ما بيننا كان اعظم للكاتبة إسراءالجميلي

الفصل الرابع عشر

#ما_بيننا_كان_اعظم
الفصل الرابع عشر
#بقلم_اسراءالجميلي
#مدونة_نور_قلبي

مو انت نطيتني فلوس قبل ما اروح الاهلي ..
هاااا اي صح ..
عاشت ايدچ ..
حچاها كالعادة و هو ديدير راسه عيني ..
كلش مستصغرني ..
و اني كلش محترمته و مكبرته بنظر الكل ..
يا حسرتي اذا هو ميذكر هذا ذهب عرسي ..
يلا عادي هو ناسي و اني دا احاول انسى ..
نفس الشئ ..
گعدوا شوية يمنه و بعدين صعدوا فوگ ..
اني سويت الغده وي خاله و رغد ..
رغد : چان انطيتيها كل ذهبچ ليش بس السوار ؟
استغربت فتحت عيوني عليها ..
و انتِ شمدريچ ذهبي هذا ؟
مو اني و هو و محمد رحنه اشتريناه متشوفي حلو ..
هههه عاش ذوقچ حبيبتي ..
يابه و اني اذا وي الي مشتري ممرتاحة !!!!
ارتاح بلبسه ..
اصلاً اني لسه ملابستهم ..
ليش شعجب ؟
ما عندي واهس و اتعاجز و مرات انسى ..
و الله انتِ مره غريبه ..
عشت و بعد عمر طويل اموت و متاكدة مراح اشوف مثلچ ابد ..
اي نوع نادر من البشر ..
بس ترى انقرضوا الي مثلچ ..
ههههه اعرف ..
بعدها تعبت لان گاعدة من الصبح ..
صعدت ارتاح فوگ ..
اخذت هدوم و فتت غسلت و رجعت ..
اتمددت على الچرباية و الخاولي براسي ..
صفنت يا قوتچ يا خيال ..
بگد كل الضعف الي تحسيه بعدم وجود السند الچ ..
بگد القوة الي بداخلچ و خارجج ما اعرف منين ؟؟؟
غفيت و اني محاسه على روحي ..
انگلبت بنومي طخت رجلي بجسم فزيت راساً ..
شگد تنامين انتِ شوكت تجوزين من هاي العادة ..
شنو اني ؟؟؟
اي لعد منو ..
لا ترى بس من اكون تعبانه ..
لا دومچ تحبين النوم ..
ليش منو الي يگعد وياك الصبح و ينفذ كل طلباتك ؟
اي و تنامين الظهر بالساعات ..
زين قصرت وياك بشئ بحيث ضايج ..
لا مقصرتي ..
المهم اني هسه مراح احتاجج هواية ..
الله ميخليك تحتاج احد ..
مبروك على التلفون ..
باوعت على ايده لازم تلفوني ..
اشكرك ..
زين اذا مشتري تلفون منين بقالج فلوس السوار او بالعكس ..
اولاً انت خليتلي مليون ..
ثانياً اني گايلتلك اجمع لان ما احتاج اشتري شى الا ما ندر ..
ثالثاً عامر اشترالي التلفون ..
اشو گام من الفراش بعصبيه و شمر التلفون على چربايتي ..
و هو شعليه يصرف على مرتي هااا ؟
عدلت نفسي و صرت گباله بالضبط ..
و قلبي رجف اخاف يغلط ..
ترى عامر اخوية مو غريب و بعدين گلي هدية ..
لا و الله هو همين ناقص واحد غريب يجيبلج هدية ..
اشو صاير حچيچ كل خيط و خرابيط ..
هاي شبيك جاي شايط عليه ؟
اتقرب عليه سند ايده على الچرباية ..
شعره صارت بين وجهي و جهه ..
احترمي نفسچ لا تخليني اتجاوز عليچ ..
مدامچ مرتي و اني عندي قدرة اصرف متاخذين ربع من احد ..
حطلع اني و ريم ارجع اريد اعرف شگد سعر التلفون حتى توديه الاخوچ ..
بقيت لحظات صافنه عليه ..
شگله اگله اني مو مرتك ؟
لا اسكت احسلي عاد جاوبته ..
حاضر الي تريده يصير ..
ابتعد عني ..
عفيه عليچ تفهميني بسرعة ..
كالعادة و هو ديطلع ..
حلوة منچ جايبه هديه الريومه ..
