داليا كانت بترجف كلها حست انها ادت سليم الفرصة عشان يهزما في لعبتو كانت بتقول في نفسها: انتي مجنونة ؟ انتي معاهو براكي وبترقصي في حضنو ؟ كده دوبو مافكر انك شمال ومابعيد يطلب اكتر طال ما لقاك ضعيفة وساهلة ، سليم حس بيها متوترة فخفف من قربو ليها ماحب يخوفا ويفسد اللحظة بعد خلصت الموسيقى وبدت واحدة غيرا وقفو رقصهم وساقا قعدا في كرسيها ، مرت ساعة احتفل فيها سليم زي ماخطط ، بعدها قام وساقا قال ليها: حجزتا غرفة فوق
طبعا داليا نططت عيونا قام سليم ضحك عليها: لا ياخي ماتخافي خليني اكمل كلامي، انا خليتهم يطلعو ليك هدومك فوق حاتطلعي عشان تغيري وتتحممي اذا عايزة وبعديها اسوقك ارجعك بيتكم ولو خايفة اقفلي عليك الباب من جوة وبعد تخلصي تنزلي تلقيني مستنيك هنا اوكي؟
داليا طلعت الغرفة استحمت وغسلت الميك اب وفكت شعرا وغيرت لبست هدوما الاصليه وخلت الفستان مطروح في السرير ونزلت تحت لي سليم ، ساقا ومشو ركبو العربية ودور مشا، سليم: شكرا يا داليا لأنك مارفضتي طلبي في يوم ميلادي
داليا: عفوا
ومشو بعد داك وهم ساكتين لحد ماوصلت داليا ونزلت وسليم دور مشا، رجع سليم الفندق تاني وطلع الغرفة ، لقى الفستان في السرير طلع جاكت البدلة وعلقو ومشا شال الفستان ووقف يتأملو : انت كنت محظوظ لانو حاضن جسم داليا هي الزادت جمالك ماانت الزدتا جمالا بس كمان اشكرك لانك محتفظ بي ريحتا جواك ، ااااااخ ياداليا الليله انا اتأكدتا اكتر اني بحبك وعايزك بس والله مابقدر اعترف ليك مابقدر كفايه علي اني احتفظ بي فستانك معاي بقدر احضنو بقدر اشمو من غير مااختشي قدامو وكمان حااكون اناني مابخليكي تبقي لي زول تاني
&&&&&&&&&&&&&&
داليا كمان من رجعت كانت حزينة وقلبها مقبوض حست انها غلطت غلط كبير لما وافقت لي سليم بي كل طلب طلبو وبقت تحاسب نفسا: ياتري لو كان طلب انو تمشو سوا الاوضه كنتي حاترفضي؟ كنتي اكيد حاتتنازلي زي كل مرة ، سليم بقى خطر عليك ابعدي عنو ودوسي علي قلبك ، انا حبيتو والحصل حصل ، غصب عني حبيتو عارفة انو ده جنون بس مابي يدي بقا لي ضروري زي الهوا البتنفسو والمويا البشربا ، انا خسرتا ياسليم وانت عندك حق انا ماقدر تحديك لي بس مابقدر اعترف كرامتي فوق كل شي بحبك بس مابقدر اقولا ليك ، بكره ضعفي قدامك ماعارفه اضبط اعصابي ماعارفة اقول ليك لأ واصر عليها ، بحبك حتي لو ماحبيتني انت
سليم في الغرفة كان سارح بي خيالو مع فستانا حتي البشكير الاتنشفت بيهو خاتيهو جمبو ونام في الاخر وهو حاضنو عليهو
خلص اليوم وسليم بات في الفندق وداليا نامت ودموعا ماليات خدودا
٪٪٪٪٪٪٪٪٪٪٪٪٪٪٪٪٪٪٪٪٪٪٪٪
تاني يوم داليا صحت وجسمها كان محموم مولع نار خالتا خافت وماخلت ليها مكمدات ماعملتا وادتها مسكن وداليا الحمي لاعبه بيها وكانت دموعا جاريات وباين عليها التعب والمرض خالتا قررت توديها الدكتور احسن ب فترة وصل الترحيل وخالة ايمان طلعت ليهم واعتزرت انو داليا عيانه ووصت واحدة من زميلاتا تكلم الاستاذ ناصر بي مرضا، خالة ايمان ماقدرت تخلي داليا تقوم عشان تلبسا احتارت تسوي شنو قالت احسن تكورك لي نفيسة بي الحيطة تجي تساعدا قالو ليها مافيشه مشت ناس ربا ، لقت انو لازم تخفف ليها حمتا شويه عشان توعى حبة وتقدر تقوم بعد فترة من الزمن ضرب تلفون داليا والكويس انو داليا معلماها كيف ترد عليهو لما ردت لقتو ناصر قلقان بسأل من داليا: مالها داليا ياخالة عسى ماشر
خالة ايمان: من صحت الصباح والحمى خاته فيها ومانزلت اصلا ماقادرة اقوما عشان اوديها الدكتور
ناصر : استني ياخالة انا حااجي اسوقا اوديها المستشفى طوالي احسن
خالة ايمان : مشكور ياولدي هي وحيدة واخوها بعيد وانا اولادي كل واحد في بلد ونحن برانا
ناصر : اعتبريني ولدك وان شاءالله خير
ناصر كلم هاني انو يوري سليم اذا جا ويهتمى بي الامور لحد ماسليم يوصل لانو حايسوق معاهو سارة ، طلعو ناصر وسارة ومشو ساقو داليا وخالتا وطيران على المستشفى ، رقدو داليا وركبو ليها محلول يخفض الحرارة والدكتور فضل انو تقعد معاهم يوم لحد مايشوف اذا بتتحسن اكتر بطلعا بكرة البيت ، ناصر خلى سارة معاهم ووكلا تهتم بيهم لحد مايرجع هو ويرسل هانى بدلا لكن هي اصرت هي التقعد ماهاني وانو حاتعمل اي شي يحتاجو ليهو
