ما بيننا كان اعظم للكاتبة إسراءالجميلي

الفصل الثامن

#ما_بيننا_كان_اعظم
الفصل الثامن
#بقلم_اسراءالجميلي
#مدونة_نور_قلبي

بدء اسلوب مهند يتغير وياية و گام التجريح و الاهانات تزيد ..
الصدگ اني ما اتحمل احد ميحترمني گمت اسوي كلشي على اكمل وجه ..
علاقتي وي اهلي طبيعية نوعاً ما ..
ما عدى بابا الي لحد الان واگفلي على الزلة ..
و اني ما اربد احتك بيه ابد ..
لان اي كلام زايد لازم يقهرني و يسمني ..
عجيب امر هذا الاب ..
مرات اسئل امي ..
انتِ متأكدة اني بتكم ؟
اتگلي لعد بت الجيران ..
مرات اشك نفسي بت العربان مو الجيران ..
بعد مرور اكثر من سنة و احنه بنفس الوضع الاجرب ..
و اني مشفت ايهم من يوم صباحيتي لسه ..
شگد صعبه نصير غرباء ..
بعد الحب الچبير الي چان بينه ..
هنياله الي يكون حبه الاول هو نفسه الاخير ..
اكو غصة بروحي ..
و دمعه بطرف عيني رافضة تنزل ..
الي دا احس بيه امر من الحنظل ..
الي چان قبل ميحچي حرف ..
لو ياخذ نفس الا يگلي ..
هسه كلشي ما اعرف عنه ..
امشي دا اصعد على الدرج و افكر بيه ..
نصبت ميز الاوتي و دا اكوي بقمصان مهند ..
هسه ما اعرف عنه شئ ..
شوكت ينام ياكل يطلع يتمرض كلشي ماكو ..
مسمعت مهند من ديصعد الدرج ..
بدخلته احچي وي نفسي بصوت عالي ..
يلا المهم هو بخير ..
صح اني بخير ..
بس هيچ اهمچ اني ؟
كل واحد مر بحياتي يهمني ..
منو ميكون ..
هااااا خوش حبابه مو اگلچ ..
عفيه مره ماكو كلمه احچيها اذا متلگالها كلمه بمكانها ..
اتمدد على الچرباية ..
باوعلي و اني اكوي و گام يصفگ بيده ..
عفية بالبطلة ماكو داعي اگلچ شغلچ شنو ؟
اني الحمدلله ممقصره بشئ ..
مو انتِ الي تحددين هذا الشئ اني احدده ..
استغفرلله صبرني يا ارب على ما ابتليتني ..
اي صح اني ابتلاء ..
لان رضيت اتزوج مره لا نفع و لا دفع ..
انداريت عليه باوعتله من فوگ ليجوة ..
فعلاً اني لا نفع و لا دفع كلامك صح ..
طبعاً اني ما احچي غير الصح ..
و من تباعيلي باعي عدل ..
ترى افگس عينچ ..
و محد يگدر يعتب عليه ابد ..
ليش قابل بايره ما عندي اهل ؟
هههه عندچ اهل اصروا الا تصيرين مرتي ..
بارك الله بيك ..
كملت گمت الم الميز و اعلگ بالقمصان ..
اليوم بساميرك كلها بالعظم ..
تعودي عليها حبي ..
باوعتله صفح ..
حبك ؟؟؟
لا ترى هاي كلمة مجازية تنگال لاي شخص ..
حتى لو ابو محل ما نعرفه و لا يعرفنه ..
رحم الله والديك ..
الوالديچ الرحمه حبي هههههههه ..
اللهم صبرچ يا روح ..
تدرين شئ ؟
خير ان شاء الله ..
كل الصبر الي صبرتيه بالفترة الفاتت كوم ..
و الي لازم و غصباً ما عليچ تصبرين عليه بالايام الجاية ..
كوم ثاني ..
لا تخاف اصبر و حوصلتي بعدها چبيرة ..
