ما بيننا كان اعظم للكاتبة إسراءالجميلي

الفصل العاشر

#ما_بيننا_كان_اعظم
الفصل العاشر
#بقلم_اسراءالجميلي
#مدونة_نور_قلبي

ثاني يوم الصبح گعدت لگيته رايح للدوام و عايفني نايمه ..
گعدت و براسي الف فكرة و فكرة و قررت ابدي انفذهم بالتدريج ..
حتى على الاقل يرتاح بالي ..
يومية لازم قبله گاعدة محضرة هدومه و ريوگه ..
لان يريد يتزوج صاير ناعم سلس ..
لميت فراشي و عدلت فراشة ..
چنت كلش جوعانه ..
نزلت جوة و بنزلتي اسمعهم يحچون عني ..
وصلت ال باب المطبخ كلها سكتت ..
صبحت عليهم لحظات يلا ردولي ..
شفت بعيونهم مستخطيني و مقهورين عليه ..
خالتي : يلا ماما تعاي تريگي ..
اي خالة جيت ..
رحت اخذت كوب صبيتلي چاي و گعدت وياهم على ميز الطعام ..
رغد : شلونچ اليوم ؟
گح زوجها ديسكتها ..
جاوبتها بابتسامة خفيفة ..
الحمدلله حبيبتي بـ رحمة الله الي ارحم من كل البشر ..
الابنية خجلت و وجه صار احمر ..
باوعت على عمي ..
عمو اريدك بموضوع ..
اي عمي هسه اكلي و بعدها نروح الغرفتي و احچي براحتچ ..
لا عمي ميحتاج هو مو سر ..
تفضلي بنتي ..
عمي اني موافقة على زواجة مهند ..
كلها فتحت حلوگه عليه متفاجاءة ..
اي عمي ماكو داعي تتفاجئون ..
ترى عادي هواية يتزوجون النفس سبب مهند ..
على الاقل هو عنده سبب ..
اكو يتزوجون بلا سبب و ياذون نسوانهم ..
بس مجرد لغاية بنفسهم ..
اي بنتي صح ..
عمو مهند من حقه اسمه يبقه بالدنيا ..
عمي انت متاكدة من قرارچ ؟
مو بعدين ترجعين ندامنه ..
عمي ترى اذا هسه مصار يصير بعدين ..
يجوز انتو هسه وياية لان تگولون خطية بعدني ممار عليه سنتين ..
بعد خمسه بالزايد عشر سنوات كلكم تريدون تشوفون ضنه مهند ..
و اني الله ما كاتبلي ..
بعد ليش هالتأخير ..
و البارحة مهند وعدني ميفرق بينه ..
و حالي حاله ..
رغد : اي غير يريد منچ شغله ..
محمد : رغغغغغغغغد هاي شبيچ ؟
ضحكت اني ..
خليها محمد رغد فطيرة و الي بـ گلبها على السانها ..
ميهم رغد اني راضيه ..
مثل مگتلكم بعدين تگومون انتوا تطلبون زواجه ..
فالافضل برضاتي ..
بعدين خاف الابنية يزوجوها اهلها و يخسرها ..
عمي : و منو گال ينطوها زوجه ثانية ؟
جربوا عمي شراح تخسرون ..
الله كريم بنتي يجي مهند و نشوف ..
بس اني طلبي نفس مهند ما اريد هذا الخبر يعرفه احد ..
لان اذا وصل الاهلي يقهرهم و همه ميستاهلون ..
اي عمو حقچ الي تريدي يجرالج ..
لگمتين و انسدت نفسي ..
گمت عفت الاكل ..
عمي : وين رايحة بنتي ؟
شبعت عمي الحمدلله ..
بالعافية بابا ..
بقلبي و الله انت احسن من ابوية ..
بس يجوز لو معاندتك چان صرت مثله ..
رحت على الحمام طلعت السطلة و الوصله دا امسح ..
اجتي وراية رغد ..
جرت السطل مني ..
عوفي خيه عوفي ..
البيچ مكفيچ انوب تنظفيلهم ..
خليني اني شوية ارتاحي ..
لا حبيبتي بالعكس خليني انظف حتى انسى ..
يمه شينسيچ بعدها ما اجتي و صارت گبال عينچ ..
هههه الله كريم رغد ..
گمت اشتغل و انظف و منتظرة مهند و اريد بس اعرف رئيه ..
