ما بيننا كان اعظم للكاتبة إسراءالجميلي

الفصل الثالث عشر

#ما_بيننا_كان_اعظم
الفصل الثالث عشر
#بقلم_اسراءالجميلي
#مدونة_نور_قلبي

بقيت لحد ما اذن الفجر ماكو نوم اگلب بالتلفون الجديد الي كلشي ما اعرف بيه ..
گمت توضيت و صليت ..
تمددت بقيت اتگلب لحد ما طر الفجر يلا غمض جفني ..
گعدت على صوت جهال خواتي و ضحكاتهم الي مسويه روح بالبيت ..
يگمزون عليه و اني نايمه ..
حلو من تگعد على صوت الملائگه الي ميفهمون شئ ..
عايشين حتى يحبون و ينحبون بس ..
فعلاً همه احباب الله ..
لا حقد لا طمع لا كذب لا اذية ..
ريتني عايشة وي كومة جهال و لا بشر واحد ياذيني و ميطيقني ..
بس اكيد فرج الله قريب اليه و الغيري ..
گمت رحت للمطبخ حتى اتريگ ..
لگيتهم ديسون دولمة و برياني ..
خير يمعودين شنو عدنه عزومه ..
اي عيني ثامر اجر النه كيه حنروح للزوراء ..
صدگ چذب تحچون ؟
اي و الله ..
يلا اتريگي و فوتي البسي بين ما انكمل ..
يمعودين ما بيه حيل ..
افنان : عيني احنه معلينه انتِ احچي وي اخوتچ ..
زين و بابا ؟
ابوچ المصون ما يجي ..
ليش ؟؟؟
لان اليوم حنة ابن اخوه شلون ميروحلهم ..
بقيت اباوع عليها لحظات ..
بقلبي گلت : هذا ابوية ابد مو طبيعي ..
يعني ما عنده و لا شعره رحمه علينا الله اكبر ..
صدگ و الله بدلنا و رحنه و تونسنه كلش ..
كلها اجتي ازواج خواتي و زوجة ثامر و بسمه ..
نسوني كلشي بحياتي من هم و قهر ..
لعبنه طوبه و تنس و حتى ختيلان مثل الجهال ..
المهم رجعنه بعد المغرب ..
مهدودين من التعب ..
اخذنه سرى على الحمام ..
همزين عدنه واحد فوگ ..
ابوية اجه بالتسعه ..
دخل سلم من ورى خشمه ..
يحچي وجه الكلام الـ امي ..
ام ثامر اليوم ما جيتي انگول حنة ولد باچر تجهزين بناتچ و تجون ويايه ..
خواتي اثنينهم بنفس الصوت ..
يابه احنه ارجولتنه ميقبلون نروح لان العرس بالقاعة و مختلط ..
هاي شنو هالعيارة مو كلنا گرايب ..
عامر : لا يابه مهند عازم ولد من شارعهم ..
لان يعرفوه و اهلهم معارف لاهل الابنية ..
هااااا لعد اذا هيچ ابقوا ..
اندار عليه بس كلامه موجه الخواتي ..
عفية عليكم بناتي المره ما الها غير رجلها و طاعته من الله واجبه ..
بقلبي اللهم طولچ يا روحي ..
رجع باوع الـ امي بنظرة حادة ..
بس انتِ تجين لو تخافين لا احد يباع عليچ ..
لا عيني لا الي تأمر بيه يمشي تدلل ..
خوش ..
يلا ما تگومون تنامون ما نگضتوا من التفرفر بالشوارع ..
حاضر حجي هسه كلها تنام ..
احنه اصلاً منتهي فلمنه فـ فرشنه و تمددنه كلنه ..
هالمرة بس خليت راسي على المخده فكرة وحدة اجت ابالي ..
اهلي كلهم نعمه ما عدى ابويه ..
كلها عايفه بيوتها و حياتها و تريد تسعدني بأي شئ ..
غفيت و اني مبتسمه لان حسيت اهلي وياية ..
على گدهم صح بس هذا الي يگدرون عليه بظل جبروت الوالد الغالي ..
نمت گعدت الصبح احسني مخنوگه ..
ليش ما اعرف ..
هم كلهم گاعديين ..
لميت فراشي شايلته و فتت من يم المطبخ ..
لان هو صاير بين الهول و غرفة امي ..
هاي شبيكم تگعدون غباشي ؟
ضحكوا كلهم ..
بيان : خيه مو احنه نگعد القرود يگعدونه ..
لا تگولين عليهم هيچ ..
لزمت بنت اختي زوزو و بستها ..
چان تجر الفراش مني ..
لچ لا حقيرة لا تخليني اصيحلچ مثلهم ..
ديلا تعاي تريگي ورانه طلعه ..
و اللكم وين حتفروني كل بغداد ..
ايه ديلا يمعودة ..
زين وين هالمرة ..
معليچ ..
