دخل سليم عند ناصر بعد طلعت الزبونة وهو مكشر
ناصر:خير مالك
سليم: ماقلت لي يعني لقيت بديلة لي ميادة
ناصر: والله؟ يمكن نسيت او ماجا في بالي ماشي كبير يعني
سليم: تمام تمام
ناصر: في شنو انت عادتا مابتجي عندي دايما بترسل هاني
سليم: ولا شي جيت ساي بس
ناصر: جيت تعرف شمار داليا يعني
سليم: سلمي عارفة انك عينت بت احلى منها؟
ناصر: اي عاااارفة ارتاح انت وبعدين انا مازيك خاين😏
سليم:انا ماعندي مرا فما بتقال عليا خاين
ناصر:وسلافة دي تبقي شنو
سليم: دي مامرتي لاني ماعرستها ممكن تقول حبيبتي او صحبتي 😀
ناصر: ياخ طالع نازل معاها لمتين عرسا واتلم كفاك
سليم: هههه وادبس زيك لا طبعا انا كدة حر وسعيد
ناصر: بكرة بتجي البتوقعك في شر اعمالك
سليم قام عشان يمشي وقال لي ناصر بي سخرية : امها ماولدتا لسه البتقدر توقعني وكل البنات اصلا مابعرفو غير يدوسو علي قلبك ويمشو ماعندي ليهم غير كدة
ناصر: غلطان انا هديني مع سلمي وتوجنا حبنا بي الزواج
سليم: سلمى مالقت فرصة ولا كان حاتدوس عليك بدون مايرف ليها جفن
ناصر: لسة مانسيت الحصل معاك؟
سليم مشا على الباب والتفت علي ناصر وقال : الحصل وعاني اكتر علي الحقيقة😒 يلا انا مشيت سلام
ناصر: الله يهديك
طلع سليم ومشا مكتبو وتاني اتكرر مشهد التلفون المرة دي مع هاني كان بتكلم في التلفون وسليم وقف يسمع، عادة بايخه بس سليم مابهمو شي صاح او غلط
هاني: لو قبلتي تجي معاي الكفتريا في الاستراحة حااحكي ليك بي مغامراتي مش وعدتك احكي ليك الحصل؟............ نحن مش اصحاب عايزك تساعديني اثبت ليها اني اتخطيتا........ لا ياخي مابالفهم ده ماهي فاكرة اني ماشايف غيرا هنا عايز اوريها اني ممكن اتونس مع غيرا عادي ......... داليا انتي بس تعالي الكفتيريا وانا بحكي ليك الشمار كلوو .....بلييييييز...........ياسلام ياصحبتي العزيزة انتي رايعة خلاص بستناك في الاستراحة بااااي
قفل هاني وماكان شايف سليم لانو رجع برا وعمل نفسو داخل دابو
مشي سليم مكتبو وقعد يفكر 😑 حس انو لازم يمشي الكفتريا ويشوف داليا مع هاني مع انو عمرو مامشي الكفتريا ولا اختلط بي الموظفين وقت الاستراحة بس حب يمشي الليلة بالذات
وقت الاستراحة نزل هاني ونزلت داليا واتلاقو تحت
هاني: انا كنت معجب بي يارا سكرتيرة سليم لكن هي صدتني اصلها قال شنو ساعية للاكبر مني البوس نفسو سليم جل تفكيرا انو تلفت نظرو
داليا:ياحراام
هاني: ماتقلقي اتخطيت اعجابي بيها اساسا
داليا: اها ولقيت غيرا
هاني: انا تاني مامستعد هههههههه
داليا: قفلتك ي...
وقبل ماتكمل كلاما شافت سليم قداما وقلبها بقى بدق زي الطبلة
هاني انتبه ليهو وقام سلم عليهو : اهلييين ياسليم المكان نور تعال اتفضل اقعد معانا
سليم عاين لي داليا في عينا نظرة خلتا تبلع ريقا وقال لي هاني ولسه عينو فيها : مااكون قاطعتكم
هاني: لا ابدا حانتشرف بيك😇
قعد سليم مقابل لي داليا اللي نزلت عيونا منو وهاني مشا قعد جمبها وقعد يقول: الليلة دي حاتتكتب في التاريخ والله انو انت مزين طاولتنا مش ياداليا
داليا قالت وعيونا لسة بتعاين في الطاولة : طبعا طبعا
فجأة ظهرت ليهم يارا اللي كانت قاعدة بعيد ولما شافت سليم قاعد جات تقعد معاهم وجات تتظارف: ازيكم يااصحاب
وعاينت لي سليم بي دهشة مصطنعة :اوووو ازيك يارئيس نورتنا والله وقعدت جمبو وطوالي قعدت ترغي وهو بسمع وساكت ولمح هاني مميل علي داليا وبهمس ليها بي شي وهي بتحاول ماتضحك اتغاظ جدا وطوالي قاطع كلام يارا وقال ليهم :ضحكونا معاكم
الاتنين صبت فيهم مطرة لكن هاني ادارك الموضوع وقال: ابدا كنت بقول لي داليا حانكون من المشاهير عشان حضرتك الليلة نورتنا وقعدتا معانا فحنكون حديث الموظفين لي شهووور
داليا ابتسمت لي هاني لانو ده ماالكانو بتوشوشو فيهو طبعا كانو بعلقو علي يارا وجيتا ولصقتا لي سليم
سليم ابتسم ابتسامتو الشريرة 😈 وعاين لي داليا جوة عينا لمن شرقت وهي بتشرب في عصير، كان الجوو مشحون بي التوتر ، داليا قامت وقالت اسمحو لي عندي شغل مهم لازم امشي سلام ردو هاني ويارا السلام وسليم ساكت وبعاين ليها بي سخرية كالعادة وشوية وقام وراها وقال انا كمان ماشي وفات طوالي ومشا بسرعة لحق داليا لقاها في السلم فناداها بي نبرة حازمة : استني مكانك
داليا نشف الدم في عروقا واتجمدت مكانا