اصعب احساس انه انت تحارب ذاتك كبريائك وعقلك ومبادئك ..
تحارب الواقع لخاطر شخص متدري بيه باعك لو بعده مشتريك ..
بس المشكلة ما عندي غير حل ..
لان عمري ما اگدر اتقبل مهند كـ زوج ..
بعيداً عن وجود حب ايهم في حياتي ..
بالله اني دا اقنع نفسي لو اقشمره ؟
اذا دا اقنعه فـ اوكي هذا خوش حچي ..
بس اذا دا اقشمره فـ هذا قمة الغباء ..
يعني اني لو ابوية مزوجني غير مهند ..
چان گدرت انسى ايهم بيه ..
و انطي نفسي و روحي و دگات قلبي ..
بهاي افكاري وصلت للمراية الي فوگ المغسلة ..
اجلف بالمغسلة و اباوع عليها ..
اخ يا مراية دتشوفين همي و قهري ..
گمت اتلمس بوجهي احسني عتگت عبالك فوگ الاربعين عمري ..
الهم و القهر ماكلني و عبالك روحي مو مالتي ..
كملت تنظيف ..
خالتي : تعاي ماما يلا كافي ادمرتي ..
تعاي اتغدي ..
لا خالة ممشتهية اريد اصعد اغسل ..
براحتچ يمه الله يعينچ ..
اصطنعتلها الابتسامه و صعدت غسلت و بدلت ..
و نمت گعدت على دخلت مهند للغرفة ..
السلام عليكم ..
عليكم السلام الله يساعدك ..
و يساعدچ ..
باوعت الساعة صايرة بالسبعه ..
اجه تقرب عليه ..
الي سويتي اليوم للموت مراح انسى الچ ..
چنت حاير شلون اگلچ تروحين تگوليلهم ..
عبالك قريتي افكاري و سويتيها ..
اني كلش مستعجل على زواجي ..
لان كلش مشتاق الـ ريم تصير بين احضاني ..
حچاها بشوگ و عشگ ما سامعته الا بصوت ايهم ..
صراحته جرحت كبريائي كـ حبيبه محرومه ..
مو كـ زوجة اولى ابد ..
ههههه مو دتلاحظ نفسك زودت بصراحتك ويايه ؟
اسف مو قصدي ..
بس دا اعتبرچ اختي مثل ما ردتيني دوم ..
صح بس مو هالدرجة ..
فهمني غلط عباله غيارنه عليه ..
ميدريني غيرانه منه و من حبه الي حيصير يمه ..
المهم هسه شوكت راح تروحون ؟
ما اعرف طلبت من خالتي و رغد يروحون يشوفوهم ..
حتى يعرفون بيهم يرضون لو لا ؟
كون بتهم حتصير زوجة ثانية ..
هههههه ليش انت مگايللهم ..
خجل وجه صار احمر ..
گام يبدل ..
لا طبعاً گتلها بس غير هيچ احچي گدام اهلي ..
غير اذا يعرف ابوية عندي كلام وياها ينهي كلشي ..
اي صح عمي حاله من حال ابويه ..
صح همه كلهم نفس الشئ ..
ترى انت همين نفس الشئ ..
تخيل باچر عگبة تعرف بنتك لو ابنك يحبون ..
تقبل تزوجهم الي يريدوهم ؟
اندار عليه و هو ديعلگ هدومه بالتعلاگه ..
صفن و اجه گعد على الچرباية ..
الصدگ ما اعرف ..
بس حبقه منا لحد ما يجون اولادي و يكبرون ..
ادعي من الله ما اكسرلهم قلب بيوم ..
اه الله كريم ..
سلامتچ من الـ اه ..
ياريت اهلنا داعين هيچ دعوات ..
باوعلي بتعجب وياه عصبيه ..
شنو قصدچ ؟
انتبهت على كلامي و راساً غيرته ..
قصدي چان انت هسه عندك طفل من ريم ..
و اني دا اكمل طبيه الي چنت احلم بيها ..
رجع اندار عني ..
اي و الله صح كلامچ ..
الله يسامحهم ..
امين ..
گلت امين بلساني ..
بس بداخلي گلت الله لا يسامحهم على كسران رگبتي ..
نزل و فعلاً راحوا خالتي و رغد و بالبداية اهلها رادوا بيت وحدها ..
