وصل سليم مع داليا ونزلو قدام مطعم فخم جدا ساقا ودخلو جوا ، في واحد قاعد شكلو زول مهم كده المهم اشر لي سليم مشا عليهو وسلمو عليهو وعرفو بي داليا وعرفا بيهو وقعدو الراجل طلب ليهم المينيو اختارو وقعدو يتكلمو لحد مايوصل الاكل الراجل نسى الشغل وقعد يتونس ويتظارف مع داليا وهي بتضحك في كلامو ومبسوطة وسليم كان بغلي من جوا بس مابين شعورو ، وصل الغدا اتغدو وطرحو موضوع الشغل والراجل وافق انو سليم يمسك تنظيم المؤتمر الكان حايتعمل بعد اسبوع ، خلصو كلامهم وسليم استأذنو واشر لي داليا عشان يمشو ، اول ماركبو العربية سليم دور وساق بسرعة جنونية وداليا خافت وحاولت توقفو : سلييم سوق براحة ارجوك انا بخاف
سليم داس فرامل ووقف بي قوة
داليا: حاتموتنا ياخ مالك انت جنيت
سليم:حاسبي علي الفاظك ، وبعدين شكلك كنتي مبسوطه وصاحبنا قاعد يعاكسك هناك
داليا: مش انت سايقني عشان كده عشان تعرضني عليهو ؟
سليم اندهش: ناصر قال ليك كده؟
داليا: الحكاية وااضحة يااستاذ ماعايزة زول يوريني ماتنسى انك سقتني انا بدل هاني بالرغم انو شغلي مع ناصر في الافراح والحفلات الصغيرة
سليم : وانتي لقيتيها فرصة
داليا: مابخصك بي وانا نفزتا الانتا عايزو وخلاص اخدتا الشغل تاني ماعندك معاي شي
سليم: كنتي قاصدة تغيظيني ، عايزاني اغير
داليا بي سخرية : حاشاك من الغيرة انا ماقصدي شي وانا ماعملت شي ده عقلك البصور ليك حاجة ماموجوده عشان مانضيف وافكارك كعبة
سليم حدر ليها خلاها تخاف بس حست نفسها ماقادرة توقف بعد لسانا انطلق وقالت ليهو : انت عملتني واحدة منحطة وجاي تحاسبني
سليم: وانتي كنتي منحطة ماقصرتي هناك
داليا بدت تبكي غصبا عنها وصرخت فيهو : عايز مني شنو لييه متقصد تضايقني كل مرة
سليم اخد نفس وقال ليها : بتبكي ليه حسي ، مش كنتي عاملة فيها قوية ، خلاص ارجوك قشي دموعك
داليا: افتح لي الباب حاانزل واركب المواصلات
سليم : ياسلام والله؟ طبعا لا انا الحاوصلك
داليا: مابنفع نزلني قلت ليك
سليم بي عصبية : ولما هاني وصلك وبالليل كان نافع ؟
داليا: ماعايزاك توصلني جايز اجيب ليك سمعة ويقولو مركب واحده منحطة معاك
سليم عصب اكتر وقال ليها : اسكتي احسن ليك ولا بعمل شي بزعلك جد حااوصلك وانتهينا وافتكر انا قلت قبل كده انا مافي واحدة بتمشي رايا علي تاني مابعيد الكلام فاهمة؟
داليا قبلت منو وهو دور مشا وبقو طول الطريق ساكتين بس كل زول فيهم شغال يهري في نفسو
$$$$$$$$$$$$$$$
في بيت ناصر المسا
ناصر قاعد مع سلمى وبسأل فيها: وين اخوك طلع ولا شنو من جيت مالمحتو وماجا راجع الشركه لما مرق قبيل
سلمى: اسكت ده من ماجا وهو متعصب لييه ماعارفة وشاكل البت الشغالة من غير ذنب ولما طلعت اشوفو مالو سامعاهو بكورك في سلافة في التلفون قمت نزلت وخليتو خفت ينفعل فيني انا كمان وحسي من قبيل ماطلع من اوضتو ، مالو اتشاكلتو ولا شنو
ناصر: ابدا انا مالي دخل هو طلع قبيل مع.... اظن انا فهمت خليني اطلع اشوفو فوق
سلمى: فهمت شنو
ناصر: بكون بس مالقى الشغل الكان عايزو وزعل بس مااكتر
طلع ناصر فوق ووقف قدام باب اوضت سليم ودق الباب
سليم فتح الباب لقاهو ناصر قال ليهو ادخل تعال
ناصر دخل وقعد في كرسي المكتبة وسليم قعد في سريرو كان هادي بس شكلو كان متضايق من شي وحاول يكون هادي
ناصر: سلمي قالت لي رجعت وعامل زوبعة وشاكلت كل الجا في طريقك مالك في شنو
سليم : متضايق شويه كفرت يعني
ناصر: مارجعت الشركة تاني ولا وريتني عملت شنو الشغلة طرشقت ولا شنو
سليم: لا ابدا اخدتا الشغل الحمدلله
ناصر : معناها داليا فادتك؟
سليم وشو اتغير وناصر التمس انو داليا المشكلة فقال : معناها اتناقرتو كالعادة؟
سليم سكت وجر نفس
ناصر: انا ما فاهم اصل المشكلة وين انت من هي جات وانت خاتيها في راسك مالك بيها ياخ وحارق دمك كده في شنو وريني حصل شنو
سليم: ولا شي واذا سمحت خليني عايز اقعد براي
ناصر: داليا و فريدة مانفس الشخص ياسليم ماتفش غلك في داليا
سليم: ناصر ارجوك اطلع وسيبني قلت ليك
ناصر: طيب بعد تهدى نرجع نتكلم تاني
طلع ناصر وسليم رجع رقد وغمض عيونو كان بحاول يطرد داليا من خيالو ماعايز يفكر في الحصل اصلا كان زعلان انو فقد اعصابو في شي مابستاهل وحسس داليا انو مهتمي بيها وكدة حاتفكر انها كسبت الجولة وحققت عليهو إسكور تاني
بقي يقول ليها اطلعي من دماغي انا ماحاسمح ليك تلعبي بي وما بستسلم ليك حتى لو كنتي لابسة ازرق
داليا كمان من رجعت وهي حابسة نفسها وبتبكي خالتا حاولت تفهم مالا قالت ليها حاسة بي صداع رهيب حاارقد وارتاح يمكن يروح ولما دخلت رقدت بقت تبكي حست انها كملت كل طاقتا في مجابهت سليم وحست انها بتخسر قدامو كل مرة وبقت مافاهمة روحا ليه هاميها رايو فيها ولييه زعلانه من انو فاهما غلط ليه نفسها يغير معاملتو ليها وقامت نادت خيالو وقالت: حرااااااااااام انا ماكده افهمني
٪٪٪٪٪٪٪٪٪٪٪٪٪٪٪٪٪٪٪٪٪