هههههههه خلي انشوف خوخه ..
التفت عليه بسرعة ..
اي لعد شعبالچ بس اهلچ يعرفون يگولوه ..
اني همين اعرفه و اعرف اگوله ..
ههه اكيد تعرف تگوله لان انت ابن عمي ..
ديله يلا حضريلي هدومي اريد اطلع ..
شتريد تلبس ؟
بكيفچ كلشي من ايدچ حلو هههه ..
لا حول و لا قوة الا بالله ..
اريد اروح الاهلي ..
و شعندچ يمهم ؟
يعني عادي اريد اشوف امي ..
طلعتله بنطرون كتان و قميص بيجي بيه ورق شجر ناعم اخضر ..
تدرين يمكن اني ابد مراح استغني عن ذوقچ طول عمري ..
لان كلش حلو و الناس كلها حاسدتني عليچ ..
حتى بعد ما................ .
بعد ما شنووو ؟
هيچ تعرفين بعدين ..
گاله بخباثة ..
حطيتهم على الطابورية ..
گمت دا انزل وصلت للباب ..
حبابه ملابسي الداخلية و الخاولي همين ..
حاضر تدلل ..
شگد دا اكره يوم بعد يوم ..
طلعتهم اله و خليتهم على الچرباية ..
طلعت و سديت الباب و انتچيت على الحايط الي بصفها ..
حطيت ايدي اليمنه على قلبي ..
اعتذرالك لان مليتك هموم من وكت و ما فكرت بعقلي ..
حتى اريحك شوية ..
هواية كلمات و ردود بداخلي لو احچيها تهد جبال ..
تريد تنحچي و توگف على طرف الساني ..
بس اسد شفافي و ما اخليها تطلع ..
و انقهر بس ما يفيد ..
ايييييه الله كريم ..
مشيت خطوة ..
فتح الباب ..
ها اشو بعدچ اهنا ؟
فريت راسي و باوعت عليه ..
صفنت بدنيتي لشوكت تبقه هيچ وياي ..
دنيتچ زينه بس انتِ الي ما اماشيتها ..
هااا همين صح ..
عفته و نزلت ..
لگيتهم مسوين چاي ..
رغد : اصبلچ حبيبتي ؟
لا حبي اني اصب لا تگومين ..
صبيت چاي و گعدت وايهم يسولفون و يضحكون ..
عدولي يجنن صاير يحچي كلمات بسيط ..
صفنت بيه لو متزوجة ايهم چان هسه ابني شوية اصغر منه ..
بعد شئ ربع ساعة ..
نزل مهند على الدرج و يغني ..
ابوه : هاي يابه صاير تطرب هالايام ..
لا ياب مو اطرب اني اغني و انتوا تطربون عليه ..
لا بويه صوتك مو مال طرب ..
ضحكوا الكل عليه و اني ابتسمت بس ..
احسن ما گاعدة تتمضحكين على رجلج گومي البسي ..
شلبس ؟
هدوم غير ..
مو تريدين تروحين الاهلچ ؟
ها ؟ بس انت مگتلي البسي ..
اي هسه قررت ..
رجعت اخذت رشفه من چايي ..
لا ماكو داعي ..
نزلت وصلني لحد بيت اهلي ..
خلي عامر يرجعج ..
و اذا يعجبج باتي ..
مگتلي فمجبت هدوم ويايه ..
كل شوية تفاجئني بشغله ..
تعلمي على المفاجاءت وياية ..
ان شاء الله اتعلم ..
ديلا انزلي بلا حجي زايد ..
فدوة الربك لا تجاوز ..
ترى اني ممتجاوز و انتِ الوحيدة الي ابد متعلمني شئ بالدنيا ..
اذا بيچ خير علمي نفسچ ..
خلي انزل احسلي ..
اي كلش احسن اخرتيني بكلامچ الفارغ ..
نزلت من عصبيتي الكابتتهَّ سديت الباب بقوة ..
مشيت للباب ما احس الا احد لزمني من رگبتي قوي ..