بس عمي رفض گالهم ردولهم احنه بيتنه چبير ٦٠٠ م ..
و همه ولدين عندي عود يسويلهم سويت فوگ ..
و تبقه ويانه حاله حال زوجة محمد و ضرتها ..
رضوا اهلها بعد نواح و اصرار منها ..
و الظاهر اهلها طيبين و يريدون بتهم ترتاح بالي تريده و تگول عليه ..
خو مثل حظي المصخم ..
اهلي عرفوا دزوا عليه ..
گتله المهند وداني عليهم ..
تولوني امي و خواتي و يبچون ..
و اني اگلهم عادي يمعودين خطية هو يحبها و يريدها ..
و همه يحچون عليه و شنو هالبرود ..
و انتِ مخبله تجيبيلچ ضره ..
بعدچ صغيره شنو مدا يصير طفل ..
و اني اقنعهم و اصبرهم عكس كل الاودام ..
حتى عامر راح على بسمه و خابرني منها على تلفون امي ..
بس ابوية گاعد يسمعهم بدون اي تعليق ..
و اني و لا يمي ..
و الله اصفن على نفسي ..
شنو هذا الخلل الفني الي بمشاعري ..
بس كلما يزيد برودي ..
كلما اتاكد انو مهند فعلاً ابن عمي و اخوية لا غير ..
و لا فد يوم حاسبته زوجي ..
المهم ..
راحوا الزلم بدون نسوان قروا الفاتحة ..
ابوية حتى ما كلف نفسه يجي يسلم عليه ..
دخل الصالة بيت عمي وي الزلم و مصاحني و لا كلف نفسه يطيب خاطري بكلمة وحدة ..
عبالك مرة مهند وحدة غريبه ..
بس لو اعرف الي يدور براسه شنو چان ارتاح ..
و الي حيكون نفسه يوم يجي شيخ يعقدلهم ..
طبعاً مهند ميگلي شئ ..
رغد تگلي كل الي يصير حتى من يروحون اهناك تنقلي بالحرف ..
علاقتي بـ رغد قوية كلش ..
مثل علاقتي ب بسمة ..
بس طبعاً ابد مگتلها على سري وي مهند الي ميعرفه غير ربي ..
اني قررت اروح وياهم حتى لو مهند مگلي ..
و هذا القرار اجه بعد تفكير عميق ..
چان عندي فضول اشوفه ..
و بنفس الوكت ردت احس بالفرح الي فقدته اني ..
يمكن مخبله بس عادي هذا احساسي ..
الي مدا اگدر اغيره او امحيه ..
گتلها الـ رغد و طبعاً كيفت عقل نسوان ..
تعاي وياية اروح اشتري هدوم ..
اتصلت بـ مهند من تلفون رغد ..
ها رغد خير ..
اني خيال ؟
خير خيال صاير شئ بيچ شئ مريضه ؟
انصدم و رد بخوف ..
لان هاي اول مرة ادگ عليه و هو بشغله ..
ههههه لا على كيفك كلشي ما بيه ..
اريد اروح للسوگ ..
هااا اي و متروحين ..
غير اگلك ..
اي صح روحي روحي ..
اخذي فلوس من خالتي او رغد و من اجي انطيهم ..
لا ماكو داعي عندي خير من الله ..
براحتچ الله وياچ ..
سده حتى قبل ما اگله مع السلامة ..
مستعجل مهند ..
الله يعينه ..
رغد : اي عيني مو هو هسه طالع وياهم ديشترون الذهب و الملابس مال المهم ..
هااا مو اگول سمعت صوت سيارات و ناس كومة ..
المهم لبست بسرعة و رحنا للمنصور ..
اشتريت تنورة حمره اقماشه بيه لمعه فضيه خفيفة كلش على شكل نقاط صغيره متباعدة ..
و فوگاها سترابلس احمر اسقيات و عليه ستره قصيرة سودة ..
بياخته اليمين وردة احمر ناعم ..
و اشتريت داخلي مال اميره اسود ..
و توربيني اسود و بيه ورود حمر بحافه وحدة من التوربيني ..
و حذاء اسود عالي و شنطة سودة ..
اشتريت مكياج جديد لان مال عرسي كلها صار قديم و ما مستخدمته فذبيته ..
چنت اشتري و فرحانه و بعتناء ..
رغد متخبله ..
