ما بيننا كان اعظم للكاتبة إسراءالجميلي

الفصل السابع

#ما_بيننا_كان_اعظم
الفصل السابع
#بقلم_اسراءالجميلي
#مدونة_نور_قلبي

الم البعد ميشبه اي الم ..
حبيبك يمك و متگدر اتگله حرف ..
الحب دخل بقلبي كسر كل حدودي ..
المشاعر الوحيدة الي حطمت داخلي ..
و خلتني اشعر بداخلي فتات هي مشاعر الاشتياق ..
بس دا احس الي كان بينا ..
كأنوا اثنين اتقابلوا بمطار ظلو يسولفون و انجذبوا واحد للثاني ..
بس بالاخير كل واحد راح بطيارة و صعد بأتجاه يختلف عن اللاخ ..
و الدليل هسه ..
اني وياه بنفس المكان ..
نفس الهوى انشم ..
واحد يسمع الثاني و يشوف الثاني ..
بس بالاخير هو راح يروح ابيت و اني بغيره ..
انتبهت على مهند شافني و اني اباوع على المراية الي بصفي ..
درت وجهي عليه ..
بعدها رجعت اباوع ليگدام و بس ..
يحچي وي ايهم ..
الي اجوبته عبارة عن نعم و لا ..
مهند حچه كومة ..
بس و الله ِ من چان يحچي چانت اذني تنسد ..
كلمه ما اسمع منه ..
ايهم اذا گال امممم اي لا صح ..
اي حرف يدخل بريتي مثل الهوى ..
دگ تلفون مهند قطع حبل افكاري ..
حچه مدري شنو سمعت بالاخير ..
اي هسه جايك ..
لاف السيارة على اليمين طلع على الشارع العام ..
اشو رجعنه شكو ؟
بس ولد صديقي اطلبه فلوس صار كومة دينطينياها ..
ايهم : لعد نزلني اهنا و اني ارجع ..
التاف عليه ..
هاي شبيك ايهم اشو عبالك غريب ..
ترى انت ابن خالة المره ..
و گرابتي بعد شكو ..
و الله مو ما اريد اخركم ..
يمعود هيه دقيقتين و نرجع ..
صدك ماكو دقيقه و وگف السيارة و نزل راد ينزل ايهم ..
يبوو هاي شبيك الشمس نار ..
الظاهر ميريده يجي وياه ..
نزل راح لمحل مال عقارات الي من جهة السايق صاير ..
ايهم صار ورى كرسيه ..
قلبي گام ينفض ..
حرارة گامت توج من داخلي ..
جراءة نفسي و انداريت عليه ..
باوعتله يباوع على الجامه بالجهة المعاكسه الي ..
يا ربي ..
مشاعري حلال لو حرام ؟
ليش هو زواجي حلال لو حرام ؟
اني هسه اعتبر مرة رجال لو لا ؟
اسئلة ادور براسي و اني اباوع عليه ..
شلونك ايهم ؟
گلتها بصوت يشبه الهمس ..
اصلاً يمكن بس اني سمعتها ..
لان بقه مندار ما باوعلي ..
بعد لحظات رفع تلفونه خلاه على اذانه ..
لا تباعين عليه لان مهند ديباوع علينه من جامخانة المكتب ..
صدك اباوع لمحل العقار اشوف مهند يحچي وي الولد و نظراته ادور بينه و بين صاحبه ..
سويت نفسي مدا اباوع عليه ..
دنگت راسي ..
فدوة جاوبني شلونك ؟
بالي عليك و الله ..
احسن من البارحة ..
و باچر اصير احسن من اليوم ..
و عگبة احسن من باچر و هكذا ..
الي فهمته بقه حاط التلفون على اذانه و يحچي ..
حتى مهند مياخذ باله انو هو ديحچي ويايه ..
الله يجعلك دومك بخير ..
انتِ شلونچ مرتاحة بالزواج ؟
يا راحه و انت مو يمي ايهم ..
ههه ضحكتيني راحة المزوجين غير ..
اني بعدني ممتزوجه ..
صدگ لعد و عرس البارحة شنو ؟
و الله بعدني على حبك حبيبي ..
هشششش و لا كلمة بعد اريد اسمع منچ ..
حبي الك اقوى من اي فعل سويته اني ..
ههههههه كافي كافي ست خيال ..
اني تعبت من حبچ ..
اريد بعد ما افكر بيچ ..
اريد ما اهتم بعد بيچ ..
اريد ما ارتاح لوجودچ ..
اريد ما احتاجچ يومية ..
اريد ما احس بأي شئ تجاهچ ..
قلبي كسرتيه و بالگوة دا احاول ارمم بيه ..
ما اريد اشوفچ بعد حتى لا ينكسر مره ثانية ..
من اول البارحة لليوم بس هذا دعائي ..
ربي يبعدچ عن دربي حتى ما اشوفچ و اتذكر روحي الي اطشرت بلياچ ..
