سليم: داليا
داليا: سلامتك ماكنت عارفة انك حاتنتحر بي وراي
سليم: الجابك شنو جيتي تتمي عرسك؟
داليا: جيت عشان عاطف وحشني
سليم: وانا ماجيت على بالك؟
داليا: خطرت لي عشان كده جيت اكفر ليك
سليم: فيك الخير
داليا: ابقى تعال احضر العرس وجيب معاك نور
سليم: طلعتي بتغيري علي وبتحبيني في الاخر
داليا: وانت ربحت خلاص كده انتهينا
سليم: وانتي كمان ربحتي وعارفة كده ولا ماكان جيتي
داليا: صراحة ماقدرت انساك كنت كارهاك واكتشفت انو كراهيتي هي الحب نفسو انت اتغلبت علي بي جدارة وجبت ليك معاي كاس هدية
سليم: اشتقت لي لسانك الزفر العايز قطعو ده
داليا: وانا اشتقت لي جبروتك وغرورك ده
سليم: انتي كده بتخوني عاطف معاي
داليا بي دلال: انا بحب الخيانة لما تكون معاك
سليم: لا لا يابت حلمك علي بقيتي تضربي تحت الحزام
داليا: حيوان بس بحبك
وطلعت داليا بسرعه من عندو وهو حاول يتحرك بس الرضوض في جسمو منعتو بقى يناديها داليا داليااااا
سليم كان مستني يخف ويطلع ليها بسرعه بقى مابنزل من يدو التلفون وطوالي معاها
سليم: شنو يعني تاني ماجيتي
داليا : عرسي قرب ومحبوسة
سليم: دمك خفيف
داليا: اي زايدة ليهو جردل مويه
سليم : اها حاترقصي رقيص العروس عشان اجي اتفرج عليك وانتي شبه لابسه هههههههه
داليا: دمك خفيف
سليم: اي عارف
داليا: بحب سغالاتك دي شديد
سليم: داليا انتي حتبقى مرتي
داليا: منو دي انا ليييه جنيت ولا قالو ليك جنيت
سليم: بخطفك تاني وارميك لكن المرة دي برميك في بيت العدل
داليا: انت بقيت ظريف وطيوب كده كييف هااا؟
سليم : معزبتي ترتدي ازرق
داليا: وكمان بقيت شاعر
سليم: شاعر يامشاعر
ده كان حالهم مع بعض طوواااالي
سليم شد حيلو وقدر يتحرك ويطلع فطوالي دور عربيتو ومشى بيت ناس داليا وكان عارف انها في الشركة بس كان ماشي لي خالتا اللي رحبت بيهو من شافتو ودخلتو جوا وضيفتو
سليم: ياخالتي وحشتيني والله كده تسافري وتقطعي بينا
خالة ايمان: فقدتني انا ولا بتي يامستهبل😄
سليم ضحك: يعني انتي عارفه؟
خالة ايمان: داليا حكت لي عن حبها ليك وكانت طول الرحلة حزينة ومامبسوطة اخوها ضرار كان عايزا تقعد معاهو تتم ستة شهور لكن لما لقيت البت حاتضيع بي وراك اقنعتو يخلينا نرجع ومن ماجينا وهي تبكي لحد مااتصلت علي سارة صاحبتا وورتا انك في المستشفي قامت جاتك جارية ونست عزت نفسا
سليم: انا كنت قاسي معاها كتير مع اني بحبها شديد وعايز اعوض عليها، وحسي جيت من وراها عشان اتكلم معاك و اكلمك اني عايزا وبوعدك انها ماتحزن تاني ابدا ان شاءالله
خالة ايمان: انا ماعندي مانع لكن عليك بي اخوها ضرار انا حسي حااضرب ليهو واخليك تتكلم معاهو
ضربو سليم وخالة ايمان لي ضرار واتكلمو سوا وسليم كرر طلبو ليهو وخالة ايمان ورت ضرار انها بتعرف سليم واهلو كويس وانها من ناحيتا موافقة سليم كان فرحان بي كلاما ، ضرار طلب من سليم يتكلم معاهو اسكايب لاو عايز يشوفو اول ويتونس معاهو سليم وافق بس طلب منو مايجيب سيرة لي داليا عن اي شي لحد مايقرر واذا وافق يكلم خالة ايمان وطلب من الخالة برضو ماتكلما انو جا هنا