خوش ..
رحت وديت الفراش صفطته على النضيده و رجعتلهم ..
رحت ورى امي حضنته و خليت راسي على جتفه الايمن ..
و الكم شلون قلبكم ينطيكم اطلعون بلا امي ..
عاد امي باستني من خدي الايسر ..
فدوة الحبيبة امها ..
روحوا تونسوا ماما اني راضيه ..
افنان : لچ القاضي راضي المفتي شعليه ..
بكيفكم ..
عاد بدلنه و طلعنه وي نفس ابو الكيا ..
گعدت اني بالكرسي الي ورى السايق ..
دا اسولف اني و بسمه ..
لمحت واحد صفح بسيارة بيضة ..
عطت : ايييييهم ..
قلبي وگف شلون من نعطس و يتوگف النبض ..
عقلي اتشوش و فقد الاحساس بكل الي يمه ..
شعور غريب رجفه على فرحه على خوفه على لهفة على اشتياق ..
على على على حب و عشگ و هيام ..
السيارة كلها سكتت حتى الجهال ..
حسيت على نفسي شسويت بعد سكوتهم ..
اهنا تمنيت الگاع تنشگ و تبلعني ..
عاد افنان گبالي گاعدة ..
اندارات باعت على نفس السيارة ..
سبحان الله هذا شگد يشبه ايهم ..
صدگ من گال ابو المثل يخلق من الشبه اربعين ..
عامر : سايقنه متعلگنه اغنية نتونس عليها ..
حبيبي يريد يتلافه الموضوع ..
اني دنگت راسي و بعد ما نطقت كلمة لحد ما وصلنا لمدينة الاعراس ..
نزلوا الشوايات و اللحم و الدجاج ..
و بدوا الزلم يشون و احنه گضيناها بس لعب و ركض وي الجهال و وراهم ..
بس كل شوية اصفن و يندهولي ..
كلها بعيونها نظرة حزن ..
عبالهم مقهورة لان اليوم عرس مهند ..
ما يدرون دا افكر يعني ليش مچان صدگ ايهم و امتع عيوني بشوفته ..
ليش هو اكو دوه للشوگ غير انك تشوف المشتاگله ..
كملو الشوي و بدو يرتبون السفره ..
اجيت اساعدهم مقبلوا ..
ارتاچيت على شجرة و بديه تلفوني ..
باوعت عليه بيه كومة وسائل حتى نتواصل وي الناس الي نعرفهم و الي منعرفهم ..
الفيس و الياهو ماسنجر و السكايب من غير المسجات ..
كل ذني و مگدرن يخلني اتواصل وي ايهم ..
كلهم لا شئ عندي ..
احسني مهاجره بس مو من بلدي ..
لا ..
من عيونه ..
و ادور عليهم وين ما اروح بكل الوجوه ..
بلكي اشوفهم و اعرف ..
بعدني بيهم لو لا ؟
اشوف العالم اباوع بوجوهم ..
الضحكة حلو طالعة من قلب مرتاح او شبه مرتاح ..
الا قلبي الهم كاتله ..
اتمنى اتجاهل كلشي و اعيش مثل الناس العايشة ..
اتمنى اعرف شلون وصلت الهاي الدرجة من التعب و الشگى ..
بسمه : عيني الماخذ عقلچ يتهنى بيه ..
هههههه ..
يلا حب گومي ناكل ..
حاضر جاي وياچ ..
رحنه اكلنه ما خلين شئ مشاوي ..
رجعوا وياية و يحاولون يگومني و ينسوني و اني كل شوية اصفن ..
هالمرة رجعنه قبل الغروب ..
بسمة وصلناها البيتهم ..
و اجينه ..
التهينه نظفنه بيت اهلي ..
عدلناه و خواتي طبخوا الـ امي كم اكله لحد ما ترجع ..
بعدها فرشنه عافوني وي الجهال ضليت اقرالهم قصص ..
و اجاوب على اسالتهم الغريبه ..
بعدها نامو ..
اجوي همين خواتي تمددنه نامو و اني بقيت گاعدة ..
سمعت صوت سيارتنه عرفت ابوية رجع ..
ردت اگوم اسأل عليه ..
اشوفه شلونه ؟
اوي و شعليه بيه ..
بقيت اتگلب روجة توديني و موجة تجيبني ..
و بعدني مكانك راوح ..
غفيت و اني كلش تعبانه ..
الصبح اجتني امي ..
يوم هاچ هذا رجلج على التلفون ..
اي ماما جيت ..
باوعت على الساعة سبعه ..
هذا شعنده غباشي ..
رحت عليها اخذته منها ..
الووو شلونك مهند ؟
الحمدلله انتِ شلونچ ؟
الحمدلله اني بخير ..
مبروك عليك عريسنه ..
الله يبارك بيچ ..
يوم لاولادنه و بوجودچ ..
شگد حقير لازم يضوجني ..
