ما بيننا كان اعظم للكاتبة إسراءالجميلي

الفصل التاسع

#ما_بيننا_كان_اعظم
الفصل التاسع
#بقلم_اسراءالجميلي
#مدونة_نور_قلبي

بقيت انتظر لحد ما اجه عامر بالدعش ..
يلا عموري حتى توصلني ..
خلي يولي هذا شنو الزمال ترجعيله ..
اجه ابوية دخل للمطبخ ..
ليش ياب ابداله متعلمها تصون بيتها و رجلها ..
ياب انت ما شفته شلون دفعها و لا احترمني ..
يابه ما يهم اخوك الچبير شكو بيها ..
التفت عليه و يخزرني ..
گومي يابه روحي البيتچ ..
المره ما الها الا بيتها ..
مو ام ثامر ؟
اي عيني اكيد ما الها غير بيت رجلها ..
بقلبي حتى بالچذب ما گلي الوقت اتاخر باتي ..
ما اعرف ليش يكرهني ابوية ..
و بس اخذني عامر و عصبي ..
الطريق كله يسب و يفشر ..
من وصلنا الباب بيتنه ..
دا انزل ..
هدي نفسچ حبيبتي بلكي ربچ يفرجها عليچ ..
ان شاء الله ..
شوكت تحچي وي ابونا ؟
و الله ما اعرف اشوفه شوكت مرتاح و يضحك و اگله ..
ههههه ليش هو ابوك هم يعرف يضحك ؟
اي و اللچ يعرف ذيچ المره شفته ..
هههههه حبيبي الله يضحك سنك دوم ..
ودعته و نزلت ..
صاح من الجامه ..
انتظرج اسمع صوت الباب الجوة يلا اروح ..
خوش حبيبي شكراً تعبتك ..
فتحت الباب البره دخلت على باب المطبخ ..
ادگ ادگ محد يفتح ..
اخر شئ طلعت مرة ابوه خطية مبينه چانت نايمه ..
دخلت جوة ..
ها يمه عبالي حتباتين ..
لا خالة رجعت لان مهند چان معصب شوية ..
اي يمه احسن فدوة القلبچ ..
الرجال يحب الحنينه و الي ما تتركه ابد و هو يصير كل اهلها و ناسها ..
صفنت عليها ..
صح خالة صح ..
صعدت على الدرج على كيف اتمنى ما اوصل للغرفه ..
وصلت فتحت الباب ..
السلام عليكم ..
شفت مهند مرتچي على تاج الچرباية ..
يحچي بالتلفون ..
اول مشافني عدل نفسه ..
زين عود بعدين نكمل ..
مع السلامة ..
من حركته و الصدمه الي بعيونه عرفت چان يحچي وي بنية ..
حسيت بالم بقلبي مو طبيعي ..
الي يجي مفروض يسلم ترى ؟
بديت اجاوبة و اني اطلع انزع عباتي ..
اني سلمت بس انت ما سمعتني ؟
قصدچ اني اطرش ؟
چنت دا اعلگ العباية ..
انداريت عليه ..
لا العفو اقصد چنت ملتهي بالتلفون ما سمعت ..
هاااا عبالي ..
اووووف استغفر لله يا رب ..
شجابج بهاليل ؟
عبالي حتباتين و بعد اخوچ ميرجعج الا انجيب كل العمام و الگرابه عليكم هههههههههه ..
و الله حقك تضحك ..
بس على گولتك انت سمعت كلام ابوك و ابوية و تزوجتني ..
فاخوية مثلك ما ينزل كلمة الكبار من گله ابويه رجعها رجعني بلا ميناقش لان يسمع كلام ابوية ..
اويلي عليچ جوابچ جوه اباطچ ..
سكتت و بعد محچيت شئ ..
اخذت بجاما و خاولي رحت للحمام غسلت بسرعة و طلعت ..
رجعت للغرفة لگيته نايم ..
اه مي بارد نزل على قلبي ..
طلعت فراشي و فرشته و نمت ..
يا ريت لو الليل عنده باب و اسدها عليه حتى ما يجيني ..
و يشعل النيران بيه ..
و يخلي كل الذكريات و القهر تمر عليه مثل الفلم ..
اوووف شلون وياك يا ليلي يا ريتك جفن يغمض و يريحني ..
نمت و قلبي يوجعني مثل كل ليلة ..
