ما بيننا كان اعظم للكاتبة إسراءالجميلي

الفصل الخامس

#ما_بيننا_كان_اعظم
الفصل الخامس
#بقلم_اسراءالجميلي
#مدونة_نور_قلبي

المراراه الي دا اشعر بيها مو طبيعيه ..
عبالك اريد اتقيئ ..
احس اني بفاتحة ..
و الميت اني ..
اني فايره ..
كلها مرتاحة و ترگص و محد حاس بمشاعري و الي ديصير بيه ..
چانت بس بيان كل شوية تجي تعدل بيه ..
تلزم ايدي ..
تحاول تصبرني و تقويني بنظرات عيونها ..
خطرة ابالي فكرة ..
صحتها اريد افوت للحمام ..
دخلت دورت بالصيدلية الي فوگ المغسله ..
ردت اخذ شئ حاد وياية ..
لگيت المگص الصغير الحاد مال ابوية ..
يگص بيه شواربه ..
دخلته بردان ايدي اليسره و بقيت لازمته باصابع ايدي بحيث ميبين ..
طلعت رجعوني بمكاني ..
سالت بيان : وين جنطتي الي راح اخذها وياية ..
قصدچ الچبيرة وديناها ..
لا اقصد الصغيرة الي حشيلها بيدي ..
ها لحظة ..
راحت جابتلي چنطة صغيرة مستطيلة فضيه ..
بيها ستراس يلمع بالحافات ..
بيان : شتسوين بيها ؟
غير الزمها خاف يجون ..
انتِ شنو خليتي بيها ؟
مكياج عادي ..
هااا شكراً الچ ..
خلي اشوف اذا اكو شئ ناقص اخاف احتاج شئ ..
اخذتها فتحتها بيدي اليمنه ..
و حطيت ايدي اليسره بنصها و دفعت المگص ..
و سديتها ..
و بقيت انتبه عليهم و اباوع على فرحتهم بالمي ..
يا الهترى كل الزواجات بالعالم هيچ غُلبه ..
كل الناس مثلي تزوجت تمثيل بـ بتمثيل ..
گامت دموعي تنزل على نفسي ..
لان هذا اليوم مفروض اكون اسعد الناس بيه ..
و اني چنت اتعسهم ..
اجتي عليه بسمه گعدت بصفي ..
باوعتلها حچت ويايه ..
حبيبتي هاي قسمتچ ارضي بيها و حاولي تكونين سعيدة ..
القهر و الحزن مراح يقدم او يأخر شئ ..
عوجت حلگي بابتسامة تعجب ..
بالله اذا هسه يزوجوج هيچ و يخلوچ تعوفين عامر همين راح تقنعين روحچ بهاي الكلمات ؟
فتحت حلگه و تلعثمت بالجواب ..
عاااامر ... شنوووو ... شبييييه هو ؟
بلا تلعثم بسمه ..
ادري بيكم تحبون بعض بس ساكته لان انتوا مگتولي ..
و الله اني ما عليه عامر ميقبل يگول الا افاتح اهلي يلا ..
هسه مصار شئ جاوبيني ؟
اذا ابوية رفض زواجكم و اهلچ اختاروالچ غيره حترضين بقسمتچ ؟
گامت دموعها تنزل و حضنتني ..
و تحچي باذني ..
الله يعينچ حياتي ما عندچ غيره ..
هو السند لكل عباده ..
بقت گاعدة يمي لحد ما اجوي مهند و اهله دا ياخذوني ..
بقيت راسي منزلته ..
مردت ارفعه و اشوفه ..
زادت دموعي ..
همزين البرگع چان مغطي وجهي ..
اجه گعد بصفي ..
اجتي مرة ابو لازمه علبة الذهب ..
لان ملحگ يلبسني ..
جر ايدي حتى يلبسني الحلقة ..
احس نار و چوتني ..
من لبسنياها حسيت عبالك قطرة زيت حاره وگعت على اديه ..
تشوغ الروح بيها ..
هذا چان احساسي زيت حار حايط اصبعي ..
من لبست حلقته ..
انطتني الحلقة حتى البسها اله ..
بقيت مدنجه ..
اخذها منها و لبسها بيده ..
مرة ابوه : هاك يمه لبسها الذهب الباقي ..
ماكو داعي خالة تلبسه هي عود من نوصل للبيت ..
وسط الهلاهل الي طرشت اذني ..
و الگولات الي ما اتذكر منها شئ ..
اني اشوف حلمي ديذوب مثل الشكر بالچاي حبه حبه ..
الدنيا هيچ احلام تتحقق و احلام لا ..
و احلام تبقه بلائحة الانتظار ..
تمنيت اعرف او احس او يجيني خاطر او حلم ..
يگلي و يفهمني حلمي بوجودي وي ايهم ..
مراح يتحقق لو بعد وكته ؟
بس مع الاسف ملگيت اي اجابة داخل روحي ..