بالعافية گلتها ما ادري سمعها لو لا ..
هذا بطران يرادله قلب ممدشن ..
و اني قلبي الجروح الي بيه كلش كافيه عليه ..
خابرت بسمة حچيتلها على موضوع التلفون ..
بس مو عامر يزعل ؟
لا اني مراح انطي الفلوس ..
اعرف السعر منچ و اگله المهند ينطينياه و اضمه عندي ..
بلا ميدري عامر ..
لعد گوليله اي رقم ليش تريديني اسال عامر ..
لان مهند امفتح بالتيزاب اخاف يروح يسال بالمحلات على سعر هذا النوع ..
ههههه اي و الله شگد ذكية بتعاملچ وياه ..
الله يسعدچ حبيبتي ..
امين يا رب ..
اجمعين يا صديقتي الغالية ..
فعلاً عرفت السعر من بسمه ..
اول مرجعوا شافني بالمطبخ ..
ها شگد سعره طلع ؟
اربع ورقات و نص ..
هاااا خوش ..
طلع جزدانه انطاني خمس ورقات ..
بس هاي خمسه ..
اي عود من تروحيلهم اشتريلهم عشه بيه ..
حچاها باستهزاء عبالك اهلي عايزين و فوگاها گدام مرته ..
بس ترى اهلي ممعتازين على عشايه ..
زين لعد جميعهم وي فلوسچ بلكي فد يوم تشتريلنه بيت هههههه ..
و مرته ضحكت وياه و اني القهر اكلني ..
شافني انقهرت جاملني اكيد لان رغد موجودة ..
يلا يمعوده لا تزعلين عود من يجون بالسبعه انطيهم الفلوس ..
دنگت : حاضر ..
شگد انقهر منه من يأذيني بكلامه دوم ..
و حتى ميفكر يعتذر مني ..
يعني هو بكل حرف يجلدني و گدام الكل هو المظلوم ..
و حتى بيني و بينه علساس اني ظالمته فهو هيچ يتصرف ويايه ..
لعد اني منو ظالمني ؟
اني ابوية ظلمني و سلم جسمي لواحد ما اريده و لا حتى رايدني ..
ريته يطلق سراحي و يخلصني ..
اه الله كريم تخلص على گولت امي ..
رغد لزمت ايدي من صعدو ..
ميهم حبيبتي تدرين بعده فرحان ..
مرت الايام و بديت اشوف مهند سعيد ..
فعلاً چان سعيد و فرحان مع انو احنه نشوفهم بس وجبات الاكل ..
باقي الوقت فوگ ..
مرة تاخروا على الغده فوگ فاحنه اكلنه ..
نزلوا بعدها حمت ريم الاكل ..
و صبتلهم گعدوا ياكلون ..
بعدها گامت لمت المواعين رادت تغسلهم ..
اجيت اني عليها ..
عوفيها ريم انتِ بعدچ عروسه ..
عود تخلص السبعه و الله كريم ..
هيه بقت تباوع عليه باستغراب و استهزاء بنفس الوكت ..
الثولة عبالها افيك گدام مهند ..
مهند : تعاي ريومه عوفيها مثل مگالتلچ خيال ..
رغد بصفي تقلد عليه بصوت ناصي ..
انننننن ..
هههههه وچ كافي ..
ريم : ضحكونه وياكم ..
رغد جاوبته بسرعة ..
دنضحك على الدنيا شلون تزحلگ بينه منا و منا ..
چنها ماعون متروس زاهي و احنه بنصه ..
اشو هاي جرت نفس و تباوع على مهند ..
نظرة كلها حب و حنان و اشتياق و وله ..
نظرة مشفتها بس بعيون الي يحبون ..
ريم : اي و الله صح و حتى مرات تزحلگنه و اطلعنه خارج الماعون ..
بس مدري شلون ربچ بقوته و بارادته يرجعنه ..
صح مرجعنه مثل ما تمنينه ..
بس المهم رجعنه المكان سكنانه الحقيقي ..
مهند يباوعله و يبتسم وده ياكلها بعيونه مو بغير شئ ..
ديلا حبيبتي كافي حسرات گومي نصعد ..
باچر وراچ التعب مال السبعه ..
ريم : اي صح حبيبي ..
رجعت عوجت حلگها خبحظي ..
ديصعدون الدرج ..
رغد : شفتيها متعرف تعدل حلگها دقيقة و ترجعه اعوچ ..