عفية لا تگول هيچ الله يخليك ..
احچي و احاول دموعي ما تطلع ..
بعدني منزلة راسي و حاطه ايدي مغطية نص وجهي الي بجهة مهند حتى ما يشوفني احچي ..
لا تحچين حتى صوتچ ما اريد اسمعه ..
گام نزل من السيارة بس قريب على باب السايق ..
الي چانت جامته مفتوحة ..
كسر قلبي و اذاني بالزايد ..
اني ما اريد احبچ و بنفس الوكت ما اريد اكرهچ ..
اريد تگومين متمثلين شئ بحياتي بعد ..
بس ما اعرف شلون اسوي هيچ ؟؟؟
اذا نسيتچ او لا ..
بالحالتين اني الوحيد الخسران ..
لان مدا اگدر اتجاوزچ ابد ..
و ليش تريد تنساني ها ؟
اني ما اريد انساك ..
و حبقه عايشه علمودك و بس ..
بس اني اريد انساچ حتى اگدر اعيش بالباقي مني ..
اجه مهند هو عود نهى المكالمة و صعدوا اثنينهم ..
اني صرت بحالة توهان و الم ..
كل جزء بيه گام يوجعني ..
كل جزء بيه يصيح باسم ايهم ..
كل جزء بيه رافض كل الكلام الي گاله ..
ليش يا ربي خليتني اشوفه اليوم ؟
حتى اجرحه بشوفتي و يجرحني بكلامه ..
سبحانك اللهي ..
مشينه بالطريق لازمه نفسي لا اطگها ابچيه ..
أسَمع بونيني اهل المشرق و المغرب ..
وصلناه نزل يم بيتهم ..
و حق الخالق نفسي انگطع بنزلته ..
شوية مشينه ..
بديت اكح من الخنگة ..
شبيچ خيرچ ؟
وگف السيارة يم ابو اسواق ..
راح جابلي مي ركض و فتحه و انطانياه ..
اشرب و احسني مدا ارتوي ..
بقيت اشرب بدون احساس لحد ما كمل البطل كله ..
هاي شبيچ يمعودة ؟
اختنگت ما اعرف ليش ..
يلا مصار شئ ..
حمدلله على سلامتچ ..
رجعنه للبيت لگيت اهلي رايحين ..
صعدنا فوگ ..
ممكن ادگلي على امي ..
لحظة ..
دگ على امي قفل التلفون و انطانياه ..
تفاجاءة بحركته ..
اوي شعليه بيه ..
هااا بنتي شلونچ خو الجرح چبير ؟
شمدريچ عندي جرح ؟
الي تروح الدكتورة بصباحيتها ..
شنو عدها مثلاً فلاونزة ؟
هههه ضحكتيني يا ماما و اني الهم ماكلني ..
هههه اي يمه اضحكي متسوه الدنيا ..
هسه مگتيلي شلونچ ؟
لا يمه خفيفه ماكو شئ ..
الحمدلله ..
ودعتها و سديته ..
اگلچ انتِ شعجب ما عندچ تلفون ؟
هااا لا چان عندي ..
قبل فترة وگع بالسنگ ..
راد يشتريلي بابا واحد و رفضت ..
ليش ؟
ما احتاجه ب شئ ..
تحبين اشتريلچ واحد ..
لا ماكو داعي ..
خوش اني حنزل يم ابوية ..
اي براحتك ..
تحتاجين مساعدة ؟
لا شكراً بس من تفرغ اريد احچي وياك ..
اوكي عود بالليل ..
نامي هسه ارتاحي ..
ان شاء الله ..
بدلت و تمددت ردت انام حاولت عالجت ماكو ..
تقريباً ساعة فوگ اني ..
گمت لبست گلابية لخ ..
يمكن مشتريلي سيت و مصفطيهم ..
دا انزل من الدرج سمعت صوت محمد اخوه ..
رجعت لبست شال و نزلت ..
باوعلي بتعجب ..
سلمت عليهم باركولي ..
همين شال فلوس انطاني ..
نفس الشئ راساً انطيتهم اله ..
زوجته اسمها رغد تصير اخت مصطفى ابن عمنا ..
حبابه و طيوبه و عنده ولد واحد بعده بالگماط اسمه عادل ..
اخذته منه شميته ..
اوي فدوة يخبل ..
ربي يحفظه الكم ..
تسلميلي ..
ربي يسعدچ ..
اتغدينه و چانت اكو نظرات محلوة ابد بيني و بين مهند و استفزاز بالكلام كلها انتبهت علينا ..
كملنه غده ردت اساعدهم بشئ ..
رغم ايدي بالگوة احركها ..
بس مقبلوا عود عروسة ..
مشيت على الكاونتر ..
انتبهت عليهم وين ضمو الخواشيگ و السچاچين ..
فتحت المجر اخذت سچينه صغيرة و قوية منه ..
