ما بيننا كان اعظم للكاتبة إسراءالجميلي

الفصل الأول

#ما_بيننا_كان_اعظم
الفصل الاول
#بقلم_اسراءالجميلي
#مدونة_نور_قلبي

كلشي ممكن نگطعه بدينه .
الا الذكريات هي الي تگدر تگطعنه و تاذينه ..
ذكرياتي وي ايهم حتموتني ..
چان يوم استلامي لنتيجتي ..
يعني نهاية كلشي حلوو وياه ..
اليوم حروح للمعهد حتى استلمها ..
كل الناس تتمنى النجاح الا اني ..
اتمنى ارسب ..
اي اريد ارسب حتى يتاخر زواجي من مهند ..
امي تگلي : اي و شراح يتغير ؟
كلشي ممكن يتغير يجوز اموت و تخلصون مني ..
اسم الله يمه ليش هيچ تگولين ؟
ماما ما اريده و الله حرام عليكم ..
و اني شبيدي عليچ ؟
ابوچ من و انتِ صغيرة هو و عمچ يحچون نفس الكلمة ..
خيال ال مهند و مهند ال خيال ..
ماما هذا حچي مال ناس متخلفة ..
احترمي نفسچ خيال مو اخذ و انطي وياچ بالحچي ..
تنگلبين علينه طنطل ..
گمت وگفت ساعة السودة يوم جبتيني لهالدنيا ..
ريتچ ذابتني و لا خالتني اشتم هوى ما بيه نفس الانسان الي اريد اكمل حياتي وياه ..
گامت عليه جرت شعري قوي ..
اشو انتِ طالعة عينچ كلش ؟
اتخبلتي اشو تحچين گدامي عنه و كأني مو امچ ؟
ليش منو علمنه انكون اصدقاء و نحچي البعض كلشي مو انتِ ؟
مو انتِ علمتينه من و احنه صغار كلشي نحچيلچ ..
خفت ايدها عليه و گامت تمسد على شعري ..
ليش مو ايهم ابن خالتچ و صديق خالو عباس من الصغر ؟
شنو الي خلاه بيوم و ليله يصير مو زين ؟
منو گلچ مو زين ..
زين و ماكو منه ..
بس ابوچ منطي كلمه العمچ من يوم انولدتي ..
يا يمه احنا نسوان و ابوچ و عمچ يفهمون اكثر من عدنه ..
ماما شيفهمون فدوة الربچ !!!
اني و مهند اخوة ..
و حق ربي لو مدري شسون منصير غير شئ ابد ..
هسه تشوفين و تگولين خيال گالت ..
الظاهر خيالچ صاير واسع مثل اسمچ ..
حتزوجين مهند يعني حتزوجي و كلام ابوچ هو الي ميصير اثنين ..
حسيتني بتحدي لازم افوز بيه ..
لازم اخلص من هاي الزواجه لو يبقى اخر يوم بعمري ..
شلون اخلي مهند يطخني و اني احس كلشي بيه يخص ايهم ..
شلون اگله حبيبي و اني حبيبي بغير مكان ..
بأي عين اباوع عليه و اني عيوني حاطتهم يم ايهم ..
يا ايد حتخدمه و تشوف طلباته و اني تحت امر ايهم ..
دگات قلبي شلون يسمعها و هيه تنبض باسم ايهم ..
اه قلبي ..
‏ايهم انسان غير عن كل البشر ..
شفت بيه واحد يشبه معتقداتي افكاري الغريبة ..
روتيني اليومي ..
حتى مرات من اشوف وجهة احسه يشبهني ..
يشبه خيال ..
أيهم خيالي الحلووو ..
ايهم يخصني و لا يمكن في يوم يخص احد غيري ..
و لا اسمح لاحد يمتلكني غيره ..
بالاحرى محد اله حق بامتلاكي غيره ..
من يوم عيني صارت بعينه عرفت هذا الشئ ..
ايهم يعني خيال ..
و خيال يعني ايهم ..
بدلت و كملت ..
نزلت جوه گاعدين ديتريكون بالمطبخ ..
صباح الخير ..
كلها ردتلي الا ابويه ..
اندار باوع عليه من فوگ ليجوه ..
هاا يا الحيده وين على خير ؟
اليوم النتيجة مالتي ..
هاااا كلش زين ..
باذن الله ناجحة حتى بعدها..........
قاطعته ..
الله كريم ياب ..
ابتسم و بعيونه نظرة انتصار ..
انتصار على شنو و منو ما ادري !!!
مرات كومة احسه مو ابوية ..
عامر اخوية : اجي اوصلچ خوخه ..
لا حبيبي حتجيني بسمة صديقتي ..
