داليا اخدت اجازة اسبوع لحد ماترتاح وبعد تلاته يوم من طلعوها عملت ربا السماية في بيت امها وعملو ديك يالحفلة بي النهار داليا كانت اتحسنت شوية وقدرت تطلع تقعد في الحلفة كانت قاعدة جمب ربا ومعاهم بنات الجيران وطبعا عاطف كان موجود وسليم جا مع ناس ناصر بس عشان يشوف داليا ، هي كانت لابسه اسكيرت اخضر وبلوزة نفس اللون وطرحه لونا افتح بي درجه
طبعا بي حكم انو عاطف صاحب عبدالحميد قام قرب من داليا وربا وبارك لي ربا وقعد يتكلم مع داليا لما عرف انها عيانه جرا الكرسي وقعد جمها يطربق وهي تسمع فيهو مالمحت سليم لما جا بس هو شافا وطبعا حس بي غضب شديد وطوالي شال التلفون اتصل بيها داليا اتخلعت لما شافت اتصالو ورفعت عيونا شافتو واشر ليها بي راسو انو ترد : الو
سليم : لما تبقي كويسه حااموتك ، افتكر اني منعتك تتكلمي مع الحيوان ده ولا عايزاني اجي اكسر ليك راسو واعمل فضيحة
داليا ماقدرت ترد قفلت الخط وقامت من جمب عاطف وقالت لي ربا ماشه جوا وجاية ومشت دخلت البيت ، سليم تاني ضرب ليها وردت: داليا انا حزرتك ليه ماعايزه تفهمي
داليا: حصل شنو لي ده كلو افتكر انا كنت قاعدة وسط ناس ماجيت لقيتنا في وضع مخل يعني
سليم: كمان عايزاني اجي القاك في وضع مخل؟ رايك شنو اجيك جوا ونعمل الوضع المخل سوا
داليا: بكرهك وصدق انا حااوافق بي عاطف على الاقل هو محترم مش زيك
سليم: وافقي ياداليا ومالو اثبتي لي انك بتهربي مني بس انا جادي في طلبي تجي نعمل الوضع المخل سوا؟
داليا كانت واقفه في الحوش ومقبله مديا ضهرها للباب لما فجأة حست سليم واقف وراها وصوتو سمعتو برا التلفون اتلفتت بي فزع وشافتو بعاين ليها بي غل قالت ليهو: اطلع برا عايز تفضحنا
سليم: وين كرم الضيافة حاتطردي ضيفك؟
داليا جرت خشت اوضتا وقفلت الباب
سليم تاني اتصل: جريتي ليه مش كنتي عاملة شجاعة وبتتخذي قرارات؟
داليا سكتت وماردت
سليم: اعتقد انك عرفتي اني مابهظر وبعمل البقولو ، عرسيهو ياداليا وشوفي انا حااتصرف كيف
داليا: انت مجنون بتعمل شئ من لا شئ عايز مني شنو اختاني يازول
سليم : عايزك
داليا: على فكرة بقيت مستفذ وقليل ادب احترم نفسك احسن ليك
سليم: انا بتعامل معاك على ضو افعالك
داليا: افعالي؟ لييه انا عملت شنو يااستاذ
سليم اتجاهل سؤالا وقال ليها: على فكرة انا حاابتدي احب الاخضر كمان
داليا: جيب شي جديد كلامك بقى مكرر وبايخ
سليم: لو ماكنتي عيانه والله كان كسرت الباب ودخلت وعلمتك معنى التكرار والبياخه كنتي حاتترجيني ازيد حصص التربية في مابعد
داليا قفلت في وشو قام طلع ساق عربيتو ومشا وهي بعد فترة طلعت رجعت الحفلة ومالقتو قاعد، فضلت تهري في نفسا وتقول: ياربي اعمل ليهو شنو معقول الغضب ده كلو يطلع منو ولييه هي اصلها لعبة ولا شنو مافاهمة البشوف تصرفاتو بقول غاير لكن ده ماممكن انو سليم بي جلالة قدرو يغير عليها ، هو قال ليها مرة انو بغير لكن دي ماحقيقة هو اساسا بستعمل اسلوب الايحاء عشان يوقعا في حبو ويكسب هو
