داليا ماقدرت ترفض انو سليم يوصلا ماحبت تلفت نظر او في توتر بينهم ، ودعت محمد وسلمت على سلمى وناصر ومشت مع سليم
دور سليم ومشا وبقا كل شوية يعاين لي داليا وهي قاعدة حاضنة شنطتا، قال: اسف لاني كسرت تلفونك
داليا: ماحصل شي خلاص
سليم مشا بيها السوق وهي ماملاحظة وقف قدام محل بتاع تلفونات ولما انتبهت قالت ليهو اوعى تفكر لأني ماحأقبل
سليم: اعتبري انو هدية واعتزار
داليا: ماعايزه غرامة
سليم: داليا ليه مصرة انو تخليني اغضب عليك ، مرة واحده اسمعي الكلام
داليا: وانت ليه مصر تمشيني على كيفك كل شويه، يعنى تكسر التلفون بي جهه وبي جهه تانية تجيب التعويض؟ ، كل شي عندك ساهل بسهولة تجرح وبسهولة تواسي
سليم: قسما بالله ياداليا تزيدي حرف بسوقك ارميك في الخلا واخليك
نزل بسرعة وقفل عليها في العربية ودخل المحل بعد شويه جا راجع وفتح بابو وقال ليها جيبي التلفون المكسور
داليا:لأ
سليم بي وعيد: داليا داليا داليا انا حااجيك اخنقك اخلصي وجيبي التلفووووووون
داليا طلعتو ادتو ليهو شالو ورجع المحل ، رجع بعد مسافة واداها تلفون جديد موديلو جميل ولقت شريحتا مركبة وجاهز للاستعمال
داليا بدون نفس: شكرا
سليم ماردا ليها فضل ساكت ومشا في طريقو وهي كمان سكتت وقبلت منو
لما وصلو جمب بيتا فتح التأمين وداليا نزلت بسرعة وجرت دخلت من دون ماتتلفت ولا تودعو ولا تشكرو على التوصيلة، دخلت على خالتا وسلمت عليها وحضنتا ودخلتا غرفتا وبدت تغير هدوما وشالت غيار ومشت الحمام
سليم فضل يلف بي العربية بدون مايقيف في مكان سمع تلفونو برن شالو وردا لقاها سلافة: حبيبي القاسي انا لسة زعلانه منك
سليم استاء لكن قال ليها: كلمتك كتير ماتقعدي ترددي في موضوع انا مابكون عايز اتكلم فيهو
سلافة: دايما بتتهرب من موضوع الخطوبة عايزنا نفضل كدة لي متين
سليم : ماتبدي
سلافة : انا اتقدم لي عريس وزول مرطب ومرتاح وبابا موافق
سليم: وانتي مابتقدري تكسري كلام بابا
سلافة : انت اتقدم لي وبابا بوافق بي الانا اخترتو اللي هو انت
سليم: عرسي المرطب انا مابتاع عرس
سلافة بكت:بكرهك وبتمنى تلقى البتزلك وتخليك تحت رجولا ياواطي
قفلت في وشو وهو رما التلفون في الكرسي الجمبو
سليم كان متضايق شديد دور ورجع بيتهم ، دخل لقا اختو وراجلا قاعدين فات طالع علي السلم وسلمى نادتو
سلمى: الناس بتسلم اول مش تتجاهل الناس
ناصر: تعال ياخ ماش وين
سليم كورك فيهم : ماتستلموني خليكم في بعض مالكم بي
طلع فوق خلاهم يعاينو لي بعض
سلمى: الود ده مالو بقى عصبي وقليل ادب
ناصر: خليهو باين انو دروعو بتتصدع عشان كدة بقى خايف
سلمى: والله انت عارف بس ماعايز تقول لي
ناصر: اتفرجي وبراك حتعرفي الحاصل
سليم دخل وطوالي مشا رقد بي هدومو وجزمتو وماكلف نفسو يمرقا مسك تلفونو واتصل على رقم ولما فتح الخط قال: لسة صاحية؟
داليا: منو معاي
سليم: قلبك مارفاك يعني ماحسسك انا منو
داليا: مع السلامة
سليم: طيب طيب انا سليم
داليا : سرقتا رقمي يعني
سليم: ماتسميها سرقة
داليا: انت ماطلبتو منى يعني سرقتو
سليم: اطلبو عشان تدللي وترفضي لا ياحلوة انا مااتعودتا اطلب انا باخد وبس
داليا: ماكفاية عليك بتستلمني كل مااشوفك كمان عايزني اتحملك في التلفون
سليم: تنكري انك سعيدة بي اتصالي
داليا: انا طايرة من الفرح كفاية اسمع صوتك قبال انوم واحلم بي خيالك ده انت الحب والروح
سليم قعد علي حيلو من الصدمة مااتخيلا تقول كده وقال: ماشي ياداليا كان ماخليتك قلتيها وانتي بتعنيها
داليا: انت مش عندك البتحبك لييه جاي تهريني انا امشي اتصل عليها وعيشو الحب سوا
سليم: لأ انا بستمتع بي اني اغيظك انتي ، صحي بتغيري منها ياداليا قولي الحقيقة
داليا: تصبح علي خير يااستاذ
سليم: انا اسمي انتي عارفاهو وناديتيني بيهو قبل كده
داليا: لأ ماحصل
سليم رقق صوتو وبقي يحاكي فيها : سليم لأ سوق براحه انا بخاف
داليا: تصبح علي خير
قفلت فيهو الخط وهو قعد يضحك يضحك ورقد وشال المخدة وحضنا وهو لسه بضحك
بي الطرف التاني داليا ماسكة التلفون وبتتنفس بي صوت قعدت على حيلا وقالت: انا بالجد بخسر في اللعبة قصاد سليم وهو عارف كده ، هل انا بحبو ؟ لأ لأ طبعا لأ هو بسوقني للنقطة دي سواقة هو بتبع اسلوب الايحاء ، المشكلة اني دايما بعمل اللي هو عايزو مهما حاولت اعند ، يعني شنو؟ يعني حاارضى اكون ضحية في الاخر؟ اتصرف كيف انا في الحالة دي . لييه ياسليم مصر عليا لييه عايز تتحداني
$$$$$$$$$$$$$$
تاني يوم كان برضو اجازة ، صحت داليا قرييب الضهر خالتا خلتا تنوم ماصحتا حست انها بترتاح اكتر وهي نايمة بقت حاسه بيها متغيرة ونوما بقا قليل طوالي سرحانة ومرات بتسمعا بتبكي ماحبت تضغط عليها جايز تكزب عشان ماتقول الحاصل شنو خلتا يمكن براها تجي تحكي ليها .