هاااا سلميلي عليها ..
انداروا امي و ابوية ..
اقصد سلميلي على كل شعبتچ ..
هاي شبيكم تباعون مو اني اعرفهم لان رحت وياها لحفلة التخرج ..
امي باوعتله بنظرة الفاهم كلشي ..
اي يمه اي اتذكر ..
اجتي عليه بسمة بالتكسي ..
گامت امي وياي للباب ..
حضنتني و همست باذني ..
ربي يوفقچ بكل حياتچ ماما ..
رفعت راسي للسماء ..
امين ماما ..
حچيتها و وياها جرة نفس صعبة ..
بستها ..
عافتني و طلعت الـ بسمة ..
صعدت بالسيارة ..
بوستها و اني حزينة ..
شلونچ حبيبتي ؟
عيوني انترست دموع بس النظارة حمتني من عيون السايق ..
تعبانة بسمة النفس دا اجرى گوه ..
هسه تشوفين ايهم و ترتاحين ..
يا ريت ارتاح طول العمر ..
الله كريم صديقتي الغالية ..
هسة تشوفيه و تزوجيه و تعيشون احلى حياة ..
انداريت على الجامة ..
فدوة شنو هالخريط ..
الله يسامحچ ..
غير اتمنالچ الي يفرحچ ..
انداريت عليها و لزمت ايدها و ابتسمتلها ..
اسفة حبيبتي لان جرحت اطيب قلب يحس بيه و يفهمني ..
ضحكت و گالتلي :
يعني اكثر من ايهم ؟
هههه لا ماكو احد يفهمني مثل ايهم ..
ضربتني على جتفي ..
شگد حقيرة ..
گابله و بزه بعينه ..
ضحكنة اثنينه ..
المهم اكو ناس يسلمون عليچ ..
منو يا ناس ؟
اكو غيره اخوية المصون ..
وجهها صار احمر ..
قصدچ عامر ؟
اعرف و احس بينهم شئ ..
بس محترم الخصوصية المنطيها البعض ..
اي قابل ثامر يعوف مرته و يباوع عليچ ..
عيني و حتى لو عاف مرته منو گلچ اني اباوع عليه ؟
هههه اي صح ..
بقينه نسولف و نضحك لحد ما وصلنه للمعهد ..
سلمنه على صديقاتنه و زملاءنه الولد ..
بدو يوزعون النتائج ..
حچيت بصوت ناصي سمعتني بس بسمة..
اني يمكن اول انسان بالعالم يفرح اذا رسب ..
لا اسم الله بعون الله ناجحة و بتفوق همين ..
ضغطت على ايدي ..
اه الله كريم حبيبتي ..
استلمناها و اكثرنا نجحنا و اني منهم طبعاً ..
بقلبي صار وجع مينحمل ..
اصعب شئ من تمثل دور الفرحان ..
و انت بداخلك دتموت ..
بعدها بقوا البنات يسولفون و كلامي وياهم كله اي و لا ..
عيوني چانت ادور عليه و شفته گدامي ..
عفتهم و مشيت اله و كانوا البشر الوحيد الي بالمعهد هو ..
ايهم وجهه مربع فكه عريض شوارب و لحية خفيفة ..
حلگه مرسوم من فوگ ..
كانوا جبلين واحد بصف اللاخ ..
خشمه مستقيم عدل ضايف جمال على جماله ..
طويل من اباوعله لازم ارفع راسي شوية ..
شخصيته قوية و يفرض نفسه على المقابل ..
حركات ايده قليلة ..
مخلص ادارة اعمال ..
و يشتغل مقاول بناء وي والده و اخوه الچبير امجد ..
الي يعرفه من نظرة عيونه يعرف شنو يريد و شنو يحس ..
شلونچ يا عافيتي ؟
هههه مرتبكة ..
ليش يا روح ايهم ؟
و خايفة ..
لان نجاحي يعني حـ اتركك ايهم ..
باوع بعيني ..
لا اعوذ بالله ..
متعرفين الله شكاتب ..
الله كاتب شى و ابوية و عمي يريدون غيره ..
انتِ مو تگولين مهند ميريدچ ؟
مهند ميريدني و اني مرايدته بس ابوية و ابوه و كل العشيرة رايدينه البعض ..
لا تخافين اني اليوم جايكم و شيصير خلي يصير ..
ميصير شى بس راح ترجع و ايدك خالية ..
ايدي متخله ابد لانچ بكل جزء بية ..
مو بس ايدي ..
اويلي عليه شلون حگدر ابتعد عنك ..
اگلچ ترى ضوجتيني هواية ..
