سليم بقى منتظر في مكتبو وكل شوية يعاين بي الشباك على الشارع حسى انو الوقت ماعايز يمشي بسرعة كان متوتر وافكارو تودي وتجيب حس انو غيران بالجد ، معقول بس بالسرعة دي قدرت تقلب حياتو فوقاني تحتاني ؟ هو بعد الحصل معاهو زمان من فريدة قلبو رفض ينفتح تاني لأي بت ، فريدة كانت اول حب في حياتو كانت زي داليا طيبة وبريئة وجميله جمال رباني كان بحبها شديد كانت محور حياتو كل يوم بنوم وبصحا على صوتا كان بغرقا بالهدايا ولما قرر يخطبا اكتشف انها مخطوبه لي ود عمها وبيناتهم علاقة وهو كان بالنسبه ليها تغيير من روتين خطيبا صارحتو بالحقيقة لما واجها ماانكرت قالت ليهو انها بتحب خطيبا بس كمان حبت تقضى معاهو لحظات حلوة ، عاش فترة في حالة حزن وغضب شديد قرر بعدها انو لايمكن يصدق انو في بت بتعرف تحب وحاتكون المعاملة بالمثل يقضي اوقات حلوة وبس والمشكلة انو كل بت صاحبا كانت من نوع فريدة عايزة تقضي وقت وتستمتع بي الهدايا والفسح وماهماها اي شي تاني، سليم بقى في حالة صراع كان بحاول يكره داليا لكن ماقادر غرورو عماهو ووقع نفسو في الشرك تاني ،حب يلعب لعبة وهو الخسر فيها لانو قلبو رجع يدق تاني بس قرر مايخسر براهو لازم داليا تشرب من الكاس هي كمان تاني ماحيكرر الحصل زمان وينهزم داليا حاتستسلم ليهو وماحيتراجع ابدا
مرو ساعتين كأنهم يومين وسليم بقا متسمر في الشباك لحد مالمح عربية وقفت ولمح داليا نازلة والسايق كمان نزل وجا بي عندها بقى يتكلم شويه وبعدين سلم عليها وبقا ماسك يدها مسافة وبتكلم سليم حسا انو عايز ينزل يكسر يدو ورجلو كمان ، داليا سابتو ودخلت قام سليم طلع بسرعة ومشا لي ناصر في المكتب عشان عارف انها حاتدخل لي ناصر ، لما داليا جات سارة قالت ليها خشي الاستاذ مستنيك وبعدين ترجعي تحكي لي الحصل، داليا دخلت وانصدمت لما لقت سليم قاعد حست روحا زي الشافع العمل عملة وخايف من امو ، ناصر قال ليها : ها نقول مبروك؟ داليا اتهجمت ماتوقعت السؤال قالت: سارة قالت ليك ؟ وقعدت تضحك هي وناصر سليم كان متجهم وساكت ناصر عرف سبب جيت سليم عندو كان عايز يشوف داليا وردت فعلها حس ناصر انو سليم بحب داليا وغيران عليها وبكابر فحب يضايقو اكتر ويضحك فيهو فقال لي داليا: يعني حاتسيبيني ياداليا 😔
داليا: لاااا اطمن انا لسه مااخدتا قرار وحتى لو وافقت ماحااتنازل عن شغلي
ناصر براقب في تعابير سليم وبضحك في نفسو : تمام ربنا يسوي الفيهو الخير سارة قالت لي انو زول وسيم بختك
سليم وقف بي غضب وقال : انا ماشي سلام، وطلع بي استعجال ، داليا حست بي الخوف منو ماعارفة لييه، ناصر : مالك ياداليا شكلك متوترة؟
داليا: لا ابدا مافي شي
ناصر: يلا تعالي خلاص اقعدي عندنا شغل
داليا: اوكي
بعد ساعة ناصر قال لي داليا تمشي خلاص فودعتو وغشت مكتبا وبعدين طلعت لقت الشركة شبه فاضيه لانو الدوام خلص من ساعة ولما طلعت برا لقت عربية سليم واقفة وهو راكب فيها عملت مامنتبة ومشت خطوتين قام نزل القزاز وناداها بي غضب : داليا ، اتلفتت ليهو فقال ليها : تعالي ، مشت ليهو وهي متخوفة منو قال ليها بي نبرة تهديد: اركبي عشان اوصلك واوعي ترفضي