عبالك حلگ اليسا ..
هههههه وچ كافي حرام ..
يابه خلي الذنب عليه انتِ ابقي مؤمنه ..
هههههه بكيفچ انتِ حره ..
بس الصدگ تأثرت بكلامها الظاهر صدگ چانت تحب مهند و انحرمت منه حالها حالي ..
شنو حالچ انتِ شعليچ ؟
ليش مو اني همين انجبرت على مهند ..
بس انتِ گلتي انحرمت !!!
صدگ .. منتبهت ..
المهم اني انقهرت عليها ..
وچ هيه صح تحبه ..
بس اني احبچ الچ اكثر ..
فراح ابقه وياچ بالحق و الباطل عليها ..
ههههههه شگد صريحة حبيبتي ..
الله ميحرمني منچ ..
انتِ و بسمه خواتي الي ولدتهم الي الدنيا ..
ليش الدنيا عدها بطن ..
رشيتها بالمي ..
ههههه شگد حقيره انتِ ..
يلا خلي انظف علمود باچر ..
رغد : يابه ميحتاج مصار اسبوع نظفنه البيت كله ..
بعدين ورانه من يطلعون راح يلعب بينه طوبه ..
اي و الله صح ..
زين معرفتي شراح انسوي اكل ..
خيه وصه من سيد الحليب مواعين جاهزة لا يظل بالچ ..
الف عافية خيه مو هاي الحب ماله خو مثلي ..
انقهرت عليه باوعتلي ..
حبيبتي ربي يعوضچ ..
امين يا رب ..
المهم صارت السبعه ثاني يوم لبست حلووو بس ابد مرحت للصالة و لا شوفتهم وجهي ..
گضيتها بالمطبخ ..
حتى امي اجتي سلمت عليه ..
امي : ليش متجين اهناك اشو طالعة احلى من العروسه ..
لو انتِ بس جايبيج للكراب ..
هههه لا ماما اني معاجبني هيه العروسه اني شنو ؟
انتِ مرته الاولى ..
ماما وبعدين يظلون ناس بس گال و گلت ..
ابقي حقچ يروح ..
لا ماما حقي ميروح اني قوية و الله وياية ..
ان شاء الله بنتي ..
البيت انگلب ..
خلصت السبعه خواتها قبل ميروحون : تريدون مساعدة ؟
و طبعاً احنه گلنا لا ..
بس صعدوا هدايا اختهم فوگ و راحوا ..
ريم صعدت فوگ وياهم تبدل و بدينه نكرب ..
و الله احنه دا نشتغل و رغد تسولفلي على الناس و تقلدهم و هاي شلابسه و ذيچ شلون رگصت و اني بس اضحك ..
منشوف الا ريم داخله علينه ..
لابسه دشداشة وردي و شاده شعره و لابسه بوند وردي ..
و بدت تلم ويانه ..
رغد : هاي شدسوين ؟
ريم : هاهيه بعد سبعتي و خلصت مو كافي هالگد تخدموني ..
اني : ميهم ريم عود باچر ابدي ويانه ..
ريم : لا ماكو داعي بعدين حتى مهند ماكو عازمي اصدقاءه بـ بيارة الشام ..
اني : هااا الف عافية ..
صدگ بدينه نشتغل و حاله حالنه و تضحك مرات من تحچي رغد بس كلماتها قليله و عينها من تصير عليه ..
احسها مقهورة و ضايجة مني بس متعرف شسويلي ..
كملنه شغل و نگضنه ..
ريم : شنو رئيكم اسويلكم گهوة ..
خالتي : و الله يا ريت مشتهيتها صار كومة ..
گامت سوتنه گهوة ..
گعدنه نشرب چان تلفت عليه و بنفس الوقت سألتني ..
اگول خيال هسه شلون راح يصير التقسيم بيناتنه ؟
اني تفاجاءت : يا تقسيم شتقصدين ؟
بحچايتي دخل مهند ..
يا تقسيم بس لا تحچين على شغل ست خيال ؟
بعدنه اسم الله بالطبگ ..
فتحت حلگي عليه اريد اجاوبه سبقتني خالتي ..
خالتي : يا تقسيم يمه بعدين غير تسلم ..
العفو مو تفاجاءت من الحچاية ..
السلام عليكم ..
بعدين يمه شعليك بشغل النسوان ..
عاد هو وجه گام ينطي الوان ..