الله كريم ربي يبعثلكم ..
شوكت ترجعين ..
ما اعرف يجوز باچر عگبه ..
اني راجع للبيت بالعشرة اريدچ اهناك تنتظريني ..
فدوة مهند لا تصغرني ..
انتِ تكبرين بيه مو بالعكس ..
اهوووو ..
و جعووووو و طارگحووووو ..
الي گتلچ عليه يتنفذ ..
سده بوجهي الادبسزز ..
امي : هاي يمه خير ؟
يريدني اروح للبيت استقبله النذل ..
ابوية : منو النذل ؟
بصوت جهوري ..
امي : لا هاي دا تحچيلي على مسلسل ..
هااا عبالي ..
يلا سويلي ريوگ خيال ..
امي : اني اسويلك تدلل ..
لا اني گلت خيال ..
حاضر يابه تأمر ..
ابوية : تدرين ام ثامر اليوم اني كلش فرحان ..
شعجب ابو ثامر ؟
لان اكو روس راح تبطل غرور و تصير مثل ما احنه نمشي ..
يعني شنو مفهمتك حجي ..
عيني هو انتِ شوكت فاهمتني حتى تفهميني اليوم ..
هو يحچي و اني متگرضمه على امي ..
سويتله اكل و خليت ااصينية گدامه ..
تفضل يابه ..
زين ..
بس شوية قربي الطبلة ..
حاضر يابه ..
بعدها گمت صعدت على عامر اگعده حتى ياخذني يرجعني ..
گتله و نزلت جهزت نفسي ..
و انتظرته ..
نزل لابس يلا خوخه بس ليش مستعجله ؟
لا عادي اتاخرت هسه يجونه خطار و رغد وحدها خطية ..
ماما سلميلي على خواتي و بوسيلياهم همه و جهالهم ..
دا انتظريهم يمه لحد ما يگعدون ..
لا يمه خطية ..
اخذني عامر وصلني ..
دگيت الباب البره و اسمع الهلاهل ..
هههه عبالهم العريس اجه ..
فتحت الباب خالتي ..
مبروك يمه مب.ً.............
هاي شنو شجابج ؟؟
ضحكت لان تفاجاءت ..
حكم القوي خالة شسوي ..
دخلت سلمت عليهم ..
صعدت دا احط غراضي بغرفتني و ابدل ..
و اسمع هورن سياره قوي ..
باوعت من شباك غرفتي ..
شفته عيني اجه ..
خُفت و الله خُفت حقير خلاني اطلع ركض من اهلي ..
و بعد ما نزل من السيارة ..
گمت اسمع الهلاهل مال خالته ..
عاد لبست گلابية و حطيت شوسة مكياچ و لبست شالي و نزلت ..
شفتهم كلهم بالهول ..
فتت سلمت عليهم ..
هو سالمته بيده ..
هيه تقربت ابوسها چان تمدلي ايدها ..
عرفتها ناوية العداوة ..
هيه بيضة عيونه ملونه وجه مربع ..
حنچها شوية بارز ..
بس شكلها كلش چذاب و جميل ..
سلمت عليها و گعدنه ..
انطاهوا عمي و محمد صباحيتها ..
چان تباوع عليه ..
لعد هديتچ النه وينها ؟
حرجتني الكلبه ..
چان يگلها مهند : هي شكو تنطيچ هدية ؟
غير احنه خوات حبيبي و الاخت تحب الخير الاختها ..
تحچي وياه و هيه لازگه بيه و تتنعوص بشكل ..
و اتمد جسمها عليه و لا اكو ذرة حيى من كل الگاعديين ..
اني جاوبتها عاد ..
لا شلون يمعودة ..
تريديها هسه لو بعدين ..
عود تريد تحرجني ..
اي اريدها هسه حتى اتباها بيها گدامهم ..
صعدت فوگ چان اطلع سوار عرسي الي ملابسته ابد و محد شافه اصلاً لان هو ملبسني بالعرس ما عجبه ..
حطيته بعلبة ذهب وحده ..
عندي من چنت ابيت اهلي ..
اني ادور السوار و العلبه و ارتبهم على السريع و نار تطلع من كل جزء بيه ..
دا انزل الدرج تمنيتها يمي و اشمرها هالممثله القبيحة الاخلاق ..
وصلت اتقربت عليها تفضلي حبيبتي ..
الله يرزقكم بالذرية الصالحة ..
فتحت العلبة تخبلت ..
بقت صافنه عليه متوقعت ..
بس بعدها انتبهت على نفسها ..
چان تگول ببرود : شكراً الچ حلوو ..
شوفته المهند ..
ها حبيبي حلو ؟
مهند شافه و عيونه صارت براسه ..
وجه گام يگلب الوان ..
هذا منيلچ ؟
وجه كلامه الي و بـ نبرة عصبيه ..

فالقصة لقاء تمنتهُ خيال