ما بيننا كان اعظم للكاتبة إسراءالجميلي

الفصل الثالث

#ما_بيننا_كان_اعظم
الفصل الثالث
#بقلم_اسراءالجميلي
#مدونة_نور_قلبي

شالوني و اني اتلوى الم ..
اتصلوا بـ ثامر اخوية بيته قريب علينه ..
اجه بسرعة ..
من شافني واگعه تخبل ..
اسمع يعيط وي ابوية ..
شبيك ليش هيچ وي الابنية ؟
عاط ابوية : انت معليك لك ؟
يااب اذا صار بيها شئ محد ياخذه و يومية تموت الف موته و انت تشوفها مكسحة ..
و الله و لا يرفلي جفن عليها ..
تكسر كلامي و بنتي ..
مو ذنيچ خواتها و انت محد عاندني ..
امي : هسه مو وكتها شبلو الابنية ودوها ..
اجوي اخوتي يشيلون بيه ..
فدوة يوووم ديربالكم عليها ..
بطلعتنه دخل خالي عباس ..
اني دا اسمعهم بس من شدة الالم صوتي ميطلع ..
محبوس بداخل صدري ..
لك هاي شبيها شكو ؟
يحچي و يساعد بيهم ..
صعدوني و كلهم اجوي ما عدى ابوية ..
ودوني لليرموك دخلوني للطوارئ ..
بعدها شافني الدكتور و حولني للكسور للعمليات مباشرة ..
لان طلع صاير عندي كسر مضاعف بمفصل القدم ..
اني اطرش بالزفه ..
بالعربانه و يفترون بيه ..
هذا الحچي كله و منطوني اي مسكن و الالم مشوغ روحي ..
گلت الامي اريد خالو اسولف وياه ..
خالي عباس چان يعرف انو ايهم يريدني و اني اريده ..
صاحته امي ..
اتقرب عليه اشرتلي براسي ..
خالو فدوة خابر ايهم ..
باوعلي و ابتسم ..
خالو اني جنت متفق وياه انتظرهم ابيتكم و صار الي صار ..
خابرته و همه هسه جايين ..
شكراً خالو ربي يخليك النه ..
لزم راسي و باسني من گصتي ..
يصير خير خالو يصير خير ..
خالو عباس اصغر خال عدنه بگد ثامر ..
علاقته ويانه كلنه حلوة ..
......................................
اول مرادني ايهم حچه وياه ..
اتصل خالي عليه بعد اسبوع من جيت بيت خالتي علينه ..
خالوو ايهم رايدچ على سنة الله و رسوله ..
من گالها خالي صفنت ..
معقولة حبني من اول نظرة مثل ما حبيته ؟
يكون حس بيه ؟
من واحد بخيالنه و نعرف نفسنه كنا في خياله بنفس الوكت ..
يصير الحب و الاحساس غير ..
حسيت بدموعي نزلت على خدودي ..
وصلت لشفافي و ضگته ..
چان طعمه حلووو ..
اول مرة اضوگ دموع الفرح ..
دومها دموعي مالحه و تحرگ و جهي ..
بچيت من فرحتي ..
بالحياة اكو مواقف تبچينه و اكو تفرحنه ..
و اللخ تصدمنه و اكو منها الي مينسي ابد ..
الموقف الي اني بيه يحمل كل هاي الاسماء و اكثر ..
و اكيد لا يمكن في يوم انساه ..
الوو الوو خوخه ؟
حبيبة خالچ ..
تسمعيني ؟
اي خالو اي دا اسمعك ..
شنو رئيچ حبيبتي ؟
خالو ياريت بس انت تعرف بابا و عمو ابو مهند شنو متفقين ..
خالو هذا حچي من چنتوا صغار ..
انتِ الي عليچ توافقين من يسالوچ و بس ..
خالو ترى ايهم ماكو منه ..
ارضي بيه و ما تندمين ابد ..
يسعدج يعني يسعدج و حتكونين الاولى و الاخير بحياته ..
يعني مثلك خالو ؟
هههههه لا خالو شجابه عليه اني عندي خلود زوجتي و وياها سته ..
هههههه لا خالو لعد ما اريده مثلك ابد ..
هسه شگلتي خالووو مرديتيلي حتى اطمن الولد ..
خوش خالو انشوف و الله كريم ..
و فعلاً اجوي و گلهم ابوية لا ..
الابنية مخطوبة الابن عمها ..
نط خالي : بس ما اتذكر حضرة خطوبة خوخه ..
و اكيد چان حضرنه كلنه ..
عاد ابوية عصب : هاي شبيك عباس شنو نسيت ؟
خيال من ولادته باسم مهند و كلكم تعرفون ..
وگف خالي : هذا كلام قبل الولد و الابنية كبروا و هم يختارون ..
اباوع على ايهم وجه و عيونه حمر من الغضب ..