اه انداريت شفته مهند ..
هاي شبيك ؟
انت تخبلت ؟
احترمي نفسچ احسلچ ترى هسه اكتلچ گدام اهلچ و الله ..
گمت ابچي و احچي ..
دسويها بلكي بعد ميرجعوني عليك ..
فتح عامر باب البيت على صوتي ..
بصوت عالي يحچي ..
هاي شكو شبيك ايددددك وخرها ؟
باوعله مهند و همين حچه بصوت عالي ..
و دفعني من رگبتي على عامر صرنا بداخل البيت بالطرمة ..
ربو اختكم و عود رجعولياها ..
عاط عامر و هو يدفع بيه ..
دولي ولي من خفت هالچهرة ..
لا ادفع و الك ..
لك انت لو عندك شوية ناموس چان ما ادفع مرتك بالشارع ..
و الك احنه اصل الغيره و الناموس ..
و الدليل اخذت اختك علمود ما اكسر حچاية ابوية و عمي ..
محد جبرك چان عفته ..
بعدين اختي مچانت بايره ..
طبعاً همه يعيطون و يتهاددون واحد على الثاني و اني بينهم صوتي ميطلع و بس اگهد و ابچي ..
شوف هذا اگله اخذتها علمود ما اكسر كلمة الكبار ..
يگلي چان ما اخذتها ..
هاي هييي ..
اني حروح لان ما اريد اوصخ الساني وياكم ..
عاط عامر حتى يسمعه ..
دولي ولي روحه بلا رده ..
عافنه و صعد بالسيارة و شخطها و راح ..
لفني عامر بيده و بده يطبب على جتفي ..
خطيتچ برگبة ابوية اليوم الدين ..
بقيت ابچي تلگتني امي ..
يمه اسم الله شبيچ يا بعد امچ ..
دخلت جوة للمطبخ و بس ابچي ..
عامر : هسه غير افتهم هذا الزمال شبيه وياچ ؟
حچاها بعصبية ..
حچيتلهم كل الي صار ..
و اني ابچي ..
و عامر يناوشني كلينس و يفشر عليه بنص كلامي ..
نعل على شرفه ..
ابن الـ............... .
بعدني دا اكمل الاخير نطت امي ..
و سكتت عامر بنظرة عيونها ..
عامر : اي هو الي يحچي الحق بهذا البيت ينلط على حلگه ..
امي : اسكت انت ما الك دخل ..
دخلي تصير عندك مره خلي اشوف شلونه تعامله يا عنتر زمانك ..
رجعت اندارت عليه تحچي وياية بصوت ناسي ..
سكتت دموعي و اني اباوعلها ..
يمه المره ما الها غير رجلها ..
و الولد خوش ولد ممقصر وياچ بشئ ..
يوم اني وين احچي و انتِ وين ..
يوم اني ما اريده لو مدري شيسويلي ..
يمه لعد تعودي على الي ديسويه ..
لان رجعه يمنه ما تصير ابد ..
چان امچ صارت اشطر ..
بقيت و اتحملت كلشي علمودكم ..
يمه بس اني ما عندي جهال ..
هو هذا المسوي المشاكل بينكم ..
لو ينملي حضنچ بطفل منه يگوم يشيلچ على راسه ..
اسم الله ..
الله لا يگوله ..
كون عاگر و لا طفل من مهند ..
لا يمه فدوة لا تعيديه يروح يسمع ربچ ..
و يحرمچ من الضنه ..
يمه عوفيني بحالي خليني عايشة و ساكته ..
ما رايده شئ منكم ..
الله لا يعوزني على احد ..
عامر : زين هو ليش گمز عليچ و لزمچ هيچ ؟
ههه مو اني سديت باب السيارة قوي ..
الظاهر خبلته هالحركة ..
عامر : ههههههه خبلتيه نبشتي عشيرته ..
كلشي و لا السيارة ..