داليا لما رجعت لاحظت انو خالتا مبسوطة وكل شوية تتبسم قالت ليها : خالتي انتي رجعتي تعيشي قصة حب جديدة ولا شنو 😃
خالتا لوت خشمو وقالت ليها ااي😒😝
داليا: ماتزعلي بهظر بس شايفاك كل شويه تتكشمي قلت اظنك رجعتي مراهقة تاني 😂😂😂
الخالة : اي قلت ليك عندي حبيب ومااي حبيب واحد وجيييه وعايش عيشة عز ومرطب
داليا: تمام الله يتم ليكم على خير
الخالة: اميييييين والله ياداليا يابتي كان تم المراد حااكون اسعد خالة في الدنيا
داليا: ههههههههههههههههه والله ياخالتي بقيتي مضحكة الظاهر بلد الخواجات قلبت حالك
الخالة: داليا قومي شوفي وراك شنو واختيني
داليا قامت حضنتا ودخلت اوضتا وقبل تعمل اي شي تلفونا ضرب شالتو وباست الرقم الظاهر في الشاشه وردت: عايز شنو
سليم: عايز اعرسك
داليا: انا مخطوبه لكن
سليم: بقتلو وارمي جثتو للكلاب واجي اخطفك وارميك في الخلا وبالليل كمان عشان تخافي اكتر
داليا: انت اصلا ظريف كده ولا بتتظارف
سليم: رايك شنو اجيك البيت عشان تختبريني اذا ظريف ولا لأ، احب اطمنك اني حنييين مابشد عليك
داليا: انت بتقول في شنو
سليم: عايزة تزوغي عارفك جبانة ، تتزكري يوم رقصنا سوا كنتي بتتراجفي فاكراني داير اكلك
داليا: انا نسيت بالله نحن رقصنا سوا؟
سليم : اصبري لي ياداليا كان ما علمتك الادب ماابقي سليم
داليا: يسلسل راسك ده ياكريه
سليم: بحبك ياحيوانه بحبك
داليا: حبك ده طاير في السما
سليم : انا واقف برا تعالي
داليا😱: انت جادي لأ طبعا
سليم : قولي ماشه لي سارة ضروري ، تعالي عليك الله والا والله بدخل انا وبجيك جوووووا اصلا انا طالبك الشرط بتاع الفوز حضن وبوسة
داليا: لأ ياسليم عليك الله امشي
سليم: مشتاق اشوفك عليييييييك الله
داليا: لاااااا
سليم: ياتجي يابمشي لي نور اصلا هي بتحنس ليها زمن عايزاني
داليا: بقتلك لو عملتها
سليم: يلا مستنيك
داليا مرقت وقالت لي خالتا ماشه مشوار ساعة وراجعة
خالتا ماكانت بتسألا عشان عارفة داليا مابتاعت فوضي ، داليا جرت ركبت وسليم طوالي دور مشا بسرعة ، ساقا ومشا وبقى يلف في الشوارع وطول الوقت يضحك فيها بي كلامو العبيط داك لحد مانزلو في كفتيريا كده على النيل وقعدو جمب بعض وبدا سليم يقول ليها : داليا انا عايز اقول ليك انا اسف على اي لحظه زعلتك فيها وضايقتك
داليا: حقيقة كل لحظه كانت معاك كانت حلوة بالنسبه لي انا الكان مزعلني اني ماكنت متأكده من حبك لي اما انا عرفت اني بحبك يوم الحفلة لما شفتك مع سلافة وكرهتها شديد عرفت وقتا اني حبيتك وحسيت بالخوف
سليم: طيب لو قلت ليك انا حبيتك من اول مرة رفعت فيها راسي في مكتبي وشفتك واقفه قدامي تصدقي؟ وانا كمان حسيت بي الخوف وحسيت بي رغبه اني لازم اقتحمك واعرف عنك كل شي