بقى الحال على ماهو عليه فترة شهرين تقريباً ..
ابوية بقه معاند على بسمه الى ان قنعه ثامر ..
بانوا ماكو بنية من گرايبنه ..
و گايل على وحدة بت ابن عمته ..
الحمدلله من راحوا عليها طلع ناهي عليها ابن عمها ..
و الولد يريد يتزوج حتى يعصم نفسه من الخطأ و سالوا على الابنية ..
المهم اخر شئ قنع الوالد الحنون ..
الي حسيتها ارزاق ..
الله كاتب عامر لبسمه ..
و الظاهر بعده مكاتبني الـ ايهم ..
بس بحوله و قوته حيجي اليوم الي يكتبنه البعض و الو بعده حين ..
المهم رحت الاهلي و مرة عمي و عمي و لگيت خواتي و ازواجهم ..
و كل زلمنا و نسوان گرابتنه الكبار ..
عامر صلوات طالع قمر ..
صارت گعدتي يمه بالسيارة ..
و الك مچنت اضنك هيچ حليو ..
ههههه حبها الي حلاني و الله ..
بلعت ريگي بالگوة و جاوبته ..
و ابتسمتله و حچيت ..
صح حبيبي الله يجمعكم بالخير دوم ..
وصلنالهم و تم كلشي بخير و سلامه ..
و چانوا جايبين شيخ و تم العقد ..
چنت گاعدة بصف بسمه لازمه ايدها و احس بدگات گلبها ..
دگات القلب الي تنبض بانتظار الموافقه ..
و ايدها ترجف ..
رجفت الحبيب الي مستعجل على جمعته بحبيبه ..
اباوع الفرحه الي بعينها ..
الفرحة مال المستعد يدخل باحلى حياة ..
ابوية حرمني من نبض قلبي و رجفت ايدي و فرحة عيوني و كلشي بيه ..
الحمدلله على كل حال ..
اندارت علية بسمه ..
حبيبتي و الله چنت اتمنى هالفرحة الچ قلبي ..
بس..... قدر الله و ما شاء فعل ..
لا بسمه هذا مو الكاتبه الله ..
و الا چان گدرت اعيش مثل البشر ..
اني ميته بسمه و منتظرة يوم دفني ..
اسم الله عليچ حبيبتي ..
ضحكت بحزن ..
عوفيني حبيبتي خلينه هسه بفرحتكم يا قلبي انتِ ..
اختي و اخوية بنفس اليوم ..
فدوووووة و حضنتها ..
فرحنه كلش و اجه عامر دخل عليها ..
فرحتلهم بغصة قلبي و الله ..
بس ميفيد غير الي الله يريده ..
رجعنه و رجعت وي عيالي البيتنه ..
شفنا مهند و اخوه بالهول ..
عمي : يابه ليش مجيت ويانه عيب من عمك ..
بعدين عدايلك اثنينهم جايين ..
عيب انت ما اجيت ..
يابه چان عندي شغله مهمه ..
يابه اني رايدكم بشغلة ؟
گعد ابو على القنفه ..
بنتي خيال سوينه چاي ..
لا يابه خيال اريدها گاعده الشغلة تخصها نوعاً ما ..
رغد : اني حگوم اسوي عمي ..
اي عمي بارك الله بيچ ..
يابه اني جايك بشغله و ان شاء الله متردني ..
خير بوية ..
يابه اني اريد اتزوج ؟
اني عبالك انشلت حواسي ..
حواسي كلها تجمدت و قلبي ما عاد ينبض ..
ردت اصرخ بعالي صوتي بس عبالك ضيعت صوتي ..
اصابعي بعد ما أگدر احركهم ..
حسيت اجاني الخريف غفل و وگع كل اوراقي مرة وحدة ..
اني حالياً واگفه بين الحياة و الموت ..
مدا اعرف الي ديريدها مهند هسه بصالحي لو لا ؟
الشئ الاكيد بروحي صارت مليون غصة مرة وحدة ..
بس عيوني گاعد تشوف شنو الي ديصير بينهم ..
ابوه گام من مكانه وگف معصب ..
شنو شگاعد تحچي انت ..
اصبر يابه ..
اگعد و اسمعني ..
خالتي : اگعد عيني ابو مهند ..
انتظر خلي الولد يكمل كلامه ..
يابه اني راح احچي الكلام الي كلنا نعرفه بس محد بينه اتجراء يحچيه ..