هسه ممكن تسكتين شوية ..
ليش ؟
اريد تخليني استمتع بجمال عيونچ و نظراتها الي تسلبلي روحي ..
باوعت عليه ..
ابتسمتله : جمال عيوني و لمعتها متصير بس من انت ويايه ..
ليش عود ؟
لان حبك هو الي يخليها تلمع و تصير حلوة ..
لا و تگلي اشلون اگدر ابتعد عنك !!!
وچ اني الي شلون اتنفس الهوى و كلامچ الحلو متسمعه اذني و يحس بيه قلبي ..
كلش صعبة نفقد انسان هو النه كل الحياة ..
لا تگولين هيچ يا كل حياتي ..
گولي يا الله ..
يا الله ..
دك تلفوني شفته ماما ..
صمتت تلفوني ..
اجتي بسمة..
يلا حبيبتي نروح ..
خلينه شوية بعد ..
باوعتلي بنظرة مواساة ..
حاضر راح اترككم شوية ..
تعال ايهم خلي نگعد على المصطبة هاي الي يم الحايط ..
رحنه گعدنه اخذ جنطتي خلاها بينه ..
لزمته دا اوخره ..
سحبه و نزله لا يعمري ميصير ..
الله يخليك اريد اصير قريبة منك فدوة ..
لحد يشوفچ قلبي ميصير ..
اليوم اخر يوم بدوامي بالمعهد ..
حيجون غيرنه السنة الجاية و ينسوني ..
بس اني مراح انسى اي نظرة تجي عليچ من وراية ..
باوعتله بنظرة عشگ و وله و حب ما الها اول و لا تالي ..
بقى يباوع عليه صفن عيونه گامت تحچي ..
بوييييه همزين احنه بالمعهد چان...........
و سكت ..
ضحكت : چان شنو ؟
هههه بعدين تعرفين من تصيرين ابيتي ..
الله ينطيك على گد نيتك ..
اكيد و نعم بالله ..
شفت بسمة من بعيد اجتي يعني هاهيه لازم اگوم ..
دموعي مدا تنزل على وجهي ..
دموعي دا تنساب بين ضلوعي ..
اخاف يشوفها و يعتبرني ضعيفة .
قلبي كام ينزف دم و دمع ..
و الله حرام تخلي عيوني متشوفك ..
عيونه دمعت دار راسه عني ..
حتشوفيني و تشبعين مني شوف ..
ليش حچيتها بلا متباوع عليه ..
باوعلي ..
اخذ نفس و زفره بقوة ..
اووووف اريد اگلچ شغلة لا تنسيها ابد ..
شنو ؟
لا تعتقدين فد يوم اخذلچ و انتِ بحمايتي و وراء ظهري .
لان ادري بيچ امنتي بيه و بحبي ..
حبيتيني رغم ان الحب ابلدنه شبه محرم ..
و بالذات عند اهلچ و ناسچ ..
اتحديتي كلشي تربيتي عليه الخاطري ..
احلفلچ برافع السماوات بلا عمد ..
حكون وفي الچ لاخر لحظة بعمري ..
و حق ربي الخلقني لو يزوجوج عشرة ..
اسم مرة ميصير بجنسيتي غير خيال ..
اعتبريه وعد من رجال ..
تعرفيه كلش زين گد هالوعد ..
صفنت عليه و جاوبته بقوة ..
و اوعدك لو زوجوني مية محد يطخني و لا يلمسني غيرك انت ..
ابتسم بالگوة ..
وصلتنه بسمة : يلا عاد خوخه تأخرنه ..
گمت وكفت بتعب رفعت عيني عليه ..
اندار بكل جسمه و صار گبالي ..
رفع ايده اليسرى صار بوجهي باطنها ..
و ياشر على ساعد ايده ..
دتشوفين شرايني ؟
اي ..
انتِ دا تمشين بيهم ..
رفع راسه عليه ..
تروحين منهم بس من اموت و ينگطع مجرى الدم ..
اسم الله عليك يا نور عيوني انت ..
احبچ يا احلى خلقه بحياتي ..
احبك يا احسن خلقه بعمري ..
تمشينه سوة الباب المعهد ..
اجر النه تكسي و دفعله الكروة ..
صعدت بسمة و دا اصعد چان يصيحني ..
خيالي الحلو ..
لفت راسي عليه و ابتسمتله بطلعان الروح ..
طمنيني عليچ ..
اشرت براسي اي ..
صعدت و بقيت اباوع عليه و دموعي تبلل خدودي لحد ما لافت السيارة بالفرع ..

فالقصة كسرة قلب قبل العظم

باذن الله تعجبكم البداية .