سليم رجع البيت وش الصبح وطلع غرفتو طوالي وهو شايل الفستان في كيسو ودخل علقو في دولابو وغير هدومو ورقد نام، لما صحا الصباح لقى نفسو متأخر فقام يجهز سرعة وينزل كان مبسوط من زكريات امبارح وكأنو كان بحلم ، نزل بعد فترة وفات الشركة وهو داخل مكتبو لاقا هاني جاي من مكتب ناصر قال ليهو : متين اصبحت لي ونساتك مع البنات
هاني: ابدا والله ناصر رسل لي لأنو داليا عيانه وهو وداها المستشفى وطلب مني حسي امشي هناك واشوف لو محتاجين حاجة
سليم كأنو جا واقع من تالت دور اتخلع وقال ليهو : مستشفى ؟ داليا؟ مالا داليا وقبل هاني يتكلم مشى سليم بسرعة على ناصر ودخل طوالي بدون مقدمات وقال: ناصر مالا داليا
ناصر: شرفت اخيرا؟ وين كنت صايع لحد الفجر
سليم: سألت داليا مالا فيها شنو
ناصر: عيانة شويه بس حمتا كانت عالية ووديتا المستشفى، ومالك انت خايف عليها؟ ليه شايف في عيونك انك قلقان
سليم: عايز تقول شنو جيب من الاخر
ناصر: داليا عاجباك صاح؟
سليم: لأ ماعاجباني انا بحبها ارتحت؟
ناصر مااتوقع الاجابة واندهش
سليم : وديتا ياتو مستشفي
ناصر : سوق هاني معاك انا وريتو العنوان
مرق سليم ومااستنى ناصر يعلق اي تعليق ساق هاني وطلعو بسرعة ، لما وصل سليم كان ملهوف بس مسك نفسو قدام هاني وقدام الخاله وسارة لما دخلو وداليا شافتو حست بي المرض زاد عليها ، سلمو علي خالة ايمان وسليم قال لي داليا بصوت رزين : سلامتك ياداليا
داليا بصوت تعبان: الله يسلمك
هاني طبعا قرب منها ومسك يدها وبا يقول : شنو يافردة ياخ عايزة تعرفي معزتك عندنا قدر كيف؟
داليا خافت من سليم يغضب بس اتفاجأت انو هادي ومبتسم وهاني قرب منها وقال بي همس: عايزه تدلعي شويه وترقدي هنا تخليني لي ناصر وسليم يلقفوني لي بعض ؟ والله انا بجي برقد في السرير الجمبك واعيا انا برضو ، ضحكت داليا غصب عنها وبرضو خافت سليم يغضب عليها بس برضو ملامحو كانت عادية ، ياترى مالو ولاعشان هي عيانة سامحا ؟ سليم وجه كلامو لي خالة ايمان : انا اسمحو لي حاامشي بس هاني حايفضل جمبكم لو عزتو اي شي هو بعملو
خالة ايمان: مشكور كتر خيرك ياولدي الله يجازيكم كل خير
سليم لي داليا: سلامتك مرة تانيه وربنا يشفيك ان شاءالله
داليا: شكرا يااستاذ
سليم: سارة ناصر طلب ترجعي معاي يلا اطلعي
سارة ودعتهم وطلعت معاهو
فات سليم وهاني قعد مع خالة ايمان برا وطبعا ونسا تماام ، اما داليا كانت رقدة وحاسه راسا دايخ وبتفكر في سليم والحصل بينهم امس كانت حاسة بي سعادة انو فكر فيها واختارا عشان تحتفل معاهو رغم انها انبت نفسها على العملتو كانت جرأة منها صحي انها تعمل كدا وتلبس كده وكمان ترقص اسلو؟ حست انها خلاص عينا اتكسرت قدامو وتانى مابحترما حاتكون مجرد واحدة بلعب معاها لعبت تحدي وهي سلفا خسرت فيها، ماكانت عارفه انو سيد اللعبة كمان خسر فيها وانو اللعبة اساسا جيم اوفر من الاول
٪٪٪٪٪٪٪٪٪٪٪٪٪٪٪٪٪٪
تاني يوم طلعو داليا البيت وهاني اتولى توصيلهم ومشا جاب فواكه وعصاير وجاب ليهم غدا من برا
داليا ارتاحت في سريرا وغمضت عيونا شوية قام تلفونا رن ولقتو سليم ردت: الوو
سليم: معقول خفتي مني لي درجة المرض؟
داليا : انت مابتعتق اصلو ؟
سليم: طيب لو كنت طلعت معاك الاوضه وغيرت ليك بي نفسي كنتي حاتموتي؟
داليا: ماتبدى عليك الله خلينا نعمل هدنة لحد مااقدر استجمع قوتي تاني
سليم: وافقد فرصتي دي
داليا: وين الاخلاق الرياضيه واخلاق الفرسان حاتقتل فارس اعزل؟
سليم: شكلك بتحبي افلام التاريخ والحروب رايك شنو اسوقك السينما
داليا: ليك يوم وحانتقم منك
سليم: مش بقول ليك بتحبي الافلام
داليا: مع السلامة ياسليم
سليم: احي انا ياقلبي قلتيهو تاني 😍
داليا : سلام
قفلت داليا وكانت طايرة من الفرح، قررت تعيش حبها حتى لو كان بالمناقرة معاهو قبلانة بس المهم تفضل تشوفو وتسمع صوتو
&&&&&&&&&&&&&&&&&&