يابه اني رجال و شفت اشكال الوان ..
و بيوم واني بطريقي البيتنه شفت وحده قلبي تعلگ بيها ..
يشهد الله ما ردت العب عليها و افوتلها من الشباچ ..
و يجوز لو فايتله هيچ فوته چان رضيت تزوجنياها خوفاً من الفضيحة ..
ابوه گام يزفر مثل الاسد الهايج ..
بس انا ردت افوت من الباب حالي حال كل الخلگ الي ادگ اقلوبها ..
اجيت اگلك رفضت بحجت عمي منطيني بنته الي چانت بالگماط ..
گمت ااخر و انتظر و كل مره بحجه ..
لحد ما گتلك و صارت المشكله الچبيرة ..
و خفت عليك ياب ..
و رضيت مع انو ادري بت عمي متريدني مو لاجل شئ ..
بس لانه ربينه سوه و صرنه مثل الاخوه ..
المهم تم الموضوع و بت عمي ما ممقصرة وياية بشعره ..
طبعاً حچاها للجمله و يباوع عليه بنظرة توعد ..
اذا تحچين شئ احچي كلشي ..
بس بوية قلبي محبها ابد ..
و فوگاها بت عمي طلع ميصير عدها جهال ..
اهنا اني و عمي و مرته فتحنه حلوگنه ..
عمي : و ليش مگتلنه حتى نوديها لاحسن الاطباء ؟
نسفرها للاردن للهند لاي مكان ..
رجع جواب ابوه و عيونه كلها حزن و الم ..
يابه مردت احد يجرحها بكلمه كافي عليها الي بيها ..
بعدين الدكتور گالنه ماكو امل ..
لان عدها ضمور بالمبايض ..
فتحت عيوني بوسعها عليه ..
شنو هذا التمثيل ؟
منين جاب هاي الكذبة ؟
هذا من صدگ يحچي ؟
عمي : يعني شنو مفهمت ؟
يعني اعضاءه المسؤولة عن الانجاب صايره مثل وحدة عجوز ..
هااااا ..
ابوه عيونه غورگت و نزل عيونه بالگاع ..
مرة ابو بس دموع تكت ..
اخوه ميت قهر عليه ..
و اني بداخلي معقولة اكو هيچ بشر ؟
هيچ ممكن يسوي ..
گام من مكان و راح على ابوه ..
يابه امانة الله الي عرفتوه هسه بشر خارج البيت ما اريدها يعرفه ..
اني مرتي صح ما احبها ..
بس بت عمي و عرضي و ما اريد احد يكسرها ..
لهنا بعد ما اتحملت ابقى ..
صعدت ركض فوگ ..
فتحت باب غرفتي و گبل ذبيت روحي على الچرباية و ابجي بحرگه و عياط اكتمه بالدوشگ ..
اي فكرة ماكو ابالي راحت كل الافكار بقه بس الم عاصر قلبي و روحي و عقلي عصر ..
ما ادري شگد بقيت ابچي لحد ما غفيت و ما حاسه على نفسي ..
فزيت على ايد تلعب بشعري ..
عبالي احلم ..
بعدين رفعت راسي جر ايده مهند بسرعة ..
احنه من تزوجنه لسه مجرد اخوه مثل ما ردتي ..
و الصدگ مثل ما احساسي الداخلي راد ..
بيوم العرس احس حرام اتقربلچ ..
لان انتِ ما قابله ..
بعدها سالت شيوخ و چان كلامي صح ..
زواجنه باطل مدامچ مموافقة ..
بس چانوا يگولون بأي لحظة توافقين يعتبر زواجنه حلال ..
يعني ميحتاج عقد جديد ..
چنت انتظرچ تقبلين ..
و بيوم تجين عليه و يتم كلشي ..
لاني اني رجال معتز بنفسي و بكرامتي ..
مو حيوان حتى اتقربلچ و انسه الله و تربيتي ..
و بنفس الوقت اعرف الاصول و الحمدلله مقصرت وياچ بشئ ..
انطيچ مصرف و اي شئ تريدين احاول اسويلچياه ..
رغم الاستفزاز الي چان يصير بينه ..
اني ضامه الفلوس مالتك ربع ما صارفه منها ..
المهم چنت انطيچ و هيه فلوسچ ..
بكيفچ تريدين تصرفيها تضميها حره ..
