وهي واقفة جاها احساس ملح انها تتلفت وراها واتلفتت لقت سليم واقف ومكتف يديهو كانت حايغمي عليها من الخوف ، ابتسم ليها بطريقة مافهمتا وقال: غرامي الازرق ، براڤو والله ماكنت فاكرك جريئة، طلعتي مهتمة بي يعني
داليا حست بي نار الغضب بتحرق فيها فردت عليهو ونست الخوف منو للحظة وقالت: والله ماانا البطلع في وشك في كل مكان ولا انا البجر شكلك كل شوية😏
سليم: كدة كدة ، طيييب يا داليا انتي بديتي وعرضتي نفسك علي وانا قبلان واستحملي البجيك ياحلوة
داليا: لأ انت موهوم مااكتر انا ماعرضت ليك نفسي ولو علي اللون اللي انا لابساهو ده ماحكر عليك انا بلبس البعجبني مش البعجبك انت ولا غيرك😡
سليم قرب منها وهي لاشعوريا رجعت لي ورا وعيونا فيهم فزع ضحك سليم فيها ورجع قال: انا مابرجع في كلام قلتو انا قبلان انو تكوني من حبيباتي
داليا : بكرهك وبكره غرورك ده وماحاانولك الفي بالك لايمكن اخليك تلعب بي ابدا فاهم ؟
سليم: حنشوف
انسحب سليم خلاها مقهورة بتهري في نفسا ، سارة طلعت وهي بتتأسف عن تأخيرا وداليا قالت ليها انا ماعايزة اعمل شي يلا نرجع سارة وافقت ومشو رجعو الحفلة ، شافت سليم قاعد متلصق في حبيبتو وبوشوش فيها وهي تضحك لحظتا حست بي غضب جواها ماقدرت تفسرو حست انها بتكره البت دي بدون اي سبب، داليا قررت ترجع البيت وابت تسمع لي هاني وسارة البحنسو فيها عشان تقعد مشت لي ناصر واستأذنتو في انها تمشي ناصر حس بيها متضايقة اخدا علي
جمبه وقال ليها : مالك مكشرة ، في زول ضايقك ، اوووو دقيقة دقيقة لي حاسس انو فستانك عمل لغط
ابتسم ليها وهي ماقدرت تخبي : انا والله ماعارفة انو مامفروض البس اللون ده وسليم حسي فاكرني واحدة جريئة وصلت ليهو رغبتا فيهو بي اسلوب ملتوي😞
ناصر: عارف هاني بكون هول ليك الموضوع وخوفك ساي ده كلام فارغ ماتختي في بالك ونصيحة تانية سليم مايرهبك والا حاتخليهو يلعب بيك وارجوك اقعدي كملي الحفلة والعشا وانسي سليم انسيهو وانبسطي
داليا وافقت علي مضض ، ماقدرت تقول ليهو انو سليم جاها وقال ليها عايزك وانو الموضوع ماهظار بقا
سليم بقي طول الحفلة عينو متابعة داليا ومامنتبه لي حبيبتو ولا بتقول في شنو بقي بس بتأمل فيها شاف فيها شي ماشافو قبل كدة شاف جمال طبيعي مامزيف جسم مثالي علي حد قولو، الفستان زغلل عيونو لييه لبست لونو المفضل هل هي عايزاهو بالجد؟ كان فاكرا مختلفة لكن وقف في الحتة دي حتت انها استدرجتو كان في حالة صراع مع نفسو وتاني قال ليه اصلا مهتم اذا كويسة ولا لأ هو بطل زمان يهتم غير لي نفسو قرر انو البنات تقضية وقت وبس وداليا واحدة منهم حايقتحما ويقضي بيها زمن زيها زي غيرا قرر يخليها تندم علي انها فكرت فيهو واتجرأت عليهو ماحيسمح تاني لي واحدة تملك قلبو ابدا، اما سلافة كانت بالنسبة ليهو زينة مكملة لي برستيجو العاملو لي نفسو هي طاردتو فترة من الزمن لحد ماقرر يستجيب لي اغرائاتا وماحرم نفسو من انو يعرف عليها بنات تاني وهي بت متحضرة شديد بتخليهو يحضنا ومرات يبوسا كمان المهم انو يبقى ليها ومايبعد وهو مستمتع بكدة وعشان كدة مصاحبا من زمان
قبل نهاية الحفلة بساعة داليا رفضت تنتظر اكتر وقامت عشان تمشي هاني اصر يوصلها ويرجع وطلعت معاهو ،سليم حس بي الغضب لانو شافا طالعة مع هاني كان نفسو يقوم يلحقهم بس سلافة لاصقة ليهو
انتهت الحفلة وكل واحد فيهم بقي في سريرو وبفكر، داليا كانت بتتزكر في سليم وكلامو ليها بقت ماقادرة تزحو من فكرها مهما حاولت كانت كارهه ضعفها قدامو وقدرتو في انو يسيطر عليها بي حضورو كل مرة
سليم كان راقد وخيال داليا مافارق عيونو وبقي يردد في نفسو : غرامي الازرق بعشق جمالو بأسرني غموضو بسحرني بملكني مازنبي ، استني علي ياداليا استني علي وحاجيب راسك
