في اليوم التاني استلمت داليا شغلها وزيها وكانت قاعدة في مكتبا لما فجأة دخل عليها واحد وابتسم ليها ابتسامة عريييضة وجا اتكل في المكتب وهو بقول :داليا العضوة الجديدة في الركب ازيك
داليا ردت ليهو نفس الابتسامة وحيتو
احب اعرفك انا هاني بشتغل المساعد الخاص لي الاستاذ سليم مدير شركتنا التاني يعني انا وانتي بنشغل نفس المنصب
داليا:اهلا فيك انا داليا
هاني : انا اذا سمحتي لي حااكون صديقك والزول الحيرسيك علي كل الشمارات الفي المكان ده واعرفك علي كل الموجودين 😊
داليا: ياسلام شكرا ليك ياهاني
هاني:يلا انا داخل عند استاذ ناصر سلام ياحلوة
داليا : سلام
هاني: الساعة ١عندنا استراحة حااجي اسوقك الكفتريا الخاصة بي الشركة نتونس وناكل شي خفيف
داليا:تمام يلا سلام
هاني:سلام
في فترة الاستراحة جا هاني وساق داليا وسارة معاهم ومشو تحت قضو نص ساعة ونسة وضحك هاني كان ظريف وبتاع نكتة واغلب الموظفين الكانو بجو الكفتريا بقيفو يسلمو علي داليا ، مرا اليوم التاني وداليا كانت متحمسة اكتر واكتر
مرا الاسبوع الاول علي خير لحد ما طلب سليم من ناصر يرسل ليهو اوراق مهمة مع المساعدة بتاعتو وضروري، مشت داليا ومعاها الاوراق لمكتب سليم ، وقفت عند السكرتيرة واسمها يارا بت شايفة روحا وعاينت لي داليا عين متفحصة وطلبت من سليم اذن لي البت الواقفة قداما وقالت ليها تدخل،دخلت داليا عند سليم كان مشغول ومارفع عينو عاين ليها وقفت تتأملو شخص وسيم الطلعة بس مامريح وبدا قلبها يدك وبعد شوية حست نفسا واقفة زي الهبلة فاتنحنحت
سليم رفع راسو وانصدم من البت الواقفة قدامو عاين ليها بي استغراب حسا انو ماشاف النوع ده قبل كدة وبي نظرة متسائلة عاين ليها فقالت بي سرعة: انا داليا رسلني استاذ ناصر بي الاوراق الطلبتها
سليم عاين ليها عين خوفتا كان شكلو بالنسبة ليها بعمل هلع مع انو اول مرة تشوفو من ماجات بس ماارتاحت لي وقفتا قدامو
سليم: انتي البت الجديدة؟
داليا اتغاظت منو ماعارفة ليه وردت بي برود : نعم انا داليا المساعدة الجديدة
سليم وكأنو بجرب الاسم في خشمو :داليا ، خلاص شكرا جيبي الاوراق واتفضلي
داليا اتغاظت اكتر ختت الاوراق وطلعت بسرعة من غير ماتستأذن او تتلفت خلت سليم يرفع حواجبو وجاهو صوت هاني من برا وهو بقول : اووو داليا عندنا يامرحبا
وصوت داليا: اهلا هاني كيفك
هاني برد: كويس والله الحمدلله
داليا:يلا سلام انا ماشة
هاني : خلينا نشوفك تاني بالله
ودخل هاني عند سليم وسلم : سلام
سليم: اهلا بي هاني النشيط
هاني: مشيت عملت كل الكلفتني بيهو وحااطلعك علي النتيجة
سليم كأنو ماسمع وغير الكلام: بتعرف مساعدت ناصر انت؟
هاني:داليا؟ طبعا لاقيتا في مكتب ناصر كم مرة
سليم: وليه ماوريتني انو لقا موظفة جديدة
هاني :كنت فاكرك عارف وهو كلمك
سليم بغضب: في داعي اطلع اهبل قداما واعاين ليها ومااعرف هي منو ؟
هاني:اهدي يا سليم ماحصل شي زلة صغيرة فوتا خلاص
سليم: ماعلينا اقعد وفهمني عملتا شنو
سليم كان بسمع بي اضان واحده وبالو بعيييد فكر في البت الفجأة ظهرت قدامو ومافهم سر اهتمامو بي كدة بس الفضول ملاهو وقرر يقتحما
سليم شخصية بحب لفت الانتباه خصوصا عند الجنس اللطيف كان عندو حبيبة وكم بديلة وكان بحب النسوان وداليا ماكانت من النوع البلفت نظرو بس هي فاجأتو بت واقفة قدامو وشها خالي من اي ميك اب وعيونا بس مكحلة ولمحة برائة مالية وشها حس انو عايز يكتشف النوع الجديد ده ، وفاق علي كلام هاني بقول : اها رايك شنو
سليم:حاجرب اكييد
هاني: انت سمعت اصلا انا بقول في شنو؟ شنو هو الحاتجربو
ضحك سليم وقال في سرو: النوع الجديد