هو يحچي و اني گاعدة بوسط فراشي اباوع الفرشة ..
و اصابيعي تروح و تجي عليه ..
مو حباً لا ..
بس اداء واجب فرضوه عليه ..
و اصير متزوج حالي حال كومة شباب ..
لاجل النومة و الجهال حتى ما ينگطع نسلي ..
لحد ما رجعت ريم ..
باوعتله : يا ريم ؟؟؟
ريم الابنية الي حچيت الابوية عليها جوه ..
الي چنت اريدها و اعشگها ..
سبحان الله عيونه تلمع من حچه على حبيبته ..
يا هالترى ايهم بعده من يحچي عني تلمع عيونه بحبي ؟
شوف اني بيا حال و افكر بيه ..
ليش هيه وين راحت ؟
ما اعرف بعد عرسي اختفت ..
بس رجعت بعد سنة و ٣ اشهر ..
اي ..
و عرفت رايحة البيت جدها بـ ديالى مستغلتها فرصه بيبيتها متمرضه و رايحه اداريها ..
اي ..
و من رجعت و شفتها ردت الروح بيه ..
اكتشفت كل هاي الفترة مچنت عايش ..
مچنت حاس بطعم اي شئ بالحياة ..
شگد اني قوي بس اصير اضعف الضعفاء گدامها ..
تدرين من رجعت و شفتها سالتها شنو اني بالنسبة الچ ..
بقت صافنه بوجهي و چان تبچي ..
تدري انت شنو ؟
انت قلبي و دگاته ..
انت عقلي و افكاره ..
انت روحي و و عمري بحلاوة ايامه ..
انت امي و ابوية و اختي و اخوية و كل ناسي ..
انت سعادتي بهاي الحياة ..
انت صديق قلبي و فرحتي ..
رغم كل البعد الي صار و المسافة الي ابينه ..
بس بقه حبك يكبر و يكبر بداخلي عبالك ما اتزوجت ..
حسيت مهند ديوصف مشاعري اني لـ ايهم ..
متتخيلين فرحتي و هي تگلي هيچ ..
گلت اني لازم الگه فكرة حتى اتزوجه ..
هو يحچي و اني قلبي فرحان الهم ..
و احاول بكل الطرق ميبين على وجهي ..
زين و بعدين ؟
بعدها فكرة و لگيتها اليوم و حتى خابرته و گتلها علمود نفس الكلام نگوله الاهلها ..
بلكي يوافقون تكون زوجة ثانية ..
ابد مچان قصدي اقهرچ ..
ليش لعد مگتلي على خطتك ؟
حتى يبقه وجهج مصدوم و مقهور مثل مچان قبل ساعتين من چنه جوة ..
يااا اني نمت هواية ..
اي تقريباً ساعتين ..
زين انت ليش ما اطلگني و تزوجها ؟
اشو هذا انفض ..
لا عفه عليچ ..
ليش اني ارضاها الخواتي حتى ارضاها الچ ؟
لعد اني ابقه هيچ معلگه ؟
لا حشاچ ..
مو هيچ بس احنه ما عدنه بعوايلنه وحدة مطلگه و انتِ اعرف ..
بس نگول الله كريم الله يحلها ..
لعد يصير انت تعيش سعيد و فرحان و اني ابقه مكسورة گدامك ؟
ترضاها بشرفك ؟
مترهم خيال ..
خلي هسه يتم زواجي و بعدين انشوف شراح يصير ..
بداخلي اگول اي طبعاً اتزوج انت و صير سعيد و اني بالطوفان ..
خوش الله كريم ..
يلا تعاي انزلي تعشي ..
لا ما اريد مجوعانه ..
تريدين اجيبلج العشة لهنا ..
لا و الله مجوعانه ..
اريد اغسل ..
اي خوش حتى ترتاحين ..
گمت اخذت ملابسي و فتت للحمام ..
و بديت ابچي جوة الدوش ..
على عمر خيال الي ديضيع هدر ..
الناس تفرح و تزوج و يصير عدها اطفال ..
و تحج و تعمر ..
و اني مكانك راوح ..
هواية مرات نعيش بواقع ميلائم مشاعرنه بس نضطر و ننجبر نعيشه ..
گمت احس الدنيا يوم الي و ٣٦٤ عليه تاذي بيه و تاكل من حقي ب الحياة ..

فالقصة زواج ترگص بيه خيال