بس كلمة وحدة ما حچه ..
ابوية : ليش منو اختار من عدنه اختك لو انت لو حتى اني و ولدي ؟
الي يگولوا اهلنه هو الي يمشي عباس ..
ايهم : بس عمي.........
ديحچي وگف ابوه : يلا عيني امشي ام ايهم ..
كأنوا سكته ..
كلنا وگفنه بوگفته ..
اتقرب على ابوية ..
قدمله ايده ..
ابوية همين قدمله ايده ..
خويه ابو ثامر اعتبرنه لا جينا و لا طلبناها ..
و نبقه اهل طول العمر ..
عاد ابوية لزمه من جتفه ..
اكيد اكيد اهل و عزاز ..
قبل لا يطلعون باوعلي ايهم ..
نظرة طول عمري ما انساها ..
نظرة تگلي اني حاميچ بقلبي قبل اديه ..
طلعوا و بدء ازعاج الوالد يتهم امي تدرين و مگتيلي ..
و بنتچ فرحانه و موافقه ..
ناصبات عليه اثنينكم ..
و زواج اي واحد ميصير الا بالي اني اريده ..
تجي اخر الوكت هالمفعوصه تمشي كلامها علينه ..
اني گاعدة على الدرج و ابچي ..
حسيت ايهم مراح يعوفني ..
بس اعرف ابوية همين مراح يخليني ارتاح ..
و بدت رحلت حبي و معاناتي ..
الحب الي مسامعه و لا شايفه منه ..
الحب الي ياخذني الغير عالم و ميردني الا من يروح صاحبه او ما احچي وياه ..
عشق وله وجد ..
الحب الي بينه لو يتقسم على العالم چان كلها صارت عشاگ ..
كلما تصير مشكله بينه و طبعاً بسبب ابوية مو من ورانه ..
يزيد حبنه و يقوه ..
كلما نبتعد رجعتنه تكون بيها لهفه و شوگ اقوى ..
چان دومه يگلي ..
لچ هيه روح و عشگت روح شله علاقة بـ ابوچ و ابويه ..
و چنت كلما اشوفه نفس نبضة القلب هي هي و كانوا هستوني شفته ..
و تم الرفض دوم ..
لحد اخر شئ كتلني ابوية كتله مال موت ..
و گال وچ و الله لو يبقى اخر يوم بعمري ..
ازوجج ابليس و لا ايهم ..
جاوبته بقوة : بس اذا الي حلفت بيه رادنه نتزوج محد يگدر يمنعنه ..
بوكته جنزني ..
من المشاكل الي صارت كل البيت صار ضدي ..
رادو بس نخلص من القهر ..
و بقينه سوة و مستسلمنه ابد ..
لحد هاي اللحظة ..
اجوي كلهم ..
چانوا عائلتي و عائلته بس يدرون بحبنه و كله متستره على الموضوع خوفاً من ابوية ..
اتقربلي ايهم ..
اسم ربي عليچ قلبي انتِ ..
عيونه مغورگه و يتصنع القوة ..
بيه و لا بيچ حبيبتي ..
اسم الله عليك ..
لزم ايدي و عصرها قوي ..
ضحكت من كل قلبي ..
و النبي الالم نسيته ..
اول مرة تلزم ايدي ايهم ..
ضحك و خجل ..
جره على كيفه ..
احبچ و ما اعوفچ ابد ..
ادري و اني همين ما اعوفك ..
اخذوني و ودوني للعمليات ..
طلعت و صحيت من البنج و انده باسم ايهم بس ..
احس ب امي تتقربلي ..
تحچي باذني ..
اسكتي يمه فدوة ابوچ اهنا ..
يروح ينتبه ..
و ارجع باصرار بعقلي و قلبي و اصيح اسمه ..
و ترجع تتوسل بيه اسكت ..
صحيت باوعت ما موجودين بيت خالتي ..
الي فهمته من امي جاي ابويه و متعارك وياهم و طالعين ..
اتقرب عليه ابوية و نظراته تتوعدلي ..
سمعت شگلتي من فكچ البنج لان اني مو اطرش ..
درت وجهي عنه ..
اتقرب من وجهي و لزم حنچي جعصه قوي ..
و دارني عليه ..
اجتي امي يمه : فدوة عوفها الله يرضى عليك ..
شافته معافني فتحت الباب و تصيح على اخوتي ..
خنزر عليه و نار تطلع من عيونه ..
شفتي شنو اگدر اسويلچ ؟
عرفتي قوتي شنو ؟
شفتيني شگد قاسي و ميهمني احد ؟
و الخلقچ اذا متبطلين منه اضربچ طلقه و ميرفلي جفن صدگيني ؟
باوعت بعينه باصرار اكثر منه ..
جاوبته بالصوت الي بالگوه دا يطلع ..
اذا ضربتني طلقه اموت و اخلص منك ؟
چان يدفع راسي قوي ..