لا خالة شعليه اني انتِ موجودة و ترتبين كلشي ..
اني ما ارتب شئ ..
كل وحدة بيهم تشوف شئ بالبيت وسخ تنظفه ..
و بالتعزيل الكل و خلص ..
مهند : صح خاله ..
گومي خيال سويلي گهوة لو راس ابوية اگرع ..
خالتي : ههههه اي و الله اگرع يا يمه ..
عاد ضحكنه كلنه دا اگوم اني ..
گعدتني من جتفي ريم ما ادري بيها شوكت گامت ..
اني اسويلك حبيبي ..
خطية البنات تعبوا ..
هو البسمه شگت حلگه ..
تسلميلي يا روحي ..
اني عادي اشرب بالگهوة ..
رغد شاورتني : شفتيها شلون تفتهم مو مثلچ غبره ..
ههههههه شكراً اني عاجبني اصير غبره انتِ شنو ؟
صدگ اني شحارگ حمامي ..
كملت گهوتي من رخصتكم اني صاعدة ..
مشيت چان يصيحني مهند ..
خيااال ؟؟
نعم ..
محتاجه شئ ..
لا شكراً ..
انطيتي الفلوس الامچ ؟
يا فلوس ؟
مال التلفون خاتون ؟
هااااا اي انطيتهياه ..
عفيه عليچ ..
رغد : اني همين اصعد عدولة يم البنات صار كومة ..
صعدت ويايه على الدرج ..
تدرين شنو قصدها بالتقسيم ..
اي عرفت تريد تقسم الشغل ..
حنموت اذا مشتغلت ويانه ..
چان تكفخني على راسي ..
اييييييا لچ ليش ؟
لج انتِ صدگ غبره تقصد مهند شلون راح يقسم الايام بينكم ..
وگفنه يم باب غرفتي ..
يعني تريدني اني اساله ؟
اگول ليش تحچي على الشغل و هيه نظفت من كل قلبها ..
و الله هي مبينه حبابه بس ابقه ما اطيقها مدام اجتي فوگاچ ..
هههه فدوة العقلچ حبي ..
يلا افوت ..
هسه مگتيلي شلون حيسويها مهند ؟
شمدريني يمعودة شلون ميريد خلي يسويها ..
الله اكبر شگد فاهيه انتِ ..
ضحكت و دخلت و سديت الباب ..
صفنت ريته يبقه وياه دوم و ينساني ..
بس صدگ اني فاهيه ؟
لو اصلاً ميهمني ؟
عبالك زواج عامر ..
صدگ مخابرت عامر و عرفت شوكت عرسه بالضبط ..
دگيت عليه عرفت بعد اسبوع عرسه بس حيسوي بس زفه ..
عامر مراح يعزل يبقه وي اهلي لان ما عدهم احد ..
بس ابوية النحس و اكثر الاوقات ممتواجد ..
امي خطية فقيرة و هي و بسمه وحدة تحب اللخ ..
المهم قنعت مهند اروحلهم و اساعدهم قبل يوم ..
رحتلهم و طلعت وي خواتي اشتريت هدوم ..
ثوب بنفسجي طويل و حچاب اسود ..
بالحنه چانت للولد و اني افتر بين الهول و الصالة و المطبخ ..
حتى اباوع من الشباك بلكي المح ايهم لان الحفلة بالحديقه ..
بعد ساعة چنت فاتحة البردة شوية بالصالة و دا اباوع ..
ترى مجاي ايهم ..
يمه فزيت عزه بعينچ افنان ..
انداريتلها برعب ..
ادري بيچ شدورين انتِ متملين ؟
اووووف افنان اكو واحد يمل من روحه ؟
مو دائماً الي نحبهم هم صح ..
ممكن ربج يكتبنة شخص ينور حياتنة بعد ظلمة عشناها ..
قصدچ مهند ؟
مهند عاش حياته و مرتاح اني الي ماكلتها ..
من ايدچ خوخه ..
شلون افنان علميني انساه ..
علميني ما اشوفه بكل شئ بدنيتي ..
علميني شلون هو مو گدام عيني بس هو كل الي اشوف ..
وچ دگات قلبي چانت بس علمود اعيش ..
من عرفته گامت ادگ لان هو بي ..
سمعنه صوت امي تصيحنه ..
افنان : عيشي خيال ..
