When Fools Rush In (COMPLETED)

17

MATULING lumipas ang mga araw, maliban sa obvious na disgusto ng mama ni Greg, everything was going on smoothly. Nang umagang iyon ay nagising siyang wala ito sa tabi niya. Wala rin ito sa buong kabahayan. At kahit sa shop. Hindi alam ng mga tao nito kung saan ito nagpunta.

Napag-usapan na nilang ihahatid siya nito sa boutique at pagkatapos ay sa mall na rin kakain. Sa garden, nakita niya si Mrs. Vargas at si Betty na nag-uusap. Nahinto ang dalawa nang makita siya.

"Good morning, po. Umalis po ba si Greg?" tanong niya kay Mrs. Vargas.

"Bakit mo sa akin itinatanong, eh, ikaw ang asawa?" anito at tumayo. "Betty, isunod mo sa akin iyang kape ko. Sa kuwarto ko na iinumin iyan."

Sinikap niyang ngumiti sa isinagot ng biyenan at sinundan ito ng tingin.

"Kasama ni Alice si sir," ani Betty, dinampot ang kape sa ibabaw ng bakal na mesa. "Maaga silang umalis. Hindi ba sinabi sa iyo?"

Hindi siya makaapuhap ng sagot. Ang alam niya ay may lakad silang dalawa ngayon.

"Hindi ka pa ba nakakahalata na ayaw sa iyo ng mama ni sir?"

"Hindi ako bulag para hindi ko makita iyon. Saan sila nagpunta?"

"Ewan ko. Baka nag-date."

Tinalikuran na niya si Betty. Sa nakalipas na dalawang araw ay alam niyang magkasama sina Greg at Alice. Tuwina ay ang antipatikang katulong ang nagpapaalam sa kanya. Si Alice ang gusto ng mama ni Greg. At si Alice ang uri ng babaeng hindi mahirap gustuhin.

At hindi man lang nagpapaalam si Greg sa pagsama-sama nito kay Alice. For all she knew, baka inaayos na nito ang papeles para umalis patungong Amerika.

Hindi niya gustong pansinin ang matinding sakit na umahon sa dibdib niya.

"Bakit sambakol iyang mukha mo?" bati ni Tessa nang pumasok siya sa boutique.

"Traffic," she lied. Tiningnan ang record sa harap ng mesa. "Maraming sales, ah."

"Suweldo, eh," sagot ni Tessa.

Mula sa clear window ay natanaw niya ang laman ng isip niya na papasok sa boutique. Nakangiting binati si Tessa bago nagtuloy sa mesa niya.

"Hi," bati nito.

"Ano'ng ginagawa mo rito?"

Nag-angat ng mga kilay si Greg. "Bakit ganyan ang bati mo? O dahil nagising kang wala ako sa tabi mo?" he teased.

"Hindi ko inaasahang nasa tabi kita kada umaga paggising ko, Greg."

Yumuko ito at hinagkan ang ibabaw ng ulo niya. "Sorry kung hindi kita naihatid ngayon. Kailangan kasi ni Alice na magpunta ng bangko. Tulog ka pa nang umalis kami. Hindi naman kita gustong gisingin," ani Greg at mula sa likod ay isang bungkos ng mga rosas sa harap niya. "Para sa iyo."

Lihim siyang napangiti. Iyon ang unang pagkakataon na binigyan siya ni Greg ng bulaklak. Ngunit agad ding nawala ang saya niya. Ganoon raw ang lalaki kapag may ginagawang kalokohan. Kung ano-ano ang ibinibigay.

"Kay Alice mo sana ibinigay iyan." It was too late to take back her words.

Greg laughed. Hinawakan siya sa baba at itinaas ang mukha niya. "Nagseselos ka ba kay Alice?"

Hinawi ni Bianca ang kamay nito. "Nunca!"

Nanatili sa mga labi nito ang nakakalokong ngiti. "Hindi ka pa rin ba in love sa akin? Baka naman kung kailan senior citizen na tayo'y saka mo pa lang aamining may pagtingin ka sa akin? Ang tagal ko namang maghihintay."