مع الاسف گمت احس بسعادة من استفز ابوية ..
اجوي اخوتي جروه من يمي ..
گام يعيط ..
بس يفتحون الجبس تزوجين مهند خلص الكلام ..
و حق الله و انبياءه و اولياءه ..
زواجج ثاني يوم فتحت الجبس ..
و تگولين حربي گال ..
دموعي انسابت على خدي ..
طلعت من المستشفى ..
و تلفوني اخذو مني ..
چان مرسالي خالي ..
يدگ على امي عود يحچي ويايه ..
و يخليني اسمع صوت ايهم و تردلي روحي ..
و صرت زينه و فعلاً الي راده ابوية حيصير ..
بس راد العقد قبل يوم العرس ..
مراد هواية مناسبات و لا تاخير ..
بحجة قابل احنه غربه ؟
اجاني مهند قبل العرس بكم يوم ..
رحتله للهول و اني اعرج ..
طلع ابوية و عافنه ..
سلم عليه و گعد يحچي ويايه ..
اني ما اگدر اكسر كلمة ابوية ..
تعرفين عنده قلب حاولت وياه كومة و راد يروح مني ..
لعد شلون مهند ؟
ها هي خيال قسمتنه ..
خلينه انجرب بلكي نرتاح ..
انت كل عقلك تحچي ؟
اكو اخ يتزوج اخته ؟
خيال انتِ مو اختي ..
لا عفية مهند ليش تغيرت ..
لان ما اريد ابوية يموت و يظل ضميري يأنبني طول العمر ..
مهند كل واحد يروح بيومه شنو هذا الحچي ..
هذا الي عندي ..
يحچي و ميباوع عليه و ما اله نفس بيه ..
شلون اعيش وياه عمر ..
طلع و راح الامل الوحيد الي عندي ..
قلبي وگف نبضه ..
اتذكرت ايهم ..
من اتذكره قشعريره غريبه تصير بجسمي ..
اذوب بضحكته و صوته و كل حركه يسويها ..
صرت مخبله اضحك و ابچي ..
دخلت امي عليه حضنتني و تبچي ..
ميفيد بنتي عيشي حياتچ خلص بعد ..
ماما اطلب منچ طلب ؟
اطلبي حبيبتي ؟
بروح ابوچ و امچ خليني اسمع صوت ايهم ..
وخرت عني و فتحت عيونها عليه ..
جريت ايدها ابوسها ..
الله يخليچ يووم اخر مره اودعه بيها و بس ..
استغفر الله يا رب ..
زين بس انتظري ابوچ يطلع ..
حاضر ..
بعد ساعة اجتي عليه ..
هاچ التلفون ..
دكيت عليه ..
طبعاً كل گرابتنه عرفت بموعد زواجنه ..
و ابوية اصر يعزمهم و حتى طلب من عمي يعزمهم ..
فتح الخط و صوته حزين ..
انتظرته هو يحچي ..
الو شلونچ خاله ..
يحچي و يجر النفس گوه ..
شلونك ايهم ؟
اويلي ردتلي روحي ..
ههه شلونچ يا كلي ..
الحمدلله ..
شعجب خابرتي ..
ردت اسمع صوتك قبل.......
قبل متصيرين الغيري ..
احنه تواعدنه و وعد الحر دين ..
و اني حره ..
غيرك ميطخني و لا يلزمني ..
اصلاً كفر اذا غيرك لمسني و روحي بس وياك و الك ..
تعتقدين راح تگدرين ؟
اذا گدرت متزوج ..
اگدر ما اخليه يطخني ..
بقينه نحچي و محسيت بالوقت ..
الى ان اجتي امي و تأشرلي كافي ..
سكتت ..
ها تريدين تروحين ؟
شلون عرفت ؟
اكو واحد ميعرف نفسه شتريد ؟
صح ..
ناقصچ شئ حبيبتي ؟
بچيت و جاوبته ..
ناقصني كل شئ مدام انت مو يمي ايهم ..
انتِ تدرين بالي يجمعنه ما الي قرار ..
و انت تعرف اني ما عندي بس اقاوم و ابقه بالانتظار ..
و حبقه انتظر و اي لحظة بعيده عنك متسوى شئ ..
الله قادر يبدل الحال و الشوگ الي حارگني اطفيلياه بحضنچ ..
هههه حبيبي صاير جريئ ..
حبيبچ صاير واحد ميعرف نفسه مدامچ مو وياه ..
رفعت راسي للسما ..
اووووف صبرنا يا رب ..
باذن الله يصبرنه يا روحي ..
حچاه و بصدره حسره و بصوته الدمع ..
احبچ يا انا ..
احبك يا انا ..
سديته و عفت باب قلبي مفتوحه اله ..
و ما اسده ابد للموت ..
الا عليه ..
و اجه يوم الحنه ..

فالقصة قوة و اراده و اصرار