امي : و الك انت تضحك و اختك فايره هاي شبيك ؟
انداريت عليه و گمت اضحك ..
ياشر بيده عليه و يحچي ..
شفتي يوم شفتي ضحكتها ..
امي : هسه عوفنه منك و من فطاريتك ..
يمه شتريدين گوليلي ..
ليش يوم اذا گتلچ الي اريده حتسولياه ؟
دمعت عيون امي ..
و الله يمه ما ادري ..
عوفيني يمه عايشه و ساكته و ربچ كريم ما ينسى احد ..
تدرين خوخه همزين اجيتي ..
رايدج بشغلة ..
بروح جدك اختك تعبانه و انت تريد شغله ..
ميهم ماما خليه يحچي ..
بلكي ينسيني الي اني بيه ..
هسه يگلي سويلي برياني ..
لا كبد ما اريد ..
لعد شتريد عموري ؟
اريد بسمه ..
لك يا بسمه ؟
بسمه صديقتچ ..
شبيها شتريد منها ؟
يممممه عقلها راح الابنية ..
هههه لا بداعتي احچي ..
اريد اتزوجها غير ؟
هاااا زين و ابوك يدري ؟
امي : وچ اسكتي ابوچ نايم بالغرفة ..
و اني شگلت ؟
المهم ليش انت مگايل الها ..
يابه شلون اگلها و اني ادري اب ابوچ يجوز ميقبل ..
لعد ليش هسه تريدني اگلها ؟
لان انتظرت كل بنات گرابتنه تزوجوا ..
مبقوا بس خوات مهند و اثنينهم صغار ..
يمممممه شلون عقل خو مثل عقلي المصخم ..
ليش شبيه عقلچ خيه يوزن بلد ..
زين هسه شتريدني اسوي ؟
اريد تجسيلي نبضها ..
اذا تقبل اگول الابوية ..
ما تقبل اگعد و اسكت لحد ما يجيني عدلي ..
ههههههه لك انت ولد يا عدلك ..
خيه اذا اختيار ابوية و هو يجي يگلي عليها ..
غير هو حيجيبلي عدلي ..
ههههههه و الله ضحكتني بس كلامك صحيح ..
احنه اهنا الولد و البنات منتظرين عدلنه ..
امي : احترموا نفسكم لا تحچون على ابوكم شئ ..
اروح اگعدة احسن راح تصير المغربيه ..
عامر : اي يمه روحي گعديه يروح يدخل بيه جني ..
ضربته امي على راسه و هي تمشي ..
من خفه هالصماخ ..
هههههههه خرب ببليسك عامر ..
يلا خوخه اني معتمد عليچ ..
دگي عليها ..
شنووو ؟
هسه قصدك ؟
اي طبعاً يمعودة ..
عفيه عموري اني بيا حال ..
اتقرب عليه بالكرسي مالته ..
فدوة القلبچ خوخه ليطمئن قلبي ..
اوووف خوش ..
دجيب تلفون امي ..
ليش انتِ لسه ما عندچ تلفون ؟
اي ما عندي و لا اريد ..
يلا براحتچ هسه معلينه ..
راح جاب تلفون امي من فوگ الكاونتر ..
هاچ ..
انتِ حافظة رقمها يعني ؟
لا خازنته بتلفون امي من يوم ابوية اخذ تلفوني ..
هااا ديلا حبابه فرحيني ..
الو هلو حبيبتي شلونچ ؟
اني عايشة الحمدلله ..
ليش هو كل عايش مرتاح ..
المهم جايتج بطلب و كون مترديني ..
اي اكيد خير ..
و الله خيه اخوية عموري رايدچ على سنة الله و رسوله ..
هاااا يعني ابوچ هذا اخر كلام اله ..
عيوني حزنتها ..
عامر يباوع عليه و يأشر بيده ..
شكو شگالت ؟
و اني أأشر اله اسكت خلي اكمل بيدي ..
اوكي خلص حبيبتي ..
انتظريني عود اجي ازورج لان كلش مشتاقتلچ ..