صعدت بدون ما اگول الـ مهند ..
شوية اندگت باب غرفتي ..
چنت متمددة عدلت نفسي ..
تفضل ..
دخلت رغد ..
هلا حبيبتي تفضلي ..
اني اسفه دخلت عليچ ..
بس سالت مهند عليچ و گال ما الها خلگ ..
الله يخليچ لا هسه احسن ..
و الله مهند خوش ولد ..
بس يمكن مو زين وياچ لان انغصب على زواجج ..
هههه و الله غريبة ..
كلامكم عجيب شلون ولد يغصبوه ..
حبيبتي احنه كلنه متربين على طاعة اهلنا ..
نعتبر ازعاجهم يدخلنه النار ..
و اذا غضبناهم ننطرد من رحمة الله و رحمتهم علينه ..
بالتالي تردالنه باولادنه ..
نزلت راسي و اني اسمعها ..
عمي گله غيرها متزوج ابد ..
على چثتي ادخل غيرها للبيت ..
رفعت راسي عليها باستغراب ..
ليش مهند چان يريد وحدة معينه ؟
هااا لا مو هيچ بس هو يگله يعتبرچ مثل خواته ..
بعدها مهند طلع من البيت راح البيت جده ..
عمي تعب من مهند ما رادج ..
وگع تخربط و وصل للموت ..
تدرين شنو وصى ؟
لا ما ادري ..
گال تگولوله تزوج خيال و اذا متزوجتها بگبري ما ارضى عليك ..
و تالي من عرف مهند رجع و قرر يتزوجج ..
و ها هيه ..
تحمليه شوية لحد ما ينسى ..
شينسه ؟
قصدي ينسه قهره من ابوه ..
اي صح ..
الله كريم ..
گامت تقربت عليه باستني : الله يسعدكم ..
تمددت و نمت محسيت على روحي ..
فزيت على عيطه ..
اه هاي شنو ؟
فتحت عيني و گعدت راساً ..
هاي شبيك ؟
شخاله جوه المخده ؟
دفعت نفسي و گعدت على المخده ..
وخري ؟
ما ما اوخر ..
دفعني قوي ردت اوگع من الفراش ..
رفع المخده شاف السچينه ..
هاي شسوي السچينه جوه المخده ؟
حچاها بعصبية و صوت عالي ..
ما اريدك تتقربلي ..
اوكي ما اتقربلچ ..
السچينه شعليها ؟
حتى اذا تتقربلي اطلعها و اضرب نفسي ..
گام يصفگ بيده ..
لا حول و لا قوة الا بالله ..
اندار عليه ..
لچ كل عقلچ اجي اتقرب عليچ و انتِ متريديني ؟
شنو قلت بنات ..
وچ مكومات و الله ..
احترم نفسك ..
اني اختلف عن غيري ..
ليش يابه شعرچ ذهب و خصر الزنبور ..
و طول الفارع و عيون الغزلان ..
اني مو كل الي الي گلتهم ..
بس اني مقتنعه بشكلي ..
گام نزل من الچرباية ..
تحلمين اتقربلچ ..
لو ينطوني وزنچ ذهب ما اريدچ ..
الي بينه ورقة محكمة و بس ..
و يجي يوم اسوي غيرها ..
يا ريت تكون گد كلمتك و تسويها ..
اتقرب عليه دفعني على الحايط ..
هسه تشوفين اسويها لو لا ..
طلع و سد الباب قوي الجام گام يهتز ..
بچيت على حظي المصخم ..
يا رب يا رب يا رب ..
ارحم بحالي ..
مرت الايام و الاسابيع و احنه بحالة حرب سوه ..
بالغرفة و گدام الكل ..
يومية واحد گاعد ويانه و ينطينه محاضرة ..
بدو اهلي و اهله يسالون على الاطفال ..
انگلهم مدا يصير ..
يا الهترى راح اصمد بوجه الي ديصير بيه ..
حبقه خافيه شوگي و لهفتي ال ايهم ..
بعدها گمت انتبه مهند تغير ..
بشوش و يضحك و فرحان ..
و ما أهمه ابد ..
يلگه لبسه وصخ يلبس غيره ..
ما مكويه قمصانه يروح يكوي الي يعجبه ..
يخابر هواية بالتلفون ..
يگعد يصفن ..
يسمع اغاني رومانسيه ..
فهمت بده يحب ..
بديت انقهر على حالي ..
و فرحانه لان بديت اخلص منه ..
دا اعيش حالتين متناقضة بين قلبي و ما يهواه و عقلي و ما يريده ..
كلش تاذي شغلة انو اسوي نفسي ما ادري و ميهمني ..
و قلبي يوجعني و محد حاسس بيه ..
احس قلبي گلاص گزاز ما گام يهمني من يكسره متقصد لو ميدري لو حتى اني السبب و خليته يكسره ..

فالقصة عذاب يشوبه فرح مجنون