ليش هو عايش افنان فدوة احچيلي ؟
لزمت ايدها بتوسل ..
ارتبكت ما اعرف شئ عنه حبابه ..
عافتني و راحت ..
مر اليوم عادي و ثاني يوم صار العرس حاولت بكل طاقتي ابين سعادتي ..
و فعلاً كالعادة مشت على الجميع ..
خابرت مهند و گتله ابقه يمهم للسبعه و قنع راساً ..
طبعاً ملتهي بعروسته و حياته اني ابيش كيلو ..
بقيت يمهم بالسبعة جاب البنات و خالة مهند و اجه وياهم ..
بقه كاعد بالمطبخ ويايه اني اروح و اجي بين المطبخ و الصالة ..
وگفت اباوعله شلون فرحان هو و عروسته ..
ضحكتي بوجهي و حسرتي بقلبي على حالي ..
لا حسيت بعرس و لا بدله و لا فرحه ..
عفتهم و رحت للمطبخ شفت كم ماعون على السنگ ..
گلت خلي اطلع حرگتي بيهن ..
السنگ يصير گبال باب الشارع ..
اندگ جرس الباب راح واحد من الجهال فتحها ..
دخل أيهم ..
ياااااااابه سنتين صارالي مشايفه ظله انوب وجه و طوله المهيوب ..
اه يا قلبي المشلوع و باقي يمه ..
اديه بقت بلا حركه ..
لازمه الماعون و الجلافة ..
المي يجري و تجري وياه ايامي الحلوة ..
الموتوه اهلي ..
و تروح من ايدي و ايده ..
دموعي تنزل ..
ديسد الباب و شافني ..
بقه صافن عليه ..
لازم الباب بيده و ملتفت عليه ..
عيونه انترست دموع الرجولة الي متنزل ..
ما اعرف شگد مشه من الزمن و مر ..
بس تمنيتني ابقه واگفه عُمُر ..
اشو راساً وجه تغير لونه و وخر عينه مني ..
انمدت ايد مهند سدت البوري ..
باوعت عليه متفاجاءه ..
رجلي گامت متشيلني متت خوف ..
لزمني من زند ايدي اليمنه ..
تعاي ويايه بسرعة ..
صوت الديجي اختفه من اذني ..
صار ابداله وشه قوية ..
جرني دا امشي وياه شفت ابوية گبالي ..
انتبه على وجهي و شاف وجه مهند معصب ..
خيركم ؟
سمعت صوته وگعت و محسيت على نفسي الا و اني بغرفة امي ..
شبيچ ماماتي اسم الله عليچ ؟
باوعتلها ..
عبالك الساني معگود ما اگدر اجاوب ..
سمعت ابوية ..
خير يابه شجاج ؟
خاف حيشرف ولي العهد و يضرب على چتف مهند الواگف گبالي ..
عيونه ما يتفسر الي بيه ..
مدري خوف مدري اهتمام مدري عصبيه مني ..
لا عمي لا ..
بس هيه منامت البارحة زين و من الصبح گعدت على الشغل ملحگت تاكل زين ..
ابوية ضاج ..
هااا اكلي يابه مو زين عليچ ..
بلعت ريگي و جاوبته بخوف و تردد ..
حاااااضر بابا ..
رفعت ماما راسي دتشربني مي ..
اجه تقرب عليه ..
اخذ گلاص المي من ايد امي قبل متوصله الحلگي ..
لا عمه عوفيها اني اشربه ..
روحي لضيوفچ عيب ..
اي صدك گومي ام ثامر ..
خلي انشوف العالم ..
امي بقت تباوع عليه و عليهم ..
عرفته يريدنه نبقه وحدنه ..
حچيت بصوت يرجف ..
روحي ماما مهند يمي ..
طلعوا سدو الباب ..
بقلبي اجاك الموت يا تارك الصلاة ..
اتقرب عليه ..
جر راسي بقوة ..
اشربي بت عمي ..
شششششكراً ..
شبيچ ترجفين ؟
مممممممابيه ..
رجع راسي على المخده ..
حچه و هو يصك على سنونه ..
اسمعيني زين يا زينة البنات !
اشرتله براسي نعم ..
انتِ مرتي بالقانون و الشرع ..
عايفچ ..
لان مو انتِ الي چنت رايده ..
فتحت عيوني عليه ..
اسمعيني اكمل ..
و لا انتِ تريديني ..

فالقصة حادثة غير متوقعة