و بيچ اكثر ..
سلميلي على ماما و بابا ..
سديت التلفون ..
ها و اللچ شنو رفضتني ؟
و الله ما اعرف شگلك يا خويه ..
حسبي الله لعد ليش چانت تباوع عليه ..
و تضحكلي مرات ..
ليش ليش فهميني ؟
طبعاً يحچي و يلعب بشعره ..
و يفتر بالمطبخ و يرجع يوجه الكلام اليه ..
بعدها ابتسمت ..
ليش تضحكين خيال ؟
تضحكين على جرحي ..
صار سنتين انتظر بناتنه يتزوجنه حتى ما تبقه وحده يغصبني ابوية و ميجي ويايه حتى اخطبه ..
و ردت اعلي مقدارها برضات اهلي ..
ههههههه ..
اريد افتهم على شنو ؟
ههههه مو انت راساً عصبت و اني اصلاً مگلت كلمة رفضت ..
اجه بسرعة وگف گبالي و گومني ..
شنو ولچ ؟
هههههه لك وافقت و منتظرتني انروحلهم اني و امي ..
ظل يهز بيه ..
لچ شسوي بيچ ؟
لچ هذا مهند حقه ؟
هو يهز بيه و اني و اضحك ..
بعدها چان يحضني ..
و صوته صار هادئ ..
حبيبتي الله يسعدچ و يفرحلچ ..
و كل الي تريدي يصير ..
الله قادر ..
عيوني غورگت ..
ابويه : خير شبيكم تتحاضنون ؟
وخرنه راساً ..
خاف دا تواسيها فوگ ما هيه غلطانه ..
اني مغلطانه ياب ..
اسكتي لچ و لا كلمه ..
اتحملتچ كومة صار سنين ..
اي و الله حقك ..
بده يأشر بيده و يحچي بعصبية ..
امي لازمه ايده و تهدي بيه ..
و حق الخلقچ لو تجيني دمچ الركبتچ ..
و شعرچ بيدچ و كل عظمه وحد ..
امي : على كيفك فدوة يروح يرتفع سكرك ..
لا تخافين يا مره ما عليه شئ ..
مدام كافيه شر بنتچ عنا ..
طلاك ما تطلگين و غير مهند رجال الچ ماكو ..
ياب اني مجاي اكلگ طلگني ..
و لا جايه زعلانه ..
اني اجيت صدفه و صارت المشكلة گدام عامر ..
اي عفية عليچ ..
اردچ اله لو شما يصير ..
چثتچ ما تطلع الا من بيته ..
الي حسيته بهاي اللحظة ميوصفه كلام ..
جبل فوگ ظهري كسره ..
الناس من يموت ابوهم يگولون انكسر ظهري ..
اني كلما اشوف ابوية يكسره الي ..
بقيت گاعدة يمهم جسد بلا روح ..
عبالك انازع الروح ..
اريد بس يجي الليل و يرجع عامر و يوديني ..
لان طلع وي اصدقائه ..
امي دگت عليها خالتي و الي فهمته بعد ما سدته امي ..
تريد تخطب الـ ايهم ..
و جايبتله كومة و هو مدا يقتنع ..
امي گايلتلها اخاف ميريد يتزوج ؟
اتگلها لا اني اعرف ابني يريد ..
لعد يبقه بلا مره ..
اي ماما و عليه محچت ..
لا يمه و لاذكرتچ ..
اصلاً حتى ميسالون عليچ ..
يسالون على خواتچ و انتِ لا ..
حقهم ماما حقهم اذيتهم كومه ..
اجتي عليه ..
يمه انتِ مو بيدچ هاي قسمه و نصيب يا بعد قلب امچ انتِ ..
مع كل الي ديصير بيه يزيد اصراري على ايهم ..
قررت ما اخون وفائي لـ ايهم ابد ..
حتى لو هو خان وفاءه الي و عافني ..

فالقصة خطوبة بس المن ؟؟؟؟؟؟؟