المهم گالو يلا دنروح ..
گام وگف و عافني ..
ادري اذا انت مرايدني منو صخم وجهك و گلك تعال ..
چان عفتني و ريحتني منك ..
اجوي خواتي گوموني ..
مشيت وياه حتى بدون ما يلزمني ..
وصلنا للباب اجتي حضنتني امي و البچي زاد ..
مگدرت ارفع ايدي و احضنها ..
مقهورة منهم لان خذلوني ..
كسروني و وجعوني ..
و بسببهم حصير تعيسه العمر كله ..
رفعت راسي عليها بنظرة عتب زاد بيها بچيها ..
و الناس تگلها مو خوش فال يمعودة ..
ابوية مچان موجود اصلاً ..
اخوتي واگفين و عيونهم مليانه دموع ..
و ضحكة الفرح على شفافهم المقهورة عليه ..
و الاضرب من وصلنه للسيارة ..
راح ديصعد بجهته و عافني ..
صاحو الولد يمعود وين عروستك منو يصعده ؟
بعدك باول ساعة نسيتها ..
رجع مدري شنو گلهم و ضحكو كلهم و فتحلي الباب ..
لزمو البدلة خواتي و صعدوني بيها ..
اجه گعد بصفي ..
چان اخو يسوق و اغاني و هوسة ..
بقيت الطريق كله ابچي ..
ودونه للمصور مچان موجود الاصلي بس العامل ..
و اخذنه اسوء صور عندي ..
فرحت لان چانت سيئه ..
تمنيتها كلها تحترگ و متطلع ..
مردت اشوفني بصف احد غير ايهم ..
وصلنه البيتهم ..
گعدونه شوية بالصالة ..
بعدها گالوله يلا اخذها و اصعدوا ..
الي چان كلش مؤذي بموضوعنه ..
اثنينه مغصوبين بحيث شنو يگولون نسوي ..
عبالك لعابه ام الخيط و لازمين خيوطه من فوگ و يحركون بيها ..
جرني من زندي و صعدنه ..
الطريق الغرفتي انرش بدموعي بدل الورود ..
دخلني : بدلي اني هسه جاي و سد الباب وراه ..
گعدت بقيت اباوع على الغرفة ..
ههه غرفة نومي الي مختاريت بيها اي شئ ..
چانت خشب توصاه ..
كنتور چبير بيه ملحق عالي كلش ..
اول مدخلت الكنتور على يمنتي ..
و گباله الچرباية ..
على يسرتي الميز تواليت ..
گعدت على طابورية مستطيلة ..
لازگيها يم الچرباية گبال الكنتور صايرة ..
الغرفه چانت چبيرة ..
البردات وردي بوسطها تول ابيض ..
الفرشه مال عرسان ورديه و بيه كركش ..
اباوع على المراية و شفت روحي اول مره و اني بـ بدلة العرس ..
ههه عروسه ..
اني عروسه لـ مهند ..
فكرت الحياة مو طويلة حتى نگدر نعيشها وي انسان منريده ..
و لا گصيرة و نگول يلا مبقة شئ ..
بس هيه تصير كلش حلوة اذا عشناها وي الي يختاره قلبنه ..
و تصير مره حنظل مثل حياتي اذا شخص منريده و منحبه ..
تمنيت اموت ..
گمت فتحت البدلة بالگوة نزعتها و لبست كورسيه كامل ..
مشتريته من زمان مال حفلات ..
لبست فوگها گلابيه حاطيلياها بالكنتور عود مال الصباحية ..
رجعت گعدت على الچرباية ..
بچيت طبعاً مكياجي صار فلم ..
و اني و لا مهتمه ..
قررت لازم انهيها الحياتي ..
بعد متسوى ابد ..
بعدها فتحت الجنطة الصغيرة الفضيه ..
اخذت المگص گلت هاهيه حتخلص مآساتي و ارتاح ..
ماكو داعي اله النفس اذا مو من انفاس ايهم ..
بقيت صافنه عليه ..
يداته سود و شفراته بطول الاصبع ..
صغير بس حاد بشكل ..
رفعت رداني اليسره ..
فتحته و لزمته و خليته على اديه ..
بچيت من كل قلبي ..
الدموع طلعت منه مو من عيوني ابد ..
دا احركه و بده دماغي يشتغل ..
اني محصلت ايهم بالدنيا ..
اغضب ربي يالانتحار و ما احصله بالاخره هم ..
صفنت للفكرة وقويت نفسي بهاي الفكرة ..
انو لازم احصل ايهم على الاقل بدار الاخره ..
بفكرتي هاي انفتحت الباب ..
راساً وگع بحضني ..
خفيته بديناتي اثنينهم ..
چان نازع قاطه و لابس دشداشة بيضه ..
و شايل بيده صينية مال اكل ..
ها زين امبدله ..
