مرا اسبوع مزدحم بي الشغل وعملو داك يا حفل الزفاف ولقو كم عرض شغل جوا العرس وكان الكل مبسوط وناصر قرر يعمل حفلة في بيتو مكافئة للموظفين علي الشغل الدؤوب
جا يوم الحفلة وسارة غشت داليا مشو سوا ووصلهم ابو سارة
سارة كانت لابسة فستان فوشي وداليا فستان ازرق لونو يضوي سارة قالت لي داليا شنو الاناقه دي فستانك عجيب لكن داليا ضحكت وقالت ليها ياسلام مافستانك برضو مبالغة سارة غمزت ليها وقالت: ماكنت قايلاك مفتحة لكن عرفتي تختاري لون فستانك
داليا: كيف يعني مفتحة
سارة: ناوية عليهو الليلة؟
داليا: قصدك منو مافاهمة بتلمحي لي شنو
سارة:امممممممم ، خلاص خلاص وصلنا
نزلو ودخلو بيت ناصر ، فيلا كبيرة مبالغة وعز في عز ، دخلو واندمجو مع زملائهم ، لاقو ناصر وزوجتو وسلمو عليها واتعرفو بيها
كانت حفلة دي جي في جنينة الفيلا
هاني شافهم جا وسلم وبدا يغازل: لا لا سارة؟ معرفتك تشرفنا😊 ولا داليا ؟ لااااااا قلبي مابتحمل كده
ضحكو البنات عليهو وقعدو يشاغلو فيهو وقام اخد داليا علي جمبة وقال ليها: اش اش اش حتي انتي راسمة على بعيد؟😉
داليا: قصدك شنو 😕
هاني: منو الكلمك عن الاسطورة اكيد ما يارا لأنها هديك قاعدة تحدر ليك
داليا: انا مافاهماك والله مالكم انت وسارة بتقولو في كلام غريب وضح كلامك ولا خليني في حالي😒
هاني: ماعارف حاسس انك مسطحة ، طيب حااحكي ليك ، معروف عن سليم حبو لي اللون الازرق خصوصا اذا لابساهو بنت جميلة زيك كدة ومعروف انو لو حابة تلفتي نظرو ليك فعليك بي اللون دة وانتي طبقتي الليلة النظرية بي حزافيرا 😁
داليا فتحت عيونا كبااار وقالت: وااااااااااي لأ لالا انت جادي؟😥😥😰 هاني بتتكلم جد؟ انا اتصرف كيف حسي سليم اصلا شاميني واجي انا اطبزا كدة اعمل شنو ياهاني واااااي انا في ورطة
وهاني يشيل ويضحك فيها وغمز لي سارة المتابعه من بعيد وضحكت معاهو لانها فهمت من المنظر انو داليا عرفت
داليا: هاني بطل سغالة ماتضحك. اصلا دي غلطتك انت
هاني:غلطتي؟ ليه ان شاءالله
داليا: انت ماكلمتني عن الموضوع ده قبل كده ومانبهتني😠
هاني : هههههههههههه اي صدقي ههههههههه ماكنت قايلك حاتعمليها بي السرعة دي
داليا: ده فستاني حق التخرج والله يعني مااجتهدت اساسا😔، انا احسن ارجع البيت قبل سليم يظهر ويشوفني
هاني: للاسف ماحينفع خلاص لانو سليم اصلا وصل وشافك وانتهى 😂
داليا دق قلبها وماحبت ترفع راسا ولا تشوفو واقف وين كل الكانت حاسة بيهو انها رسمت في بالو شي ماكويس عنها
هاني: اطمني ماتخافي انا معاك وبعدين هو معاهو سلافة حبيبتو حاتشغلو عنك
سارة جات عليهم وساقتهم مشو قعدو في طاولة بعيدة عشان خاطر داليا تكون مرتاحه وبعيدة عن نظر سليم
داليا انطرحت حبة وحاولت تكون عادية وقالت في نفسها سليم اصلا ماشايلها من ارضها مهما لبست ولاعملت فما حاتهتم لي رايو فيها بقت تتونس مع هاني وسارة ولما سارة اشرت علي حاجه جمب المسرح داليا جات عيونا في عيون سليم حست قلبها بدق بعنف وخصوصا لمحت في عيونو نظرة مختلفة عن كل مرة ماقدرت تفسرا حاولت تبعد عيونا عنو لكنها ماقدرت كأنو كان مبرمجا على كدة كان وسيييم ولبستو راقية وفخمة والبت المعاهو حلوة وواثقة من نفسها لابسة اسود واكسسوار فضي فخم شعرا معمول بطريقة فنانه ، داليا حست بي طعنة في قلبا واخيرا قدرت تنزل عيونا منو وتعاين في الطاولة قداما ، سارة انقذتا من نفسا وقالت ليها يلا نمشي الحمام نصلح الميك اب ، وافقت داليا ومشو دخلو جوا الفيلا والسيرفس دلاهم علي مكان الحمام، سارة دخلت اول وقالت ليها سوري يابيبي نداء الطبيعة خلتا تضحك ووقفت تستناها ، وهي واقفة جاها احساس ملح انها تتلفت وراها واتلفتت لقت سليم واقف ومكتف يديهو كانت حايغمي عليها من الخوف ، ابتسم ليها بطريقة مافهمتا وقال: غرامي الازرق
********************
