مشا بسرعة لحق داليا لقاها في السلم فناداها بي نبرة حازمة : استني مكانك
داليا نشف الدم في عروقا واتجمدت مكانا ومااتلفتت، طلع سليم واتخطاها ووقف فوقا وعاين ليها في عينا ، داليا كرهت فيهو جرأتو الذايدة واصرارو لي احراجا بي نظرتو القوية في عيونا سليم بادر واتكلم وبي نبرة أمر: تعالي معاي مكتبي حالا واتحرك مشا وداليا ردت: ممكن استأذن من استاذ ناصر اول عشان مايفقدني
سليم اتلفت ليها وعيونو شرار واتلفت حواليهو مالقا زول شايفهم قام جراها من يدها وساقا معاهو وهي بتقول ليهو : استنى بس اي اي انتظر وسليم ماشي بغضب وجاريها ودخل بيها المكتب ورزع الباب وراهو داليا خافت منو وكأنها شافت وحش، هي بت ماعندها اي تجربة ومابتعرف تتعامل مع الشباب ومابتعرف تتصرف في مواقف زي دي هي حسي مافاهمة هي عملت شنو وليه سليم بعمل معاها كدة بس حاولت ماتبين خوفا قرب منها سليم وهي ماقدرت تتحرك ولاتتكلم قرب شديد ووشو في وشها وقال ليها: انا مافي واحدة بتقدر تقول ولاتعمل شي انا ماعايزو وتاني مرة اوعي وانا موجود تقومي تمشي مهما كان السبب فاهمة؟
داليا جرت نفس ووشها اترسم بي صورة التحدي وقالت ليهو: انت عامل ده كلو عشان انا مشيت؟انا افتكر اني استأذنت اول قبل ماامشي
سليم: وانا ماأذنت ليك
داليا: طيب متأسفين ياسيدي سماح منك
سليم: حاولي قللي من عدم احترامك لي شوية
داليا: مابعرف لي انت شايف كدة انا ماعملت شي يقلل احترامي ليك او لي غيرك
فجأة دخل ناصر المكتب وشاف الموقف وكيف سليم مقرب لي داليا وكيف كانت نظراتهم الملانه غضب، ناصر لمح سليم وهو جاري داليا وراهو وجا عشان ينقذ الموقف اياً كان
سليم شافو وبعد عن داليا اللي ملاها الخوف من شوفت ناصر ليها في وضع زي كده
ناصر: داليا امشي مكتبك انا عايزك ضروري
داليا مشت بسرعة وخلت ناصر بعاين لي سليم عين فيها استفسار ، سليم اتكل علي مكتبو وكتف يديهو وقال: في شنو ولي جيت داخل بالصورة دي
ناصر: عايز شنو من داليا ياسليم ولي كنت جاريها وراك بالاسلوب دة افرض زول غيري شاف الموقف حايقول شنو وفكرو حايمشي وين
سليم: حبيت اعلما طريقة التعامل معاي لان يبدو ماعندها فكرة عني وعن برستيجي
ناصر : ابعد عن طريق البت ماعندك بيها دخل
سليم: انا ماكنت حااكلا علي فكرة
ناصر: كلمتك وخلاص
فات ناصر وخلى سليم بفكر اتزكر انو لما كان قريب منها حس كأنو كهربا سرت في جسمو مع انو كان في مسافة بينو بينها انزعج من الاحساس ده ماقدر يفهم شعورو كل الفهمو انو ماحيسيب البت الا لما يخليها تعترف انها انهزمت ليهو ابتسم وقال في نفسو: صبرك عليا ده انا سليم ياحلوة قاهر قلوب البنات
ناصر مشا عند داليا وقال ليها تعالي نتكلم في مكتبي احسن ودخلو المكتب
داليا بادرت وهي خايفة: انا والله ماعملت شي الاستاذ سليم فهمني غلط و...
ناصر بي نبرة هادية: سليم مالو معاك قولي لي
داليا: هو فاكر اني مااحترمتو عشان قمت مشيت وهو قاعد مع اني استأذنت
ناصر: وين كنتو اصلا
داليا: كنت في الكفتريا ومعاي هاني وهو جا وهاني عزمو يقعد معانا وجات معانا يارا السكرتيرة وانا بعد شوية استأذنتهم اني طالعه لاني مشغولة وهو زعل مابعرف ليه
ناصر: نصيحة مني سليم اتجاهليهو تماما ماتخليهو يأثر فيك ده اصلا اسلوبو ، سليم هو اخو زوجتي وبعتبرو اخوي الصغير بس هو شخص مستبد وعنيد اتجنبيهو ماتخليهو يختك في راسو
داليا: ان شاءالله
ناصر: داليا انا قررت اوظفك بصورة دايمة قبل مايتم الشهر لاني ارتحت لي شغلك معاي
داليا😃: جد؟ شكرا ليك شكرا شكرا بالجد
ناصر: يلا علي مكتبك وماتخلي الحصل يقلل من همتك
داليا: حاااضر
داليا مشت مكتبا لقت علبة شوكولاتة مختوتة وشكلها جديدة ومقفولة بس جات من ويين
