وصلت داليا للعنوان المكتوب وكانت الساعة ٨صباحا وقفت قدام المكان تتأملو ، بنايه من طابقين منظرها جميل عليها لوحة كبيرة مكتوب فيها
( لفتة لتنظيم كافة المناسبات )
كان الاسم بالنسبه ليها غريب ، اخدت نفس عميق ودخلت
سألت عن مكتب الاستاذ ناصر ودلاها بتاع الامن ، الشي اللفت نظرها انو المكان فاضي مع انو بدل انو موظيفينو كتار المهم دخلت في مكتب لقت السكرتيرة موجودة رحبت بيها ترحيب مقتضب، كلمت ناصر انو داليا وصلت ودخلتا ليهو
داليا كانت مرتبكة بس حاولت تكون هادية ، اول مادخلت عاينت لي ناصر نظرة سريعه وهو قاعد في مكتبو بدا ليها شخص زو هيبة رغم انو نظرتو ليها كانت ودية بس حستو زول مالي مركزو
ناصر طلب منها تقعد وبدا معاها الكلام: داليا مش كدة ؟ ازيك
داليا:تمام الحمدلله
ناصر: انتي ساكنة جارة ناس اختي نفيسة ؟ماشفتك قبل كده
داليا: ماحصل ايوة بس هدي اتعرفنا
ناصر:والله ياداليا انا محتاج لي مساعدة شخصية لي بصورة ضرورية وانتي جيتيني من السما بس ماعشان نفيسة زكتك عندي ده يخليني اتساهل معاك او اوظفك من غير مااختبرك
داليا: طبعا اكيد انا جاهزة لي اي شي تحب تقولو او تعملو ولو فيها نصيب لي بنجح ان شاءالله
ناصر:جميل جدا، اولا احب اعرفك نبذة عن شركتنا لفتة، اسم علي مسمى واخترنا الاسم ده كناية عن شغلنا البنحاول دايما نخليهو ملفت للنظر واحب اعرفك انو نحن بنشتغل بي احترافية بحتة ومافي مجال للتساهل او الغلطات لانها دي سمعة بنحاول نحافظ عليها ونطورا تمام؟
داليا: جميل جدا
ناصر :انا ياداليا حااستعين بيك فورا بس كفترة مؤقتة مدتا شهر حااختبر فيها قدرتك علي مجاراة تيار الشغل حاتكوني موظفه لكن في حالة اختبار يعني مامثبته اذا التمست فيك التميز حااوظفك بي صورة دايمة
ضغط ناصر علي زر ونادى السكرتيرة
ناصر :دي سكرتيرتي المجتهدة سارة حااوكل ليها مهمة انو توديك شؤون الموظفين وتتولى اجرائات تعيينك ، نحن ياداليا دوامنا ببدا الساعة١٠صباحا وبخلص الدوام الساعة٤ بس انتي دوامك بخلص لما انا اقول خلصنا، سارة اعرفك علي داليا حاتكون مساعدتي الجديدة وعايزك تعملي القلتو حسي وتاخدي داليا في جولة في الشركة كلها قبل يبدا الدوام ويجو الموظفين وبعدين تجيبيها راجعة عندي عشان اشرح ليها طبيعة الشغل كيف
سارة:حاضر يااستاذ ناصر اتفضلي معاي ياداليا
مشت داليا مع سارة وعملو كل المطلوب وفرجتا سارة علي كل اقسام الشركة ورجعو تاني المكتب واستأذنت من ناصر في الدخول عندو ودخلو الاتنين
ناصر:اعتقد كده اخدتي نظرة عامة عن الجو العام ، وعلي حظك جاتك اول مهمة حاتحدد مدي قدرتك في تحريك الامور نحن مكلفين بي تنظيم حفلة زفاف والعريس والعروسة طلبو نقابلهم في بيت العروسة ونتفق علي التافصيل، حااديكي تقرير مفصل عن كيفية ادارتنا لي الاعراس حاتمشي مع سارة حاتوريك مكتبك اللي هو ملاصق لي مكتبي وحاتقعدي تقري التقرير كويس وترجعي عندي بعد تخلصي والساعة ١٢بالضبط حاتمشي تقابلي الزباين
داليا: تمام يااستاذ
سارة اخدت داليا علي المكتب وقالت ليها :بتمني تسدي في الاختبار ومن بكرة جيبي حاجاتك الشخصية المهمة وحاتستلمي بكرة اليوني فورم بتاعك وبالتوفيق
شكرتا داليا وقعدت علي المكتب وقداما التقرير كان قلبها بدق من الاثارة والقلق والفرحة وقررت تستغل الفرصة وتنجح مهما كان
بعد ساعة رجعت لي ناصر وقعد معاها فهما حاتعمل شنو وطلب منها افكار عشان يشوف مدي تفكيرا وكل الامور ماشة تمام ، مشت داليا لي موعدا علي انو ترجع الشركة بتقرير كامل عن المقابلة