داليا صحت على صوت تلفونا برن بي كسل شالتو وردت :الو اهليين ربا .........اي كنت نايمة ........ تعبانة والله ياربا ........ انتي عند امك؟ خلاص قايمة بستحما وبفطر واجيك
في بيت ناس نفيسة ربا كانت راقدة لما لقت داليا داخلة عليها سلمو على بعض وقعدت داليا في السرير التاني بعد مااتكلمو في مواضيع عامة ربا فتحت موضوع عاطف: دلوشا حبيبتي لييه ماتديهو فرصة تقعدو سوا اسمعي منو اتعرفي عليهو اكتر ماتستعجلي بي الرفض
داليا فكرت حست انو ممكن عاطف ده يبقى ليها سبب يبعد عنها سليم قررت تجرب من غير تأخيير وقالت: خلاص ياربا عشانك انتي انا قبلانة الاقيهو واتكلم معاهو
ربا بي فرح: خلاص برسل ليهو رقمك بتصل عليك نسقي معاهو
داليا: تمام
بعد داك قعدو يتونسو ويضحكو وداليا قدرت لي لحظات تنسى سليم جات نفيسة بي الجبنة ونادو خالة ايمان وهاتك ياونسة وفرفشة
سليم في بيتهم ماطلع من الصباح قاعد بلعب بليستيشن مع محمد الصغير والضهريه كلها نام صحوهو للغدا غصب رفض ياكل ورجع نام كان يومو كلو عادي حاول يتلهى عن التفكير بالنوم واللعب مع محمد والونسة مع اختو
جا الليل وجا وقت النوم واصحابنا بدو الصراع النفسي من اول وجديد
$$$$$$$$$$$$$$
تاني يوم الكل نزل شغلو ومشا اليوم عادي لحد ماجات الساعة ٢ لما تلفون داليا ضرب ردت عليهو : الو
...: السلام عليكم انا عاطف
داليا: عليكم السلام
عاطف: كيفك ياداليا
داليا: الحمدلله
عاطف: ينفع تاخدي اذن ساعة انا واقف تحت وعايز اعزمك
داليا جرت نفس: طيب حاامشي اشوف لو بقدر انزل ساعة وارجع
قفلت منو ومشت لي استاذ ناصر لقتو مع سارة فقالت ليهو: استاذ ممكن استأذن منك اطلع مشوار وارجع ساعة كده وبرجع ممكن؟
ناصر : ماف مانع اخدي ياستي ساعتين بس لازم ترجعي عشان عايزك ضروري
داليا: تمام
طلعت ولحقتا سارة : ويييين يانور العين
داليا ضحكت : الشمشارة دي ، ياستي عاطف جاني تحت وعايز يعزمني
سارة😃: العريس؟
داليا: ااااااي يلا امشي قولي لي هاني هههههههههههههههه
داليا نزلت لي عاطف ومشت معاهو وسارة ماكضبت طوالي تلفون لي هاني بالشمار ، هاني للاسف كان مع سليم في المكتب لما رن تلفونو وقال:ممكن ارد دي سارة
سليم: اتفضل
هاني: الو يامزة كيفك ........... اها اطربيني......... اوووووو معقول؟ جا تاني هنا؟ مشت معاهو؟........... والله طلع ماهين السيد عاطف زن فيها لمن وافقت .......... ابدا احجز الصالة والفنان كان كده ههههههههههههه......اصبري ليها لماترجع ههههههه........ اخ نسيت انا طالع مشوار مابلاقيها يبقى بكرة حااطلع منها بي التفاصيل
هاني بتكلم وسليم قدر يفهم انو بتكلم عن داليا وبدا يغضب وقال ليهو: امشي كمل في مكتبك يلا
هاني طلع وخلاهو في حالة غضب شديد داليا طلعت تقابل واحد؟ الزول الخطبا من فترا؟ يعني قررت تعرسو؟ لايمكن ده يحصل ابدا ابدا لايمكن داليا تهرب بعد مابقى مشدود ليها
مستحيييل
&&&&&&&&&&&&&&&&&