داليا ماعرفت للحفلة شي بس قاعدة والافكار ماليا دماغا وسرحانة ولما زول يسألها بتتحج بي مرضا
سليم من ماطلع فات مشا البيت وطلع غرفتو وقفل عليهو بقى لافي الغرفة رايح جاي وبقى يتكلم مع نفسو : انت بتخسرا ياسليم حاتخسر كل شي اللعبه وداليا كمان هي مافي شي بربطا بيك عشان تسيب عريس جاهز دايرا بي اي طريقة احسن شي انو تعترف ليها بي حبك ، ولو رفضتني حااعمل شنو كده حااكون اتزليت ليها ، لأ ياسليم انت لازم تعترف ليها ولا حتخسرا للابد
مشا طلع الفستان وحضنو وقال : لأ ياداليا اوعي تسيبيني انا بحبك حتى الازرق ماليهو قيمة بدونك
سليم لسه جرحو الزمان مابرا ماقادر يطلع من حالتو ابدا زاد خوفو اكتر واكتر وبقى ماقادر يسيطر علي غضبو الدايم
&&&&&&&&&&&
داليا نزلت بعد خلص الاسبوع وباشرت شغلا وبقت هي وسليم بتجنبو بعض بعد اخر مواجهه بيناتهم كانت مشتاقه ليهو لكن ماقادرة تبادر بالسؤال وهو كمان ماقادر يتحمل بس ضغط على نفسو كتير ورفض يسكها بي التلفون ولا وجها لي وجه اختار يبعد ويجبرا هي تجيهو براها داليا كانت فاهمة انو عايزا تبادر ولو مره ، تمو ١٠ يوم بي الحالة دي وداليا خلاص غلبا تصبر لقت انو سليم عنيد اكتر منها ، كانت في غرفتا والدنيا ليل بعد صراع مع نفسها شالت تلفونا واتصلت بيهو ورد ليها: داليا
حست قلبها حايقيف من الضرب اخدت نفس وقال ليهو : شكلك استسلمتا؟ مارفعت الراية يعني
سليم حس بي السعادة انو هي ماقدرت تبعد اكتر ورد عليها: انا؟ لا ابدا بس قلت اخليك تجهزي لي عرسك بي مزاج ماحبيت اعكنن عليك
داليا بي غيظ : انت متأكد تماما انو مافي عرس ولا يحزنون تاني شنو؟ سليم بي لهجة خبيثه: عايزة شنو ياداليا انا العارفو انو لما بت تتصل عليك والدنيا ليل معناها بتعرض ليك نفسا
داليا: انا غلطانه ياسليم وسافه التراب وانت سجلت الاسكور المرة دي بس تاني ماتحلم اضرب ليك
قفلت في وشو وفضل هو يضحك يضحك وقال: مااتحملتي بعادي عنك يعني، دي اول مرة تتنازل ، الله دي لحظة تاريخية
قام سليم طلع الفستان وبقي حاضنو وبدور بيهوكأنو برقص معاهو
داليا كانت مغيوظه منو بس حست بي الراحة لي انها سمعت صوتو على الاقل قالت: ياربي انا حبيت دكتاتور خفف عني يارب
تاني يوم كان في شغل برا الشركة كان في حفل زفاف والمفروض انهم بقمو بي الترتيبات الاخيرة عشان كده داليا مااتلاقت مع سليم خالص طول اليوم اخر الليل بعد خلصت الحفلة اتفرقو وكانت داليا واقفه مع البنات مستنين الترحيل وهاني كان واقف قريب مديها ضهرو وبتكلم في التلفون : اوووو نور ازيك ........... انا والله تمام مع زحمة الشغل......... سليم كان عندك؟ احيييي انا فاتتني دي والله ......... انا كنت شغال طول اليوم الليله مافضيت .......... هو انتي لما تلقي سليم بتسألي من زول تاني؟ هههههههههههههههههه