اشترت ملابس الها و العدولة ..
تگلي ذوقچ عجبني اشتريلي و كانوا دا تشترين النفسچ ..
بعدها گعدنه بمطعم اكلنه بيتزا و رجعنه للبيت ..
كل هذا تاخيرنا و هو بعده مراجع ..
حسب ما عرفت من رغد ..
همه يطلعون يتسوگون و بعدين يرجع البيتهم يبقه لحد الاثنعش يلا يجي البيتنه ..
بيتهم قريب علينه كلش ..
بعد ٣ بيوت على جهة اليمين من بيت عمي ..
اجه يوم المهر مكيجت نفسي ..
و بدلت طلعت اجنن ..
نزلت جوة اتخبلوا كلهم عليه من شافوني ..
نظرات الشفقه بعيونهم كلش ضوجتني ..
طبعاً كل گرابتهم جايين ..
اهلي بس امي جاي بأمر من ابوية ..
خواتي كل وحدة لاگيه عذر شكل و بسمه كذلك ..
امي تخبلت من شافتني اجتي گعدت يمي ..
و اللچ انتِ شعندچ جاي ..
شبيچ تخبلتي ؟
ضحكتلها و الله ماما عاجبني اتونس من زمان ما ممتونسه ..
و من كل عقلچ عود اليوم راح تتونسين ؟
اي يوم بس عوفيني ..
الله اليستر من هاليوم ..
چان مهند بعده ديبدل بغرفة ابوه ..
نزل قاطه و هدومه بيهم و غسل بالحمام الجوة ..
طلع من الغرفه للهول ..
شاف الكل گاعدين ما انتبه عليه ابد ..
لان صار فترة مشايفني بالمگياج و هو اصلاً محترم ميدقق بالنسوان ..
شاف الكل گاعدين ما انتبه عليه ابد ..
يلا يا ناس اتاخرنه على العالم ..
النسوان كلها گامت تضحك عليه ..
جاوبت خالته : يمه احنه مكملين صار ساعة و انت ماكو ..
مشينه دنطلع من باب الصالة ..
و بدو يطلعون النسوان ..
وگفت خالته : يمه ما شفت مرتك شلون طالعة گمر ..
اني ضحكت ..
لا خالة وين شفتها هسه اروح و انشوف كلنا ..
اهنا صار عندي مثل الانفجار براسي ..
ردتله خالته : اقصد مرتك الاولى يا بعد خالتك ..
گام يفر براسه يدور عليه ..
وينها وينها ؟
خالته : وراك يمه وراك ..
بقه يتلفت شافني انصدم ..
انتِ ليش هيچ امبدله ؟
غير حتى اجي وياكم ؟
و منو گلچ تعاي ويانه ..
النسوان الي بعدهن بالصالة و الي طلعنه بالطرمة ..
سكتن و لا نفس اذا تذب الابره تسمع حسها ..
رغد اجتني من وره لزمت جتفي و تضغط عليه ..
خالته : مهند هاي شبيك يمه عيب منا العالم ؟
ميصير تجي يا خالتي ..
الدمعه وصلت لـ حد عيني ..
نصت صوته خالته ..
يمه خطية ليش هيچ تگلها و هي فرحانتلك ..
اسمعه يجاوبها ..
بالاحرى الكل سمعوه ..
ما اريدها تجي و تنغص على ريم فرحتها ..
اه يا قلبچ يا خيال شكد تحمل صگعات ..
شوكت يتحطم و تخلصين من هاي الحياة ..
ترتاحين و تريحين ..
و اني ابالي علمودي لا انقهر ..
طلعت رايحة كلش زايد وياه ..
اني جنت شمعه هستوها انعلگت ..
و طفاني مهند بجملته هاي ..
مع العلم اني السبب بالضوه الي صار هسه بايامه ..
عبالك چان باقيلي جنح و كسره ..
معجبني اسمع صوت اي بشر بعد ..
مشيت بهدوء لباب الصاله الداخلي ..
و بقت رغد لازمه بيدي لحد ما اني عفته ..
لان هيه واگفه صافنه بين تجي ويايه ..
لو تروح وياهم ..
قررت اذا ما اكون دواء ..
فعالاقل ما اكون داء و اذي احبابي ..
سمعت صوت مهند : خيييييال خيييييييال ..

فالقصة الم بالروح ما ينعرف طاريه