Teach Me, Sir (Teach Series #1)

Kabanata 29

Kabanata 29

Nanlaki ang aking mata na sinalubong ng yakap si Lisa at Kevin. Nangilid ang luha ko habang tumatawa ng makitang umiiyak na si Lisa na mahigpit akong niyakap. Tumuon ang mata ko kay Nade na nakatayo lang doon at nakatitig kay Daryl.

Bahagya pa siyang kumurap-kurap.

Nang maghiwalay kaming tatlo ay si Nade naman ang nilapitan ko't mahigpit na niyakap na ginantihan naman niya.

"Buti nakapunta kayo, paano niyo nalaman nakauwi na kami?" nakangiting wika ko.

Hindi ako makapaniwalang pagkatapos ng anim na taon ay muli ko silang makikita. Hindi ko mapigilan mapaluha dahil matagal ko na silang gustong makita sa personal pero ngayon lang kami nakabalik.

Wala na akong facebook o kaya ano pang social media kaya hindi ko naman sila nakakausap. Ang huli kong balita ay nagsent si Lisa ng email kay Daryl.

Pinaupo namin sila sa mahabang sofa habang nakaupo ako sa isahan, si Daryl ay nasa armrest ng sofa nakaupo at bahagyang nakaakbay sa akin.

Ngumisi ako ng makita ng maigi ang pinagbago nila, mas nag matured na talaga.

"Grabe Sascha, hindi namin akalain makikita ka ulit namin, nagmessage lang si Daryl kahapon kaya kami pumunta umabsent kami sa trabaho," halakhak ni Lisa sabay hawak sa kamay ni Kevin.

Nagkatinginan kami ni Daryl.

"K-Kayo?" gulat na tanong ko sa kanila.

Tumawa si Kevin, gano'n pa rin ang kilos niya malambot pa rin siya. Nakangiting tumango siya. "Yup, hindi ko alam sa malditang 'to pala ako babagsak."

Kahit halata na ay nagulat pa rin ako sa narinig ko lalo na sa kanila pa nanggaling. "Wow ha, ikaw nga patay na patay sa akin. Noong nagkaruon ako ng boyfriend lagi niya akong inaaway, akala ko may gusto siya sa ex bf ko ngayon pala in love na sa akin ang bakla, ayaw pang umamin. Kung hindi ko pa ginapang e," natatawang kwento ni Lisa.

May binulong sa kaniya si Kevin, siguro ay pinapatigil niya sa pagkukwento pero tumawa lang si Lisa. Bumaling ako kay Nade na nakangiti rin sa dalawa.

"Ikaw Nade may lovelife ka na? Pamilya?" tanong ko.

Nakita kong lumunok siya. Inilagay ko ang kamay ko sa hita ni Daryl, bumagsak doon ang kaniyang tingin. Naitikom ko ang labi ko para pigilan ang pagtawa. Bahagyang pinisil ni Daryl ang balikat ko.

"A-Ah wala pa..." mahinang aniya.

Tumawa si Kevin. "Wala talaga, wala naman lalaking nakakalapit dyan. Reserve ata. May hinihintay ata e ang kaso mukhang wala naman ng hihintayin."

Hindi ko alam kung tama ang hinala ko.

Nahihiyang pabirong himpas ni Nade si Kevin. "Ano ka ba Kevin nakakahiya," aniya.

"Kanino ka mahihiya? Kay Sascha? Kay Daryl? Nako bakit ka mahihiya sila nga hindi nahihiya naghahawakan ng hita." Humagalpak ng tawa ni Lisa.

Inalis ko ang kamay ko sa hita ni Daryl.

Nag-iwas tingin si Nade. Bahagyang yumukod si Daryl upang bumulong sa akin. "Kukunin ko lang ang mga bata." Tumango ako at hinayaan siyang umalis.

Naiisip kong sana ay kumpleto na kami, reunion sana ang kaso ay may kulang. Napabuntong-hininga ako doon.

"Hindi mo pa ba siya binibisita?" pambasag ng katahimikan ni Nade.

Umiling ako. "Hindi pa, siguro bukas kapag maaga ako umuwi o kaya weekends."

Tumango siya. "You should." Bumaba ang kaniyang mata sa kamay ko na parang may hinahanap. Nang mahagip ng mata niya ang singsing ko ay pakiramdam ko ay bumagsak ang kaniyang balikat o sadyang nag-iisip lang ako ng kung ano.