داليا سمعت الكلمتين ديل وراسا لفا لكن مسكت نفسا وتاني ماسمعت اي شي بقت مسهمة بس ، سليم كان مع واحدة ؟ طيب وين المشكلة ؟ ماهو ماكان حبيبك في مشكلة طبعا انا بحبو شديد ومابتحمل كده ، هو ماهاميهو الا انو يناقرك ويقضي وقت بيك ، طيب الحصل يوم ميلادو ده معناتو شنو ، معناتو انك رخيصه في نظرو واحدة حب يتمتع بيها وخلاص. فضلت الافكار تاكل في دماغا لحد ماركبت الترحيل ورجعت البيت دخلت اوضتا وبقت تبكي تبكي ومنهارة وقتها تلفونا ضرب لقتو سليم قشت دموعا وردت : عايز شنو
سليم: الناس بتسلم اول
داليا: ماشبعت عند صحبتك وجاي تكمل علي
سليم: صحبتي؟
سليم قال في نفسو اووووف اكيد الحيوانه ديك ضربت لي هاني تكلمو وداليا سمعت الكلام ، رد عليها: بتراقبيني ليه ماتكوني مهتمة وبتحبيني
داليا: بكرهك اطلع من حياتي
سليم: كزابه مابتقدري ده انتي مااستحملتي ابعد عنك ١٠ يوم حاتتحملي اطلع نهائي؟
داليا: سليم انت ربحت ربحت مبسوط؟ انا بحبك وتعبت من الحب ده وخلاص بعلن استسلامي ، مبروك انت الفايز ممكن بعد كده تبعد عني؟ انا مامتحملة اكتر
سليم اتفاجأ من ردت فعلا دي اعترفت ليهو بي حبها وهو صوتو راح ماقدر يقول شي وداليا فسرت سكوتو انو مامهتم بي مشاعرا وقالت ليهو : مع السلامة
قفلت الخط ورجعت تبكي ومسكت تلفونا تاني وفتحت الواتساب ورسلت لي اخوها ضرار رساله انها عايزة تسافر ليهو لانها اشتاقت ليهو شديد ، قررت تهرب وتخلي شغلها وحبها واي شي وراها ، تاني يوم مشت لي ناصر وكلمتو انها عايزة تستقيل ناصر قعدا وجا قعد قصادا وقال ليها: سليم السبب؟ داليا ماقدرت تخبي وقعدت تبكي ناصر حاول يهديها وبدا يتكلم: سليم ياداليا اتعرض زمان لي ازمة عاطفية شديدة لانو انقهر من البت الكان بحبها اسمها فريدة طلعت بتخدعو واصلا كانت مخطوبة وبتلعب بيهو زمن طويل ، للاسف هو الغضب عماهو وبقى حاد الطباع بقى بتاع بنات وفوضى لفترة طويلة لحد ماظهرتي انتي وعشان لقى نفسو مشدود ليك اكيد حاول يضايقك كتير ماعارف الحصل بيناتكم شنو بس انتي ماتهتمي خليك قويه ، انا مابقبل استقالتك لكن بديك اجازة شهر ابعدي فيها وارتاحي وقوي اعصابك وارجعي
داليا حست بي ضرورة الهرب من سليم وطلبت من ناصر انو سليم مايعرف حاجه عن موضوع الاجازة لحد ماتقدر تسافر بعيد.
داليا سافرت بعد اربعة ايام وطول الفترة دي ماكانت بترد على تلفونات سليم الكان هايج لانو ماعارف يوصل ليها كان برسل ليها رسايل كتيرة بطلب منها ترد عليهو وهي غصبت نفسا انها تتجاهلو ، وجا اليوم السافرت وخلتو وراها ماعارف انها سافرت
&&&&&&&&&&&&&&&&&&&&&