داليا: مافي داعي تتعب نفسك كل مرة طريقنا ماواحد
سليم: تحبي نعمل فضيحه هنا قدام الشركة وفي الشارع؟ انا ممكن انزل واشيلك وحاتركبي معاي في الاخر رايك شنو
داليا: الله يسامحك فيوالبتعملو فيني
ركبت في الاخر وسليم دور مشا كان ساكت وصاري صرة عجيبه داليا قررت تتجاهلو وشالت تلفونا وبقت مشغوله بتقلب في البرامج لحد ماسليم نطق وقال: عايزاني اكسرو ليك تاني؟
داليا لقت مافي فايدة من السكوت فقالت: لييه حاتتهمني اني بغيظك بيهو مرة تانيه ؟ اتجاهل سليم تعليقا وسكت واصل طريقو داليا سألتو انت ماشي وين ده ماطريق البيت
سليم: خاطفك انا عندك مانع ؟
داليا: انا ماعايزه العب معاك تعبانة وعايزه ارجع البيت
سليم: التعبك شنو ، عاطف كان موقفك علي حيلك طول الموعد
داليا: ماليك دعوه
سليم: خليتيهو يوصلك وكمان يمسك يدك ياترى خليتيهو يعمل شنو كمان ؟
داليا حبت تغيظو عشان تاني مايتحشر : خليتو يبوسني اصلي انا قليلة ادب وتافهه
سليم : حزرتك من انو تستفذيني قبل كده وماسمعتي وجا الوقت الاعلمك فيهو الادب
داليا: انت مالك ومالي اصلا ياخ ماتدخل فيني عايز مني شنو اوووف
سليم: ماانا البتلعبي بيهو فاهمة؟ عايزة توريني انك مرغوبه؟ وانو عندك بدايل تانية؟ طيب ياستي انا عرفتا بس فضل انتي تعرفي انا منو وبعمل شنو في واحده زيك
داليا خافت بالجد ماعارفة لييه هو اصلا غضبان ولييه مصر يتشاكل معاها في حاجات ماليها داعي ومابتخصو ، زولكم وصل بيها حته مقطوعة وبنايات مكسرة وقال ليها انزلي داليا بكت وبدت تترجى فيهو : سليم انا اسفة ماكان قصدي ازعلك ماكان قصدي من الاول اعمل شي انت البديت عليك الله ماترميني هنا براي انا اسفه بليييييز رجعني انا متأسفه والله والله ، وفضلت تبكي وتترجى فجأة سليم بدا يضحك يضحك ويقول ليها : اهدي اهدي ماحاارميك انا كنت بس عايز اتكلم معاك
داليا دموعا بتجري : ده مامكان لي كلامات انت قبل كده قلت لي برميك في الخلا
سليم رجع يضحك: صدقي روحتي عني الغضب بي منظرك المضحك خلاص ياستي حانرجع البيت وتاني مرة اوعي تلعبي بي الاسلوب ده معاي وياستي عشان ماتقولي لي كل شويه انت مالك حبيت تعرفي اني بغيييير ارتحتي ؟ وعرس من الاسمو عاطف ده انسيهو تماما نحن لسه ماخلصنا لعبتنا بعد نقول جيم اوفر
داليا من وسط دموعا: ياسلام؟ وانت مسموح ليك تحب سلافة وتلاقيها وانا ممنوع الاقي عاطف؟
سليم: اطمني سلافة طلعت من حساباتي يعني اعتبري اني متفرغ ليك تماما ، داليا حست بي راحة لانو سلافة اختفت بس كمان عرفت انو سليم جادي في اللعبة وماناوي يستسلم والله يستر من الجاي هدا وراها عينة ، دور سليم ورجع من محل ماجا ورجع داليا البيت وطول الطريق بقى لطيف معاها وبتونس في حاجات عامة ولما وصلت ودعا بي ابتسامة
داليا قالت في نفسا وهي بتراقب في العربية وهي بتبعد: شكلي حبيتو المجنون ده 😯
$$$$$$$$$$$$$$$$$$$
