتتزوج واحد مغترب وحاتسافر معاهو
فكر ناصر يعلن عن وظيفة شاغرة ونزل اعلان
@@@@@@@@@@@
في حي متواضع البيوت كان هناك في بيت بسيط بس من برا تحسو معتنين بي شكلو ساكنينو اتنين خالة ايمان وبت اختها اليتيمة داليا والاخيرة دي بنت شابة عمرها٢٣سنة خريجة فنون جميلة وعاطله في البيت وليها اخ كبير مقيم في دولة اروبيه بعيدة ومابنزل البلد خالص بس برسل ليها هي وخالتا مصروفهم بي انتظام
خالة ايمان بتنادي:داليا ياداليا تعالي خالتك نفيسة هنا عايزة تسلم عليك
داليا:يلا جاية
داليا دي بت بسيطة جميلة بس الا تتأملوها عشان تنتبهو لي جمالا شكلها بريئة براءة واضحه في ملامحا في عيونا في هيأتها العامة مبتسمة علي الدوام رغم انها فقدت امها وابوها سوا في سن الطفولة المبكرة سبب روحا المرحة السعيدة هي خالة ايمان بتحبها وربتها بي كل زرة من روحا خالة ايمان اولادا كلهم متزوجين وحياتهم لاهياهم وهي ارملة وربنا رسل ليها داليا بنت اختها الاصغر منها عشان تونس وحدتا بعد مااولادها يفوتو كلو في حال سبيلو داليا كانت بتحب اولاد خالتها وعاشت معاهم فترة لحد مااتسرسبو واحد ورا التاني وفضلت مع خالتا الحبيبة
داليا: ازيك ياخالتي كيفك وين بقيتي مابتجي علينا ربا شغالاك مننا
نفيسه: هههههههه اسكتي بس ياداليا ربا خلتني قلتا الروب تقولي مافي زول حمل قبليها غلبتني كل يوم لافحة توبي وجاريه ليها
داليا بي ابتسامه: طيب جيبيها معاك هنا لو عبدالحميد برضا
نفيسة :مع انو تعب منها بس ماراضي قال مابقدر يقعد براهو بدونا
خالة ايمان:والله يانفيسة فاقدة تصبيحتك علي كل يوم
نفيسة:ماتفقدي عزيز ان شاءالله، كدي حسي خليني من ربا ووحما انتي ياداليا مادايرة تشتغلي
داليا: يارييت بس مافي شغل فتشت كتير
نفيسة : طيب لقيت ليك الشغل وكلمتا ليك صاحب الشغل قبل اكلمك حتى
داليا بي دهشة مخلوطه بي فرحة : ويين ده ياخالة ياسلااام تكوني عملتي معاي معروف
خالة ايمان:نفيسة من متين بقيتي واسطة وواسطة تقيلة كمان هههههههه
نفيسة:ههههههههههههه الله يحزك ياايمان ضحكتيني، لا واسطه ولا شي الحصل انو عندي اخوي ناصر لو تتزكروهو بجيني هنا طوالي وهو عندو شركة بتاعت تنظيم مناسبات ولا شنو ماعارفة المهم كايس ليهو موظفة وانا قلت ليهو عندي ليك بت جارتي اسمها داليا جامعية وحلات الدنيا عليها
داليا:حلات الدنيا دي لزومها شنو حسي هو كايس لي عروس اصلو ؟ههههههههههه
نفيسة :يابت لازم لازم ، يلا قال لي بكرة تمشي ليهو في الشركة عشان يقابلك ويشوف لو بتناسبي الشغل وشيلي شهاداتك معاك
داليا بي توتر : خير ان شاءالله، واشكرك ياخالتي ماقصرتي معاي
وقامت حضنتا،ومشت عشان تسوي القهوة لي خالتا والجارة العزيزة خالة نفيسة
كملت داليا يوما عادي ولما جا الليل بدت تستعد واختارت لبسة جديده كانت محتفظة بيها لي يوم زي دة كانت معتبرة انو الانطباع الاول مهم في اي وظيفه واي معاينة لي شغل ولما جا اوان النوم مست علي خالتا ومشت رقدت وكانت بتدعي لي الله يوفقا لانها نفسها تعيش مرحلة جديدة في حياتا وتبني نفسها بي نفسها ، نامت وهي في راسا كل الافكار البتشغل اي زول مقبل علي فرصة عمرو
طلع الصباح وداليا صحت علي صوت خالتا وقامت وعملت كل الطقوس الصباحية وبعدين بدت تستعد للطلعة
طلعت ودعوات خالتا مرافقاها شالت ورقة العنوان وقرتا مرة تانية ومشت ركبت المواصلات
كانت مقبلة على مغامرة حاتغير حياتا البسيطة من غير ماتعرف
&&&&&&&&&&&&&&&&&&&&&&&