بس شو لبس مال مؤمنه ؟
و منو گلك اني كافره ..
لا مو گالولي لازم تلبسين غير شئ ..
و على شنو البس غير شئ ؟
غير حتى نخلص و يرتاحون ..
منو گلك اني اريد اخلص شئ ..
و بعدين همه الي لازم يرتاحون لو احنه ؟
هههه احنه مراح نرتاح ابد ..
خله الصينيه على ميز التواليت ..
و اجه گعد بصفي و اندار عليه ..
شوفي يا بنت الناس ..
اني مغصوب حالي حالچ ..
ههههه و الله ضحكتني ..
ولد و يغصبوه ..
يمكن الدنيا انگلبت ..
هيه راح تنگلب من ورى بنات باخلاقچ ..
تستهزء بزوجها ..
منو گال انت زوجي ..
لعد البارحة العقد شنو چان ؟
خيو العقد باطل لان اني مراضيه ..
لعد ليش وافقتي ..
ههه لنفس سبب موافقتك ..
باعي خصم الحچي زواجنه لازم يتم ..
الناس دا تنتظر جوه ..
شينتظرون عيني ؟
اوي نغه متعرف شنو ينتظرون ؟
شوف ترى هواي تماديت ..
يلا انزعي ..
حياة مجبورين عليه بس لازم انكملها ..
حال امي و امچ و ابوية و ابوچ ..
هياتهم بعدهم مرتاحين ..
اگلك منو قنعك بهذا الكلام ؟
انت مو چنت اتگلي معليچ و خلص و احنه اخوه ..
قنعني الي قنعني ..
المهم لازم يتم كلشي ..
جرني عليه قوي ..
ايي هاي شبيك تخبلت ؟
گمت ابچي ..
بلكي استعطفه و يعوفني ..
الله يخليك عوفني ..
خلينه نبقه سوة فترة و طلگني ..
اتقرب عليه لزم جتافي ..
وچ هو منو بعائلتنه اطلگ حتى هسه اني اسويها ..
و الله انت حسبت عامر و ثامر ..
و الله ما اگدر ..
الله يحفظك عوفني ..
گام يهز بيه ..
بابا انتِ شنو تحچين ؟
انتِ مرتي و خلص و لازم يتم كلشي فهمتيني زين ؟
گمت وگفت رحت باتجاه الكنتور جريت المگص حطيته على صدري ..
و الله اذا اتقربت اقتل نفسي ..
گام وگف ويضحك عليه ..
ههههه اي بالله شوفيني شراح تسوين ؟
انت واحد ما عندك كرامه شلون تريد تجبرني عليك ؟
و الله انت متحترم نفسك ابد ..
اجه تقرب عليه ..
هو يتقرب و اني قلبي يدگ باللحظة الف دگه ..
و حق ربي الخلقني و سود عيشتي بابوية ..
اكتل نفسي ..
اي بالله دسويها يا بطله ..
كلامه استفزني بالزايد ..
لزمت المگص و خليت الحافه مالته على صدري ..
حخلي بصدري حتى اكتل قلبي اول شئ ..
لان غبي و مشه بكلام الضمير ..
و الله و تالله و بالله حقتل نفسي اذا تقربت اكثر ..
اتقرب و مدار لكلامي بال ..
خليت المگص على صدري دفعته عليه و جرحت نفسي ..
بلمح البصر صار يمي ..
دفعني قوي و جره مني ..
گام يعيط
ايا مخبله يا غبيه ..
لچ مو اذا سويتي بروحچ شئ يگولون مو ابنية و انتحرت ما فكرتي ؟
اموت و ما اخليك تلزمني ..
خله ايده على صدري ..
وين نيشانچ ؟
شنو ؟
اني گمت ارجف مثل الغصن الخاوي ..
ما اعرف بالكنتور خواتي صفطوه ..
لچ يا نيشان ثولة ..
خله ايده اليسره على صدري حتى ما يكت الجرح دم ..
و بالثانية فتح الكنتور ..
يشمر بالملابس لحد ما لگه خاولي ابيض ..
شگ الگلابيه و خلاه على صدري ..
ها هيه خلص ..
وخره باوع على الجرح ..
الجرح سطحي همزين و خفيف ..
گام جاب عطر رش عليه ..
جر خاولي لاخ وردي حطه عليه ..
ارتاحي هسه اجيج ..
اليوم خلصتي مني بس مو عبالچ هاي النهاية يا بت عمي ..
اخذه و نزل جوه على اهله و اسمع الهلاهل و صوت الطلق ..
الي چانت دگات قلبي اعلى منه ..
گعدت الم بخوفي ..
خفت احب ايهم لا افقده و اتالم ..
و خفت لا ما احبه و تضيع فرصة و اندم ..
يا ربي شلون ابقه احبه و لشوكت ؟

فالقصة حياة جديدة غريبه