داليا كانت حاسه بي خجل شديد وسليم لاحظ ليها وقعد يضحك: من متين انتي قاعدة تخجلي يا حيوانه ماساله لسانك ده طول الوقت فيني
داليا ضحكت : انت عديم الرومانسية
سليم: انا الرومانسيه عندي معناها قلة الادب تحبي تجربيها
داليا😡: انا والله مضيعه فيك وقتي وحبي وانت مابتستاهل انت مفروض تتشنق في ميدان عام
سليم بضحك😂: اي اظهري علي حقيقتك خلي عامله فيها خجلانه وبتاع
داليا: انا جعانه جيب لي اكل يابخيل
سليم: تعالي معاي بيتنا وانا بعرف اشبعك كوييس
داليا: وااااااااااااي منك ياناس الحقوني انا بحب لي واحد قليل ادب وحيوان وسفيه
سليم: خلااص حاتاكلي صمي خشمك ده
وقضو الاتنين القعدة كلها كده يضحكو وينكشو في بعض وبعد داك ساقا رجعا البيت
بالليل سليم اتصل بي الاسكاي بي علي ضرار واتعرف بيهو واتونسو بي الساعات ، ضرار : خالتي بتشكر فيك وهي مربية داليا وادري بي سعادتا وانا موافق بيك وبتمني تطلع قدر المسؤوليه،داليا يتيمه طول حياتا ومع انو خالتي احتضنتا بس محتاجه برضو لي حب راجل يحتويها ويعوضا فقدانا للاب في حياتا
سليم: انا بسعي بي كل جهدي اسعدا باقي عمرها الجاي ان شاءالله كفاية انها خلتني انسان جديد وحببتني فيها
سليم كان سعيييييد بي موافقت ضرار وجرا صحا سلمى وناصر وقال ليهم انا حااعرس داليااااااا حااعرسا 🏃🏃🏃
ناصر لي سلمى : اخوك خلاص جنا ياحليلو وبقو يضحكو فيهو
تم تحضير حفل زفاف خرافي لي داليا وسليم وكل الترتيبات كانت مفاجأة لي داليا اكتر
سليم ساق اهلو ومشو خطبو داليا من خالتا وكانت حاضرة نفيسه وربا اللي قعدت تشاغل داليا: والله طلعتي ماهينه سليم ياداليا؟ لعبتيها صاح يجي شنو عاطف قدام سليم هههههههههه
سليم طول القعدة بعاين لي داليا القاعدة بعيد وبغمز ليها وهي تضحك .
طبعا داليا قالت ليهو مابعرس دايرة اتخطب اول 😀 سليم قال ليها الخطوبه مدتا شهر لاغير والا مافي ليها غير الوضع المخل ضربتو داليا وعضتو في كتفو
وجا يوم العرس وسوو لي داليا حفلة حنة اول وطبعا للان ماشافت فستان الزفاف لانو سليم قال ليها تشوفيهو يوم تلبسيهو ولما جا يوم الزفاف مشو سارة وربا معاها نفس البيوتي سنتر الوداها ليهو سليم والتلاته اندهشو من الفستان كان فستان زفاف بس لونو اكيد عرفتوهو
ايواااااا ازرق كان مفصل عشانا خصيصا وطلعت بيها سبحان الخالق فيما خلق وسليم لما شافا مااشتغل بي ربا ولا سارة ولا هاني الواقف جرا وحضنا لما الجماعه خجلو واتضايرو ههههههه غايتو يجازي محنك ياسليم😂😂😂
وفي الحفلة رقصو الاسلو المرة دي قدام الكل وسليم ماكضب ماسكا من خصرا وضاميها وهي كانت منحرجه قال ليها: مالك ومالي مرتي وانا حر مافي زول عندو معانا كلام ، ضحكت داليا وقالت ليهو : ياربي حبيت فاجر انا قال ليها : خلاص هس خليني استمتع قبل الغنيه تخلص
💗💗💗💗💗💗💗💗💗💗💗
الباقي انتو عارفينو فمافي داعي نفصلو وتعالو نمشي نخليهم
في فرحتهم براهم ويلا يلا ماتبقو عوارض انا غايتو مشيت
